احبابنا اليوم نوصل وياكم الى نهاية المطاف مع ابطال التائهين باروقة الحياة بماضيها وحاضرها بالقصه التي ابدعت اختكم الكاتبه #nuha-d-h في تصويرها وسردها لتفوز بموقع الوتباد بالمرتبه الاولى بالقصص العاطفيه في قصتكم
#تايهة_بين_اروقة_الماضي
اتمنى لكم قراءة ممتعة مع البارت الاخير الجزء
#Hoda
#تائهة_بين_اروقة_الماضي
#بقلم_الكاتبة_nuha-d-h
تحية طيبة مني اليكم واعتذر عن التأخير لان اليوم البارت الاخير وصار كلش طويل
🌷🌷🌷🌷🌷🌷🌷🌹🌷🌹🌹🌹🌹
ريام
سمعت عياط وصياح مصدره كان ضاري ورفاهشفت ميس وخالة حليمة كامو يشوفون شصار
واني كمت وراهم نزل علينا ضاري واعصابه نار كبرة ولازم رفاه من زندها وجاي ينزلها وياه عالدرجة حيل جانت تبجي وخشمها وخدودها حمر الظاهر ضاربها راشدي
حليمة.. يمة ضاري شبيكم شصاير ياستار
ضاري..سألي بنت اخوج وهي تحجيلج
وين نقالي
حليمة .. يمة شجاكم يا ستار والله محسودين اشو اخوكم الجبير طلع الشر متربع براسه ويريد بس يتعارك ومشاكل هو ومرته
وضرار طلع ضايج وكالب الجهرة وهم ما ادري شجاه
ونوب انت تجي تجمل ضيمي فوك القهر العندي
وتتعارك وية مريتك
ضاري.. يمة انا ما متعافي وادور مشاكل بس
افعال بنات اخوج تنطق الصخر
انتبهت عليهم دخلو كلهم لغرفة بيبي خاجية ودخلو وسدو الباب وراهم رحت مشيت على اطراف اصابيعي واتلفت اخاف واحد يشوفني وحطيت اذاني عالباب اتسمع لهم
حليمة.. يا ولك ضاري ما جاي احجي وياك عليمن راح تتصل جا هسة غير يفهمني شراح يسوي
ضاري.. الو هلا بوية اريدك هسة تجي وتجيب ضرغام وياك للبيت
.. لا مصاير الشي جدتي ما بيها شي تجي للبيت
وانا احجيلك الصاير ضروري وياك ضرغام
سد النقال واجتي رنا تحجي وتصيح
رنا .. ولك انت منو حتى تمد ايدك عليها هَـا ولك
اليوم الا اخابر ابوي واخليه يحرك البيت على راسك
حليمة .. رنيوة انتي مالج دخل رجال ومرته محد طلب منج تدخلين بينهم
رنا.. لا والله اشوفه يمد ايدة على اختي وترديني اسكت
حليمة.. ولج اليوم من وراج اتصلت على اخوي فاضل وحجيتله عن كل سوالفج وكلتله شلون مديتي اللسان علية وعلى الحجية وتعيرني بعقم ضرغام
رنا.. عادي حتى لو حجيتله اني محجيت شي جذب يعني تردين تهجمين بيتي وتتبلون علية وضرغام يمد ايدة علية ويكتلني وترديني اسكتله ترة اني هم بشر اصلا بابا اذا عرف بضرغام ضاربني صدكي يحرك البيت على راسه وهسة صرنا اثتين اني واختي اتعديتو علينا وما سويتو لبابا اي حساب عود هاي احنا بنات اخوج وهشكل تعاملينا
حليمة.. ولج انتي الحجي ضايع وياج والله السالفة زادت عن حدها اذا ما البس عباتي واروح لبيت اخوي واخليه يجي يحطلج حل لهذا السانج ما اكون حليمة
الحجية خاجية .. اول مرة ادري بحياتج تعرفين تحجي هاي بنت اخوج فايتها دك بالحزام
همة يحجون واني طاح حظي من الوكفة ورة الباب
كمت احوم لان صارت هواي مواقف كدامي واريد اعرف بيهم كلهم
هو اني من غير كلشي الفضول راح يدمرني
اويد اعرف هسة ضرغام شحجة وية هيام
ونوب طلعولي ضاري ومرته اخت رنا خرب هواي اكشن والله راح اطك واموت من ورة الفضول والله خطية هذا الطفل الي ببطني اتوقع من ورة الفضول راح تطلع راسه نخلة
جنت مندمجة وبعدني على نفس وضعي اتسمع ما حسيت الا على واحد لزمني من طرف الدشداشة غمضت بعيوني وحسيت خدودي صارت حمر من الفشلة جان شكلي مثل حرامي لازمينه متلبس بالجرم المشهود خرب ارتبكت ومعرفت شحجي
.. اااااااا ضرار اترك الدشداشة شنو لازمني عبالك حرامية
ضرار.. لج هاي رابع مرة الزمج تتسمعين شنو سالفتج كل مرة اكول صدفة لا بس الظاهر الموضوع اكبر من هيج يمكن عندج مرض الحشرية يالله شو امشي كدامي وعوفي الناس بحالهم واهتمي لضرارج احسنلج من هاي السوالف التعبانة خرب زين انتي ما تستحين احد يلزمج غيري
.. اني ممسوية شي
.. شنو ممسوية شي وانتي تسترقين السمع جنج واحد حرامي ترة عيب
.. لا هذا موعيب هذا مو استراق السمع هذا يسمونه التعقب يعني طبعي اذا اشوف مصيبة ما اعوفها الا اعرف شنو اصلها وشنو سببها يعني اكعد اتعقب وانقب واتحقق
يباوع علية عبالك يباوع لوحدة مخبلة
.. هَـا لعد شعبالك هاي هواية عندي من واني صغيرة
.. والله انتي مو عاقلة لا عقلج فاصل كلش والله ورطني بيج
لزم ايدي واخذني وياه جنت امشي واتلفت
واباوع على باب غرفة بيبي واني حاصرتني البجية
.. لا عفية ضرار وين ماخذني انت ما تعرف شنو الصاير
جان يمشي ويصعدني وياه وهو يحجي
.. ليش هو شنو الصاير وصدك وين ابوي ضرغام وجدتي
.. هو انت لو بس شوية عايفني اسمع جان عرفت الصاير وفهمتك
دخلني للغرفة وسد الباب ودارني عليه
.. لج عوفج منهم وتعالي كليلي ريمتي شبيها وياي خلتني اطلع اليوم زعلان من البيت حتى ما كلفتي روحج تسألني ليش طنكرت عليج
حط راسه بركبتي وهو يحجي بصوت هامس
.. لج ريمة بعد ممنوع تكليلي تعبانة وما بية حيل والله اموتج
عقجت وجهي وبعدت راسي عنة
..ضرار اني مو كلت بعد لا تحط من هاي الريحة والله تلعب نفسي منها
رجع سحبني عليه ونزل راسها على ركبتي وكعد يفتح بدكم الثوببهمس
..لج ريمة هاي من شوكت صرتي تضوجين من عطري
جان يحجي ويتحرك بأتجاه السرير جانت ايديه تحوم على جسمي.
مكدرت اتحمل ريحة العطر الي كان حاطها كلبت معدتي دفعته من صدره وبعدته عني
.. ضرار عفية ابتعد والله انكلبت معدتي من ورة هذا العطر عفية روح بدل ملابسك او اسبح
عقد حواجبه بشك
.. لا ريام لهنا وكافي صدك مصختيها ما تكليلي انتي شنو فلمج اشوصايرة كلما اقترب تصديني منج معقولة كاعدة تعاقبني وتحاسبيني علمود اخوي ضرغام ومشاكله وية اختج
ريام.. ضرار لحظة انت منين تجيب هذا الحجي ليش تحجي هشكل
ضرار.. شنو منين اجيب الحجي وانتي من يوم مشكلة هيام وضرغام وانت تتهربين مني وبعدتيني عنج احس بيج صايرة تضوجين مني وما تطيقيني معقولة تخلين مشاكل اختج واخوي تأثر علينا وعلى حياتنا
هو يججي واني معدتي انعقدت واني اباوع عليه وهو بعده يحجي
.. ورغم جنت زعلان منج بس اتعوذت من الشيطان ورجعت اكول ميخالف خطية حقها اختها ومقهورة عليهاوهسة انا يمج اريد اشم حضنج بس انتي قابلتيني للمرة الثانية بالصد لهنا وكافي على شنو الذلة ترة البستان بي هواي ورود
.. ضرار لتحجي وياي هشكل ..الحجي مو بس الك انطيني مجال احجي
مكدرت اكمل كلامي احس. بروحي. اجتي تطلع
تركته وركضت للحمام وصرت اتقيء احس بروحي راح اموت اجة ودخل وراي للحمام اقترب مني وسندني وغسل وجهي
مكدرت ابعده عني لان جنت احس بروحي ضعيفة لاحول ولا قوة انتبهت عليه انخبص خبص متفاجيء
ضرار بخوف.. ريمة احجي وياي شبيج من شنو موجوعة
همست بتعب.. ضرار ابتعد عني اني ما اريدك وروح للبستان اخذلك وردة مناك وخليها تفيدك
ضرار.. لا تخليني اسب حتى ابو ضرار بالله شو كومي خليني اخذج للمستشفى انتي وضعج ما عاجبني ووجهج اصفر ..سحبني والتفت علية كليلي وين حاطة عباتج
.. ضرار ما يحتاج اني ما بية شي اني مو مريضة اني حامل
اني جنت اتمنى اسويها الك مفاجئة واحتفل وياك بالخبر واتفقت اني وميس اجهز الغرفة بس طلعت انت ما تستاهل لحظة وحدة تشغل بيها تفكيري من اول شدة انت كبل صرت تتوعد وتهدد
باوعت عليه وكف كبالي عاجز عن الكلام واللمعة بعيونه جان هناك اكو ظلال دموع ترفض النزول كبرياء الرجل و لمحة الفخر بعيونه
ضرار.. عيدي شنو كلتي
همست واني ابجي.. اني حامل ومع الاسف انت بعد كم شهر راح تصير اب والله متستاهل
جنت احجي وابجي
بفرحة.. لج ريمة لتبجين من احتركت عشيرة ضرار ..لج انا مخبل وما على المجنون من حرج ..لتاخذين بكلامي
انتبهت عليه سحبني من ايدي وكعدني عالسرير
وكعد عالارض كبالي رفع راسه ومد ايده ومسح دموعي .. لج والله وعيونج كلامي بساعة عصبية ماعليج مني ان شاء الله ياربي كون كص للساني ويصير فد نفرين كباب لكرشج
ابتسمت على كلامه
..من رحت انا وعشيرتي فدوة لهاي الضحكة
ااااخ بوية راضي لج انا شعندي غيرج احبل اجيب
.. جذاب بس حجي والله بس اوكع مريضة انت اول المحتجين علية
.. اسم الله عليج بية ولا بيج انت ام الغالي ام راضي
.. احلف يا شيخ لاتكول راح تسمي ابنا راضي
.. اي شنو بيها يعني انا بعد كم شهر يصيحوني
ابو راضي وانتي يصيحولج ام راضي
.. لاااااااا عفية لااااااااا والله ما جاي اتخيل روحي
ينادوني ام راضي خرب احس بروحي عبالك عجوز واكعة سنونها لا عفية ضرار غير الاسم
.. ههههههه هسة احنا جاي نتعارك عالسمج البشط ..هسة هو خلي يجي سالم عسى ما اسميه جبار هم قابلين
نسيت نفسي بحضنه وضليت كاعدة بحضنه فرحان وهو يهمسلي
فجاءة سمعنا صوت خالو راضي يحجي بصوت عالي وعصبي كمزت من مكاني
وضرار وكف راح على قميصه لبسه وكعد يدكم بي لبست شالي
.. اوكفي لحظة وين رايحة تركضين ام الفضول الحشرية على كيفج امشي ترة انتي حامل
هيام
اتصلت علية بيبي خاجية ووصتني ان ما اتنازل وارجع وياه لو شما يسوي اجتي عهود
.. هيام خالو راضي وضرغام جوة يردونج
.. عهود علاوي وين
.. الكلب شاف ابوه وراح لحضنه ولاجنك يعرفنا لبست شالي ونزلت جوة وية عهود
دخلت عليهم بالاستقبال وسلمت ورحت لعند خالو كام من مكانه حظني وباسني من راسي
راضي.. هلا بهيومة ام الغالي شخبارج بشريني
حفيدي الجاي بالطريق شلونه وياج خو ما متعبج
ابسمت .. الحمدلله صحتي زينة خصوصا أخر فترة
والله بيت خالة هيفاء كايمين بية بالصلوات
راضي.. كلمة حق تنكال ماشاء الله صاريرة جنج وردة ولايك عليج الحمل
انتبهت على حركة ضرغام العصبية اسمعه كل ساعة يحم حم ويجلي صوته يريد يلفت انتباهي
غلست عليه متعمدة
ضرغام .. شنو هيام احنا كفار وحرام تسلمين علينا لو نسيتي رجلج جان مسافر وتتحمدليه عالسلامة
باوعت عليه وكلبي نهض
.. اسفة ما انتبهت عليك
شفته شلون رص سنونه بغيض انتبهت عليه فتح حلكه راد يحجي بس خالو قاطعه
راضي.. لحظة بوية ضرغام خليني انا احجي ادري بيك انت هسة صاير نار اكعد واسمع كلامي انت ومريتك
التفت علية
.. شوفي بوية هيام رجلج حلل وطلع ما بي شي والحمدلله وجانت نيته بهاي سفرته حتى يطمن كلبه ويكطع الشك باليقين وما راد يحجي اي كلمة بالموضوع
حتى ما يظلمج ويستعجل بحكمه لان مثلما تعرفين هو يعرف بروحه عقيم فصعبة عليه بليلة وضحاها تجي مرته وتكله انا حامل وفوكاها الظروف اتعاونت لحتى الشيطان يوسوله فهو يا بوي جاي ويريد يستسمح منج يرجعج على بيته
ضرغام.. بوية على شنو استسمح منها ترة انا ما سويت شي ولا مسيتها بحجاية كلما بالموضوع جان كلبي مامتطمن سافرت واتطمنت خو ما تكعدون تحاسبوني على الي بگلبي ترة والله سالفتكم ماتتسولف وسويتو من الحبة كبة
التفت علية بكل ثقة .. يالله هيام كومي حظري جنطتج خلي نرجع للبيت
راضي.. والله ما تنلام
وياك جدتك خاجية بيوم تتحلف بيك وتتوعدلك اثاري انت هواي مستهين بالسالفة شوف بوية ضرغام ما دامك تشوف انت ما مسوي شي جا تعال كابلني وخلي يصير الحجي طك بطك
انا ابوها وانا اكلك مالك مرة عدنا واعلى ما بخيلك اركبه تطعن شرف بتنا وتشكك بي وتالي تجي تكول انا مامسوي شي لا لهنا وحدك خليني اعلمك بالحجي ترة الاتهام وكسر الخواطر مو بس بالحجي لا مرات الافعال تغني عن الف كلمة وانت بفعلك هذا وية بتنا شككت بيها وطعنتها بشرفها وهذا الشي ما يصرفلنا
ضرغام.. بوية شبيك كمت علية ترة مو هيجي الحجي انا مريتي اريدها وما اتنازل عنها حتى لو غلطان بحقها ترجع لبيتي وانا اكعد اراضيها بطريقتي بس انت وجدتي خاجية طلعو منها وخلوني انا ومرتي نحل مشاكلنا لوحدنا
التفت علية
.. يالله هيام كومي لبسي عباتج وجنطتج مو لازم تجيبيها. انا بعدين اجي اخذها
كام وكف وشال علاوي ظليت كاعدة بمكاني وحجيت بصوت متماسك
.. ضرغام اني ما ارجع وياك وشنو يكولون خالو وبيبي خاجية اني وياهم
انتبهت عليه اتسعت عيونه بصدمة من كلامي عبالك جان مالي ايده ان اني راح اييده بكلشي
.. هيام تعرفين شنو معنى هذا كلامج
.. اي اعرفه معناها انت بطريق واني بطريق
صك على سنونه وقبض ايده بغضب
.. لج هيام انتي مو بكيفج ترجعين وياي غصب عنج ماكو اخذ علي من عندج وتحلمين اخليج تشوفينه
باوعت عليه ببرود.. مو بيدك ما تعترف بغلطك
تهين وتطعن وتتهمني بشرفي وتريدني ارجع وياك بكل بساطة لا وانت واثق من نفسك ما غلطان بحقي
تريد ابنك اخذه عادي هاي المرة ما راح تكدر تلزمني من ايدي التوجعني واذا تريد بعد حتى الي ببطني من اجيبه اخذه الك ما اريده لان انت ابوه واكيد يشبهك شمحصله منك حتى احصل منهم
ضرغام.. هيام انتي ما تلوين ايدي بهذا كلامج
بس صدكي وامني بالله الا اخليج ترجعين برجليج لبيتي ولحضني
.. ما تكدر تغصبني ارجعلك
.. لا ما راح اغصبج تدرين ليش لان اعرف كلش زين ..بيتج حضن ضرغام مثلما بيتي حضنج
درت وجهي عنه ما اريد اضعف
ضرغام.. يالله بوية كوم والا اكلك خليك يمها لان صرت علية اليوم جلادي وبيدك تنفذ حكم الاعدام
الي صدر من جدتي خاجية والله زعلي عليكم ثكيل وانا طالع وراح اخذ علاوي
باوع علية وشافني ما اتحركت من مكاني مثلما حان يتصور اني راح انهار اذا اخذ ابني مني ما يدري بيبي خاجية محذرتني من طلعته هاي ومحسبة حسابها
رجع مرة ثانية عاد الكلام .. انا طالع وماخذ علاوي وياي
ما رديت
ضرغام بغضب.. انت يا حايط انا طالع وعلاوي وياي
ما ادري ليش حصرتني الضحكة من كال حايط واتذكرت ايامي وياه كوة سيطرت ما ابين ضحكتي
بس يالله شلون جان شايط والنار تجدح ادري بي لوما خالو واكف بوجهه جان اني هسة مشيولة ومشمورة باقرب سيارة وماخذتي للبيت عنده هناك
وادري بي راح يتبع الاسلوب الي واثق منه ياخذ مني استجابة واضعف كدامه الي هو حضنه
كام واخذ وياه علاوي الي فرحان طالع وية ابوه بالسيارة والشارع
دك نقال خالو راضي
.. هَـا بوية ضاري
خير شبيك شكو
.. شنو ارجع للبيت واجيب ضرغام وياي ولك وكعت كلبي جدتك خاجية صار عليها شي؟؟؟
جا شنو شبيك تجوعر وتصيح مثل السيارة العطلانة يالله احنا جايين للبيت
شنو وخالك فاضل ليش اتصل عليه واجيبه
والله حيرتني ميخالف عودك اتصل على خالك فاضل واكله يجي على بيتنا
...........................
رجعت للبيت ووياي علاوي وانا اتأمل تتصل وتكول تعالو اخذوني ما اكدر بعد اريد ابني
بس مع الاسف هيام هالمرة كلبها حجر وحتى فراك ابنها ما راح يغير قرارها
دخلت للبيت وانا كاره حتى روحي والدنيا ضايكة بعيني ياناس رحمو بحالي من ايدي راح الغالي
اريد اعرف همة ليش هيج يسوون وياي انا بالذات
دخلت وجان الكل كاعدين بالصالة وشفت خالي فاضل كاعد بالصالة
وانتبهت لرفاه كاعدة على صفحة تبجي وعيونها حمر عقدت حواجبي دخلت امي وبيدها صينية الجاي تريد تقدم لخالي جان الجو مشحون بس خالو فاضل جان الطبيعي الوحيد بيهم شافنا كام وسلم علينا
فاضل.. كول خوية راضي شعندك داز علية شنو الشغلة المهمة الي تريدني بيها
راضي.. والله ياخوي علمي من علمك انا هم مثلك اجهل الموضوع
التفت على ضاري.. كول بوية ضاري شنو صاير
ضاري .. شوف بوية وانت يا خالي اسمعني
اليوم رفاه بنتك اجتني وخبرتني بمصيبة بنتك رنا
فاضل.. وشبيها بنتي رنا ورفاه شعندها على رنا وتحجيلك ليش انا وين رحت عنهم مو انا ابوها واولى تجيلي وتخبرني
ضاري.. تدري ليش هي اجتني الي وخبرتني انا بالذات لان الموضوع بي هجمان بيوت ويخص اخوي ضرغام
بوية رنا مرت ضرغام طلعت عندها علة بالرحم
تمنعها من الحمل وهاي العلة صارت بيها من طرحت ابنها
نهض خالي بأعتراض .. مستحيل ماكو هيج حجي
التفت على رفاه.. احجيله عن اختج وسرها
رفاه.. بابا رنا عندها مشكلة بالرحم اتعرضتلها باثناء الاجهاض وامي تعرف بالموضوع وحتى الدكتورة كالت خلو ببالكم بعد ما يصير عندها حمل كلة هذا صار بسبب الطفل جان جبير وهي بشهر الخامس
فاضل.. اي اذكر بيومها اختج وصلت للموت
بس ليش انا ماعندي علم بهيج موضوع مهم
.. ماما كالت ما يحتاج ابوج يعرف هاي شغلة نسوان
.. وليش يالله هسة حجيتي وفتحتي حلكج وين جنتي
.. بابا اني ما جنت اعرف برنا ما حاجية وية ضرغام واتفاجئت مثلك من عرفت بأختي مغلسة عليهم
وما مخبرة ضرغام هي بوكتها كالتلي اني كلت لضرغام وكلي انا اهم شي عندي انتي ما اريد اطفال يشغلوني عنج وشارط عليها ان ما تحجي لاهله شي
يعني على اساس هو كايللها خلي الصوج بية هو انا اول وتالي ما يصيرعندي خلفة
مو الا تكولين لاهلي
واتزوجت وعرفت الحقيقة بمرور الايام ان ضرغام ما عنده علم رحت لعندها وكلتلها ليش ضرغام ماعنده علم بعلتها
اتوسلتلي وكالت لاتهجمين بيتي والله اموت ترة اني ما اريد شي بس ابقى عند زوجي وبحضنه وانتي شوفت عينج ضرغام يموت علية
اباوع لخالي وجهه كام ينطي الوان من الغضب وعيونه جدحت نار كام على حيله وكال .. صيحولي رنا بسرعة خلي تلبس عبايتها وتجي وياي
دار وجهه على ابوي. ما اعرف وين اودي وجهي من عندكم
وانا جاي بكل ضني الموضوع نفسه الي اتصلت عليه حليمة وكالت رنا تتجاوز وتعيرها بعقم ضرغام
بكل ضني انتو زعلانين وتردون اادبها الكم بس اثاري الطامة الكبرى بتي عاقر
نزلت رنا وعيونها تتكلب بخوف تباوع لأبوها وترجع تباوعلي تطلب مني اخلصها من ابوها
ھٍَھٍُھَھٍ بس وين هيهات مو كل مرة تسلم الجرة اوكع بنفس الغلطة واصدك حيلتها
درت وجهي
وكفت كدام ابوها وعيونها تصب دم
.. بابا والله همة يتبلون علية لتصدكهم
اجاها راشدي من ابوها
.. انجبي ولج عار هاي اختج منج وبيج كالت محد اتبلى عليج ولج اثاري ما عرفت اربيج
لزمها من شعرها وصار الصياح والعياط ونزل ضرار و ريام مفزوعين شنو شصاير وابوي كدر يفكها من جوة ايد خالي
راضي.. كول يالله يارجال مو هيج الحجي عاقبها بس مو بالضرب ادري غلطها ما ينسكت عنه
بس تبقى مرة وضعيفة ولاحول ولاقوة اخذها عندك احبسها احرمها من رضاتك بس ياخوي مو تضربها
فاضل . ولك خوية هدني عليها بعدة كلبي عليها يفور ما ارتاح الا احط راسها وادوسه بالكاع هالعار
صاح بصوت عالي
.. رفاه امشي روحي جيبي عباية اختج
ركضت رفاه تجيب العباية
ضرغام
جان الخبر الي مثل الصدمة وصرت اعاني بدل الجرح جرحين جرح اتهامي لهيام وجرح حكمي عليها وساويتها وية رنا الما تسوى نعال هيام
جابت العباية ولبست اختها وخالي اجة يترخص بس انا اتخذت قراري المابي رجعة
ضرغام.. خالي قبل لا تطلع عن اذنك اريد احط النقط عالحروف حتى ما يصير خلاف بينا وبينك بنت ما عادت تصلح الي مرة لان رنا مو بس ضمت عني انها عاقر وما تحبل لا هي اتبلت على مرتي هيام وطعنتها بشرفها
وهي تدري بروحها عاقر وما يعدي علينا يوم اذا ما ذكرتني انا عقيم هي لو جانت محترمة نفسها وكاعدة وساكتة وكافية خيرها شرها جان ما اكسرها واطلكها بس مع الاسف ما عندها شي يمي يشفعلها يخليني ابقيها على ذمتي
فخالي انا اعتذر بنتك تروح وياك وتجيها ورقة طلاكها وراها وان شاء الله احنة اهل وانت خالي وتبقى تاج راسي
فاضل.. يسلم راسك يابو علي وانت ما طلبت غير حقك والصوج بينا
اخذ بنته وطلع موطي راسه ويكسر الخاطر
خالي فاضل ما يستاهل الي صار بي بس الله كاتبها عليه هاي بنته حظه هيج
الحجية خاجية.. قدر الله وما شاء فعل كلشي مكتوب والمكتوب مامنه مهروب
اي وانت يالفحل صفيت ولا وحدة من نسوانك خطية اثنينهن عافلك البيت ومشن تستاهل وابو زايد الي يصير بيك
ضرغام.. خليج على عنادج انتي وبنت بنتج وانا ابقا مثل ما انا جبل ما يهزني ريح
((((((((((((((((())))))))))
اجة الليل وجان الجبل يهتز
ضرغام
شايل ابني على جتافي وهو يبجي
.. بوية علاوي شبيك شجاك انت زلمة عيب تبجي على امك
جنت اروح وارجع بي بالغرفة اريدة بس يسكت
دخلت امي علينا
اجة الليل وجان الجبل يهتز
ضرغام
شايل ابني على جتافي وهو يبجي
.. بوية علاوي شبيك شجاك انت زلمة عيب تبجي على امك
جنت اروح وارجع بي بالغرفة اريدة بس يسكت
دخلت امي علينا
حليمة.. يمة انطيني شبي الولد ولك يمة بس لا يبجي يريد امه
اخذته مني .. تعال يمة سودة علية تريد امك
ضرغام.. يمة الله يرضى عليج حاولي تسكتينه ترة يحلم واوديه لأمه شنو انا من تالي وكت يجي طفل صغير ويخليني اكسر حجايتي
حليمة.. اتعوذ من ابليس يا يمة جا هي مو كلشي بالعركة والعناد والمزامط انت هم شوية هدي اللعب
(((((((()))))))))
هيام
اريد انام ما اكدر حضني مابي ابني خانكتني العبرة صرت اتكلب بالفراش مثل المخبلة كل ساعة اكوم على عباتي اريد البسها واخلي ايمن يوديني لبيت خالو راضي بس اتذكر كلام بيبي وارجع اتحملي هيام اتحملي
صرت اروح وارجع على عباتي بالاخير بجيت بأستسلام ما كدرت لزمت العباية ولبستها ونزلت جانت خالتي هيفاء وزوجها كاعدين بعدهم ما نايمين
.. خالة عفية خلي ايمن ياخذني لبيت خالو راضي
هيفاء.. ياستار شصاير ابنج علي بي شي
احجي وابجي.. خالة مو بيدي استسلم ما اكدر اريد ابني
جنت احجي وياها وسمعنا صوت الجرس
راح زوج خالتي يفتح الباب وخالة هيفاء اخذتني وكعدتني يمها وكعدت تواسيني
.. الله يسامحج وكعتي كلبي عبالي الولد بي شي
دخل زوج خالتي ابو ايمن وراه ضرغام
وشايل علاوي بيد وعلاليك بالايد الثانية
جان شكل ضرغام مهوش وشعره مكوش وحالته حالة وعيونه حمر يباوع علية بمكابرة وعيونه بيهن لوم وعتب ويحجي وية خالتي هيفاء
.. عمة هاج اخذي لزمي هذا الطحش ما يكدر ينام الا بحضن امه طلع الزلمة ابن امه
وماله امان هم خلة بية ويريد يتركني
عادي اصلاً انا اتعودت على احبابي يبيعوني برخص
ودلالي (گلبي) شاريهم (مشتريهم)
عفية عليك ياكلب شجم دوب يهجرك حبيبك ويخلي بيك
بس شكلك ابد ما تـُوب وعاجبك تبقى عايش بلكي يرجعلك ويحيك
باوعت عليها عيونها حمر ولابسة عبايتها
انخمط كلبي بكل ضني يوجعها شي اخاف صاير شي على حملها
سألت عمتي.. عمة شبيها تبجي يوجعها شي
هيفاء.. لا خطية كعدت حلمانة بكابوس وتبجي
.. ليش لابسة عبايتها لايكون تنام وهي بعبايتها
هيام .. لا جنت اريد ايمن ياخذني يفرني عالكورنيش
وجنت ابجي اتوسل لخالة حتى تقنعه يطلعني
جنت احجي بدلع وببرود حتى اقهره مثلما قهرني واخذابني مني
ضرغام بغيض.. من طلعت روحج ان شاء الله
ولج والله اكسر رجليج اذا سمعت بيج طالعة من وراي وبدون علمي اذا عاجبج تطلعين مختنكة انا موجود ترة انا رجلج مو رجل كرسي وتتعديني فاهمة
جنت احس بي يطلع كل كلمة من كل كلبه ادري بي مقهور لان اني كدامه وما يكدر يطولني وخلي هشكل لحد ما يعترف بخطاءه ويجي يعتذر عودك بوكتها افكر ارجعله لو لا
(((((((((((((((()))))))))))))))
ثالث يوم الصبح
كعدت وانا دين ما باقي براسي لبست ملابس الشغل
ونزلت لكيت الكل كاعد يتريك كعدت كبال جدتي وحجيت بصوت جزع
..جدة انا اريد مرتي شلون بالله هذا حكميش حتى الله ما يرضى بالكاعد تسوينة بية
الحجية خاجية.. خير شنو سالفتك كل يوم كاعدلي من الصبح جنك ديج هراتي تحجيلي هاي الكلمتين وتطك راسك بالحايط وتطلع للشغل
شتريد من عدنا ترة دوختنا بصياحك
ضرغام.. جا جدة ما حن كلبج علية
اريد مرتي يا ناس ياعالم اريد مريتي
.. يا يا يا فلك طرك هذا الولد تسودن
.. اي وشنو الجديد انت كل يوم نازل علما تصيح اريد مرتي ما اتغيرت بعدك مثلما انت راسك يابس ما اشوف
صاير بيك شي
.. لا جدة انا اعترف بروحي انا غلطان
وهاي كدامج وكدام الكل اروح لهيام واعتذر منها مو ما عندي كرامة بس بعدها عني علمني شسوي بكرامتي وانا ميت بدونها
هسة شنو كلتي اكوم اروح اجيبها من بيت عمتي
الحجية خاجية .. ولك بعدك يتربات ايدي جبل ما يهزك ريح وهاي الكلمتين الي هسة حجيتهم يمي ما يوكلن خبز جا عبالك انا ذيج العوبة هيام وتضحك عليها بهاي الكلمتين
لا يضرغام جنك ما تعرف خاجية ولك انا طبيت بديوان وسكتت العكل وانا بهاي مشهودتلي انا اريد الاعتذار مو بس كلام انا اريده كول وفعل
ضرغام.. اي علميني شنو الحل وتاليتها وياج
.. ما ينفع اعلمك اريدك انت تصير فطن وتاخذها من حلك السبع وانا حلفت وانا بنت جبار ماترجعلك الاتحفة حتى تطولها هَـا وخلي ببالك مو عبالك الحجي مسألة وقت ويخلص خلي ببالك انا ناوية بس تخلف تنطيك ابنك واطلكها منك وازوجها من خيرة الشباب مو عبالك بس انت بالدنيا وهيام ما عندها غيرك وعايشة علمودك لا جدة اصحى
وراجع نفسك وانتبه شوف روحك من تحجي وياي تحجي بمنة علينا جنك مسوي فضل بيوم اجيتني وكلت انا غلطان روح جدة روح بعدك ما اتعلمت درسك عدل
((((((((()))))))
هيام
مر شهر واني بييت خالة هيفاء
من بعد ما طلع ضرغام من يمي بذاك اليوم هو وخالو راضي وراها اتصلت علية ريام تهلهل فرحانة حجتلي عن كل الي صار وية رنا وابوها وضرغام شلون حجة وية خاله بس اجة يوكع كلبي من كالت ضرغام راح يطلك رنا غير اجة كلبي يوكف من الفرحة كعدت بلحظتها وصرت ابجي ما مصدكة الي صار فدوة رحتلك ربي ما تكسر بعبدك
بس رغم هذا كلة خبر طلاك ضرغام ورنا ما غير من قراري شي لان اني مشكلتي الاساسية مو رنا لا مشكلتي ضرغام وكسرة كلبي بيوم طعني وشكك بية
لكن
مرت الايام و ضرغام الي صار مخيم عند بيت خالة هيفاء كل يوم
عهود.. اجة ضرغام يريدج كاعد بالاستقبال
لبست شالي ونزلت اشوفه شنو يريد
بكل ضني يحجي وياي بشغلة تخص علاوي
اي لان اني هم صعبت عليه الامور صرت انطيهم علاوي يودنه لابوه وما اخلي يشوفني
دكيت الباب ودخلت شفته كاعد لوحدة بالاستقال وكاعد يدخن جيكارة شافني طفة الجيكارة وكام من مكانه واجة يمشي بأتجاهي على كيف وهو يحجي
.. اي ست هيام وتاليتها وياج انتي وبيبتج
ليوين تردن توصلن مو جنكم زودتوها
انتبهت عليه سد الباب وسحب الكرسي وخله جوة اليدة
سألته بريبة
.. ضرغام شنو دتسوي
التفت علية واقترب مني
.. ما اريد اسوي شي بس هيج اشتاقيت لحلالي واريدة مخنوك وكلت اخذ شمت هوى من عطرج
جان يحجي ومد ايديه وسحبني لعنده
.. لك ضرغام بعد عني لا والله اكول لبيبي عليك
قلد صوتي.. كولي لبيبي علية ما مسوي شي حرام
دنك راسه واخذ شفايفي بغضب عبالك يريد يشلعهم من مكانهم
رفع راسه .. لج هيام راح اموت اريدج
دفعني على كيف ومددني عالقنفة واقترب مني وصار فوك مني
..هيام خليني اخذج وياي لبيتنا ميت لحتى احضنج
واخذج كلج الي جان يحجي وياي
ويرفع ملابسي ويريد يراوغني وينسني نفسي بحركاته
للحظات اني نسيت نفسي بين ايديه لكن فجاءة صحيت على حالي مستحل اهدم بلحظة ضعف كل الي بنته بيبي خاجية
دفعته من صدره وكمت عدلت ملابس وايدية ترجف
.. واني ما اريد واحد طعني بشرفي
وما يسويلي حساب ترة اني مو بس فراش وحضن
همس .. كليلي شنو اليرضيج وانا اسوي
.. ما اريد اي شي منك والي انكسر ما يتصلح
شفته وكف مصدوم من ردي وياه
.. يعني افتهم ان هذا اخر كلام الج يعني ما بيج مجال تغيرين رأيج ونرجع سوة
.. اي ماعندي غيره هذا اخر كلام اني ما ارجع الك
انتبهت عليه اتجه للباب ووخر الكرسي بغضب والخذلان تنطق بكل حركة بي
حجة وهو منطيني ظهره قبل لا يطلع
.. هيام ديري بالج علاوي ابني واتذكريني كلما شفتيه وامانة تكولين لابني نواف الي بطنج تكليله ابوك يموت عليك واشكد يتمنى تخلص الايام حتى يشوفك
هيام انا اعترف غلطت بحقج واتندمت مو بس علمود سالفة الحمل لا انا متندم على هواي امور غلطت بيها بحقج تركني وطلع
عقدت حواجبي بشك وحيرة هذا شبي
ليش يحجي هشكل وجايني من دون الايام بلهفة وشوك هو مر الشهر ما يوم كال اريد اشوف هيام شعجب هسة جاي
صار العصر واجتي خالة حليمة وبيبي خاجية وميس وخالة رحاب وريام
جنت كلش مشتاقتلهم كعدنا نسولف ونحجي ونتبادل الاخبار وعلاوي يتكلب وخالة حليمة كل ساعة تسألني
شلونة حملج وريام صايرة بطة
.. لج عوبة شتاكلين وهشكل حليانة
ريام.. سألي خالة حليمة هي كل يوم تسوي اكل طيب واني بس اكل عبالك دجاجة تريد تسمنهة عالعيد حتى تذبحها
.. الف عافية على كلبج
حليمة.. تعالي يمنة وانا ادللج اكلج يمة ما حن گلبج على وليدي
الحجية خاجية.. خايبة حليمة احنا نخلص من وليدج تجين انتي تكعدين تدكين الناعمة يمنا
جنا نسولف ونضحك على سوالف بيبي
فجاءة دك نقال خالة حليمة
والمتصل ضاري انتبهت على خالة حليمة لطمت على وجهة
.. يمة صخام الصخمني ولك منو من اخوتك
... يبووووووي يمة ضرغام ولاضرغام
كمت مفزوعة من مكاني مثل المخبلة
وجمد الدم بوجهي اريد بس اطلع الكلام من واسألهم سمعت بيبي سبقتني وسألت حليمة
.. خايبة حليمة منو المتصوب
حليمة بصياح وصريخ وبجي
.. يمة ما معروف حجية وليدي ضرغام انخطف
ضرغام
نزلت من السيارة اركض على بيت خالو العبرة خانكتني رجيلة صارت خيوط والكلب يريد يطلع من
مكانه
هجرت من الخوفة دخلنا للبيت وضرار وجماعته الضباط بالاستقبال وضاري يروح ويرجع مثل المخبل
كل ساعة نقاله يدك
.. سمعته يكول ولكم كلشي ولا ابوي يدري
حليمة.. يمة عزة العزاج يا حليمة
الحجية وعيونها ووجها انكلب لونهم خفت عليها
.. جدة ضاري واحد بيكم يفهمنا شنو شصاير
ضاري بقهر وخوف .. جدة ضرغام انخطف
وهسة ضرار جاي يحجي وية الخاطفين حتى يتواصل وياهم شلون يسلمهم الفدية
