الغنيه والفقير خيال عراقي عاطفي

البارت الثالث

.... ماهر....
بعد ماخلصت شغلي وي المدير ( ابو فرح ) طلب مني انتظرة فد شويه حته ايجيبلي اوراق ادرسهن ايخصن الشغل بيني وبينكم جنت مشتاق اشوف فرح رفعت راسي والكاهه تباوعلي من باب غرفتهه وعرفت هيه معجبه بيه اجت يمي
فرح : شلونك ماهر
ماهر : بخير وانتي شلونج
فرح : اني زينه ع الخير ع الشغل وي بابا
ماهر : اشكرج خير الصابني يصيبج .. ليش ماتقرين غير عدج امتحانات كسولية 😉
فرح : شحدك اني كسولي انه العام عدت معدلي ٩٠ 🤨 وانته تكلي كسولي
ماهر : شبيج اشاقه وياج ليش زعلتي 😅
فرح : انه ماازعل بس من الناس الي احبهم 🙄
ماهر : شنو قصدج يعني تحبيني
فرح : يحححح لالا استحي لاتحجي هيج حباب
ماهر : شنو لالا اشوفج كل مااجي تباوعيلي
فرح : شنو حرام اتباوعلك 😆 يجوز تذكرني بشخص عزيز
ماهر : ها منو هذا الشخص العزيز يجوز اعرفه
فرح : ماتعرفه
ماهر : اوك هسه انتي شرايده
فرح : رايده سلامتك
ماهر : اريد اطلب طلب منج ممكن
فرح : اذا اكدر ليش لا كول شنو طلبك
ماهر : اريد اخابرج اليوم ممكن
فرح : شنو المناسبه
ماهر : عدي موضوع احجي وياج
فرح : احجي هنا
ماهر : مااكدر اله بالتلفون
فرح : اوك اطيني جهازك
...... فرح .....
اخذت جهازه ومامصدكه طلب يخابرني وااااو شعور يخبل حسيت بسعاده لاتوصف سجلت رقمي وكتله احفظة يمك انه رايحه لغرفتي دخلت غرفتي سمعت بابا اجه وسولف وي ماهر وطلع من بيتنه
..... ماهر .....
اليوم انه حيل جرئ طلبت من فرح رقمه وطتنيا واليوم اتصل بيهه اخذت جهازي وسجلت رقمهه وراحت انتضرت شويه اجه المدير اطاني الاوراق ورحت للبيت .
صارت الساعه ب١٠ ونص متردد اتصل بفرح بعد التفكير الطويل قررت اتصل ...
ماهر: الووو
فرح : اهلا ماهر
ماهر : شلون عرفتيني
فرح : مااطي رقمي لاي واحد غريب غيرك
ماهر : يعني انه غريب
فرح : ماهر كول شنو موضوعك حته اروح انام
ماهر : اذا منعسه خليهه ع غير يوم
فرح : لااحجي بعدني ماانام هسه
ماهر : اكو كلام بداخلي اخاف احجي اخاف اخسر
فرح : شنو نوع الكلام
ماهر : مشاعري من اول يوم الي شفتج بي حسيت بشي غريب اتجاهج
فرح : شحسيت بالله
ماهر : اني معجب بيج فرح بس جنت خايف احجي هالكلام لان تعرفين الفوارق الماديه بيناتنه
فرح : ماعرف شكلك ماهر صدمتني
ماهر : فكري براحتج لاتردين خبر هسه
فرح : اوك باجر اردلك خبر باي
ماهر : الله وياج ... سديت الخط خفت حيل من كلامهه احسهه رافضتني بس ليش جنت حاس بيهه معجبه بيه شلووون فشله ياربي بسلا اتكل لابوهه المدير ويفصلني وارجع من الصفر للعماله .. خل انام وباجر الله يحلهه ..
.... فرح .....
من سمعت حجيه وياي فرحت وبنفس الوقت حسيت بشعور مو حلو على كولته فوارق ماديه واهلي من سابع المستحيلات يوافقون بي من انسد التلفون خليت وجهي ع المخده وابجي ماعرف ليش كلبي هيج يدك قوي شعوور غريب الله اليستر من باجر
في اليوم التالي ...
.... ماهر ....
بينما الصباحُ الجميل واشراقة شمسٌ لايُملُ ضوؤها استيقضتُ على صوتٍ كُله شجن من اغاني فيروز ...
كعدت سبحت وكويت ملابسي لان تعرفون بعد موظف مو مثل قبل اطلع كلي وصخ كملت كوي رحت تريكت يم ست الحبايب ...
ماهر : صباح الخير يووم
خديجه : هلا بروحي صباح الورد مهوري
ماهر : اليوم كله فيروز شكو 😊
خديجه : والله يمه صوت فيروز بس الصبح ينسمع بغير وقت موحلو 😄
ماهر : هههههههه اي والله يمه
خديجه : يمه ماهر اريد احجي وياك بسالفه
ماهر : اي يمه سولفي شتحتاجين كولي
خديجه : يمه انته هسه الله فتحهه بوجهك وتعرف انه وحدانيه بس انته الي واختك بعدهي زغيره واريظ من يساعدني
ماهر : اي .. عليمن تلمحين يووم
خديجه : يمه اريدك تزوج ... بت خالك زهراء خوش بنيه وحلوة وفاهمه واهم شي شايله البيت شيل ولايكتلك البنيه وهيه هم رايدتك انه دوم احسه تباوعلك ومن اروح تسالني عنك وتكلي سلميلي عليه
ماهر : يمه سدي الموضوع هسه انه بعدني مامثبت رجلي بالشغل ومامفكر بالزواج بعدني
خديجه : يمه فكر زين وردلي خبر
ماهر : ماشي يوم يالله مع السلامه رايح للشغل
خديجه : الله يرزقك يمه ويوفقك بشغلك
.... ماهر.....
امي سولفت وياي بخصوص الزواج انه بياحال يووم وانه كلبي رايد فرح .. طبعا هاي زهراء هيه اكبر مني بكم سنه ولازكه عليه حته ضليت ماروح لخوالي بسببهه اني مااطيقهه وامي تكلي حلوة وين حلوة يمه غير جنهه خالي مزين شواربة 😂 ...
وصت للشركه دخلت مكتبي طلعت الاوراق الي اطانياهن المدير امس بيهن معلومات كامله عن كل العُملاء بيهن ارقامهم وعناوين مكاتبهم وبشنو جانو يتعاملون وي شركتنه حسب نوع السلعه لان شركتنه متنوعه بسلعهه تصنع قطع غيار للسيارات والدراجات واكو قسم خاص للاجهزة النقاله ..
رحت لقسم السيارات ورحبو بيه عرفوني المحاسب الجديد ردت نموذج من المكائن ويشدونهه الي بداخل السياره نفذو الي ردته واباوع بعيونهم نظرة استغراب طلبت من موظف يسوق السياره حسيتهه تردد دخلت السياره اني وبديت اسوق بعد خمس دقايق نزلت تلمست المكينه حاميه ولو باقي اكثر يمكن مفجورة عليه طبعا عصبت عليهم وصيحت عليهم حته يعالجون المشكلة بأقرب وقت ممكن .
رحت لغرفة المدير وحجيتله الي صار
ماهر : شلونك استاذ
المدير : اهلا استاذ بشر اشسويت
ماهر : عرفت ليش العملاء لغو تعاملهم وي شركتنه بسبب الصناعه الرديئة
المدير : شنو تقصد صناعتنه كلهه تشهد عليهه
ماهر : .......... هذا الي صار هسه وتكدر تتاكد حضرتك بنفسك وانه طلبت منهم يحلون المشكلة بأقرب وقت
المدير : مستحيل ... هسه عرفت ليش ... ماهر اريدك انته تشرف على المصنع الخاص بالشركه
ماهر : تدلل استاذ
وطلعت لكيت السكرتير سعد كاعد
سعد : هلو استاذ ماهر
ماهر : اهلا استاذ سعد ... يااخي من اصبح بوجهك لازم اصير كارثه 😂🤣😁
سعد : ياستار ياربي شمسويلك 🙄
ماهر : اذا ماتشتغل عدل هسه افصلك سمعت لو لا 😆😁
سعد : الحد هسه محترمك اتروح من يمي لو اشوي على اذانك بصل من الصبح 😐
ماهر : هههههه بسيطه سعيد رايح ومن يجي موعد الرواتب عود تعال
سعد : ماهر الذهب انته نور الشركه من تجي هيج الشركه اضلم 😂 قصدي تنور بوجودك 😁 اشعدنه غيرك احنه
ماهر : ههههه خوش انه اضلم الشركه ....
طبعا سعد صار صديقي وميانتنه قويه لان هوه اقرب اكثر واحد اشوفه
رحت لمكتبي
...... فرح....
اليوم لازم ارد خبر لماهر كلت لازم استشير صديقتي الانتيم حوري خل اتصل عليهه
طوووووووط ردي ولج حقيره
حوراء : الو
فرح : وجعه ليش تتاخرين اله تردين
حوراء: وجعه ابطنج ولج جنت اقره
فرح : لج حوري اريد احجي وياج بشغله بيناتنه
حوراء : ياستار ياربي خيرج فروح
فرح : بخصوص ذااك الشاب الي شفتي عدنه ذاك اليوم تذكرتي
حوراء : اي شبي ولج بسلا صار شي بيناتكم
فرح : صارحني كالي معجب بيج
حوراء : ههههههه تشاقين
فرح : والله مااشاقه كلت اخابرج تنصحيني شسوي
حوراء : شوفي حبيبتي انتي حالتج ميسورة وهو فقير اكيد فكر كال اخليهه تحبني وتصرف عليه
فرح : لا والله ماهر مو من هذا النوع حوري هوه اصلا جان مستحي يكلي لان اكو فوارق ماديه
حوراء : والله فرح لاثقين بأحد وروحي اقري ولاتفكرين بشي ثاني مستقبلج اولا والزواج ثانيا ...
فرح : اوك حبيبتي باي
حوراء : بايات فوفو 😉
من سديت الجهاز وي حوري رحت كملت قرايتي ونسيت انه اطيت موعد ارد الخبر اليوم .. تعشيت ونمت .. واني عندي طبع متعوده اخلي جهازي صامت وانام ....

@ اركان الشطري
&&&&&&&&&&&&&&&&&&&&&&&&&&&&&&&