احببت _ مريض _ نفسى

احببت _مريض _نفسي

الحلقه العاشره
......................................................
مصعب مصبي علي دار البنات
رنا تلبس في وشاحها ولاء توتي في شنطتها
قربت الاء من الطاوله وحطت fair&lovely
مصعب:امسحي امسحي
الاء:تؤ مافيهش شي هذا عشان الشمس
مصعب :كذابه هضا تفتيح اهو من الرسمه اللي علي الباكو باين
الاء:لالا عشان ماننسمرش
مصعب:ادهنيه مايعجبنيش تمسحيه غصبا عنك
واللا مافيش مشي
الاء:باهي
دهناته واقتنع استاذ مصعب ان مش باين
مسكت الاء الروج وتبي اتحط
مصعب:لاااااا
الاء:اوووف ياخالتيييييييي
خالتها :نعمم
الاء:امسكي ولدك
مصعب:تمسك عينها مكياج لااااا
خالتها:ههههه حتى انتي طق فيك تستاهلي ديري اللي رنا الدير فيه
مصعب:شنوو تعالي هنا ياقرده شن دايره
رنا:شي هاا (مسكت منديل معطر ومسحت وجها )
مصعب:هاا يام مافيش شي
امه:خلاص ياالاء ماعندي ماانديرلك
الاء:هههه
رنا :نمشي اندير قهوه
ام مصعب:شن رايك ياصالحه(ام الاء)نمشو انفرشو في الجنان
ام الاء:هيا
طلعن
مافيش في الدار غير الاء ومصعب ..
مصعب قرب من الاء وهيا ع المرايه وحط يديه الاثنين ع الطاوله يعني حاصر الاء
الاء برمت ووجها انحمر ومصدومه
مصعب بصوت وااطي:توا حبيب وعندك في واحد يحبك ويموت فيك الديري في مكياج ليش هاا
الاء:ومن قالك اني اندير فيه عشان الشباب انا اندير فيه  عشاني ناا
مصعب:انحبك وانموت فيك وكل يوم نعشقك اكثر انتي وحركاتك الطفوليه
الاء:توا نتاخرو
مصعب:لوكان هضا سبب تاخيري طز
الاء:مصعب حول
مصعب:باهي قولي حبيبي نبي نسمعها منك عارف انك حاستها وتكابري
الاء:مصصععععبببببب
مصعب:عيونه
الاء:حوووول
مصعب:حااضر
وباعد عليها وطلع ورد للدار
مصعب:وغلاتي عندك ماعاد تحطي حاجه علي وجك
الاء:حاضر
.............................................
عند رواد :
لبس وطلع وسيب حور تلبس
نزل لهله :
رواد:هيا انا جاهز
عماد:باهي اللي جهزت ياعريس
رواد:ههههه شن رايك في الستايل الجديد
عماد:يجنن طالع عليك توا انجي ناخض عندها دروس مراتك
رواد:لالا الدروس للزوج بس
عماد:توا نزوج وانخلي مراتي اتقصقصلي
رواد:هههههههه
طلعو..............
مشو لمول وخشو لمحل فيه دبش شباب وصبايا هوا محل اسمه adedas يعني دبش شباب وبنات بس للماركه هذي كل شي يخص الماركه هذي دبش شناطي أي حاجه ....
ام رواد:رواد شوف التيرشرت هضا سمح
عماد:اها انا خضيت منه ابيض خوض الاسود
رواد:لالا اسود لا حور تقتلني هههه
عماد:وشن دخلها حور
رواد:ماتحبش الالوان هذين نبي ناخض واحد دمي
امه:هاا حتى الدبش خشت فيه الاخت حور
بعدين مشو لمحل الذهب قعدو يختارو عماد وامه اما رواد هكي وهوا يبرم شاف اسواره هاديه بسيطه عليها ريشه بس رااقيه
رواد عجباته بس ماعمرش تفاهم مع صاحب محل وهكي قعد مرتبك ويفكر في كلام حور كيف اتشجع فيه فشاف ان لو حكا مع الراجل وشرا لها حتفرح وقعد يتوقع في فرحتها في عقله لعند مااقنع روحه وبرم علي صاحب المحل ولاول مره يحكي مع وحدين في اماكن فخمه زي هذين
رواد:معليش
امه وعماد بحتو فيه يبو يعرفو شن يبي يدير
ص.م:تفضل
رواد:نبي الاسواره هذي
ص.م:حاضر دقيقه (وطلعها له )
رواد:بكم
ص.م:ب 3000
رواد ابتسم :معاي كرت
ص.م: عادي تقدر تدفع بيه
رواد:باهي تفضل
ص.م:انغلفها لك
رواد:تمام احسن
امه :شفت هاا قعد يصرف عليها بالالف
عماد:ياامي مراته يعني لو انا بكرا شريت لمراتي حاجه هكي تبي الديريلي
امه:لا انت غير ياعماد بس هيا اهي لاعبه براسه كانت بنت فقر لقت عز انت مراتك جايه من عز
عماد:ااااااخ منك المهم شوفي خوي متريح ويضحك ويحكي
امه:اووووووف هضا اللي مصبرني بس
................................
عند حور:
مصعب:ها خلاص كملتن
حور :اها بس يامصعب حطني عند عياده ال......... وانت امشي
مصعب:لو تبي انراجيك
حور:لالا توا انكلم الشوفير يجيني نبي الدكتور النفسي ل رواد
مصعب:رواد مزلت ماتعرفت عليه تصدقي
حور:هوا اصلا مش بتاع هدرزه اهو دوبه بادي ينطلق
مصعب:باهي شنو معاك سمعت انه عصبي
حور:بس بسرعه مايهدى
مصعب :المهم ضرب لا واهانات وهزايب لا
حور:لالا ماتخافش لا ضرب لا هزايب بالعكس ديما يقولي لما انعصب خشي واقفلي عليك الدار لان لما انعصب مانفطنش لروحي شن اندير بس انا مايهونش عليا منظره يقطع القلب يامصعب
يقعد يرعش وعيونه ذابلات وبكل مقسى قلب امه تعطيه مهدئات عشان يسكت ويرقد مستحيل انخليه يرقد وهوا فيه الحاله هذي
مصعب:ربي يخليكم لبعض وصدقيني يابت خالتي كل واحد ونصيبه انتي هضا نصيبك ذقتي المر وجايك الحلو مغير اصبري خصوصا رواد اهتمي بيه شويه بس لان زمان هله ماكانوش مهتمين بيه علي كلام خالتي
حور:اها صح مش مهتمين بيه لالا بس يعني يجيبوله ايباد بليستيشن نت تليفون بس مش لاقي مع من يطلع يحكي يضحك يغير جو قعد انطوائي
مصعب:باهي الله يقدم اللي فيه الخير
حور:والعقبالك انت قالو تحب (وبحتت في الاء من الجنب وابتسمت )
مصعب:انا مش طايح بوجي نا طايح بجسمي كله ملصق تلصيق
حور:ربي يخليكم لبعض
.....................................
الدكتور:شو مدام حور جايه لحالك
حور:اها هوا طلع مع خوه عماد وامه وانا انتهزت الفرصه وجيت
الدكتور:هوا بيعرف
حور:انا قتله اني طالعه للسوق وتوا كنت في السوق بس شفت ان الوقت مزال بدري فجيتك عندي كم سؤال
الدكتور:تفضلي
حور:دكتور انا قريت الاوراق ليش نفس الاسئله ؟
الدكتور:شوفي مدام حور احنى ضروري نعرفو مين بيحب والاحتمالات اللي ممكن يعملهن يعني احنى سئلناه مين بيحب هوا قال حور يعني هوا بيسمع منك وبيفهم منك فمشان هيك انتي اللي بتكوني الوسيله المساعده النا .وقلنالو كمان لو راحت وتركتك شو بتعمول وكانت ايجابتو انو ممكن ينتحر يعني هالشي بالنسبالنا فيه خطر كبير يعني احنى بنخاف عليه كتير ممكن يعمل اشي بحالو لانو مو انسان طبيعي هوا مريض بس مو مبين عليه
حور:باهي دكتور مفيش حاجه اتخفف الحاله اللي تجيله
الدكتور:للاسف الى الان للي بتجيله الاعصاب تشنج ويفقد السيطره متل الصرع بس مو الصرع يعني اللي يشوفو بيقول انو عندو الصرع بس هوا لا ماعندو وبيحكي وهوا بهالحاله مو يتشنج ومايحكي لا يحكي عادي صح
حور:اها ويصرخ اخرى
الدتور:حور رواد كتبير بيحبك لا تكسريه
حور:مستحيل اندير هكي حتى هوا امس اول ماطلعنا قالي ماتسيبينيش وكلام هكي اول ماروحت للحوش وقريت الاسئله فهمت عليش هوا هكي قال
الدكتور:اول مره بشوف رواد بيحكي بلهفه وابتسامه امس وممكن لو استمر هيك واستمر دعمك لالو ماعاد يجي هون يعني عادي  هوا هلا ماعندو ولا شي وامس حكالي كتير كلام عليك بس الورقه اللي عطيتها الك كانو الاسئله بس اسئله المقدمه
حور:شكرا دكتور اخرتك علي شغلك
الدكتور :لالا عادي معقول هيك عادي تعي باي وقت
حور طلعت وكلمت الشوفير
روحت للحوش لقتهم جايين في الصاله اللا رواد
حور:السلام عليكم
امه:وعليكم السلام كملتي نشنشه
حور:اها وين رواد
عماد:ركب فوق قال يبي يغير
حور:فرحان والله متعقد
عماد:لالا جوه يجنن ويغني ورايق
حور:ههه هيا باهي تصبحو علي خير
......................
خشت للشقه لقاته مقابلها ومربع يديه وقارن حواجبه
حور:كنه حبيبي لوطا قالولي ان رايق شن صار توا
رواد:توا الساعه 7 وين مشيتي
حور:هوا انا مشيت للسوق بس بعدها مشيت لمشوار اخرى قبل نبي اندسه عليك بس مانعرفش نرقد الليل وانا داسه عليك حاجه
رواد:شنو
حور:تعال ع الصالون ونحكيلك
رواد:ها قعدت هيا قولي
حور:مشيت لدكتورك
رواد:ليش
حور:ماكنتش نبي نمشيله بس روحنا من السوق والقيت مزال في وقت فقلت نمشي اليوم وبكرا نقعد مع حبيبي وكبيدتي
رواد ابتسم :باه مره اخرى قوليلي
حور:من عيوني اسفه
رواد/عندي لكي مفاجاتين
حور:شنو هنا (بابتسامه )
رواد :طلع باكو من الشكاره ومده لها
:هذي المفاجاه الاولى
حور فتحتها :الله حبيبي تجنن راقيه تهبل امسك لبسها ليا
(لبسها لها )
حور:تجنن نجك ليا (وباساته)
رواد:مزال في مفاجاه اخرى
حور:شنو ؟؟؟
رواد:انا اللي حكيت مع صاحب المحل مش عماد انا اللي شريتها
حور:صاااح ايوه حبيبي نبيك ديما هكي تمام ديما اطلع وهدرز ودير اصحاب تمام
رواد ابتسم:حاضر عارف انك حتفرحي فعشان هكي قتلك
حور:نجك ليا نا حبيبي كلملنا دليفري ماعنديش نيه اندير عشاء متكسره
رواد:تؤتؤ توا ننزل انا
حور:لو تعبان مفيش داعي تنزل
رواد:لالا عادي توا نلبس جاكتي وننزل
......................
رواد نزل وطلع بدون مايشوفوه هله ........
وهوا يمشي ..حاس روحي داير انجاز خاطري نمشي طريق طوييله كل يوم تحفزني اني اندير حاجه .
جاب عشا ورد للحوش لقا هله يتعشو
امه:وين كنت انت بروحك
رواد بابتسامه: مشيت لعند المطعم بروحي بدون مايصبيلي حد
امه:طاح سعدها واتقول فيها تضحك مخليتك تمشي اتجيبلها عشا كنها هذي انكلبت لا ومش مصبيتلك
رواد تلاشت الابتسامه من وجه ومصدووم
باته:خلاص صار اللي صار عدي رواد اركب فوق
امه:لا امشي خلاص صااح صار اللي صار صااح تخيل في الطريق نابشه واحد وجاته الحاله شن نقولو صار اللي صار هاا رد عليا ياصالح قول اتصبي تصفق في عزاه
رواد:اصلا انا اكتشفت حاجه ياامي تعرفي شنو
امه:هاا غرد شنو
رواد:انا الحاله تجيني اول مانقعد معاك بس
تصبحو علي خير (وركب )
استقبلاته حور من الباب
كان جوه مش تمام وخانقته العبره وعيونه حمر
حور بابتسامه:حبيبي وينك ليش طولت انشغلت عليك
رواد:كنت لوطا مع امي هاكي
حور:هيا غير علي ماحطيت
رواد:نبيش انا انتي كولي (وابتسم ابتسامه صفرا )
حور:ليش؟؟
رواد:شي بس معنديش نيه (وكان مطبس راسه يفك في الكندره (حشاكم ))
حور مسكت يده :مفش حد زعلك صح
رواد هز راسه ب اها وخش للدار غير
وحور حطت الاكل في الميكرويف وطفت عليه
...غير رواد دبشه واتكا ودار وجه شور الساس وعيونه دمعن صعب الاحساس بالخيبه لما تجي تبي تحكي علي انجاز بالنسبه لك انت درته وتتوقع رد ويجيك عكس الرد اللي كنت متوقعه كان واحد صب عليك اميه ساخنه كان واحد قالك انت لو كان الدير المستحيل حتقعد تحت اسم معاق هالشي اثر واجد علي رواد اما امه خشت في فراشها ورقدت ماحستش ولو 1% من الذنب لان بالنسبه لها اللي داراته عادي يعني مشا خطوتين شن هنا ولا حاجه ....حتى نحنا ديما نحسبو في الشي من  جهه وحده مانشوفوش من جميع الزوايا كل واحد يشوف الشي من زوايا اهتماماته .........................
حور:رودي حبيبي
رواد:ءءها
>>>>>>>>>>>>>>>>>>>>>>>>>>>>>>>#يتبع . ...................