بيت جدي اللي جمع كل المحبه والاماني والحنين

8

الجزء الثامن

مرت ثلاث ايام العزاء وريم على حالتها وكان سعود جنبها ويواسيها
كانت قاعده في الغرفه وماسكه البوم صور في يدها تقلب فيه والعبره خانقتها صور لها مع ابوها وهادي وكانوا يضحكون والسعاده باينه في عينهم امها توفت وهي صغيره صغيره مره وابوها الغالي هو اللي رباها وكان الابو والام لها
دخلت مرام وهي شايله صينيه فيها اكل وقالت بابتسامه : شخبارك اليوم
ريم: الحمد لله تمام
قربت مرام وحطت الصنيه: كلي يلا ماطب شي في بطنك من ثلاث ايام كلي لايصير فيك شي
ريم: مرام تكفين والله مالي نفس
مرام تقعد جنبها : مو بكيفك يلا كلي
قعدت جنبها وغصبتها تاكل دخلوا البنات عشان يخففون على ريم اللي تحس نفسها وحيده
قالت ترف: زين انك غصبتيها تاكل تتدلع علينا ريم
ابتسمت لها ريم بألم وهي تاكل بدون نفس بس جد جوعانه
قالت امل اللي ماحتكت في ريم كثير : ان شاء الله اليوم احسن
ريم تنهدت: الحمد لله على كل حال
وعد تبي تلطف الجو : اما اخوك هذا يجنن لو كان مو متزوج بس
ابتسمت ريم غصب : لا تسمعك زوجته والله تدفنك بأرضك
وعد كشرت : زوجته هالقشرا نفسها بطرف خشمها طول العزاء وماكلمت احد وقاعده كآنها مغصوبه
مها : وعد وش هالكلام
ريم : خليها هذي الحقيقه مرت اخوي الله يهديها طبعها كذا شايفه نفسها ولا تحب احد الا نفسها حتى عيالها مو مهتمه فيهم جايبه لهم مربيه وراميتهم عليها ولا تدري عنهم
مها عقدت حواجبها : ايه فيه كثير بعد اقول لك مرا ابوي كان مسافر ونمت عندهم في البيت طينة عيشتي وشيشة اخوي علي والمشكله ان اخوي يحبها موت ومتعلق فيها ومايستغني عنها
استانسوا البنات انها بدت تسولف شوي قالت جود : طيب كم عيال اخوك ماشفناهم وشلون علاقتك معاهم يحبونك ولا مثل امهم
ريم : فديتهم عنده بنت وولد البنت اسمها شهد وعمرها 6 سنوات والولد اسمه فراس وعمره 5 سنوات اموت فيهم وهم يحبوني كثير بس ماشوفهم واجد لان امهم مانعتهم وماتحبهم يشوفوني
فجر: الله يهديها طيب ليه تكرهك انتي سويتي لها شي
ريم هزت راسها : لا والله ابد بس هي كذا تكرهني
فجر: طيب علمينا اكثر عنك كم عمرك تدرسين ولا لا عندك بنات عم وكذا يعني
ريم : امممم عمري 19 سنه وادرس جامعه سنه اولى تحضيري وعندي بنات عم كثير بس علاقتي معاهم عاديه ومااقابلهم كثير بس هم حبوبين مره وطيبين ويحبوني واممم عندي صديقة مقربه مره اسمها هند وبس
امل ودها تتقرب من ريم وتشيل هالكره اللي بقلبها لان البنت مالها دخل : طيب اعتربينا خواتك وانتي بين اهلك وناسك هنا واي شي تحتاجينه احنا موجودين
استغربوا البنات من امل لكنهم عارفين طيبة قلبها ابتسمت لها ريم : ان شاء الله واكيد اذا احتجت شي ماراح اتردد دقيقه وحده اقول لكم
سولفوا البنات معاها كثير وراح ومر الوقت وهم يتكلمون عن ريم وعن ملكة امل اللي بعد ثلاث ايام وعن اشياء كثيره
دق جوال ريم وشافته سعود وردت : هلا سعود .. الحمد لله بخير والبنات ماقصروا .. ايه اكلت .. الله يسلمك .. مع السلامه
انقهرت امل دآق يتطمن عليها بعد لكنها قررت بداخلها انها تشيل هالافكار من بالها هي بعد كم يوم بتكون لراكان ولازم ماتفكر في احد غيره
مشاعل : بنات تدرون ان اليوم ملكة عبير ولا فكرت حتى تعزمنا
ترف : كيفها على العموم الله يوفقها