تائهة_بين_اروقة_الماضي
البارت ٢الجزء٣
تمنيتنا لكم جميعا بقراءة ممتعة
#Hoda
#تائهة_بين_اروقة_الماضي
#بقلم_الكاتبة_nuha-d-h
ضرغام
نهيت الاتصال وية ابوي ما اعرف شوكت يبطل من هاي سوالفه رجعت اتصلت على حمزة وانطيته التعليمات
.. الو حمزة اسمعني زين اريدك تعرفلي كلشي عن هاي الي اسمها زهراء حياتها اهلها وين بيتهم ومكان دوامها اريد اعرف كل صغيرة وكبيرة بحياتها
.. صار باشا الباجر تجي وتلكة المعلومات كلها يمك عالمكتب
.. يالله ما اوصيك ما اريد ابوي ينتبه عليك فاهم او يحس بتحركاتك اريد كلشي يتم بسكوت
.. تم باشا
دخلت للبيت ولكيت جدتي كاعدة ويمها امي
باوعت على امي انكسر خاطري عليها
متستاهل الي كاعد يسويه ابوي من وراها ولو هي صحيح اتعودت بس كل مرة تعرف بيها اشوفها تنمرد مرد من القهر اتمنى احل السالفة قبل لا توصلها المشكلة بس خالي فاضل بالسوك وشي اكيد توصلها الاخبار
باوعت لهيام تباوع لوجهي بنظرات تسائل
جنت من صدك تعبان واحتاجها يمي
.. هيام جهزيلي عشا كلش جوعان
.. صار بس انت عينك على علاوي
اباوع عليها كامت راحت للمطبخ وعيني تمشي على طولها اااخ ياطولها شلون بية وشوكت اخلص من المعاملة
الحجية خاجية.. هَـا جدة ضرغام شبيك بس تصفن شجاك شنو الحسبة الي ببالك
ضرغام.. جدة بس انتي تفهميني بدون ما احجي
كمت من مكاني ورحت ورة هيام للمطبخ
دخلت وشفتها شلون تتحرك يم الطباخ
كعدت وحطيت ايدي اثنينهم على راسي ودنكت تعبان ..اريد بس اكل وانام
حسيت عليها اجتي يمي
وحطت الاكل عالميز كدامي رفعت راسي
.. رحمة الله والديج
مديت ايدي عالاكل وصرت اكل
هيام
اباوع عليه مهموم كسر خاطري ما اعرف شلون ابادر واسأله مكدرت ابقى ساكتة عبالك علاوي ابني مهموم اتمنيت ازيل الهم عن وجهه ..اجيت اطلع واتركه لوحده ياكل
بس كلبي ما انطاني وشكلي راح ابقى طول عمري اتبع كلبي وامشي وراه سحبت كرسي من جهة اليسرى وكعدت جان هو كاعد ياكل على راس الميز ..رفع حاجبه مستغرب
ضرغام.. منج من الشيطان شعجب كعدتي يمي ترة بعدني محولت العمارة جاي يمشون بمعاملة التحويل
ابتسمت .. اعرف بعدك ممحولها
.. جا مادام تعرفين ليش كاعدة يمي
شنو متخافين اكلج لو استفرد بيج على كولت جدتي تختل بالفرخة
ابتسمت على كلامه ادري بي شايل بخاطره علية لان كثر الصد مني مو بس من بيبي
رجع يكمل اكله
.. ضرغام شنو شبيك مو على بعضك
باوع علية .. ويهمج اذا موجوع
همست وعيوني بعيونه
.. اي يهمني لدرجة اتمنى امسح عن وجهك نظرة الحزن
سحب نفس عميق.. هيام تعبان
مديت ايدي ولزمت كتفه وعصرته اريد اواسيه
.. شبيك صاير شي متعبك
.. ليش هو شنو مصاير اشو كضيت عمري المشاكل تتراشك على راسي ما ادري منين تطلعلي تدرين هيام اليوم اكتشفت ابوي متزوج على امي
شهكت ولطمت على صدري
.. لااا.. الله يسامحك يخالو على هاي الطلعة
خطية خالة حليمة شلون بيها اذا عرفت
.. هو انا مهموم علمودها ما اريدها تعرف اريد اخصم الموضوع قبل لا يوصلها الخبر
ابتسمت من اتذكرت اول لقاء الي اني وياه
.. على شنو تضحكين
.. اتذكرت اول يوم شفتك بي جنت جنك مجرم حرب تريد تاكلني بسنونك
ضحك بتعب ..بوكتها حسبالي ابوي متزوج وحدة صغيرة بكد بناته ..اتذكر من دخلت وشفتج ..اااااخ بوية كرهتج وكرهت ابوي وياج وكرهت نفسي ..لثانية حسدت ابوي شلون كدر يطيح على هيج جمال وصرت اباوعلج بحقد شلون تقبلين بواحد بكد ابوج
هددتج وانتي ماكو متخافين تالي من اعترف ابوي بسر عمتي هناء وبناتها بساعتها صار الكره حقد ما اعرف ليش جنت احاربج اريد اكسر غرورج والسانج جنتي مفرعة وعطوبج موتتني
هيام .. هههه لا والدكتور الي نشبت وياه تتذكر
.. شلون ما اتذكر جنت ما اطيقه ولا نوب الاستاذ صار يزحف عليج وكدام منو كدامي انا هلة هلة وانا شفته يحجي وياج وانتي الفاتحة الحلك خرب دين ما ضل براسي كبل رحت طلعت حركة كلبي كلها بي واتمنيت الزمج بوكتها واشبعج بسط
.. همزين بوكتها متكدر تتقربلي جان كلبت الدنيا على راسك
باوع علية ورفع حاجبه
.. ولج هاي عليمن تكلبن الدنيا
.. اقصد على راس ضاري اكلب الدنيا شبيك ما تتشاقة
.. هذا كلامج يذكرني بجماعتي دائماً يكولون انت ما تتشاقة خصوصاً غسان جان يكلي الله يساعد الي راح تتزوجها هاي امها داعية عليها لان انت كلش ثقيل وراح تعاني وياك من ورة جمودك يا اخي افردها
صدك جان كلامه بمحله جانت سبب مشاكلنا
عدم كلامي وياج واسلوبي خلاج تعانين من عدم فهمي
اباوع لضرغام لاؤل مرة ينطلق وياي بالكلام ويحجيلي عن اصدقاءه همومه صرنا نسولف بدون منننتبه للوقت وصار موضوع يجر موضوع انتبهت عليه هواي متغير بتصرفاته
دخلت علينا ميس مثل العاصفة وقطعت علينا لحظات الوئام
..هيومة عفية سوي جاي لان اجة خالو فاضل
ضرغام.. وليش مو حضرتج انتي تسوين
.. عفية ضرغوم جاي العب ابلي وية ضاري
هيام ابتسمت على شكلها خبلة مو بيدها
.. سهلة روحي اني راح اسوي جاي
راحت تركض حتى تلحك
ضرغام.. انتي دائما هشكل متحبين تردين احد
باوعت عليه بستغراب
.. الي اكدر عليه اسوي يعني ما يأثر علية
جنت اتحرك بالمطبخ احضر الجاي
واحجي وياه.. تدرين اشوفج متساهلة وية الكل الا وياي
.. متوهم انت اكثر واحد متساهلة وياه والدليل ووجودي هنا يمك كاعدة احجي وياك واني ادري بيبي متقبل اقترب منك
خلصت الجاي
.. تريد جاي
كام من مكانه .. اي صبيلي واخذي وياج هناك لعند جدتي اغسل واجي
رحت دخلت بالصالة شايلة صينية الجاي
سلمت وانتبهت لرفاه كاعدة يم ابوها
بس شافتني كامت اخذت الصينية مني وقدمتلهم ..كعدت جانو يسولفون دخل ضرغام وسلم على خاله
فاضل.. ضرغام باجر اريد تمر علية بالعلوة عندي حجي وياك
افتهمت خالي شنو يريد مني معناها وصله خبر زواج ابوي
.. ان شاء الله امر عليك باجر ونحجي وان شاء الله كلشي ينحل
باوعت لجدتي
الحجية خاجية.. لا حول الله ولا قوة الا بالله
كلما اكول هانت اتعثر واتدوهن بالضيم
سكتت ما كدرت تحجي لان جانت امي كاعدة واخاف تعرف
جان ضاري وميس يلعبون يمنا بلاي
مندمجين وهوسة بينهم يتناكرون
كام فاضل يريد يطلع
.. يالله انا اترخص كعدتكم حلوة
رفاه.. بابا لحظة انتظري اروح وياك
اريد اشوفكم وابات عندكم قبل لا يبدي الدوام والتهي وبعد ما اكدر اشوفكم
.. جا يالله بوية بس استعجلي لان عندي شغل مستعجل
.. بس البس عباتي واجي
راحت صعدت فوك
انتبهت لضاري ترك اللعبة وكام وعيونه نار
عرفت بي ما قابل على رفاه
ضاري.. خالي انت اتوكل على شغلك وانا اجيب رفاه وراك
جان يحجي وهو صاك سنونه
فاضل.. هَـا جا اذا هشكل انا طالع يالله مع السلامة
راح خالهم وشوية ونزلت رفاه لابسة عبايتها باوعت باستغراب
.. وين بابا
ضاري.. انا كلتله يروح ما ينتظرج
.. شنو ليش
.. اتصور عندج رجال تجين تستأذنين منه
من تردين تطلعين
رفاه.... هذا شبي تركني وراح شنو قصده يعني هسة الي يسمعه يكول هذا شكد حريص على زوجته صعدت وراه واني نار
دخلت وسديت الباب
.. ممكن تفهمني انت ليش سويت هشكل
.. حتى مرة ثانية ماتعيدها وتتصرفين من يمج بدون ما تسوين حسابي لان انا رجلج
.. يالله يا زوجي العزيز تكدر توديني لاهلي
.. لا ماكو روحة لاهلج
.. شنو قصدك يعني ما اروح لاهلي ليش
.. ماعندي مرة تبات عند اهلها تروحين باجر تشوفيهم عصرية بس خلي ببالج ماكو مبيت
.. والله عجيب امرك هسة الي يسمعك يكول والله يحب مرته وما يستغنى عنها وانت ما تعرف وين الله خالقني
ضاري
ما ادري ليش من سمعتها طلبت من ابوها تروح تبات عندهم احس كلبي نغزني هي باخر يومين كامت تعاملني ببرود وبطلت محاولات التودد الي وحتى مكامت تحاول تراضيني اتعودت عليها تحضني وانا نايم بس صارلها يومين تنام بطرف السرير هسة.
وبطلبها من ابوها احس عبالك وجهتلي ضربة وعتني على حالي من وصلت تبتعد عني ما كدرت اسكت انتبهت عليها نزعت عبايتها وهي مبرطمة عجبني شكلها الزعلان
جانت لابسة بجامة فانيلا برمودة اقتربت منها ورفعت وجهه
.. بالله شو رفعي راسج
.. شنو
.. شنو اشو صارلج يومين بعيدة عن حضني ولا هامج ضاري وين الله خالقه حتى ما كمتي تسأليني شنو شربت شنو اكلت
رفاه بدلع.. اي هذا كلة منك انت الي بعدتني عنك بصدك وزعلك واني هم بشر اني بس مجرد يومين ابتعدت عنك شوف نفسك شلون ضايج وزعلان لعد اني شنو اكول الي صارلي اكثر من اسبوعين ما تعبرني ولا تحجي وياي مخلصها وياي كلة جفة وبرود تدري حتى قررت اعزل فراشي عنك شفت نفسي مالي لزوم بحياتك والله لوما رنا ستوها متطلكة واخاف على ابوي ينقهر
اجي اني الثانية زعلانة جان ما بقيت يوم واحد عندك على هاي المذلة
اباوع عليها تحجي بهضم مردت كلبي كلشي
..ما ارضي مرتي تنهضم وانا موجود حوطتها بين ايدية وهمست بأذنها انتبهت عليها بجت بأستسلام
.. ما عاش الي يذلج وانا موجود
رفاه.. عجيب امري تاخذني لحضنك واكعد اشتكي لحضنك عليك انت سبب هضمي
باسني من راسي ونزل راسه اخذ شفايفي
.. دخيل ربج شكد كصيرة اتوقع بعد جم سنة من زواجنا يصير عندي انزلاق بالفقرات العنقية من كد ما ادنك عليج واريد اخذ بوسات من هاي الشفايف
ابتسمت موبيدي احبة
.. ممجبور تدنك علمودي
.. شسوي مو بيدي اريد اضوك طعم الشفايف
فتح شعري جانت ايديه تتحرك على جسمي وهو يمشي متوجه للسرير خدودي من اللهفة صارن حمرن وشفايفي خدرت
احس بانفاسه جمر
ضاري .. ما تدرين شكد جنت احارب روحي واعاندها حتى ما اضعف واخذج لحضني بس طلعتج هاي سلبت مني مقاومتي رفع ايده وكرصني من شفايفي
.. ديري بالج تعيديها وتكولين ابات عند اهلي
صدك اكسر رجليج وما اخليج ترحين لاهلج
رفاه.. ااااخ شفايفي ضاري
رجع دنك وهمس .. اذيتج
همست..اممم
.. بالله شو تعالي خلي اطيبهم الج
مددني عالسرير وصار يعتليني دنك وطبع شفايفه على شفايفي
فجاءة واندك الباب بكل قوة
شهكت مفزوعة وهو اتوقف متشنج والتفتتا نباوع عالباب
ميس.. ضااااااااااري شنو وين صرت يالله
ترة اللعبة بدت برشلونا وريال
ضاري .. الله ياخذج ياميس على هالدكة
نهض من يمي وراح اخذ التشيرت ولبسه
وهو يسب ويلعن فتح الباب شافها واكفه
ميس
جنت واكفة منتظرته ..يمة وهو فتح الباب وطلع عيونه تجدح نار
.. ولج انتي تاليها وياج
اجة يريد يضربني اعرف ضرباته تأذي واني رحت اركض انزل الدرج
واني اصيح .. يماااااااااااي لحكي علي
ابنج ضاري راح يموتني
حليمة.. يبووووووي منج ولج شوكت تكبرين
عفت امي واني احس ضاري ينزل الدرج يريد يضربني ما شفت بيبي خاجية بالصاله
عزة جدتي ماكو تحويل للخطة رقم ٢ درب الفلتة ماكو مفر رحت بسرعة دخلت الاستقبال وسديت الباب ووجهي وجسمي كله دايرته عالباب جنت اتنفس بسرعة من الركضة وحاطة ايدي على كلبي همست بصوت ناصي
.. يمااااا صيحي جدتي خاجية خلي تلحكني
سمعت صوته يصيح عليه
.. والله لو تموت ما اطلعلك شبية بايعة روحي
انا لو بس اعرف همة شبيهم وياي جنت ملتهية اخطط شلون اشرد سمعت صوت واحد من وراي يحم حم جمدت بمكاني متصنمة وجهي عالباب التفت على كيف واني مصدومة طاحت عيوني على رجال كاعد بالاستقبال يباوع علية ما انطيت مجال بسرعة مثل الطلقة فتحت الباب وحان انركع على وجهي بصدر اخوي ضرغام لزمني حيل قبل لا اوكع دفنت وجهي بصدره
صرت بين نارين نار هذا الرجال الي موجود بالاستقبال ونار اخوي ضاري اخاف يغسلني
ضرغام.. ولج ميس شتسوين بالاستقبال
رفع راسه وشاف صديقه غسان خربان ضحك على شكلها التحفة ودار وجهه علمود اخته ما لابسة حجاب وافتهم خبالات اخته
ميس حجيت واني دافنة راسي بصدره ما على راسي حجاب ومنا الرجال خطية ضرغام ابتلى فتح الباب وخلاني اطلع وهمس وياي وكوة لازم روحه ما يضحك .. شوفي ولج حسابي وياج بعدين مو عبالج افوتها الج طلعت مثل الفارة الي حرروها من المصيدة خدودي حمر شفت جدتي طالعة من الحمام رحت لعندها
.. ادري جدة ليش قوات الاسناد من احتاجها تختفي ومن اسوي الغلط الكاج كدامي شنو سالفتج
الحجية خاجية .. هَـا خير شمصخمة هسة
شوكت ما اجيج الكاج تتعاركين ومحتاجة الفزعة
لزمت ايدها ورحت وياها لغرفتها واني كلبي يريد يطلع من صدري
هذا منو الولد ما اعرف اني شايفته كبل بس منو من جماعة ضرغام خرب شكد عيب هسة شيكول علية يالله هسة حسباله عندهم وحدة مخبلة لزمت نقالي واتصلت على ضرغام
.. ضرغام بعدة صديقك يمك
.. اي بعدة شتردين منة بعد ما خرعتي الولد
.. الله شنو كلتله علية
.. ماكلتله شي التهيت بصاحبي اهدي من الخرعة
.. الله عليك كله هاي عندنا وحدة مخبلة اندعيلها بالشفاء العاجل
سمعت صوت اخوي وصاحبه يضحكون
ودك جرس عندي ضرغام فاتح حاكية
اسمعه يكلة.. ها شفت غسان مو كلتلك مخبلة وابد ما تكبر
سديت النقال واني خربانة ضحك
يعني هذا طلع غسان صديق ضرغام الحمدلله هذا شوكت رجع من الخارج اشو العوبة هديل ما كالت اخوها رجع من الخارج
بس الله ستر غسان ولا غيره على الاقل هو يعرفني من اني وصغيرة
((((((((()))))))
ريام
راجعة بالخط الي اجرناه اني ورفاه من الكلية واحس نار صعدت براسي شايطه
رفاه.. ريام كولي يا الله واتعوذي من الشيطان الجائز بالصدفة مار من يم الكلية انتي ليش هشكل معظمة الامور
اليوم اتأكدت بنفسي اكو واحد جان يراقبني دائما اشوفه واكف قريب على الشلة مالتي اني وصديقاتي من بدت الكلية لحد الان اني وضرار كل يوم مشكلة بس يفاجئني ان هو كلشي يعرف عني حتى اسماء صديقاتي يعرفهم واتعجب اذا وقف يمي واحد من الزملاء ويجي يسألني عنه والصدمة الاخيرة
من اجاني واحد يسألني اذا كنت مرتبطة
وبيومها من رحعت ضرار حرك البيت على راسي احس بي يغار علية بس ما يريد يبين واليوم لزمت الولد الي جان يتجسس علية ويوصله اخباري لان اني ريام متعبر علية ومتفوتني هيج فقرة
ريام.. لا مو صدفة هاي
رفاه نسيتي شسوة بأول يوم الي بالكلية
شلون اصر الا هو يدخلني للكلية وكام يمشي ويخزر بالشباب بزيه العسكري عبالك جايبة وياي بدي كارد حماية ادري لان صممت اداوم غصب عنه
وصلنا ونزلت من السيارة واني اتوعد دخلت للبيت شفته كاعد يم امه وابوه بالمطبخ وشايل علاوي بأيده سلمت والنار تطلع سهام باتجاهه
ضرار.. يا ستار استر
باوعت لخالو راضي
.. خالو اذا ما تسويلي حل لابنك والله اعوفله البيت واطلع
راضي.. خير بوية شصاير
ريام.. ضرار مخلي واحد يراقبني بالكلية
انتبهت على ضرار وكف متفاجيء
.. منو كلج انا جاي اراقبج
.. الولد الي جان يراقبني صرت اني الي اراقبه واتسنط عليه وتالي سمعته اتصل عليك ولاتكلي هاي صدفة
ضرار.. اي صدفة صاحبي وياكم بنفس الكلية ما بيها شي ترة لاتعظمين الامور وشعندي اراقبج
.. اسأل نفسك هذا السؤال لان اني حصرة علية اتنفس اذا ما ارجع للبيت والكة عندك خبر بي ..خالو اني هذا الحال ما يعجبني
ضرار.. وانا هذا العندي حمدي ربج وشكريه ما اجيج للكلية كل يوم حضرتج فرحانة كل فترة واحد يجي يخطبج مني لاتخليني ابطلج من الكلية واكعدج بالبيت
ريام.. شفت خالو ابنك يريد يكعدني بالبيت
راضي.. ضرار عيب هذا الحجي زحمة شنو مالك ثقة بيها
ضرار.. لا مو مالي ثقة بيها ما عندي ثقة باولاد الناس الي يحومون عليها وانا رجال واعرف الشباب بالكلية اذا شافو بنية حلوة ما يتركونها الا يحجون وياها وانا اخاف عليها موبيدي انت مو تشوفها السان وقوية وتجاوب ترة الله وكيلك هاي بزمخة وحدة تطيح مغمي عليها مابيها خير
ريام.. بسيطة يا ضرار انا اعلمك
تركته وطلعت من المطبخ
اسمعه يصيح وراي
.. يمعودة ام راضي تعاي اوكفي اهووو هسة هاي شراح يسكتها
راضي.. صوجك يابوي المرة تحب تحس بالحماية من رجلها بس مو بهاي الطريقة لو حاجيلها عن الولد حتى ما تفهم غلط
دخل ضرغام وسلم وعيونه نار .. حجي عن اذنك اريدك بحجاية عند جدتي خاجية
انتبهت لابوي انكلب لونه
راضي.. روح وانا جاي وراك
(((((((((((())))
ميس
رحت شفت هديل وهالة منتظراتني بالكلية
رحت لعندهم وسلمت وهديل تضحك
هديل .. لج عوبة البارحة شمسوية بأخوي وجاي خربان ضحك عليج
ميس.. اي ولج سكتي شكد فشلة البارحة جان ضاري كالعادة يركض وراي متحلف يريد يضربني عبالك كاطعة ليلة عرسه
ودخلت للاستقبال شاردة من اخوي وجفتت على اخوج بدون ما ادري
.. لج البارحة غسان كلة يحجي بيج
يكول هاي الفصعونة شوكت كبرت وصايرة مرة
.. اكول ست ليش ما كلتي اخوج كمل دراسته ورجع من الخارج
..اي هو مصارله يومين من استلم شهادة الماجستير ورجع
ميس .. خرب بس اخوج والله صاير حاتة جنة جكليتة ابن اللذين انتي عليمن طالعة هيج عوبة
هديل.. طالعة على صاحبي ميسي
جنا نحجي واجة ايمن لعدنا احس كلبي كمز من مكانه
