ورود في تربة الجحيم / الكاتبة منال منولة

بداية الشرخ العاطفي وتطور الانفصام

الحلقة 31 **يقلك بلي الي يبقى يشوف في الماضي يقعد ديما محبوس فيه .. حالة ملك ديما تخمم في الماضي وعلى هذا الاساس قاعدة تخطط .. كانت فاتحة البيسي ودايرة جدول حاطة فيه بروقرام الخدمة .. قاعدة تشيك على السلعة الي دخلت والي خرجت حتى صونا التلفون نتعهااا ...كان مجد يعيط
ملك بلعت البيسي اهلا مجد .. وش كاين غير الخير
مجد واش الاخبار مع بنات مصطفى كاش ماقدرتي توصلي
ملك ناضت وشافت من الزجاج .. ماوصلت لوالو .. حبيت رحيم يخلي شمس طيح فيه اما خرجلي فيها وقالي مانقدرش ..
مجد بروبلام والله .. ممم عندي فكرة تهبل
ملك طلعت حاجبهااا ايه احكيلي راني نستنى ... تعرفني نرحب دما فالافكار الجدد
مجد ممم ضرك نتي ماقدرتيش تيلهم الورث واش رايكم تخلي القانون هو الي يتصرف
ملك يعني وش تقصد بالقانون ..
مجد ممم واش رايك تخلي شوية مخذرات في المصنع .. فساد لحوم فيي الفرع نتاع انقرة وهكااا تخلي القانون هو الي يدي حقك منهم ..
ملك جات تهدر حتى سمعت الفاز طاح تكسر .. حست بلي كاين واحد راه يسمع فيهاااا .. خرجت تجري تشوف شكون .. مجد ممبعد نحكو هكااا .. بلعت البورطبل وقعدت تشوف شكون الي راه فالكلوار .. اا ماكان حتى حد ..
البنات ماكانش عينهم لا فالعشا ولا في اي حاجة .. ملك كانت تلعب على اعصابهم .. على هذاك فضلو هاذ اليوم يتجنبو المشاكل معهااا .. كانت شمس الاصيل قاعة فالكوخ هربت من كامل الناس .. حتى حست بواحد دخل كي دارت شافت رحيم تبسمت معاه ..
رحيم قعد بحذاها وش راكي ديري لهنا لوحدك .. ماتخافيش
شمس هههه لا حنين شوية هاط تجي .. تونسني
رحيم شبك صباعتيه .. اهيه واقيلا مازلتي زعفانة من هدرة يمااا .. تحب برك تحكي ماديريش في بالك
شمس تبسمت وفرحت كي عاد رحيم ينتبه ليهااا .. لا مش هدرتها الي زعفتني اما كي نتفكر نتشوى .. انا عمري لاجربت حنان الامم على هذاك

·

الحلقة 32 كانو يحكو حتى بدات الشتا تطيح .. رحيم ناض وبقااا يحط فالحطب .. وشمس تشوف فيه .. شخصيتو وكاريزما الي عندو .. شوية حتى سمعو الاولاد يتجراو .. كان نظال وادم .. وعشق وسمر ونزيم وحنين .. دخلو على البرد غلقو الباب ..
نظال اوه راني نشوف الجماعة كامل راهي لهنااا هربتو كامل ..
سمر والله ماحبيت نقابل عمتي اليوم .. حسيت رح تكمل على الشء نتاع الصباح
نزيم شعل سيجار وقابلهم .. عمتك كي شغل تفوت الوقت .. بالنسبة ليهاا كي هكا تخرب فيكم تريح نفسيااا .. ايراد صفق .. هياا ملا واش رايكم نلعبو ونفوتو الوقت
حنين قاعدة بجنب المدفاءة .. مزالك صغير تحب تلعب . تعي علابالك ..
نظال اي والله فكرة نلعبو Action et verité
بدااا نظال يدور فالقرعة .. طاحت عند سمر خطارت حقيقة .. ممم وعلاش قاع العام مزيرة وجهك
سمر تبسمت ههههه كي شغل هكاا من بكري فيااا ..
جا دور نزيم بقا يدور فالقرعة طاحت في ايراد .. اختار حقيقة هو ثاني .. وش هي اخطر حاجة درتها في حياتك
ايراد دار يدو على خدوم مم مرة ضربت البروف بكرسي .. كامل بداو يصفرو ههههه
نزيم طلق بضحكة عالية .. وليد خالي مكش ساهل ...
ايراد دور القرعة طاحت في حنين ختارت جراة .. ايراد شفتي هذاك القيطار .. نحبك تغنيلنا غنية هههه
حنين طلعت حاجبهاا مايكون لاخاطرك .. حنين جبدت القيطار ونزيم يتبع فيها بعينيه .. بقات تعزف ومع كل حركة تروح وتزيد تغيس في الماضي نتاعهااا .. كانو الكل عايشين اللحظة .. حتى دخلت ملك هياا مابقاش الوقت كل واحد لشومبرتو هياا ..
الكل خرجو جات خارجة حنين شافت فيهاا بنظرة ماتعجبش وفاتت ...