الوحيدة

الجزء الثالث

مروة: تعرفين عادل جبار؟

المراة : عادل!!!!
يعني انتي مروة الي اخذها عادل؟؟؟

مروة : نعم اني هي...

المراة: حبيبتي اني خالتج اخت امج...
حضنتني المرة وبقت تبجي
( تعالي طبي هسة امج راح تفرح.. )

طبيت واني خايفة ومترددة لان اول مرة راح اشوف امي الحقيقية

المراة : منال.. منال شوفي منو اجتي

المراة الي جان اسمها منال نايمة بالفراش مبينة مريضة وكالت وهي متعبة والمرض واضح عليها
- نرجس. منو هاي

المراة الثانية الي اسمها نرجس(خالتي) : هاي مروة.. مروة بنتج الي راح نص عمرج وانتي تنتظريها ترجع.. مروة الي اخذها عادل وسرقها منكم وهي صغيرة

منال (امي) بقت تبجي وحاولت تكوم من الفراش :مروة بنتي

ركضت عليها ودموعي تنزل وحضنتها.. ضلينا على هاي الحالة لدقيقتين

منال: بنتي حبيبتي شلون كدرتي تجين ووين عايشة طول هاي الفترة؟ شسوة بيج الضالم عادل؟

مروة : ماما.. بابا قصدي عادل توفى قبل ايام

منال : الله لايرحمه الي حرمني منج طول هذا العمر

مروة: ليش ماما شسوة شنو الي صار وليش؟؟ اني جنت عايشة ويا بدونكم.. هو صار ويا حادث بمكان البناء وقبل ليموت كالي هو مو ابوية ودورت بالبيت ولكيت عنوانكم

منال : ابوج اسمة مروان هو فقير يشتغل معلم بمدرسة انتي جان عمرج ٣ سنوات من صار الحادث... ابن عادل هم عمرة ٣ سنوات يعني بعمرج وبيوم من الايام ابوج جان يسوق السيارة ودعم حسن ابن عادل بدون ميشوفة ميدري بي.
توفة حسن وعادل انجن على ابنة طبعا حقه لان ابنه الوحيد بس كال مادام انتو كتلتو ابني بعد راح اخذ بنتكم اخليها بدال ابني الي مات.. حاولنا نمنعه بس بدون اي فايدة بحيث اخذج عن طريق تدخل العشيرة مثل متعرفين العراق بلد العشاير.
اخذج واختفة منعرف عنكم اي شي دورنا بكل مكان وسئلنا لكن معرفنة وين رحتو..
مرتة جانت انسانة عطوفة وطيبة امنتج عندها قبل ليرحون
بعد مارحتو اني صارت عندي جلطة ونمت بالفراش وهاي حالتي ماكدر اكوم منه بس دام رجعتيلي لازم اصير زينة..

مروة: هو جان دائما قاسي علية ويضربني ويضرب امي (يعني مرته) الله يرحمة..

منال: حبيبتي بنتي انسي كل الي صار هسة بس يجي ابوج رح يفرح بيج برجعتج بالسلامة النة.

مروة : ماما صار شكد مشتاقة لهاي الكلمة احبج

منال : واني هم حبيبتي..

نرجس: يلا عيني كافي سوالف تعالو صار الغدة.

مروة : اي خالة جايين
ساعدت امي وكعدتها على الكرسي المتحرك ومشيت اني وياها لغرفة الطعام او هي نفسها غرفة جلوس العائلة لان عائلة متوسطة الحال

حضرنا الاطباق والاكل صار جاهز
اندكت الباب واجة واحد جبير بالعمر اعتقد ابوية
ضليت واكفة بدون ماحجي شي

منال: مروان شوف منو اجتي.. هاي مروة بنتنا وفرحتنا

مروان: مروة؟؟؟؟ شلون؟؟؟؟؟؟ مستحيل!!!!!

منال: اي هاي بنتنا مروة الي راحت من عدنا

مروان: مستحيل.. مروة ماتت من جان عمرها سنوات مستحيل انتي بنتي.

منال: شنو؟ هاي بنتك مروان شنو ماتت.. بنتك الوحيدة الي اخذها عادل من عدنة

مروان يحجي بعصبية وحزن بنفس الوقت : مروة ماتت افتهمو.. من صار عمرها ٥ سنوات يعني ورة سنتين من اخذ عادل الها وصلتني اخبار انه هي ماتت بالمرض بس مكدرت احجيلج كلت خاف تتمرضين اكثر خاصة حالتج جانت كلش صعبة بوقتها...

انتي منو وشتريدين من عدنة؟؟؟

......

انتهى هذا البارت