جنت طالبة اعدادية … وهو جان يداوم بالشرطة … الدورية الي يوكف بيها قريب كلش من المدرسة الي اني اداوم بيها … همه شغلتهم يفترون بوكت الطلعة مالتنا و يراقبون تجمعات الشباب .. لان يم الاعدادية مالتنا و يم كل مدرسة مال بنات يجون شباب هواي حتى يصادقون و يختارون دائما وقت نهاية الدوام … اني شفته صدفه و طبعا سمعني حجي بوقتها بس ولا درت بال و عفته ومشيت .. و مرة لحكني بدربونه قريبة على بيتنا .. بس بملابس مدنيه و كلتله ترى اني اعرفك و اذا تسويها ثاني مرة اجي للضابط مالتكم اشتكيك .. ضحك كال هو اني الضابط .. كلتله و شكو تضحك اصلا اروح اكول للاعلى منك والله … كال بس اني نيتي خير مو شر .. كلتله مو شغلي و عفته ومشيت … وراها كام يطلعلي بكل مكان … بس ولا مرة وراها حاول يحجي وياي .. يعني اروح اني وامي للسوك اشوفه هناك … اروح للدوام اشوفه بالدورية .. بكل مكان كام يطلع بس مثل مكلت ابد محاول يحجي وياي بعد … و فد يوم رجعت عادي من الدوام و لكيت مرية غريبة بالبيت … شافتني و سلمت عليا بس سلامها الي جان غريب و شبعتني بوس و دعاء … من طلعت كلتلها لأمي هاي منو ؟؟
كالت هاي جايه تخطبج لأبنها .. كلتلها بس هاي مشايفتها بالمنطقة .. كالت اي من غير منطقة بس ابنها شرطي هنا يداوم و شايفج و عن طريق معارفه مندل بيتنا و سائلين علينا بالمنطقة رادو يعرفون انتي مخطوبه شي .. و جوي وراها .. كلتلها يوووم اني ما اتزوج هسه اني اريد اكمل دراستي .. كالت اي طبعا و هالحجي نفسه كلته للمرية بس لازم اول شي نكول لأبوج حتى بس يصير عنده علم .. كلتلها زين … و اجه ابوية و طبعا ابوية مثقف و دارس و كال خلص هي متريد تتزوج نجبرها قابل .. من تجي ام الولد كوليلها ابوها هم كال بعدها صغيرة و خلي تخلص دراسة … و جتي ام الولد و كلنالها نفس الحجي … وراها بكم يوم اجه ابوية من الشغل و صاح أمي للصالة و طبعا احنا بالبيت نصنف على ابوية وامي من يدخلون للصالة لان نصيح للصالة هاي مقر الاجتماعات السرية هههه من بابا يصح ماما و يفوتون جوى معناها عدهم شي ميريدون نعرفه .. و مرات يتفقون عالشي وراها يطلعنا الخبر اليقين … طلعت امي كالت تعالي لج .. لحكتها للغرفة مالتها .. كالت لج هذا الي رايح يخطبج يمكن مخبل لو يمكن صدك ميت عليج .. كلتلها شلوووون ؟؟
كالت رايح لابوج للدوام و ابوج يحلف يكول بعد شوية يبجي و كايله خلي تبقى بدوامها و اني قابل عسى ما تبقى طول العمر و كايله انتو ناس طيبين و اني سألت عنكم الناس بالمنطقة كلها تحلف بشرفكم بالمنطقة لذلك اني مستقتل اخذ البنية .. و حتى لو تريد تجيب ورقة بيضة تسجل عليا تعهد بتوقيعي انو اني اذا تزوجتها اقبل تبقى تكمل دراستها للموت هم مستعد .. الولد داخل صدك دخلة زواج و مبين مو من نوع الي يلف و يدور .. و طبعا امي بوقتها اني جنت احجيلها كلشي و جنت حاجيتلها عليه من لحكني و من سمعني حجي … امي كالت فكري لان هو راح يدز امه بعد مرة … كلتلها والله ماعرف يوم .. طبعا هو الرجال امانة احجيها كلش معتني بمظهره و شكله حلو … كلتلها ماعرف ماما اخاف اقبل و بعدين يبطلني .. امي كالت ماتوقع … بصراحة بذاك اليوم افكاري كلها تخربطت … و كلت لأمي زين خلي ابوية يسأل عنهم .. امي كالت يعني انتي نكدر نكول عندج موافقة مبدأيه ؟؟؟
كلتلها اي .. و صدك والله ابوية هم سأل عنهم طلعو ناس زينين بالمنطقة و همه ولد ثنين و بنية وحدة متزوجه … قبلت و الولد اجه خطبني و راد بنفس الشهر نتزوج … اني جنت ماريد بسرعة بس ابوية كال خلص مدام الولد جاهز هاي هي على بركة الله … و صدك والله تزوجنا .. الولد طار بيا طير .. و صدك جان يحبني … و حقيقة و امانة خلاني اداوم .. بس اني بالبداية مجنت رايدة اطفال … ردت على اقل اكمل كلية .. لان جنت اخر سنة اعدادية و انقبلت على ابن الهيثم …
المهم … هو جان يريد جهال .. و كال احنا اتفقنا انتي تكملين كليه بس متفقنا نأخر موضوع الاطفال .. كلتله ماشي …
اشو هذا طفل ورى طفل عبالك حالف يسويهم عشره ... اجاني الاول و ماكو سنتين الثانية جتني .. و طبعا جهالي حبايبي احلى شي عندي بهل الدنيا بس غمضت عين فتحت عين صارو تلاثة .. و طبعا وحدة عدها تلاثة و كلهم صغار .. تلحك تدرس تلحك تفوت كلية .. اني من نفسي بطلت و تركت الدراسة … و التهيت بالجهال و شغل البيت .. لهنا كلشي عادي .. زين نجي هسه على الجهال ..
الجهال يتعبون اكبر واحد … زين همه كلهم اعمارهم صغيرة شسوي يعني …
خبلوني والله العظيم مرات بليل هلكد ما اكوم تعبانة و مشبعانه نوم من ورى بجيهم انضرب بالحايط .. لدرجة جبت كلاص مي يمي بالغرفة هذا مو للشرب … هذا مخليته يمي حتى من افز بليل عليهم اغسل عيوني بالمي لان المغسلة و الحمام جوى .. المشكلة هو عنده دوام و فوكاها ميريد يفز بليل و اصلا هو ميساعدني بشغل البيت وهذا حقه ماشي رجال ويجي من دوامه تعبان على عيني و على راسي .. بس عالاقل بالجهال شوية ساعدني .. هو ولا عبالك يجي يكعد شوية وياي و بعدين يكلب بالتلفزيون و يصعد ينام .. و من يريد مني شي يعني سوالف زوج و زوجه … يكلي تعالي فوك بسرعة … هالحجي كله عادي واني زوجة ولازم اتحمل و كلت باجر عكبة الجهال يكبرون و حلفت ماسوي جهال بعد كافي ٣ … المصيبة هواي اكو بنات راح يكابرون على حجايتي و يكولون انتي غلطانة لان المرتبه لو عدها عشر جهال تبقى مرتبه…
اني هملت نفسي … لان تعبت والله وداعة امي و داعة ابوية تعبت … كمت ما الحك اعتني بنفسي من ورى الجهال و شغل البيت … يعني براسي ٣ جهال .. وام زوجي .. و اخوه هم ممتزوج .. تنظيف بيت .. طبخ .. غسل هدوم … ومن عده هاي كلها المسواك … كلها براسي .. وين الكي وكت اعتني بروحي بي … وفوكاها رجلي كام يتزعل … و كام يسمعني حجي .. يسميني ابو اسماعيل و يتشاقى وياي بحجة اني رجال .. وكل شوية يكلي راح اروح للحلاق تجي وياي ابو اسماعيل حتى تحدد لحيتك و الحواجب .. ومرات يكلي خوويي .. و طبعا هالحجي كبال امه يسوي و امه تضوج كلش منه و ترزله بس هو ولا عبالك … ومرات يكلي انتي من اخذتج جنتي كمر اشو كلش تغيرتي .. اكله تعال ابقى بالبيت اسبوع وانت شيل المسوولية كلها براسك وشوف شلون تنكلب … يكلي حالج حال كل النسوان قبل الزواج تخبلون و حلوات و ورى الزواج تتغيرون .. كلتله تعبت و كمت ابجي .. اجه باسني و كال يله خلص من هاللحظة بعد ما اتشاقى .. وبطل شقى و اني رتبت وقتي تجيني بنية للبيت هي اصلا تشتغل بصالون .. و علساس بديت بهل الشي و شوية شوية كمت ارجع اعتني بروحي رغم هوسة وضعي .. بس الي حسيته هو كام يخوني و عنده عذر ليكدام اذا الكفه .. طبعا هو تغير كلش و صدك كام ميتشاقى بس حسيت هو ديخوني وماكو زوجة متحس بهل الشي اذا زوجها يخونها … بس المصيبة ملزمت عليه شي .. ادور بهدومة ملكفت شي .. اخر شي هو اجاني .. كالي شوفي اريد احجي وياج .. كلتله كول شتريد ؟؟
كال انتي عبالج اني داخونج و اسوي علاقات عليج مو بله ؟؟
كلتله اي والمطلوب ؟
كال بابا اني ماعندي غيرج انتي ام جهالي بس انتي اخر فترة كلش هملتي روحج .. اني هم رجال وهم اريد زوجتي دائما حلوة .. مترهم يعني .. كلتله يعني اني ارجع اعيد الحجي كل شوية .. يا ابن الحلال تعبت اني .. كال راح اجيبلج الي تشيل وياج الحمل .. هو كال هيج اني كمت الطم و ركضت جريت العطر الي علميز و كسرته بالحايط و شلت قطعة منه كلتله هسه انتحر لك اني تحملتك كل هالوكت و تحملت جهالك و امك واخوك و صرت خدامة وتتزوج عليا وكمت اغلط عليه و ابجي و صدك ردت اضرب ايدي .. اشو هذا كعد بالكاع يضحك و اختنك من الضحك .. كلتله تضحك و قربت الكزاز مال شيشة العطر على ايدي .. جان يكول لج غبية قصدي راح اخطب لحسن اخوية .. اخت ضابط وياي بالدوام راح حاجيته و راح نتقدم على اخته هالاسبوع .. هو كال هيج اني استحيت من نفسي كلش ..و ردت بس اسده للموضوع كلتله لا جذاب انته … جان يصيح حسن اخوه و حسن مكيف واصلا يدري بالموضوع …
كلتله زين ليش مكتلي .. كال هو الموضوع كله مصارله ٣ ايام من سولفنه بي اني وحسن و اصلا مصار مجال افتحه لان بالدوام وعدنا انذار واجي بس انام و ارجع للدوام .. كلتله زين .. و صدك والله تقدمو للبنية و تزوج حسن و كعدو ويانا بالبيت و البنية شالت وياي شغل البيت خطية … و مشت السالفة و الجهال شوية كبرو .. بس هو تغير .. لحد قبل فترة لكفته عنده علاقة بوحدة و صارت مشكلة جبيرة .. و اخوه زعل منه و امه هم زعلت و حتى زوجة اخوه متحجي وياه .. اخر شي اجه رجع يبجي يكول غلطت و هم ذب الصوج بيا يكلي انتي جانت حجتج شغل البيت وجتي فلانه تساعدج و هم نفس الشي .. و انحلت السالفة و حلف هو جان غلطان بس شسوي .. بس اريد افتهم شسوي .. والله العظيم معتنية بروحي بس مرات الوضع النفسي و الوضع العام بالبيت و هوسة البيت و الشغل يأثر و يخلي البشر ينسى نفسه … ماعرف شسوي والله .. هسه هو ماشي عادل بس بيا خوفه بداخلي .. حتى مرات كمت اخاف ادور وراه حتى لا اكشف شي ..لان الشك ديموتني .. و المصيبة الي ديصير بيا داطلعه بالجهال و هالمساكين ماعدهم ذنب .. اخر شي قررت شيصير خلي يصير .. اني الي عليا اربي هالجهال و اطلعهم احسن ناس بهل الدنيا .. و خلص .. لان والله تعبت ..
(تعبت)
انتهى
