بعد شهرين
" خلال الشهرين الي راحوا كانت غنا اغلب الايام تكون بيت ام بدر ..وبدر سوا عملية العامود الفقري وكانت ناجحه درجة اولى عدلت من اعاقة ظهره .. بس الي سائت حالته الصحيه هو بوفهد بسبب ضغوطات الحياة .. اما بالنسبة ليوسف وغنا كانوا متفاهمين كثير كثير... لما غنا عطت عمها رايها بالموضوع وانها مو موافقه حاليا ويمهلها بس لما تخلص السنة هذه وبعدين تفكر بجدية احترم رايها وخصوصا انها اعطته الثقة .. ويوسف نفس غنا ماكان مستعد حاليا للزواج بس كان مرتاح لان تأكد من مشاعر غنا وخصوصا انها فهمته ان الرفض مؤقت ,, اما بالنسبة لأم فهد فتركت الموضوع لوقته لان في الوقت الحالي شايلين فكرة الزواج لكن قسوتها على غنا تزيد يوم عن يوم لانها صارت اقوى من قبل وماتسكت عن حقها بذات اذا غلطت ام فهد على اهلها "
في ايطاليا
ام طلال : ليش تأخرتي ياغنا وماقلتي لي قبل ؟
غنا : اسفه خالتي ماكان سهل علي اقولج وهو كان مريض خفت ان يصير فيه شي قبل لاتشوفينه وتزعلين عليه
ام طلال : يعني لا سمح الله لو صار له شي ماقلتي لي
غنا : ماكنت اعرف شنو ممكن اسوي وقتها
ام طلال : والحين هو وينه وشلونه ؟
" وخبرت غنا خالتها بكل الي صار البدر وهي تفاجئت كانت تعرف بحمل اختها بس بوفهد قال لها ان مات .. هذا الشي حز في خاطرها من بوفهد وكيف كذب عليها كان ممكن هي تاخذه بدل مايرميه بدار الايتام .. "
----------------------------------------------
بيت بوفهد
" بعد ماقفلت غنا عن خالتها حست براحه انها قالت لها ولو انها كانت زعلانه منها بس كانت متأكده ان راح تفهمها .. مسكت كتابها عشان تكمل مذاكرتها وانشغلت فيه .. وبعد 3 ساعات من المذاكرة المتواصلة حست انها تعبت قفلت الكتاب وطلعت عشان تسوي لها نسكافيه وتقدر تتابع مذاكرتها "
لما كانت طالعه شافت احمد نازل من الدرج .. احمد ويوسف ماكانوا عارفين ان غنا موجوده لانها في ايام الاختبارات في الاسبوع الي راح ماجات ابد
غنا : احمد
التفت احمد واستغرب ان غنا كانت موجوده : انتي هنا ؟؟
غنا : أي وين كنتوا انا جيت العصر وماشفتكم
احمد : كذا تقطعينا مره وحده
غنا : كلها اسبوع .. وبعدين عشان تشتاقون لي ..
احمد : ومن قال ان اشتقنا لج
مدت غنا بوزها : افا
احمد بجديه : ولو ماجيتي يكون احسن
غنا استغربت : انت زعلان من شي ؟؟
احمد : وليش ازعل بس ارتحت وانتي غايبه
غنا : جد احمد .. انت تقول كذا ؟
أحمد : ايه وليش تستغربين .. انتي مو غنا الي نعرفها اول
غنا مصدومة : احمد اكيد تمزح
احمد : غنا انا لقيت إن امي معاها حق ..
غنا : من أي ناحيه ؟؟
أحمد : ان وجودج هنا غلط
غنا : لا لا ما اصدق ان الي قدامي احمد
أحمد بسخرية : لا تصدقين يمكن قرينه
" نزلت دموع غنا من الصدمة "
عطا احمد ظهره لغنا والتفت مره ثانيه بوجه اكثر جدية : وياليت ياغنا اذا تقدرين ماعاد تورينا خلقتج
غنا ودموعها على خدودها : احمد قولي انك تمزح
احمد : اووووه تراني مليت عن اذنج ..
مسكت غنا احمد ولفته عشان يكون قبالها : تكذب صح
احمد : يعني عشاني كنت طيب معاج ؟؟ استغربتي ؟
غنا بعدها دموعها تنزل : لا مو لهذا السبب لاني اعرف احمد
احمد : مثل ما انتي تغيرتي انا تغيرت
غنا : انا تغيرت ؟؟ قولي شنو الي تغير فيني ؟
أحمد : والله شوفي تصرفاتج وانتي تعرفين .. يلا طولت صاحبي ينتظرني برا
غنا : احمممممممد
" لكن احمد مشا وماعطاها وجه "
" جلست غنا على ركبتها من الصدمة اخر واحد كانت تتوقع منه هذه التصرف هو أحمد وجلست تبكي "
" رجع احمد عشان ياخذ مفاتيح سيارته "
احمد : خخخخ الي يشوفج مسويه مناحة يقول ميت عليج احد ..
غنا : أحمد لاتسوي كذا ادري انك تكذب
احمد : صدقتي ولا بكيفج ..
غنا : انت رجعت عشان تقولي انك تمزح
أحمد : ياربي على الثقة قالوا لج انتي احمد الي يحبه مايقدر احد صده
غنا متفاااااااااااااااااجئة من كلام احمد مو قادره تستوعب
احمد مد المفاتيح بعد ما اخذهم من الطاولة في وجه غنا : انا جاي اخذ " وحرك المفاتيح بأيده بأسلوب ينرفز "
" ولما طلع احمد راحت غنا تركض غرفتها "
" شافها يوسف وكان توه صاحي من النوم لانه رجع من الشغل تعبان خصوصا ان يوسف من لما قل وجود غنا في البيت كان يشغل نفسه كثير بالشغل والدراسة والتمارين الرياضية "
يوسف : غناااا غناااا انتي هنا ؟؟ متى جيتي ؟؟ وليش ماقلتي
التفتت عليه ومسحت دموعها : يوسف انت هنا ؟؟ وين كنت ؟ انا دقيت غرفتك ومالقيت احد
يوسف : لو قلتي لي ما نمت ..كنت نايم تعبت من كثر الشغل وكل هذا بسببج
غنا : انا ؟؟ ليش ؟
يوسف : البيت بدونج مو حلو عشان كذا لهيت نفسي بالشغل
احمر وجه غنا وماتكلمت
يوسف : طيب شفيج زعلانة ؟؟
غنا : أحمد
يوسف : شنو فيه احمد ؟؟
غنا : ما اعرف كان زعلان مني كثير ..
يوسف : زعلان ؟؟ !! غريبه طيب ماسألتيه ليش ؟؟
غنا : الا بس قالي مو زعلان انا مرتاح كذا بغيابج
عقد يوسف حواجبه مستغرب : تبيني اكلمه ؟
غنا : ايه تكفى ..
يوسف : ولايهمج بس انتي لاتزعلين .. وبعدين انتي عندج اختبار مو ؟
غنا : ايه بس مو لبكرا الي بعده
" دق موبايل يوسف .. وكان المتصل أحمد "
يوسف : هذا احمد .. هلا احمد
أحمد : يوسف تقدر تعطيني سيارتك ؟
يوسف : ليش فيها شي سيارتك ؟
احمد : تعطلت عندي في نص الطريق واخذتها عالكراج والحين محتاجها ضروري
يوسف : انا ماراح اطلع تعال اخذها
أحمد : اوكي انا جاي
يوسف : احمد أحمد
: طووووووووووووووووووووووط
يوسف : قفل .. لاتحاتين راح اكلمه
تنهدت غنا: خلاص
يوسف :طيب ماقلتي لي ليش كنتي تدورين علي
غنا : ها .. بسلم عليك
ابتسم يوسف : بس ؟؟
استحت غنا : بروح اكمل مذاكرتي
يوسف : لا تعالي جلسي معاي نشرب شاي او نسكافيه ..
غنا : اوكي
" نزلوا تحت وجلسوا بالصالة وراحت غنا تسوي النسكافيه "
" شوي الا بدخلة احمد عشان ياخذ المفاتيح "
احمد : بسرعه يوسف عطني المفاتيح
يوسف : قبل لا تطلع ابي اكلمك
احمد :بعدين يوسف مستعجل
يوسف : احمد انت ليش زعلان من غنا ؟؟
قرب احمد من يوسف وهمس له في اذنه .. وتفاجئ يوسف
يوسف : اها الحين فهمت .. بس
احمد : لا بس ولا شي ... عن اذنك
" جات غنا ومعاها النسكافيه وشافت احمد وهو طالع وسكر الباب وراه "
يوسف كان سرحان
غنا : كلمته صح ؟؟
يوسف : بصراحه ايه
غنا : وليش كذا تغيرت ملامحك ؟؟ في شي صاير وانا مادري
يوسف : مادري شنو اقولج اهو حتى ماعطاني فرصه
غنا : يعني في شي ؟
يوسف : قالي كلمه بس مافهمت كثير
غنا : يوسف لاتخبي عني شنو قال ؟
يوسف : لما افهم منه كل شي راح اقولج اوكي
غنا : اوكي..
يوسف : لا تتضايقين اكيد ماراح يكون كذا على طول بس هو زعلان شوي
" جلست غنا تفكر في كلام احمد .. وكل ماتتذكر ملامحه ..قلبها يعتصر "
غنا : ماشفت امي وينها ؟
يوسف : امي ماتجلس بالبيت اكيد طالعه مع جارتنا
غنا : حتى امي كثير زعلانه مني وماتكلمني ابد .. عندي تجرح فيني ولا انها تقاطعني .. انا غلطت كثير لما رديت عليها ماعرف شنو الي قلبني وخلاني اتكلم معاها بهذا الاسلوب
يوسف : غنا لاتلومين نفسج انتي ماغلطتي وكان لازم تردين عليها .. امي الله يهديها حملتج ذنب انتي مالج فيه
غنا : يوسف انا حاسه ان وجودي في البيت صار يضايق اغلب الي بالبيت .. حتى فهد ماعاد يكلمني مثل قبل
يوسف : فهد عنده سبب بس ما اقدر اقوله .. اعذريه وبعدين ما يكفيج أنا
غنا : اخاف تصير ضدي في يوم من الايام
يوسف : غنا انا قلت لج اياها قبل لو يتخلى عنج العالم كله انا ماراح اتخلى عنج شيلي هالفكره من راسج
ابتسمت غنا بخجل ( لو انت تتخلى عني يمكن اموت ) ...
غنا : بس خوفتني فهد فيه شي
يوسف : وعدته اني ما اقول
غنا : اوكي .. وهبه وينها انا اصلت فيها وماردت
يوسف : هبه بتتعشى بيت اهلها
------------------------------------------------
