فهد : انت اذا قلت لامي وعرفت كل شي جيب بدر هنا مع ام بدر
بوفهد : هه وانت تتوقع امك راح تسمح بشي هذا .. راح تطفر ام بدر وتضايقها وام بدر مره طيبه كافه خيرها شرها .
فهد : صدقت يبه .. والله صعبه بس ما اعتقد ان امي راح تسكت وتخبي هذا الشي عن غنا
بوفهد : انا اقدر احل الموضوع هذا
فهد : شلون يبه
بوفهد : بعدين تعرف
فهد : اوكي بس يبه مو الحين تخبر امي بعد ماتخف
بوفهد : امك راح تنتظر هي بنفسها راح تسألني اذا انا ماقلت لها
فهد : ان شاء الله تعدي على خير
-----------------------
" كانت غنا تحاتي ام فهد وبنفس الوقت تفكر في نظرتها لها لما دخلت المكتب .. كانت نظره كلها حقد وعصبيه .. ( شنو الشي الي سويته وعصبها للدرجه هذه .. للاوراق الي بأيدها علاقه ؟ او يمكن فهمت نظرتها غلط ... تدرين شلون ياغنا بطلي تفكرين بتفكير سلبي ) وبسرعه طردت هالفكره من راسها وعشان ماتجلس دقت على ساره وقالت لها راح تجي تزورها الي خلا ساره تستغرب لان غنا مامره سوتها "
" راحت غنا تستأذن من عمها دقت باب المكتب وكن فهد طالع من المكتب "
فهد: ها غنوءه شلونج ؟
غنا : الحمدلله انت وينك ماتنشاف
فهد : اشتقتي لي
غنا : على طول نشتاق لك ماتخلينا نشوفك
فهد : من اليوم ورايح بتشبعين مني
غنا : ليش شمعنى
فهد : الشركه بتصير فيها صيانه وخصوصا مكتبي وبشتغل حاليا في البيت
غنا : ههههه يعني لاحقك الشغل للبيت
فهد : كل ماتشتاقين لي طلي علي
غنا : اصلا راح اطفرك لحد ماتكره الشغل
فهد : اكيد تبين ابوي صح
غنا : انت دايما تقرا افكاري
فهد : وين اقرا افكارج انتي جايه مكتب ابوي يعني تبين تكلمينه
غنا : بستاذن منه عشان اروح بيت ساره
" لما جابت غنا طاري ساره فهد تمنى انه توصل سلامه بس مايقدر في مثل وضعه .. هو بنفسه مايدري ليش يفكر فيها كلها مرتين الي شافهم فيها بس هالمرتين كانوا كفيلين يخلون فهد يفكر فيها والاكثر من هذا كلام غنا عنها .. فهد كثير يتمنى صفات مثل صفات ساره .... بس ماباليد حيله "
فهد : تفضلي
" دخلت غنا واستأذنت من عمها "
" طلعت غنا الحديقه تنتظر بعد ما اتصلت بالسواق عشان يوديها .. وكان يوسف فاتح النافذه من فوق لان يوسف متعود يترك النافذه مفتوحه ومر بالصدفه وشاف غنا لابسه عباتها .. نزل على طول لان فهد لايمكن يترك غنا تروح بالسواق حتى لو كانت الخادمه معاها "
سمعت غنا صوت السياره وافتحت الباب بتطلع
يوسف : غناااا
التفتت غنا وراها وبصوت خفيف : يوسف
يوسف : وين رايحه ؟
غنا : بطلع
يوسف : مع السواق ؟
غنا : ايه وباخذ الخادمه معاي
" طلع يوسف برا وقال للسواق شوف شغلك غنا ماراح تجي معاك "
غنا : انت ليش تتدخل صديقتي تنتظرني
يوسف : انا بوصلج
غنا : يوسف مايحتاج خلي السواق هو لايش ياخذ راتبه
يوسف : بس في حاله وحده تركبين معاه اذا كنا احنا معاج .. يلا اطلعي انا بوصلج
" ركبت غنا السياره وهي متنرفزه من تصرف يوسف "
يوسف وكأن يقرا افكارها : مالي حق اخاف على اختي ؟
لفت عيونها عليه بدون ماتلتفت ولا تتكلم وهزت راسها بالايجاب
ابتسم يوسف ابتسامة عريضه بينت غمازاته الخفيفه : خلاص اجل لاتفكرين ابي افرض رايي عليج
غنا تطالع في وجه يوسف اول مره تنتبه لغمازاته
يوسف :في شي بوجهي ؟
غنا التفتت في الجهه الثانيه وتكلم نفسها : بس اطالع في وجهه قال في شي بوجهي <<< تقلد صوته
ضحك يوسف : انا ادري عنج
غنا : لا بس اول مره ادري ان عندك غمازات
يوسف : احم احم في بالج بس انتي عندج غمازات
غنا : اقول لاتغتر علينا ..
يوسف يأشر على نفسه: كل هالوسامه وماتبيني اغتر
غنا : ياربي انت واحمد ميتين على عمركم
يوسف : شنسوي اذا الله معطينا جمال
ضحكت غنا : الله يعين حرميكم عليكم
يوسف : قولي يابختهم فينا .. يلا انزلي وصلنا .. واذا خلصتي لاتدقين على السواق اتصلي علي او على احمد او فهد
غنا : ان شاء الله .. يلا مع السلامه
يوسف : في امان الله
" غنا وفي داخلها كانت فرحانه ان يوسف كان طبيعي معاها وفعلا مو زعلان "
--------------------
