Black Angel ( S - 1 )

Part 21 (Unicode)

ဗိမာန်ငယ်ထဲမှ ကျောက်ကုတင်ပေါ်ရှိ ဒန်နရယ့်ရင်ခွင်တွင် မာတယ်ရိုမှာ နှစ်ခြိုက်စွာ အိပ်မောကျနေသည်။ ဒန်နရယ်၏ လက်မောင်းပေါ်တွင် ခေါင်းအုံးကာ သေးငယ်သော လက်တစ်ဖက်မှာ ဒန်နရယ့်ခါးကိုကျော်ကာ လှမ်းဖက်ထားသည်။ ကလေးငယ်၏ သေးငယ်သောခါးပေါ်တွင် ဒန်နရယ်၏လက်ကို ခပ်ဖွဖွတင်ထားသည်။ ညည့်နက်နေပြီဖြစ်သော်လည်း ဒန်နရယ် အိပ်မပျော်။ ရင်ခွင်တစ်ခုလုံး မမြင်ရသော မွန်းကြပ်မှုများနှင့် ထိုင်းမှိုင်း လေးလံနေသည်။

နေ့ခင်းမှ သိမ်းငှက်ကြီးပီဆို၏ အပြုအမူကို ဒန်နရယ် ပြန်စဉ်းစားတိုင်း အံ့သြမယုံကြည်ဖြစ်ရသည်။ ပီဆိုသည် သူ့အစ်ကို ဖေဒေအပေါ်တွင် သစ္စာကြီးလှသလို တွယ်တာလွန်းသည်ကို ဒန်နရယ်သိသည်။ ဖေဒေမှလွဲ၍ ဘယ်သူ့ထံမှ သွားလေ့မရှိသလို ဘယ်လူသားနှင့်မှလည်း ယဉ်ပါးစွာနေလေ့မရှိ။ ဒန်နရယ့်လက်ပေါ်တွင်တောင် ဘယ်သောအခါမှ မဆင်းသက်ခဲ့ဖူး။ ဒါ့ကြောင့်လည်း အခုလို ဖရက်ဒီ့လက်မောင်းပေါ် ဆင်းလာလာခဲ့သည်ကိုတွေ့ရသည်မှာ ဒန်နရယ့်နှလုံးသားများကို မီးနှင့်မြှိုက်လောင်ခံရသလို ခံစားလာရစေသည်။

ဖေဒေ.. ပီဆိုတောင် ဖရက်ဒီ့ကို တွယ်တာနေမှတော့ မင်းလည်း သူ့ကို အပြစ်မမြင်ခဲ့ဘူး မဟုတ်လား...

အစ်ကိုဖြစ်သူ၏ နောက်ဆုံးအချိန်များကို သူ နာကျင်စွာ ပြန်လည်မြင်ယောင်လာသည်။ သေချာသည်ကတော့ စေတန်နတ်သည် ဖရက်ဒီ့အား သူမကြားလိုက်ရသည့် အကြောင်းတစ်စုံတစ်ခုကို ပြောခဲ့သည်။ မျက်နှာဖြူဖွေးသွားကာ ကြောက်ရွံ့သွားသော ဖရက်ဒီ။ ထို့နောက်မှာတော့ စေတန်နတ်နှင့် အပြန်အလှန်ပြောလာသည့် စကားများ။

"အခုအချိန်မှာ ကျွန်တော် အရမ်းဆာနေတယ် ဖခင်.. ဒီကောင့်နှလုံးကို ကျွန်တော် စားချင်တယ်.."

"ဒါဆိုရင်တော့ မင်းသဘောလေ.. ငါ့စိတ်ထင်တော့ ငါ့အစီအစဉ်ကပိုပျော်စရာကောင်းမယ်ထင်တာပဲ.."

ဒန်နရယ် အသက်ရှူဖို့ကို ခေတ္တခဏမေ့လျော့သွားမိသည်။ ဟုတ်သည်။ စေတန်နတ်ပြောခဲ့သည် ၎င်း၏အစီအစဉ်ဆိုသည်ကို ဒန်နရယ် မသိခဲ့။