صرخة يتيمة ح٧
الحلقة السابعة
عبير وصابرين ركبوا تاكسي ومشيوا، فرحانين أن الأمن أخد منهم ورقة بيانات ام صابرين..
والدكتور عمرو بيدور عليهم في الشارع مش شايفهم .. مش لاقيهم ..
رجع للأمن تاني، بيسألهم وهو مذهول، وكأنه مخطوف ذهنيا..
_ البنت اللي في الحلم راحت فين؟
_ حلم ايه يا فندم؟!
_ البنت اللي كانت في الحلم هنا؟!
(افراد الأمن بيبصوا في بعض مستغربين؛ وعمرو نفسه مش بدأ يفوق لروحه)
_ معلش معلش متاخدوش في بالكم، شكل أعصابي تعبانة.
_ الف سلامة على حضرتك يا فندم.
_ الله يسلمكم
(عمرو طلع فوق وهو بيضغط بصوابعه على دماغه، وبيتلفت حواليه يدور عليها)
.......... #سيد_داود_المطعني ... .......
صلاح رئيس الحسابات في مكتبه، وقدامه الورقة اللي الأمن طلعهاله، وفيها اسم المسجونة نجوى ام صابرين.
بيخلص ورق قدامه، وبعد كده فتح الورقة علشان يكتب الاسم والبيانات في الورق قدامه.
صلاح اتفاجئ وهو بيقرأ اسم المسجونة رباعي ... نجوى حسين عبدالله الخيشي.
_ ايه ده؟ معقول التشابه الغريب في الاسم ده ..
الدكتور عمرو مدير عام الشركة اسمه عمرو حسين عبدالله الخيشي.
أنا متأكد من اسمه، معقول تكون اخته؟! معقول يكون تشابه في اسم الاب والجد ولقب العيلة؟
انا لازم اروح اقول للدكتور عمرو عن التشابه ده، مش هخسر حاجة يعني لو قلت له..
(صلاح بيقوم من مكانه، ورايح ناحية مكتب الدكتور عمرو)
بس وقف فجأة ... متردد .. يروح ولا ميروحش..
صلاح خايف أن عمرو يزعل منه بسبب تشابه اسمه مع واحدة مسجونة بسبب كام ألف جنيه..
مستحيل تكون أخته..
عمرو ده اكيد ابن ناس اغنياء ومش هيسيبوا بنتهم تتسجن في إيصالات أمانة..
(صلاح بيرجع مكتبه، وقرر ميروحش يقول لعمرو عن التشابه)
..... #سيد_داود_المطعني....
صابرين وعبير وصلوا عند نصبة الشاي ... وشافت مفاجأة مؤسفة..
كانت شرطة المرافقة بتشيل أي حاجة ع الطريق ... ورفعوا نصبة الشاي بتاع عبير ... اخدوا البوتاجاز والانبوبة والترابيزة والكوبايات والابريق والسكر والشاي والكراسي وكل حاجة..
عبير بتصرخ، بتجري ع الظابط، بتتوسل إليه يسيب لها حاجتها .. دي مصدر اكل عيشها..
_ ابعدي يا ست انتي .. ده قرار م المحافظة برفع الانشغالات..
(عبير بتلطم، وبتجري ورا عربية الشرطة علشان تلحق تجيب حاجتها ... وصابرين قعدت مكانها تبكي)
.... #سيد_داود_المطعني .... ..
.... #سيد_داود_المطعني ......
..... #سيد_داود_المطعني ....
عمرو بيشرب قهوة في مكتبه، مش مستوعب الحلم، ومش مستوعب الطفلة اللي شافها.
بيطلع تليفونه من جيبه يتصل بمراته وعمه جلال بيه يطمن عليهم...
_ ايه الاخبار يا بسنت؟! عملتوا ايه؟
(مكالمة طويلة كانت تحكي له فيها عن رحلة الأشعة والتحاليل، وإعداد البروفيسور للعملية الصعبة دي)
في اخر المكالمة، كان جلال بيه بيفكره بالغارمات .. وبالست اللي هتجب له الورقة، وبكل الحالات اللي وصاه عليها.
عمرو افتكر الورقة .. والست بتاعت الورقة ... ووعد جلال بيه أنه يكلم المستشار القانوني للشركة يمشي فيها بنفسه..
وبعد المكالمة..
عمرو اتصل برئيس الحسابات يفكره بالست اللي هتجيب ورقة باسم مسجونة..
_الست وصلت يا عمرو بيه .. وجابت لنا ورقة باسم نجوى حسين عبدالله الخيشي ... سجينة في سجن القناطر للنساء..
عمرو سمع الاسم واترعب...
اتخض
اتفزع
كان هيتجنن
_بتقول اسمها ايه؟
_ نجوى حسين عبدالله الخيشي..
(عمرو قام من مكانه بسرعة .. واخدها جري على مكتب صلاح يشوف الموضوع ده بنفسه..
...... #سيد_داود_المطعني .....
صلاح خلاه يشوف الورقة..
_دي جابها لي بتاع الأمن من شوية .. وبيقول ست ومعاها طفلة جوم امبارح والنهاردة..
_الطفلة! هي الطفلة ... أيوة هي الطفلة.
(عمرو اخدها جري على أفراد الأمن وسألهم عنهم..
_ معرفش هما مين يا باشا .. دول ركبوا تاكسي ومسئول
(عمرو هيتجنن .. مين الطفلة دي؟ ومين الست اللي معاها ... ونجوى راحت السجن ليه؟!
عمرو طلع فوق عند صلاح..
_ احكي لي يا صلاح .. مين اللي عرف عمي جلال على البنت دي؟!
_ جلال بيه يعرفها بنفسه يا دكتور عمرو..
(عمرو طلع الفون واتصل بجلال بيه)
_ انا اسف يا عمي اني هسألك عن حاجة وانت في الظرف ده.
_ اسال يا عمرو في اللي عايزه
_ مين البنت والست اللي جابوا ورقة بيانات السجينة؟!
_ دي ست بتبيع الشاي في طريق الشركة.
_فين بالظبط؟!
_ السواق بتاعي يعرفها خليه يوصلك هناك..
_ تمام يا عمي .
(عمرو قفل مع جلال بيه ونزل جري، واتصل بالاسواق وخلاه يروح معاه ... وفي الطريق اتصل بالمستشار القانوني للشركة وخلاه يبدأ بأقصى سرعة إجراءات الإفراج عن نجوى أخته وتسديد كل الفلوس اللي عليها ... ولازم بجيبها معاه لمكتبه.)
_ معقول كل ده يحصل ... اختي تتسجن علشان فلوس ... اختي تتعذب وانا عايش؟ بس مين البنت دي؟ ومين الست بتاعت الشاي؟ ويعرفوا نجوى منين؟
....... #سيد_داود_المطعني....
انا بعتذر أن الحلقة السابعة قصيرة جدا ...
بس والله يكتب وانا في الشارع.... لاني في رحلة أثرية وقلت لازم اكتب حلقة من القصة
معلش اعذروني ... ووعد مني أن بكرة يكون الجزء طويل خالص
انتظروني غدا في الحلقة الثامنة من صرخة يتيمة
سيد داود المطعني
تصميم الغلاف محمد محمود التريكي
