بيت جدي اللي جمع كل المحبه والاماني والحنين

7

الجزء السابع
<<<<<

بعد ثلاث ايام يوم ملكت "سعود "
كان في بيت ابو عبد الكريم والبنات بكامل زينتهم كل وحده تقول الزين عندي والجو هادي ومافيه الا صوت الاغاني اللي يصدح في المكان
كآنت ريم قآعده في الغرفه ومتوتره مرا لعدة اسباب اولا لان ابوها بيسوي العمليه بكرا وثانيا لان ماعندها اهل كثير وعماتها الثنتين ووحده من خالاتها ومرت اخوها اللي تكرههها هم اللي حاضرين بس
طبعا في البدايه رفضت لكن ابوها المريض اقنعها وقال لها انه شايل همها وهو قلبه تعبان وانها برفضها تزيد عليه التعب ومن هالكلام اللي خوف ريم وخلاها توافق بس عشان ابوها
قاطع افكارها دخول منال وترف ابتسمت لهم وردوا لها الابتسامه وقالت منال : مستعده ياقمر الحين بتنزلين
تنفست ريم وهزت راسها وقآمت مع منال وترف وقلبها بيطلع من مكانه ياترى وش بيكون مصيرها مع سعود نزلت على انغام الموسيقى والمصوره تصورها
كانت امل قاعده على احدى الطاولات ونظراتها ضايعه في الفراغ ودها تصرخ ودها تذبح ريم ودها تقوم وتهرب بس اكتفت بدموعها اللي تنزل وتمسحها بسرعه
وصلت ريم للكرسي وقعدت وعلت اصوات الزغاريد وبعد فتره قالت منال : تغطوا المعرس بيدخل
دخل سعود وهو عاقد حواجبه ويحاول مايبين الضيقه قد مايقدر وصل لريم وباس راسها ببرود واقل من البرود جابت منال الشبكه : يلا لبسها
لبسها ولا حس بأي مشاعر لها ولا ناظرها اصلا قعد وهو يدور بعيونه على حبيبة قلبه شافها وعرفها من بين كل البنات وشلون مايعرفها وهي قلبه اللي ينبض انفاسه واكسجينه شاف العتب والجرح بعيونها كان وده يموت ولا يشوف لمحة الدموع بعيونها
وده يقوم ويضمها ويخبيها في ضلوعه وده يكلمها يقول لها واللي خلقني ماسكن هالقلب غيرك بس حكم القوي ! قاطع افكاره صوت امه وهي تقول : يمه سعود ابتسم للمصوره
ابتسم غصب وريم ملاحظه هالشي وخافت من مستقلبها المجهول خلصوا تصوير ومنال قالت : جهزت لكم المجلس تفضلوا
البنات كانوا كلهم متضايقين على امل ومايدرون ليش سعود سوا كذا اول ماطلعوا من المكان ركضت امل لغرفتها مو قادره تتحمل وتجامل اكثر قلبها قاعد يحترق
في المجلس كان الصمت سيد الموقف ريم منحرجه ومنزله راسها وسعود عاقد حواجبه ويهز رجله بتوتر
اخيرا نطقت ريم تكسر الصمت : انا مابي اسوي عرس
سعود استغرب : ليش
ريم : بس مابي بقعد مع ابوي كم يوم في المستشفى لين يطلع ابوي بالسلامه ان شاء الله وبعدها بروح معاك البيت
سعود ماهتم : براحتك
طلع كرت ومده لها : هذا رقمي يلا انا استأذن تبين شي
اخذت ريم الكرت ورفعت راسها ولمحته ماتوقعته بهالوسامه نزلت راسها بسرعه وكانت بتقول ليش بتطلع بس قالت : لا
قال وهو طالع : سلام
ناظرت في ظهره وهي مستغربه بروده وتنهدت بضيق "انا ناقصه بعد "
خلصت الملكه على خير وريم كان كل بالها مع ابوها اللي عمليته بكرا ماقدرت تنام واول ماطلعت الشمس راحت له المستشفى دقت الباب ودخلت له شافتهم يجهزونه للعمليه ولابس لبس العمليه
قربت ومسكت يدها تبوسها : شخبارك يالغالي
ابو هادي بابتسامه حنونه: بخير يبه انتي شلونك
ريم: بخير دامك بخير -قالت بحزن- ها بيدخلونك العمليات
ابو هادي : ايه يبه ادعي لي ولا اوصيك انتبهي لنفسك وصوني زوجك تراه رجال
ريم والدموع بدت تتجمع بعيونها : الله يطول بعمرك يبه - قالت تضيع السالفه - هادي ماجاء
ابو هادي : الا بس راح يوقع اوراق العمليه واوراق ثانيه عند الدكتور
ريم: ان شاء الله بتسوي لنا العمليه وبترجع لنا بخير وصحه يبه كلنا ننتظرك تقوم بالسلامه انا وهادي وعيال هادي كلنا ننتظرك
ابو هادي : ان شاء الله
دخل هادي : السلام عليكم
ريم وابو هادي : وعليكم السلام
ابو هادي : يبه ليش ماجبت العيال معاك ابي اشوفهم قبل لادخل للعمليات
هادي: ماقدرت يبه لانهم في بيت جدتهم ان شاء الله اجيبهم لك بعد ماتطلع من العمليه بالسلامه
ابو هادي: ان شاء الله
وطلت الممرضه وطلبت منهم يطلعون لانهم بنقلونه لغرفة العمليات
قربت ريم من ابوها وضمته ودموعها نزلت غصب عنها : الله يحفظك يالغالي
ابو هادي : وش له البكا يابوي تضايقيني كذا
بعد ريم ومسحت دموعها وابو هادي قال : لاوصيك على اختك ياهادي حطها بعينك
هادي: ريم بعيوني يبه والله يحفظك وتشوف عيالها
ابو هادي : آمين
طلعوا من الغرفه وريم دموعها ماوقفت قال لها هادي : بس ياريم ادعي له ماتفيد الدموع ويلا تعالي برجعك البيت لان العمليه مطوله مالها داعي قعدتك
ريم هزت راسها بقوه : ماراح اتحرك من هنا لين يطلع ابوي من العمليات
هادي: بس مـــ
ريم قاطعته : هادي قلت لك ماراح اروح لمكان لين يطلع ابوي
هادي : طيب انا لازم اروح عندي شغل وبرجع العصر بكلم سعود وبقول له انك هنا اذا بغيتي شي كلميني
قعدت على كراسي الانتظار بدون لاتتكلم وهادي مشى ورفع جواله يكلم سعود : الو
سعود : هلا والله هادي شخبارك
هادي: بخير عساك بخير حبيت ابلغك ان الوالد دخل لغرفة العمليات وريم بالمستشفى مارضت ترجع
سعود: الله يقومه بالسلامه خلاص انا بجيب وحده من خواتي تقعد جنبها
هادي: ماتقصر يلا تامر بشي
سعود: سلامتك
هادي: سلام
سكر سعود الجوال وتوجه لغرفة مرام بما ان منال رجعة لبيتها دق الباب ووصله صوت مرام : تفضل
دخل وهي عقدت حواجبها باستغراب : مرام ابيك تروحين جنب ريم المستشفى ابوها دخل لغرفة العمليات وهي لحالها هناك
مرام تحترم سعود كثير واتحب ترده : طيب عطني دقايق البس بس
نزل ينتظرها وبعد ماخلصت وصلها للمستشفى ومشى على طول وصلت مرام وشافت ريم وقعدت تهديها وتواسيها
,,
الساعه 12 ظهرا
عقدت امل حواجبها : وش يبي
مشاعل : مدري قال لي اناديك
امل وهي توقف : خلاص رايحه له
نزلت وتوجهت للمجلس وين ماجدها موجود دخلت وقالت : السلام عليكم
ابو عبد الكريم : وعليكم السلام تعالي يبا
قعدت جنب جدها : خير يبا تقول مشاعل تبيني
ابو عبد الكريم : ايه ابيك بموضوع بصراحه يبا فيه واحد متقدم لك
امل : واحد ؟ مين
ابو عبد الكريم : راكان الــ اخو صديقتك ليان
انصدمت امل وخصوصا ان ليان مالمحت لها ولا جابت لها سيره: انا مو موآفقه يبا
ابو عبد الكريم : انا مابيك تردين الحين يبا فكري وخذي وقتك وترا الرجال والنعم فيه وانا اعرف ابوه
وقفت امل : بس انا مو موافقه ولا ابي افكر
ابو عبد الكريم بضيق : ليش يبا الرجال ماينرد ع العموم ماراح اضغط عليك بس ماراح ارد عليهم الحين برد بعد كم يوم واذا غيرتي رايك علميني
طلعت امل وهي متضايقه ماتبي احد من بعد سعود طلعت لغرفتها وهي تفكر ومستغربه ان ليان ماجابت لها سيره "مستحيل اتزوج احد من بعد سعود "
قعدت وافكارها توديها وتجيبها ياربي ماتخيل نفسي مع غير سعود يارب اختر لي ماتراه خير لي يارب
,,,
في حديقة بيت ابو سلطان
كانت طفشانه وتتمشى والهواء يحرك شعرها كانت تنط وتغني باستهبال سمعت ضحكة تعرفها زين "ياسر ؟ "
قربت من المجلس بحذر وطلت عليه من النافذه وشافته يكلم جوآل وضحكته شاقه الحلق
ابتسمت لضحكته لكن ضحكتها تبخرت وهي تسمعه يقول : ههههههههههههههههههههههههه طيب قلبي الحين انتي ليش معصبه قولي انك غيرانه
حطت يدها على فمها بصدمه "لا لا مستحيل " سمعت صوته من جديد : ياعيوني انتي شفيك افهمي والله مافي القلب غيرك سوسو انا احبك افهمي والله احبك
قربت اكثر وهي تحاول تسمع اكثر : ههههههههههههههههههه لا لا انا ماقدر على هالكلام ترفقي علي ارحميني
غطت فمها بيدها بقوه تمنع شهقتها تطلع "جد انك حقير " ماقدرت تسمع اكثر ركضت لداخل البيت وصدمة بشي قوي وطاحت
عمر: شفيك تركضين كذا مطيوره انتي
سكت وهو يشوف دموع فجر نزل لمستواها : فجر شفيك تعورتي
فجر بكذب: ايه رجلي
عمر : شدعوه ! الضربه خفيفه طيب تقدرين تمشين ولا اشيلك
فجر : لا بمشي
وقفت وعمر ناظرها بشك : فجر فيك شي احد مزعلك
فجر تمسح دموعها : لا بس تعورت من الطيحه -قالت تخفف من شكه - ماشاء الله عليك مو جسم حديد
عمر كشر : الله عليك اكبر لا اله الا الله ابعدي بس تاخرت على ياسر ينتظرني بالمجلس
طلع عمر وفجر رجعت دموعها "جد اني غبيه احب واحد مثلك والله اني غبيه "
سمعت اصوات مها وفواز يلعبون بلايستيشن ويصارخون مسحت دموعها بقوه وعناد ودخلت تلعب معاهم وتنسى اللي سمعته
قال فواز : تعالي تعالي فجير شوفي صقعت اختك بـ 9 اهداف
مها : والله ! مسوي فيها قوي انت ولد وطبيعي تعرف تلعب كوره تبي العب معاي شي ثاني وشف وش بسوي فيك
قعدت فجر بضيق تنآظرهم يتهاوشون
فواز : قومي بس قومي فجر تعالي العبي ذي ماتعرف شي شغل المطبخ احسن لها
مها تضربه بالمخده: مطبخ بعينك وش شايفني فيك خير غير الشريط حط سيارات ولا مصارعه
فواز : ههههههههههههههههههههههههههههههههههههههههههههه ضحكتيني وانا مالي خلق اضحك يعني السيارات والمصارعه للبنات ؟ والله اني بكسرك تكسير
مها بتأفف تكلم فجر : يازين ايام كراش بس كذا صرت مسخره للي يسوا واللي مايسوا وللبزران
فواز عصب : بزر بعينك تكلمي عدل لااجلدك
مها عارفه انه يعصب من هالموضوع قالت بعناد : بزر وبزر وبزر
فواز وقف ومسك سلك البلايستشن : الحين اوريك من البزر
مها تنحاش : لالا والله خلاص رجال فديتك
فواز : وغصب عنك بعد تعدلي بالكلام لامحطك بهالسلك
مها : طيب اتحداك تشيلني
فواز ينآظرها : شوفي انتي ماقدر عليك بس اقدر اشيل فجر
قرب من فجر وهي ناظرته بدون نفس مالها خلق لسخافته شالها بسرعه بما انها نحيفه وصار يدور فيها وهي تصارخ ومها ميته ضحك عليهم وفواز مبسوط
فجر: فووووووواز نزلننننننني بلا استهبال بطيح هههههههههههههههههههههههه
فواز نزلها وهو يتنفس بتعب : هههههههههههههههه بس عشان اوري اختك هالعنز هذي اني رجال
فجر : وانت مصدقها تبي تجننك اكيد رجال وعشر رجاجيل بعد
فواز انبسط ونفخ ريشه من كلام اخته ومها قالت وهي عند الدرج : لاتصدق عمرك تكذب عليك ذي بس تبيك تسكت وتنطم
وركضت بسرعه لغرفتها قبل لايتوطا في بطنها ضحكت فجر على اخوانها المجانين اللي خلوها تنسى ضيقتها شوي
فواز : تعالي فجر العبي
فجر: مالي خلق فواز خلها وقت ثاني
فواز يناظرها : شفيك فجر تعبانه مو عوايدك هاديه وقاعده كذا
فجر: ايه تعبانه شوي
فواز : طيب قومي اوديك المستشفى لاتقعدين كذا
فجر توقف: لا اخذ لي بنادول الحين وانام وان شاء الله اصير احسن