بيت جدي اللي جمع كل المحبه والاماني والحنين

13

-
الجزء الثالث عشر
>>>>

حطت يدها على كتفه وعيونها كلها دموع: استهدي بالله ياناصر
ناصر بخوف وتشتت : ربى ليش صار معاها كذا هذا مو موعد ولادتها
ربى تقوي نفسها : ان شاء الله خير انت ادعيلها بس
بعد فتره قصيره طلعت الدكتوره وقالت لناصر : انت زوجها
ناصر بلهفه : ايه طمنيني زوجتي بخير
الدكتور تهز راسها : الحمد لله قدرنا نوقف النزيف والمدام بخير والجنين بخير كويس انكم جبتوها بسرعه ولا كان فقدت دم اكثر
ناصر براحه حط يدينه على وجهه : اللهم لك الحمد
الدكتوره : المهم انها ترتاح ولا تجهد نفسها ابد الفتره الجايه اي اجهاد بسيط ممكن يعرض حياتها هي والجنين بخطر
ربى : طيب هي ليش صار معاها كذا
الدكتوره : واضح انها متعبه نفسها هاللي صار معاها كله بسبب الاجهاد ولو فيه درج ف البيت يفضل انها ماتصعد وتنزل كثير هالمره الله ستر اذا تكررت لاسمح الله ممكن يشكل خطر كبير عليها
ناصر : طيب دكتوره اقدر اشوفها الحين
الدكتور: تفضل بس لاتطول خلها ترتاح اليوم وانا بكتب لها خروج بكرا يلا عن اذنكم
ربى: اذنك معك مشكوره - التفتت على ناصر - الحمد لله على سلامتها ياخوي انت ادخل وانا بنتظرك هنا
هز ناصر راسه ودخل لهديل اللي كانت نايمه ومو حاسه بشي قرب منها ومسك يدها اللي فيها المغذي باسها بهدوء وهمس: سلامتك يابعد قلبي
قعد عندها شوي يمسح على راسها ويقرا قران لين دخلت الممرضه وطلبت منه يطلع طلع وهو ماوده بس صبر نفسه بكلام الدكتوره انها بكرا بتطلع
ربى اول ماشافته جات لعنده: يلا ناصر نروح البيت وبكرا باذن الله هديل تطلع
ناصر يرفع جواله : لا انا بكلم بدر يجي ياخذك وانا بقعد هنا
هزت ربى راسها لانها عارفه اخوها مهما تكلمت ماراح يقتنع : طيب على الاقل رح البيت تروش وبدل وتعال
ناصر يناظر ثوبه : صح نسيت يلا امشي اجل بوصلك وباخذ شور سريع وبرجع
ركبوا السياره وناصر قال بضيق : الحمد لله اللي حفظ لي زوجتي وبنتي هذا كله من امي الله يهديها حرمه حامل وبكر مارحمتها وهي عندها بدل الشغاله ثنتين
ربى بضيق اكثر : والله انا خايفه ان هاللي تسويه امي في هديل يرجع فيني
ناصر : لا ان شاء الله انتي مالك دخل ع العموم اللي يهدي امي ويسامحها مانملك غير الدعاء لها
ربى بهمس: امين
بعد وقت مو طويل وصلوا البيت ونزلوا دخلت ربى وطلعت غرفتها قبل لاتكلمها امها ووراها ناصر اللي مشى للدرج على طول لكن وقفه صوت امه : ناصر
ناصر التفت: سمي يمه
ام ناصر اول ماشافت الثوب شهقت وقربت من ناصر بخوف : وش فيك يمه ؟ وش صاير انت متضارب مع احد
ناصر : لا يمه هديل جاها نزيف والحمد لله لحقنا عليها بسرعه وهي واللي فـَ بطنها بخير
ام ناصر تنهدت براحه : حسبت فيك شي - قالت بدون نفس - وكيفها حرمتك الحين
ناصر : الحمد لله يلا عن اذنك بروح اتروش وبرجع المستشفى
طلع الدرج بسرعه وام ناصر عوجت بوزها : وش فيه طاير الحمد لله والشكر

,,,,

صحت من النوم وهي تحس براحه عجيبه من زمان مانامت هالنومه بس تحس بألم فَ بطنها كانت بتقوم بس انتبهت لليدين الثقيله اللي حاضنتها شهقت يوم استوعبت ان سعود حاضنها ورايح فَ النوم
انحرجت وحاولت تبعد يدينه وتقوم لكن وصلها صوته : وش فيك ماراح آكلك
انحرجت اكثر وانصبغ وجهها احمر لانه صحى من حوستها قالت بربكه : سعود وخر بقوم
بعد يدينه بهدوء : الناس تقول صباح الخير
قامت بسرعه وتوجهت للحمام -اكرمكم الله -بدون لاترد عليه قام بعدها وطلب الفطور وجلس يحوس فَ جواله شوي
بعد فتره انتبه ان ريم طولت خاف وقرب من باب الحمام -اكرمكم الله - دق الباب : ريم
ماجاه رد دق الباب اقوى : ريم فيك شي
فتحت الباب وطلعت ووجهها احمر وكأنها بتبكي ناظرها باستغراب : وش فيك كل هذا لاني حضنتك ترا مو قاصد نايم مو حاس بنفسي وثاني شي انا زوجك
مشت بدون لاترد عليه وانسدحت على السرير ويدها على بطنها واضح تتألم قرب سعود وقعد على طرف السرير : ريم شفيك ؟
ريم باحراج : مافيني شي
في هاللحظه اندق الباب والفطور وصل دخله سعود وقعد: يلا الفطور وصل
ريم بألم : مابي اكل انت
وقف سعود بملل وتأفف مايدري وش فيها : طيب قولي وش فيك انا زعلتك بشي
لاحظ انها ماسكه بطنها بقوه وتبكي قرب منها بخوف : في شي يعورك
ريم تمسح دموعها : لا رح اكل انت لايبرد الاكل
سعود يلف وجهها : ريم شفيك علميني بطنك يعورك
هزت ريم راسها وسعود قال : شفيك طيب قومي اوديك المستشفى
ريم بسرعه : لا سعود قلت لك مافيني شي
سعود: شلون مافيك شي وانتي تبكين طيب افرضي ان عندك قولون قومي يلا اوديك المستشفى
ريم تأففت بضيق والم : سعود افهم مااحتاج مستشفى بطني يعورني شوي ويخف
سعود ناشب : طيب من ايش معقوله كذا بدون سبب
ريم باحراج بدون لاتنآظره : سوالف حريم
واخيرا سعود استوعب قال وهو يحك راسه : اها طيب وشسمه اجيب لك شي دافي تشربينه
ريم ماتدري تبكي من الالم والا الاحراج هزت راسها لا
سعود: طيب شلون اتصرف معاك مو معقوله اخليك كذآ تتألمين وش تسوون انتوا بهالوضع
ريم: عطني حبتين بندول
سعود : مو زين يضرك
ريم : طيب خلاص رح افطر وماعليك مني بحاول انام شوي وان شاء الله اصير زينه
هز راسه وقام : براحتك وماتشوفين شر