يوم الخميس في المطبخ
ميار لابسة سورية بيضة و قونة ليكرة تحت الركبة عنابية
ناجية والله ياريما جايين نطلبو يد بنتك ميار لولدي قيس
ريما ٠ والله مانلقو خير منكم ومن ولدك قيس
عند البنات
ميار تمكيج فاها رواسي
آية ٠ محلاك ياميار كان يشوفك قيس لما يروح بيك
نور ٠ تهبلي كان انا ولد والله لما نهرب بيك
رواسي ٠ باهي سكري فمك انتي وياها عارفينها متبيش
نور ٠ تي باهي احني نحسنولها في نفسيتها
اية ٠ ميار خلاص تقبليه متندريش مرات تحبيه
ميار ٠ ايه ايه توا نحبه
اية انا بنمشي نجيب العصير والشوكلاتة بري مديهم
ميار٠ باهي بري امتى بيتم اليوم هدا
ريما ٠ ميار ميار تعالي
ميار ٠ خشت تمدلهم
ناجية ٠ مشاءالله تهبل بنيتك ياريما
ميار خدودها توردو
ريما ٠ تسلمي
ميار قعمزت ف جنبهم شوي وناضت
ناجية ٠ والله انا عاطية الموافقة من توا يا ريما
ريما ٠ به ناجية نشوفو بوها ونردو عليكم
منذر خش للمطبخ لقي نور
منذر يسحابها رواسي
منذر ٠ ياخرا بري نادي ميار قوليلها تعالي للمربوعة
نور ٠ تلفتت مصدومة انا خرا
منذر ٠ اااااا سامحيني نحسابك رواسي
نور ٠ باهي توا نديهالك كيف طالعة من الباب شدلها كتفها
منذر ٠ نور اعطيني رقمك
نور ٠ اااا علاش
منذر نبي ندوي معاك في موضوع
نور ادويه توا
منذر هو طويل شويا وتشوفي قي الحوش توا جايين خطاب
نور ٠ اها باهي سجل عندك 092••••••
منذر طلع فرحان ونور اكتر ركبت لدروج ضبحت على ميا ر
ميار ٠ حي عليا خايفة يابنات
رواسي ٠ بالله عليك نمشيلا انا نقوله تعالى اخطبني
ميار ٠ ههههه على الأساس تعرفيه انتي
رواسي٠ امس نتصفح في الفيس لقيته تي غزال مغزل الفرخ
ميار ٠ وكيف عرفتيه
رواسي ٠ لقيته قيس ال،،،،، ولقيت الكلب منذر صديق مشترك
نور ، اول ماسمعت اسم منذر سرحت
البنات لاحضاها ، نور نور نور مابتش ترد عليهم
رواسي ٠ يانورررر وجت صفرت في ودنها
البنات ٠ ههههههه
نور تحك في ودنها اهه محرها
رواسي ٠ خيرك ياخرا سرحتي اول ماسمعتي اسم منذر😉
نور ٠ آه منذر خدي رقمي توا
ميار ٠ حقا
نور ٠ والله
رواسي ٠ مالقيتي غر التيس هداكا
نور سكري فمك معاش تنبحي عليه
رواسي اشي التافها باعتني وسمعو منذر يضبح
البنات٠ ميار بري اطلعي بسرعة
طق طق طق
ميار خشت ٠ السلام عليكم
قيس قام عيونه فاهت ٠ طالعة تحفة ٠ ااااا وعليكم السلام
ميار ٠ قعمزت بعيد شوية
منذر ناض طلع
(مع ان قيس كان جميل بمعنى الكلمة لاكن ميار ع خاطر بيتزوجوها غصبن عنها مكانتش تشوف فيه قنين)
قيس ٠ميار بنسألك مغصوبة عليا انتي كنهادا عادي نوخر راه
ميار٠اأاا لالا مش مغصوبة
قيس بنضرة شك متأكدة
ميار ٠ ايه ايه متأكدة
قيس ٠ مع انه شاك فاها ٠ باهي عطيني رقمك نكلمك ف اليل
ميار ٠ اوكي عطاته الرقم وطلعت
خش منذر وقاله قيس يكلم امه تطلع
في الدار
رواسي ٠ قنين وله قنين ميار ننبح قنين وله
اية ٠ سكري فمك شكلها قاعدة مش مستوعبة
نور ٠ شنو ميورة خيرك
ميار٠ والله مع انه كان آية من الجمال لاكن مقدرتش نشوفه حلو
رواسي ٠ كيف عرفتيه اية من الجمال اماله
اية ونور ٠ فنصو فاها
رواسي خشت تحت البطانية هربت
اية ٠ باهي شنو بتوافقي
ميار ٠ مشعارفة
رواسي ٠ بالله عليك وافقي
نور ٠ وانتي شن دخلك توافق ولا لا
رواسي ٠ ماهو نبي نطلع بناخدلها بتاتها
البنات ٠🤦♀️
نور هيا ننزلو نضمو المطبخ انا بنروح
البنات ٠ ايه نوضو هي
ضمو وشطبو امورهم وروحو
رواسي في الطريق شافت خاها منزل هلبا حوايج وواقف عليه منذر
رشيد ٠ رواسي تعالي (رشيد جسمه عادي وحتى شكله عادي مواليد 95لاكن يحب اخته هلبا وهو كان في الشرق مع صاحبه وهدا وين روح )
رواسي٠ طلعت تجري ضبطاته وتبوس فيه
منذر ٠ تي باهي قتلتيه
رواسي كانت مستحشاته هلبا معدلتش على منذر
رشيد ٠ هههههه خلاها
رواسي تمسح في دموعاها بعيون برائة شنو جبتلي من غادي
رشيد ٠ ههههه متتغيريش بكل انتي تي قولي شن ماجبتلكش
رواسي ٠ باهي علاش ماقتلناش انك مروح
رشيد ٠ هكي نبيها مفاجأة
رواسي ٠ تي احلى مفاجئة الشهر هادا
منذر ٠ مرض نسحابها بتقول في حياتي كلها
رواسي ٠ انت مدخلكش
رشيد ٠ هي انا بنخش نحس في روحي متكسر تكسير
رواسي ٠ بعيد السو انشاءالله في منذر ولا فيك
منذر 🤦♂️
رشيد ٠ ههههه قعدين زي توم وجيري
منذر هي الحمدالله ع السلامة مرة تانية
رشيد ٠ الله يسلمك منور يامنذر ٠
رواسي ٠ ع خاطر قالك الحمدالله السلامة منور
رشيد غر خشي ونقصي لسانك هي بنسلم على بوي وامي وخوي
رواسي ٠ مادخليش فيك راه خش دوش لين انا نجيب مشروب وسبول وسمينسا ونشوف شن جايبلي طبعا وبنقرملك الدنيا كلها اليوم من اول ممشيت لليوم
رشيد ٠ ههههه باهي مع اني تع،،،
رواسي ٠ صكر فمك خلاص كلمو وقلتها انا
رشيد ٠😳اااا باهي باهي
ميار في سريرها ٠ تتصفح بعتلها قيس طلب صداقة
وافقت عليه
قيس ٠ بس بس
ميار ٠ اهلين قيس
قيس ٠ اهلين بيك ميار متأكدة انك مش مجبورة
ميار ٠ لالا علاش
قيس حسيتك كأنك مش فرحانة امبكري
ميار ٠ لالا غر راسي يوجع فيا بس
قيس ٠ انشاءالله لاباس
ميار ٠ لايوريك باس خافت ميار يشك فاها
ميار ٠ ايه عرفني بيك
قيس فرح بسؤالها وبدي يهدرز وسبحان الله ميار عجبها جوه ورتاحت معاه قعدو يهدرزو ل الساعة ٢ بعدين رقدت ميار والتالفون في ايدها
رواسي ٠ تقرم وتاكل وخوتها ميتين من الضحك كيف تقلد في الناس
اما اية حست يلي دير فيه غلط في غلط (طبعا اية عندها اخت وحدة صغيرة هلبا )فقررت تكسر شفرتها وتبدأ من اول وجديد
اما نور ضربتها نومة ناضت الساعة ١ لقت عشرة مكالمات من منذر
نور هدا من بدايتها ياكبدي (نور عندها ٥ بنات وراس ولد مش رح نعرف عليهم لانهم مش ندكرهم هلبا في الرواية )نور كلماته وحست اسلوبه معاها كويس ومستغربة كيف ميار تدوي عليه هكي اما معاها كان شخص تاني خافت وقررت انها بعد مدة تفتح معاه الموضوع
يتبع ،،،،
طبعا في حلقة بعدين
😍😍😍😘😘
أنت تقرأ
اصدقاء العمر
Humorبداية روايتنا هي انقلاب حيات بنية طبعا الرواية تحكي على واقعنا الليبي وطبعا رح تكون فكاهية ووووووه هلبا حاجات وانشاءالله تعجبكم حبايبي ❤😍😍😍😍
