تمنيته ماينساني

البارت16

بعد ماشافت غنا الهديه طلعت من الغرفه عشان تروح تشكر يوسف .. بس لما دقت الباب مارد لان ماكان في احد بالغرفه
غنا : راح الشغل ؟؟ بس اليوم الخميس ما اعتقد .. يمكن يجري بالحديقة
" وهي نازله من الدرج التقت بهبه الي كانت طالعه من شقتها "
غنا : صبح الخير هبه
هبه : صباح النور .. صاحيه بدري
غنا : لا وين بدري تعودت اصحى كل يوم بالوقت هذا
هبه : طيب وين نازله ؟
غنا : بروح افطر ..
هبه : انا بعدني مافطرت وفهد بعده نايم بفطر معاج
غنا : اوكي خلينا ننزل نسوي الفطور
هبه : اوكي بس تركت بعض الصحون ماغسلتها بغسلها وبنزل بعد شوي
غنا : اوكي انا بسوي الفطور على ماتخلصين
" طلعت غنا الحديقة وفعلا كان يوسف يجري .. جلست غنا على الطاوله تحت المضلة تنتظره يخلص .. ويوسف ما انتبه لها وبعد" 5 دقايق " كان يوسف تارك المنشفة على الطاوله الي جالسه فيها غنا .. ولما شافت غنا يوسف جاي مدت له المنشفة "
يوسف : انتي هنا ؟؟ من متى ؟
غنا : شفتك تجري وماحبيت اقطعك .. قلت لما تخلص
يوسف :يعني طالعه عشان تكلميني ؟
غنا : ايه
جلس يوسف على الطاوله : خير
غنا : لا بس حبيت اشكرك
يوسف : تشكريني ؟؟ على شنو
مدت غنا ايدها وافتحتها وكان فيها العقد : على هذا .. وانك مانسيتني
ابتسم يوسف : هذا شي بسيط .. انتي فكرتي اني نسيتج جد؟؟!!
غنا : بس انت تذكرتني ومانسيتني على العموم اصلا حتى لو ماجبت لي شي ماراح ازعل
يوسف : هذا لان ماعندج اهميه لي عشان كذا ماتزعلين اني ماجبت لج شي .
غنا : يوووسف من جدك تتكلم .. انت .... " وسكتت "
يوسف : انا شنو ؟
غنا : انت للحين مو عارف قدرك عندي .. ودايما تحط في بالك انك اقل من... " وقبل لاتكمل
يوسف : لاتكملين يا غنا .. مابي اصير مثلهم
غنا تفاجئت : كيف يعني يوسف مافهمت .
يوسف : غنا انتي تشوفيني اتصرف معاج مثل احمد وفهد ؟
غنا متفاجئه : مافهمتك ... بعدين نكمل بروح لهبه تأخرت عليها وانا وعدتها اني اسوي الفطور
يوسف : انتي تتهربين .. اوكي روحي
غنا مرتبكه : تبيني احسبك معانا
يوسف : لا انا فطرت

" كانت هبه تراقبهم من فوق .. ( هذه شكلها ناسيه انها بنت عمهم مو اختهم .. انا لازم اكلمها ماراح اخليها تتكلم مع فهد على راحتها وتمشي كذا على راحتها بس مو الحين لازم اصبر شوي ) "
" دخلت هبه المطبخ وماكانت عارفه تسوي شي حست بتوتر داخلها وجسمها كله يرجف مو قادره تستوعب كلام يوسف "
غنا ( معقولة يوسف !! لالا ليش افكر كذا اهو ماقالي هذا الكلام بس شنو كان يقصد انه مايبي يصير مثلهم وتصرفاته مو مثلهم .. جد مو فاهمتك يايوسف )
" دخلت هبه المطبخ وشافت غنا سرحانه تفكر "
هبه : غنا جهزتي الفطور ؟
غنا : الحين بجهزه
هبه : ليش انتي ماكنتي بالمطبخ قبل شوي ؟
غنا : لا كنت مع يوسف
هبه : وانتي عادي تجلسين معاهم ؟
غنا استغربت من سؤال هبه : ليش فيها شي ؟؟ هم اخواني تربيت معاهم طول عمري
هبه : اممم سوري يعني مادري لان يمكن غريب علي شوي
غنا : طيب تعالي ساعديني في الفطور
هبه : اوكي
-------------------------
" طلع يوسف على غرفته واخذ شور .. وكان يفكر في الي صار قبل شوي كان شعوره مختلط بين الفرح والخوف وتغلب على هذا الشعور شعوره بالخوف .. ( هل غلطت اني بينت لها او بالعكس ؟؟.. خلاص ماعاد فيني انكر شعوري اتجاهها ولا في أي حل اقدر انساها او ابدل مشاعري .. " وحط قبضة ايده على قلبه " هذا غلبني .. 10 ايام كانت كفيلة تخليني اتأكد اني ما اقدر استغنى عنج ياغنا "
-----------------------
غنا ماكانت عارفه تاكل ولا تحط اللقمة بفمها
هبه : صاير شي غنا ؟؟ كنتي طبيعيه قبل شوي
غنا : لا بس احاتي بدر
هبه : اممم بس لاحضت انج لما جيتي من عند يوسف كنتي متوتره قالج شي ؟
غنا : ها لالا يوسف ماقال شي عادي
هبه : طيب غنا حابه اكلمج بموضوع
غنا : تفضلي
هبه : انتي امس صرختي بوجه خالتي لازم تعتذرين لها
غنا : اعتذر لها ؟؟!!
هبه : أي انتي غلطتي هذا قلة احترام .
غنا : هبه رجاء هذا شي خاص بيني وبين امي
هبه : يعني انتي تشوفيني اني تدخلت ؟؟ انا كنت حابه اصلح بينكم هذا قصدي
غنا : لاتزعلين مني هبه بس انتي ماتعرفين شي مو عايشه معانا
هبه : طيب كلميني شوي عن هذا البيت انا احسه كل اسرار وفهد مو من النوع الي يحب يكلمني عن هذه المواضيع
غنا : هبه قلتيها هذه اسرار وانا مو من حقي اني اتكلم عنها
هبه : بس انا صرت من هذا البيت
غنا : اكيد بس كل شي يتوضح مع الايام .. وترى لايروح فكرج بعيد مافي شي اسمه اسرار بيتنا حاله حال أي بيت
هبه : طيب على راحتج انا بس حبيت اكون قريبه منج وناخذ على بعض
ابتسمت غنا : حتى انا هبه صدقيني بالعكس انا مابي يصير معانا غير كذا
" نزلت ام فهد وشافت هبه جالسه مع غنا يسولفون وكانوا مندمجين وماحسو فيها "
ام فهد : صباح الخير
غنا وهبه : صباح النور
هبه : تعالي خالتي افطري معانا بعدنا مافطرنا اخذتنا السوالف وما اكلنا
ام فهد : لا انا باخذ دواي وبفطر بعدين .. افطروا انتوا
هبه : على راحتج
غنا : يمه لازم تاكلين قبل لاتاخذين الدوا
ام فهد : مايخصج هذا لاتسوين فيها مهتمه
هبه : خالتي صحيح لازم تمشين على وصفة الطبيب
ام فهد : خلاص عطيني أي شي
هزت غنا راسها مستنكرة حركة ام فهد الي مالها داعي
-------------------------------
في بيت بوعبدالعزيز
ريم : ماما
ام عبدالعزيز: هلا صحيتي بدري شعندج
ريم : تدرين الدوام يخلي النوم يتظبط .. يمه شرايج نزور بيت ام فهد احنا ما اخذنا هدية للمعاريس
ام عبدالعزيز : أي ذكرتني .. فشله والله
ريم : ماطاف الوقت هم كانوا مسافرين وتوهم جاين قبل اسبوع بس
ام عبدالعزيز : والله فكره .. انا بتصل بأم فهد ناخذ موعد نزورهم فيه
ريم : اليوم يمه
ام عبدالعزيز : وانتي ليش متحمسه
ريم : يمه شفيج نسيتي غنا ؟؟
ام عبدالعزيز : لا غنا تنسي بس انا ماحسيتج حبيتها او ارتحتي لها
ريم : لا بالعكس غنا ؟؟ !! منو قال لالا انا وهي صرنا اصحاب
ام عبدالعزيز : خلاص اليوم اكلم ام فهد
ريم : عطيني خبر
ام عبدالعزيز : اذا كلمتها بقولج
---------------------------
في ايطاليا
" كان طلال جالس بالحديقة وجالس على الكمبيوتر عشان الدراسه وهذه اخر سنه له عشان ياخذ الماجستير في ادارة الاعمال .. كان همه الوحيد انه تمر هذه السنه عشان يروح الكويت او السعودية .. "
ام طلال : طلال انت ليش ماتهتم بصحتك لانوم ولا اكل ولاراحه
طلال : يمه انا مرتاح جذي ابي اخلص دراستي بتفوق عشان استلم شهادتي واروح اشتغل السعوديه
ام طلال : مو المفروض تقول ابي اروح الكويت
طلال : لا لأني معزم على شي منزمان افكر فيه
ام طلال : اكيد شي يخص غنا مو
طلال: ايه يخصها انا راح اتقدم لها .
ام طلال : تتقدم لها ؟؟ من غير ماتعرف رايها
طلال : ابيج انتي تساعديني وتكلمينها ..
ام طلال : وانت مو خايف انها ترفضك
طلال : هي ماتفكر الحين بشي هذا الي فهمته وما اتوقع ان في احد بقلبها ولا كان قالت لي .. بس هي رافضه شي اسمه ارتباط مو رافضتني لذاتي ..
ام طلال : انا راح اكلمها .. واشوف
طلال : مابيج تكلمينها الحين .. اصبري شوي
ام طلال : وهذا الي راح يصير
-------------------------
" اتصلت ام عبدالعزيز بأم فهد وحددت معاها الزياره بكرا بعد صلاة المغرب .. وراحت وقالت لريم "
ريم : يمه ابي اروح السوق اليوم اخذ حلويات
ام عبدالعزيز :لا ماله داعي .. الهديه تكفي
ريم : لايمه تكفين عشان ابي اقدمه لهبه تراني اعرفها وفشله ايدي فاضيه
ام عبدالعزيز : ومن متى تعرفينها ؟
ريم : هبه تصير بنت عم صديقتي وكذا مره شفتها بالمناسبات
ام عبد العزيز: اها .. طيب بكيفج سوي الي تبينه
---------------------