مهند عرف صاير شي كلش جبير هيج خلة حالت منتضر سأل منتضر وماكو رد حب يخلي يفرغ كل الي بداخلة وبعدين يسأل منتضر واشر على ام منتضر ان تخليهم بحالهم وهية راحت
مهند: يلة احجيلي شبيك ليش هيج وضعك
منتضر: وهو يبجي ولك راحوا كلهم بيت عمي ماتو رنا وريام وعلي وعمو منذر وتارة ولك ماتو ذبحوهم الي ميخافون من الله
مهند:اهدى وفهمني منو مات
منتضر:مهند بيت عمي منذر تعرفهم الي بالموصل ماتو كلهم ذبحوهم
مهند:وهو مصدوم شنوووو شلون ذبحوهم
منتضر: كالو راح نطلع من الموصل وكتلهم ماشي وكالو بيت جوارينة ويانة راح نطلع بسيارة وحدة واضاهر لازميهم وذابحيهم كلهم
مهند: سكت ميعرف شيحجي وشيكول لان ماكو كلام بهيج مواقف السكوت يكون افضل
ورى شوية مهند حجة كالة منتضر زين والجثث وين
منتضر:مااعرف ماكو الهم اي اثر ولك راسي راح ينفجر كام يبجي ويكول البارحة حجيت وياهم ورنا وريام حجوا وياية وجنة نشاقة وكتلهم هذا الاسبوع اجيكم راحو مهند راحو شسوي اني هسة والله تعبت ومدااستوعب موتهم شلون راح اكول العمامي شلون
مهند: هذا قضاءالله ادعيلهم بالرحمة خابر عمامك حتى تشوفون وين راح تسوون الفاتحة
وراح منتضر خابر على عمامة وكاللهم عالخبر وعمة ياسر تخربط متحمل الخبر اما عمة الثاني فنصدم حيل وكام يبجي لان منذر اخو جان روحة وهو حيل قريب علي
وسووا الفاتحة بالبصرة لان عشيرت منتضر هناك ساكنين
واجوي كل اهل منتضر وجبير عشيرتهم
بعد ماخلصت الفاتحة منتضر بغرفتة ويفكر بالي صار ونزلت دمعة منة لان جان عمة منذر كلش يحبة وهو عوضة عن حنان الاب نن بعد مامات ابو ومنتضر جان كلش يحب ريام ورنا وتارة وعلي قضى اغلب حياتة وياهم ومن التفكير نام منتضر
الله يخليكم خلو بناتي والله ماعدنة احد عندي بس هذني البنات وابوهم مشلول ابوس ايدكم خلوهم اخذوني اني وعوفوهم همة
ذبحوا رجلهة كدامهة وسط صراخ البنات وامهم وبعدهة اخذوا بناتهة الخمسة وخلوهم بمخزن اخذوهم على اساس سباية الهم
والي يوزعهم الامير عالقادة
وصار الصبح وكعد منتضر من النوم وجسمة متكسر لان نام بملابسة وعالقنفة كعد وراح سبح وبدل ملابسة وهو بالة قرار واتخذة خابر على مهند وكالة اريدك بموضوع مهم وكالة مراح اروح للشركة راح اجيك للبيت ومهند كالة اوك منتضرك
طلع منتضر من البيت وراح يم مهند
مهند:شبيك منتضر قلقتني شنو الموضوع المهم الي مقبلت تأجلة
منتضر:اني اريد اطوع عالحشد
مهند:شنوو وين تريد تطوع شبيك منتضر تخبلت زين ماشي روح بس كولي شي واحد مافكرت بأمك شراح تسوي اذا سمعت بيك تريد ذب روحك للموت
منتضر: مهند هذا قرار نهائي يعني لتعب نفسك وامي اني اقنعهة
مهند: ماشي منتضر واني هم راح اجي وياك ثنينة نطوع سوة رجلي على رجلك وهم لتحاول تقنعني
منتضر:مهند مستحيل اخذك للموت وياية
مهند:مالك علاقة مثل مااتخذت قرار اني هم اتخذت قرار نهائي احنة روح وحدة مستحيل شي يفركنة وحتى الموت يانعيش سوة يانموت سوة
منتضر:ماعارض لان يعرف صاحبة راسة يابس
