ووووك عليا أم حبيبي تقري فيا
الحلقة3
بعد ما خشت هدى وقربعت الباب وريناد اللي حصلت ف رجليها معاش قدرت تنزل الا بصعوبه البنات كلهم شدوا مكاناتهم ونزلت ريناد من فوق الطاوله وكيف بتمشي لمكانها
هدى:ياقليلة الادب انتي وياها ياللي ماتتحشميش جايبينكم زمزامات هني تعاااالي تعاااالي انتي اللي كنتي ع الطاوله مربعتلي تقول تربيعة عزري ف مربوعه
ريناد:ياابله سامحينا
هدى:نسامح عيونكم صبايا قريب فايتيني ف الطول صوتكم لاخر الممر انتم ماتمشوش الا هكي بالهزايب ياللي ماتتحشموش ع وجهوكم معقوله ومقعمزتلي انتي تغنيلي هاايمه وما ادراك ماهايمه عليك جيل مغبر حني ف عمركم مادرناشي الشبر هذا صبايا الهدا اندادكم فاتحين حياش وعندهم حتي الصغار وانتم هني حركات الفرخات اللي اديرولي فيها
الفصل كله ساكت
هدى:تعاليلي انتي انزلي معاي للإداره والفصل كله يوقف نجيب عصا ونجيكم ويدير ربي نسمع صوت
ريناد:وين ياابله بالله عليك سامحيني اخر مرة
هدى:..تكشخ..قتلك انزلي وله كلمه وقلتها لازم تتنفد انزلي معاي تو نوريك اني هايمه ماهاميه
نزلت ريناد قريب تبكي وتدعي وتسحسح ع الابله ف خاطرها
وصلوا للادارة
.......
ايهم ف الخدمه مقعمز يفكر ف ريناد ويقول ف خاطره ...تو نروح ونكلمها ونشوف شن رايها ف امي عاد اليوم كيف جتهم اشبح شن جوها لكن الحمد الله ريناد بنت شاطره وعاقله وتقول نجاوب معناها مش حتحشمني قدام امي حتي لو اطور الموضوع نتكلم وراسي مرفوع
...........
الاخصائيه:خيرك ياريناد حتي اليوم منزلينك للإداره
ريناد ولا كلمه
هدى:تي هو الفصل كله خاش ف بعضه معقوله صبايا هكي مدايرات مزال والل
الاخصائيه:اسفين ياابله هدى حقك علينا وصح انتي اول يوم تجينا ومفروض الوضع مش هكي لكن اني نعرف كيف نعاقبه الفصل هذا بزايد
هدى:ولا الحلوه هادي مربعتلي فوق الطاوله مرة وحده
ريناد قريب تبكي
الاخصائيه:ريناد ياريناد محمد شن بنقول معاش عرفت تي انتي اليوم امك كانت هني وكلمت ابله منى نقصي شطانه يابنتي
ريناد:اخر مرة ياابله معاش نعاودها
الاخصائيه:خلاص ابله هدى اني حنركبلهم الفصل ونعاقبهم ولا يهمك وتخشيلهم ان شاء الله وتعطي حصتك
هدى:ساكته
.........
خشت الاخصائيه الاجتماعيه لفصل ريناد وعطتهم محاضرة طوييييله عريضه وسكت الفصل وخشت هدى
هدى:واخيرا سكتوا طلعوا كتابات اللغة العربيه اني معلمة العربي وانتي ياطالبه خودي ورقه واكتبيلي فيها اساميكم واعطيهالي ومانبيش ولا صووووت اليبرة اطيح نسمعها ...طبعا قوانيني مستكه ممنوع اميه ممنوع جو بنساوي وشاحي وشعري طايح ممنوع كلكم عندكم خلالات وطوبليات وساووا روحكم من الحوش اني هني مش فاتحتلكم مزين انتي وياها وحاجه تانيه اهم شيئ عندي الاخلاق والتهدريز والدوة الفاضيه ممنوع
أنت تقرأ
وووك عليا ام حبيبي تقري فيا 😻
Romanceمنقولة وديان الخير منحبش ننقل الا بيسم الكاتبه لانه تعبها
