انا من اكتر الناس اللي بتأيد و اللي بتشجع ان لازم العيلة كلها تبقى ايد واحدة في كل حاجة حتى لو الحاجة دي عبارة عن شغل بيت .. انا بشجع جدا البيت اللي يكون كده ... انا حبيت فكرة القصة جدا و قد ايه هي مفيدة و ممتعة فحبيت اشاركها معاكم.
ʚ♡⃛ɞ(ू•ᴗ•ू❁)
انا اب لاربع اطفال سيف وسليم وجيلان وجني ❤
اعمارهم كالتالي سليم 8 سنين سيف 6 سنين وجيلان وجني (تؤام) سنتين وكام شهر
انا ومراتي متجوزين عن حب وواثق فيها وفي طريقة تربيتها للولادي جدا لدرجة متخلنيش اتدخل او لاني بطبيعة الحال طول النهار في الشغل اصلا فهتدخل فين
اول ما ربنا كرمنا بسيف وسليم كنت بلاحظ ان مراتي بمجرد ما يدخلوا الحضانه كانت تعلمهم ازاي يرتبوا سريرهم ازاي يشيلوا الطبق مكان اكلهم ازاي يلموا كتبهم ولعبهم
وكنت بقول ومالو بتعلمهم النظام
لحد ما في مره كنا يوم جمعة ومراتي كانت بتروق البيت وصحيت لاقيت سليم بيمسح الارض وسيف بيطبق الغسيل وهي واقفة بتغسل الاطباق
ولسبب معرفش ايه هو اتعصبت ازاي ولادي الرجاله واقفين يعملوا الكلام ده !
زعقت جدا اليوم ده واتعصبت جامد واتهمتها بلا رحمه انها ام سيئة وسبت البيت ونزلت
هبان اب سيء لكن معلش بس اما روحت لاقيتها قاعدة وسيف وسليم قاعدين لازقين فيها مش راضين يقوموا حسيت بندم وخصوصا لما سيف زعق فيا ( يا بابا احنا بنساعد ماما عشان عيانه وبطنها فيها سمكة )
كان قصده انها حامل بس انا صالحتها وطبعا عدينا الموقف
لما ربنا رزقنا ببنات كنت بتريق عليها واقولها خلاص هترحمي سيف وسليم من التنضيف وهما هيشيلوا مكانهم
كانت بتضحك وتسكت
لحد ما في يوم حماتي تعبت ومراتي انهارت تماما علي تعبها وسبتها تبات عندها وخدت الولاد وروحت وقولت مش مشكلة
حتي التؤام مفطومين وبيعرفوا يقولوا عاوزين ايه
جعانين هيقولوا مم عطشانين هيقولوا امبو
كل ده ومش حاطط في دماغي لحد ما صحيت من النوم علي صوت المكنسة لاقيت كالعادة سيف بيكنس وسليم بيروق وياريته ترويق عادي لا دول شايلين السجاد وبيمسحوا العفش !!
لحظه كده انا مراتي بتعمل كده كل يوم جمعة فعلا والنهارده الجمعة ...
سليم : بابا حضر انت الفطار بدل ماما
ده مكنش بيطلب ده كان بيوزع ادوار العمل باين كده
في عز منا محتاس في بيض مسلوق وجبنه بطماطم وبطاطس محمرة سمعت صوت سيف بيغني اغنيه ميزتها باللحن
روحت ابص الالقيه مقعد اخته ع البوتي وبيغنيلها الاغنيه اللي امه بتغنيهالها عشان متعيطش
= اخوك فين !
رد بهدوء : بيغير لجيلان هدومها ! وكمل غني عادي جدا
ولما قعدنا ناكل لاقيت لبس التؤام متغير وشعرهم متسرح
سليم : بابا شيل الاطباق واشطفها قبل ما تحطها في الغسالة ومتغسلهاش دلوقت استني اخر اليوم جمع الاطباق كلها
الواد ده بيكلمني كده ليه !
خلصنا اليوم بدون زعيق بدون عصبية واليوم كان تحت اشراف سليم اصلا بابا حط ده بابا شيل ده يا بابا مبتتعملش كده والله ما فاهم كان لازمه بابا ايه بكميه الاوامر دي
والحمدلله مراتي رجعت ارض الوطن وبحكيلهاا اللي حصل لاقيتها لا منبهرة ولا مبسوطه ولا حتي فكرت تكافيء الولاد
انا قولتلهم انا عندي اتنين ايد بس اعمل بيهم حاجة واحدة والبيت ده كلنا عايشين فيه يبقي كلنا مسؤولين احنا هنقسم المسؤوليات بينا بالتساوي
ومن وقتها وكل واحد فينا عارف دوره ومكانه هما معملوش حاجة زياده عن اللي مطلوب منهم لو كانوا زودوا عليه كنت كافئتهم لكن هما اتمسكوا باماكنهم بدليل ان الامور اللي كنت بقوم بيها كلفوك بيها
= بس هما غيروا للبنات وكانوا بيغنولهم
خلاص يبقي هكافئهم علي كده لان ده كان من تخصصي انا
خرجنا كامكافئة للولاد ومامتهم بتقولهم انا مبسوطة منكوا عشان قمتوا بدوري في اخواتكوا
رد سيف : لا يا ماما اصل بابا مكنش هيعرف
سليم : فأتفقت انا وسيف نعمل كده بدل ما التؤام يتبهدلوا
= ينهار اسوح ده انا بتهزق !
بعد 17 سنه جواز اصبحت المهام اكثر توزيعا لان انضم للعصابة جيلان وجني والي اكتشفته مؤخرا اني جوه الدايرة دي وانا معرفش والفضل لسليم باشا لما قال
من مهام حضرتك دفع الفواتير فاتورة النت مدفعتش ليه !
عيالنا بيربونا مش احنا يا جماعة !
القصة منقولة طبعا و على لسان الأب
