#من الطفولة الي الزواج♥♥
الحلقة /1
كان عندنا مناسبة تخرج معتصم وقصي وكنا دايرين زردة جميع وملتمين العيلة كلها ونهدرزو وجو حلوو ويهبلل
كنت انا وشموسة وسحر وميسم ومروة والاء نهدرزو
قيس :ترا ديري قهوة انتي وياه قاعدت لاشغلة ولا عملة غير تقرمن
شمس :ع اساس انت تخدم في الجمارك
قيس : سكفمك وديري واسكتي
ميسم : حاضر قيسو من عنوني انديلك
قيس : تي تكمني زين شن عنوني ( بنفس الطريقة رد عليها )
ميسم انحرجت وطلعت وجهة ميتفسرش
مروة: امباه هي اطلع خلينا نكملو تو نديرولكم
طلع قيس وعدا لشباب
معتصم : شن صار وانت دزيناك تقوللهم ادقول ادجيب في الكوجينة فوق راسك
قيس متكنطي من ميسم : تي اخطاني بالله يلي يبي يمشي ابروحا
قصي : خير دعوتك عديت مفيك شي جيت قالب وجهك
عزو ( يكون ولد عمي مواليد 1995 وميسم مواليد 2003 )
عزو : اكيدة شاف الحب داخل صااح ولا لاا
قيس: شفت امك الحولة تي نفختهلي عليك فرخة مايعاا
معتصم : احم احم شن في
قيس: تي قتلهم ع القهوة قتلي من عنووني (ويعلق ع ميسم )
قصي وعزو ومعتصم : يضحكو عليه
عندنا نحن الداخل
انا نوتي في الصفرة متاع القهوة
انا : شمس حبيبتي بالله جيبي سطل الحلوياات داساتا ماما في دارها
مروة : بسم الله شن ايدير سطل الحلوبات في دار النوم العفو
انا : داسينا ع الهجوج ماجوج
عدت شمس ادجيب في السطل
في النفس الوقت عند لولاد
قصي : يامنذر وين خيط الشحن
منذر : شوفا فوق امي امبدي تشحن بيه اكيدة في دارها
قصي : باه عدي جيبا
منذر : عدي بروحك مش فاضي بيفوت عليا الشوط
قصي : ياعن شكلك تفوو وعدا قصي بيجيب الشحن وشمس كانت في الدار تحاول كيف توصل في السطل قصي استغرب من يلي يتشعبط في الدولاب وشمس كانت لابسة سروال جينز وقميص قصير لنهاية بطنها وقصي كان واقف يتفرج
شمس : حسيت ان في حد في الدار وين تلفتت القيتا قصي
قصي :شن اديري هنا انتي
شمس: جيت ابناخد سطل الحلويات
قصي : وين تو انا انزلهلك
شمس : هوينا فوق
قصي قرب ووقف ورا شمس ومد يدا بيجيب السطل وشمس قلبها بيوقف ومنحرجة قصي نزل السطل وقال:تفضلي يادريا وضحك وشمس منصدمة منا لان قليل نادر تشوفا يضحك قصي خدي الشحن ونزل مبتسم وشمس نزلت وجه احمر
مروة: خيرك تقول غاطسة وجهك في طماطم
شمس : اء لا شي بس حمو الجو
انا : حي علينا من الشباب هيا انتي وياها
سحر : تي علاش خايفين منهم تي يعدو يملحو
انا : غير هيا بسرعة
يتبع .
