بيت جدي اللي جمع كل المحبه والاماني والحنين

26

الجزء السابع والعشرون

<<<<

صحت على صوت الاذان وعيونها منتفخه من البكي ناظرت جنبها ماشافته قامت بسرعه واخذت لها شور وطلعت صلت وطلعت للصاله تنهدت براحه لانه مو موجود
توجهت للمطبخ وسوت لها كوفي قعدت تقلب فَ القنوات حطته على ام بي سي 3 وجلست تتفرج على فلم كرتون
تمنت لو ترجع طفله وتلعب مع شوق وطلال وفهد ويوديهم ابوهم مدينة الالعاب ويلعبون لين يتعبون تذكرت وهم صغار اذا جاء العيد تلبس هي وشوق مثل بعض
تذكرت شلون كانت تركض لطلال ويشيلها ويدور فيها نزلت دموعها اشتاقت لاهلها حتى لو كانوا السبب باللي هي فيه اشتاقت لهم ولأيامها معاهم
اشتاقت لسوالف شوق لضحكة فهد لحنية طلال لابتسامة ابوها ولنصايح امها اشتاقت لغرفتها وبيتهم كله اشتاقت تصحى وهي مو شايله هم شي
اشتاقت تروح غرفة شوق وهي نايمه وتزعجها لين تقوم اشتاقت واشتاقت واشتاقت بس لافات الفوت ماينفع الصوت
رمت نفسها على الكنب وهي تبكي "خلاص والله اترك غروري واصير انسانه ثانيه والله اترك امل في حالها واصير احب بنات عمي بس ارجع لبيتنا تعبت من هالعيشه تعبت "
بعد فتره طويله دخل وشافها ضامه رجولها وتبكي مااهتم تعود على هالوضع توجه للغرفه وبدل ورجع جلس جنبها مسك الريموت : بزر انتي تتابعين افلام كرتون
ماردت عليه مسحت دموعها بقوه وقامت بتروح للغرفه لكنها سمعت صوته من وراها : وين رايحه روحي جهزي الفطور - ناظر ساعته - وبسرعه لاني بطلع
عضت شفتها بقهر وتوجهت للمطبخ تدري لو ماسوت اللي يبي وش بيجيها سوت فطور سريع ورجعت للصاله حطته قدامه ناظرها وقال بأمر : اجلسي كلي
جلست غصب عنها وبدت تآكل بدون نفس ناظرته وقالت برجاء : الله يخليك مشاري بكلم اختي الله يخليك
مشاري بلا مبالاه : اذا جيت فَ الليل خليتك تكلمينها هذا مو وقت مكالمات
انقهرت وسكتت تحبس دموعها ماتقدر تعترض ماتقدر تقول شي رفعت راسها وهي تتذكر : طيب ابي اروح السوق محتاجه اغراض وملابس جديده
مشاري : اكتبي الاغراض اللي تبينها وانا باخذ داليا ودانا للسوق وبخليهم يشترونهم لك اما انتي لاتحلمين تطلعين
ناظرته بحقد ووقفت اخذت ورقه وقلم من عَ الطاوله ومن قهرها كتبت كل شي تحتاجه وماتحتاجه ناظرها وكتم ضحكته واضح مقهوره : شوي شوي على القلم بينكسر
طنشته وكملت كتابه لين عبت الورقه ومدتها له : خذ ومابي ولا غرض ينقص سامع كلهم احتاجهم
ناظر الورقه وهو يقراء المكتوب رفع حاجبه : اممم تحتاجين ادوات خياطه
قالت بتوتر : ايه اخاف احتاج اخيط ولا شي وماعندي لاخيوط ولا ابر ولا شي
مشاري : وتحتاجين مكياج وانتي صار لك مدري كم شهر ماشفت ذرة مكياج فَ وجهك
عبير بتأفف : ايه احتاج ومالك دخل جب الاغراض وانت ساكت
مشاري وقف وطوى الورقه وحطها بجيبه : اوك ولا تحسبين بهالحركات بتنتقمين ترا فلوسي تغطيك وتغطي اهلك كلهم ولو بغيت ماجبت لك هالاغراض بس بمزاجي بجيبهم باي ياحلوه
طلع وصفق الباب وراه تنهدت بضيق " هذا وش ينفع معاه اففف بس "