عائلتي حالتها الماديه متوسطة .. يعني لا فوك كلش و لا جوى كلش … عايشين و سمعتنه حلوه بالمنطقة .. ابوية كلش محبوب بالمنطقة و يسلم عالصغير قبل الجبير .. و امي نسوان الجوارين كلهم يحبوها … و هي هم تحبهم .. احنا بنات ثنين .. و ابوية و امي .. ابوية جان موظف بوزارة الزراعة و بعدين من تقاعد اشتغل بمحل بالسنك مال مواد زراعية و مبيدات حشرية (يعني شغل من ضمن اختصاصة) .. و امي جانت معلمة بس من ولدتنا اني و اختي بطلت من وظيفتها و كعدت تربينه … جانت لمتنه بالبيت حلوة .. و كل ما اغمض عيوني هسه .. اتذكر تفاصيل اكيد مو بس بعائلتنه صايره .. بكل العوائل العراقية .. جنا نلتم يوميا ناكل سوى .. بس وجبة الغداء يكون بيها نقص (بابا) .. لان يكون بالشغل .. حتى بالريوك جنا نتريك سوى .. يعني اذا ماعدنه دوام بابا يجي يكعدنه يكول يله كومو حبيباتي .. كومو باباتي .. جان يحب يشوفنه كلنه ملتمين على نفس الصينيه .. جان اليوم يمر بسرعة بس كله تفاصيل .. ماكو يوم مر عليا بنصهم اذا منشبع ضحك لو نطلع سوالف من جوى الكاع حتى نلهي نفسنه بيها .. مره نحوك .. مره نخيط .. مره نحاول نسوي زخرفه عالقماش .. مره نسوي مزهريات للبيت .. و كلنا بالبيت كلب على كلب .. جانت من وحدة من عدنا تزعل .. متمر ساعات عالزعل .. و نتصالح .. اشتاقيت لكلوبنه الطيبه .. جانت ماما دائما تكعد على زولية بالمطبخ … و احنا نتربع بالكاع يمها .. نقرا بالمطبخ .. هي جانت عينها علينا و عينها الثانية عالطبخ .. يعني تشتغل و بنفس الوقت تدرسنا و تسألنه هم .. اكثر لعبنه بذاك الوكت جان بالحديقة .. اني و اختي … جوارينه الي بصف بيتنا حايط عالحايط .. عدهم ولد واحد بس .. هالولد كلش وكح و منحبه لا اني ولا اختي .. لان لسانه محلو و يغلط و دائما يتعارك وي جهال المنطقة هلكد ما مددلي اهله .. و هو هم يكرهنا اني و اختي كلش .. مره بابا اشترالنه لعبه مال ريشه .. هي مثل المضارب مال التنس بس ريشه .. اني و اختي جنا جهال و لان الحديقه صغيره كمنا نطلع برى بالشارع نلعب .. فد يوم وكعت الريشه بحديقتهم .. دكيت الباب مالتهم .. طلع هو .. كلتله الريشه وكعت بحديقتكم .. كال اي و شتريدين هسه .. كلتله الريشه عفيه .. كال زين .. راح فات جوى و سد الباب وراه .. و شمر الريشه من ورى الحايط بس كطعها .. خربها يعني .. شمر الراس الاحمر وحد و الباقي مالتها وحد .. فد كرهته بيومها .. هو اني اصلا اكرهه و سوى هالسالفة بعد كرهته بالزايد .. و جبنا ريشه جديدة و هم كمنا نلعب .. هو الولد ماعنده اصدقاء اصلا .. جان يباوع علينه من فوك السطح من نلعب بس ميخلينه نشوفه .. وهالشي بعدينه عرفته .. و مره اني و اختي كاعدين بالحديقة مال بيتنا دنقرا .. هو شمر علينه جيس مال مي صغير .. و رحنا كلنه لامه و امه رزلته بس هو حلف جذب كال مو اني ..
عالعموم .. جان هواي يخبث ويانه .. طبعا هو بنفس مدرستنه .. بس من جان يشوفنه يبين على وجهه هو ضايج .. و احنا من نشوفه هم نضوج و ندير وجهنه بصفحه ثانيه .. و بقت العداوه بيناتنه حتى ورى مرحنه للمتوسطه … هم هو يشوفنه يدير وجهه و احنا نفس الشي .. و كبرنا ..
دخلنا اعداديات .. بالاعدادية هو تغير و صار عنده اصدقاء ..جان عنده اصدقاء ثنين دائما يجون يكعدون وياه مقابيل بابهم برى البيت .. واحد من هالشباب جان دائما يلحكني .. و بصراحه الولد جان كلش مرتب و شكله حلو و بصراحه اني جنت معجبه بشكله .. و طبعا الولد جوارينه تغير .. لان كبر .. صار عاقل و محترم .. و فد يوم صارت عركه يم باب بيتهم بينه و بين صديقه هذا الي يلحكني .. مفتهمت شنو العركه بس الي افتهمته صار ضرب بيناتهم و تزاعلو .. و راها بكم يوم كامت تجي اتصالات على بيتنا بس اذا بابا يجاوب لو ماما تجاوب لو حتى اختي ينسد التلفون بوجهم .. بس من اني اجاوب يبقى ساكت الطرف المتصل و ميحجي ولا حرف .. و هواي تكررت الحاله .. و مره من المرات ضجت من سالفة التلفون .. كلتله ترى اني اعرفك و جان كل تفكيري هو نفس الولد الي جان يلحكني و مجان صعب عليه يجيب رقم بيتنا لان امي منطيته لكل نسوان المنطقة جوارينه .. كلتله اني عرفتك حتى لو تبقى ساكت .. انته الولد الي جنت تلحكني و تجي يم فلان جوارينه .. جان يجاوب ورى محجيت هالكلمتين كالي لا اني مو هو و من صوته عرفته راسا .. هذا جوارينه الي جنت اكرهه … كالي اني فلان .. كلتله و هاي صارلك كومه تخابر و تبقى ساكت .. بله ليش .. جان يكول ماعرف ..كلتله هسه يجي بابا و اكله .. كال بس دقيقه سمعي .. كلتله شتريد .. كال اني ادري انتي تكرهيني .. و اختج هم تكرهني من قبل .. بس والله اني جنت جاهل و اسف على كل الي سويته قبل .. كلتله زين و بعدين .. كال اني مجان احد يحبني من جنت جاهل .. وجنت اتمنى العب وياكم بس جنت اخاف لا تطردوني و متقبلون العب وياكم .. جنت اباوع عليكم دائما من السطح بدون متشوفوني .. بس لان اني جنت ماعرف اتصرف و جاهل و اكررها جاهل مدلل هم .. جان ياهو الي يلعب وياي اسوي مشكله وياه و يكرهني …. كلتله اي و على اساس بطلت هسه و كبرت مووو .. كالي شنو قصدج .. كلتله مو قبل كم يوم تعاركت برى و صارت هوسه يم بابكم .. كال من وراج غير .. كلتله شنوووو !!!
كال فلان صديقي حجى عليج و كال لحكتها اكثر من مره و جان يريد يصادقج و طلب مني اجيبله رقمكم لان امي تعرف رقمكم .. وهالشي جان اول مره يسوي و يحجي كبالي و اني متحملت كلتله لك هاي جوارينه انته شدتخربط .. كالي قابل اختك هي .. و حجى حجايه محلوه عليج اني متحملت ضربته و طردته و كطعت علاقتي بي نهائيا .. سكتت اني و معرفت شنو اجاوبه و كلتله زين هسه شرايد مني انته .. كالي بس تسامحيني على سوالف قبل ترى والله باقيه براسي و اعرف اني جنت هواي اضوجج انتي و اختج .. كلتله زين مسامحتك بس بعد لا تخابر ماشي .. كال زين .. ومن يومها كام كل ميشوفني برى يسلم و بصراحه اني ارد السلام عليه .. و دائما يتبسم بوجهي .. و اني هم ابتسم بوجهه .. و صدك والله كام ميتصل ابد .. من ورى هالتلفون اني كمت اشوفه غير شكل .. يعني شكله عبالك اختلف بعيوني .. قبل جنت اشوفه بشكل كلش محلو و اضوج منه بس ورى الي صار ماعرف شنو الي صار .. كمت مثل الي ارتاح من اشوفه و من يبتسم بوجهي لو يسلم .. كمت ادقق اكثر بلبسه و طبعا اختي تعرف كل شي .. و جنت من اكلها هالحجي تكلي اييييع فلان … و خلصنه اعدادية .. اني داومت كلية و هو قبلي بسنه جان يداوم كليه بس بطل .. بطل لان ابوه راده يشتغل وياه .. همه عدهم محلات ثنين مال اجهزة كهربائية بباب الشرجي … هو لزم محل و ابوه لزم محل .. و بيوم من الايام و بدون سابق انذار لكيته كبالي بكليتي .. سلم عليه و كالي اريد احجي وياج ممكن ..
كلتله و شكو جاي لهنا و شمعرفك اني اداوم هنا .. كالي امي كالتلي .. كلتله اهااا .. و قبلت احجي وياه .. كالي قبل كل شي اريد تعرفين اني مو من النوع الي يطول بالموضوع و يدور حجي و قال و قيل … اني اعرفج من جنتي تلبسين النعال (مكرم القارئ) تك و تك .. و انتي تعرفيني و تكرهيني من جنت اصعد على الحايط مال بيتنا و اتخيل روحي دوق فليت مال كرندايزر و اصيح الرزه المزدوجه .. يعني من الاخير واحد يعرف الثاني من سنين طوووويله .. و اني ادري بيج اشرف و اطيب بنيه بالمنطقة انتي و اختج الله يحفظكم .. اني جيت اليوم لهنا حتى اخذ موافقتج المبدأيه .. و اذا وافقتي ادز اهلي كلهم باجر .. بس مال اسويها مفاجاءة و ادزهم بدون ما اخذ موافقه منج .. ما اسويها .. اني هسه عندي شغل الحمدلله .. بس الكليه بطلت منها و ما اعرف لو اكمل بالمستقبل لو لا ..
كلتله اختصر ..
كال من الاخير و من النهاية .. اني رايدج زوجه الي .. وشتريدين اني موافق و حتى كليتج ابقي داومي و تخرجي على راحتج و حتى لو ردتي تتوظفين بالمستقبل هم ما عندي مانع .. و اذا كلتي خلي يجون اهلك .. اعرف انتي موافقه و ادزهم هالاسبوع .. طبعا هو من ديحجي هيج اني ضحكت ملزمت روحي .. لان من ديحجي حسيته هو حافظ الحجي الي ديحجي مثل القصايد المدرسية ههههه .. كلتله زين كملت كلامك .. كال اي .. كلتله الحل و الربط بالموضوع مو بيدي بيد بابا و ماما .. بس اني اي موافقه و دز اهلك .. كال اووووف وكعتي كلبي .. شكرا اني اترخص و اسف لان جيت للكليه بدون موعد ههههههههههههه .. كلتله الله وياك .. عافني و راح بس ضحكت هواي والله .. يعني هالرجال ابد مو ذاك الطفل المكروووه الخبيث الحقير الي جان يتقصد يسوي مشاكل وياي .. يا سبحان الله .. المصيبه اني اربط مرات بين شخصيته المكرووهه و بين شخصيته الحاليه .. و هالشي دائما يضحكني .. يعني شلون هسه انيق و مرتب و لحيه و شوارب و ضخامه .. و محترم بمشيته و صوته خشن .. و قبل جان يغلط و يسب و يتفل عالجهال و ينهزم (مكرم القارئ) ههههه
المهم .. بنفس الاسبوع ابوه و امه جوي لبيتنا و طبعا وافقو اهلي بعد موافقتي و ورى فترة تقريبا ست اشهر تزوجت اني … بس بالمناسبة اختي الوحيده الي جانت رافضه الموضوع كله .. لان تكرهه .. من تزوجته اكتشفت رجلي على حقيقته .. طلع اطيب من الطيب نفسه .. يحب يساعد الناس .. و يحترم الكل و من اذكره بماضيه يضحك يكلي جنت جاهل والله .. و حجالي شغلات عني اني نفسي ناسيتها .. و افتهمت شنو الحب على ايده .. و طبعا كل واحد بهل الدنيا يفسر الحب بطريقة غير الكل .. اني الحب بالنسبة الي يتلخص بجملة صغيرة (الحب هو الي يحب يعرف تفاصيل عنك و يتذكرها و انته نفسك ناسيها) يعني .. هو يتذكر هدومي الي جنت البسها بعمر صغير و اني نفسي ناسيتها .. يتذكر ملاعيبي و حتى العربانة مال اللعابة شلون جان شكلها .. يتذكر لون جنطتي المدرسية بصف ثالث ابتدائي .. يتذكر عركه صارت بيني و بين ولد بصف خامس ابتدائي .. بسبب اختي لان ضربها بالطوبه و اني رحت تعاركت وياه و طبعا اني نفسي ناسي هالتفاصيل .. يكول اني مجنت اكرهكم .. اني جنت اتمنى العب وياكم .. بس جنت اخاف لا متقبلون .. و جنت احاول اتواصل وياكم بس لان زعطوط و جاهل .. طريقة الغلط و الفشار و العركات وياكم هي الطريقة الوحيدة الي جنت اعرفها .. و عشت وياه احلى ايام حياتي .. و هسه اذا اكول هو يروح لشغله و يرجع من شغلة يبوس ايدي محد يصدك .. جان يوميا يسويها .. يحبني كلش و يحترمني .. و حملت منه الحمدلله .. و جبت احلى بنوته بهل الدنيا .. و طبعا اني تخرجت بس متوظفت بسبب بنتي .. و مثل ما اجاني رائد بدون سابق انذار للكليه و طلب ايدي .. اجى الموت بدون سابق انذار و اخذ رائد و ابوه بنفس اليوم .. انفجار ارهابي بباب الشرجي بصف المحلات .. حصيلته ٣٤ شهيد واكثر من ١٠٠ جريح .. و راح الي حبيبي و رجلي و ابو بنتي .. راح الي كل ذكرياتي حافظها .. راح الي جان يبوس ايدي يوميا .. جان يكلي انتي امي الثانيه ..و الله جان طيب و ماعنده اذيه عالناس .. راح و راحت وياه الضحكه .. و بقيت اني و بنتي و امه ببيت جبير ما بي بس صوت الانين و دموع تنذرف بكل اركانه .. الام تبجي على زوجها و ابنها الوحيد .. و اني ابجي على حبيبي و ابو بنتي .. و بعد مجان البيت بي حجي و ضحك و سوالف .. صار هادئ بس هدوءه اسود .. اسود بلون الموت .. بقينا بالبيت وحدنا و طبعا ابويه و امي و اختي حايط عالحايط .. بس اني ماكدر اعوف ام رائد وحدها .. و بقيت وياها و بنتي كبرت بهل البيت .. و قبل سنتين تقريبا ..توفت ام رائد .. و بقيت اني و بنتي وحدنا .. بس الحمدلله امي يوميا يمنا و ابويه هم يوميا اشوفه .. بس اختي تزوجت و كعدت بمنطقة ثانيه و مرات تجينه .. مرات اصعد بالسطح .. و اباوع على حديقته و ابجي .. ابجي من اتذكر حجي رائد .. يكول جنت اشوفج انتي و اختج من فوك بدون متحسوون .. جنت اتخيله هو و شكله صغير شلون يراقب بينا .. و وين يوكف .. و الحمدلله على كل حال .. الله يرحم رائد و عمو ابو رائد .. و يحفظلي بابا و ماما و اختي و بنتي .. و اهم شي يرزق بنتي حياة سعيدة …
(جواريني)
انتهى
