الي خلاني اندمر و تصير عندي حالة نفسية من صدك ... هو سوالف الناس و حتى الكرايب ... وصلت مرحلة ما اطلع باب البيت و ابقى اسبوع لو اسبوعين بالبيت و حتى الاشياء الي اريدها ...
اوصي عليهم اي واحد من اخوتي يجيبها وياه من يجي ...
بالمنطقة شوية الناس متعودين عليا و على شكلي .. بس هم ما انطيهم الحق لنفس الناس من مسمينا بيت ابو فلان القزم .. الله هيج خلقني كصير وقزم يعني مو اني اختارررريت والله مو اني ..
بس من الله خلقني هيج ما انطاني بيدي ورقة لازم اشيلها بكل مكان مكتوب عليها راعو مشاعري ترى اني مثلكم دم ولحم ..
ليش وشنو فرقي عن غيري ؟
قزم بس بكلب و بعقل و شايل نفس المشاعر الي عندك او عندج .. قزم مثل متسموني بس عندي احساس بكل البشر و بحياتي ما وكفت مساعدة لأي انسان يطلبها مني ..
قزم و ما اتذكر فد يوم ضحكت لو صنفت على اي انسان عنده عيب خلقي او شكله بي شي ..
فد يوم صديقي محمد كاعد يمي بالبيت .. صديقي من الطفولة تقريبا ومتعود على شكلي .. اتصل بصديقته عالتلفون واني جنت كاعد عالكمبيوتر اباع اخبار وادور على برامج الهي نفسي بيها لان اربع وعشرين ساعة محصور بغرفتي ..
شوفو الاذية وين لحكتني حتى واني خاتل بغرفتي ..
المهم ...
اتصلت بي وهو فاتح سبيكر ومتمدد بالكاع يحجي وياها .. كالتله انت جذاب مو ببيت صديقك مثل متكول .. كام اخذ سلفي واني جنت كاعد ملتهي اباع عالكمبيوتر .. طلعت بالصورة الي اخذها بدون ما اعرف اني ..
دزها الها ورجع فتح الصوت جان اسمعها تضحك ضحك بصوت عالي كلش وكالتله شنو هذا القزم الكاعد وراك ..
طبعا هي متدري هو فاتح سبيكر .. لان ديحجي وياها صوت ..
محمد حار شلون يسد السبيكر لان عرف اني سمعت .. بدقيقتها من كالت هيج لزمتني البجية والله بس سيطرت على نفسي وسويت نفسي كمت اطلع بره ..
هو الولد سد التلفون بس ميعرف شلون يغير الموضوع ..
طلعت كعدت بالسطح وعفته بالغرفة .. بجيت بجي بيومها و اباع عالسما واحاجي رب العالمين .. كلتله ربي حتى من انهزمت من البشر وختلت بهل الغرفة لحكتني اهانتهم .. ربي شسوي بعد !!
حتى الي يكلي خلي ثقتك بنفسك عالية الكاه مسجل اسمي بتلفونه فلان القزم ..
حتى الي يحاول ميضحك عليه من وحدنا كاعدين و يمثل كبالي اني طبيعي بس يكعد بنص جماعته و يصير تصنيف لازم يذكروني بالضحك و يكعدون يصنفون عليا ؟؟
ليش ربي خلقتني هيج ؟؟
ليش ياربي .. لا بنية تقبل بيا ولا ناس تعتقني وتعوفني بحالي ولا حتى شغل اكدر اشتغل مثل اوادم و لازم ادور شغلة بمواصفات خاصة ؟؟
ليش ربي ؟؟
ليش حاصر نفسي بين اربع حياطين ...
ليش اباع عالمتزوجين و اتحصر و ادري بروحي مراح اتزوج بيوم ...
وفوكاها كل جماعتي مصادقين و كلهم يحجون وي بنات كدامي ... و الاكثر يقهرني مرات من يتزاعلون وي صديقاتهم اني اخليهم يصالحوهن .. لان انقهر عالبنات..
و ياريت لو صدك يحبون كل واحد بيهم مصادق ثنين و تلاثة .. مرات اقنع نفسي لان ما اعرف ااذي بشر و اكول (همزين الله خلقني هيج حتى ما العب على بنات الناس) بس اني هم بشر اريد احب و اريد انحب و اريد اجرب هالمشاعر .. اريد الناس متنافق عليا و يبينولي اني طبيعي و همه مسجليني بتلفوناتهم فلان القزم لو قزموز و هاي شوف عين شفتها والي خلق هالكاع شوف عين .. اريد الناس من تذكرني يذكرون السوالف الزينة الي سويتها .. مو يذكرون مواقفي (اللا مقصودة و العفوية) بسبب كصري ...
والي بجاني عدة مرات .. اصدقائي مرات عود يريدون يراعون مشاعري و يخلوني اجرب الحب .. يكولولي صادق بالنت و عيش شبيك .. و يختمون كلامهم بسالفة (قابل هي راح تشوفك مشيها عالصوت عمي و خليها تتعلق و بعدين خلي تشوفك) يعني هم يريدوني اغش و هم بطريقة مقصودة او غير مقصودة يريدون يكولولي محد متقبل بيك اذا متسوي هيج ..
الحاصل ...
بقيت على حالي هذا و ختلت فترة طويلة بالبيت .. حتى صارت معاملة عندي مقبلت اروح بوقتها و وكفت كلها بسببي ..
حالتي كامت تزيد يوم ورى يوم و امي المسكينة تدورلي زوجه و الحلو بيها خطية .. متكلي كم وحدة رفضتني .. بس تكلي شفتلك و شفتلك واني بس اكلها اي ماشي .. لان اعرف مراح ترهم مثل كل مرة ...
و اخير شي لكتلي وحدة اكبر مني بسبع سنين و عدها جهال و رجلها متوفي ...
طبعا من كالتلي امي هالتفاصيل كلها مسمعتها بس جنت اريد اسمع كلمة المرية موافقة ... و لا ببالي مطلكة ارملة عدها جهال ما يصير عدها ... المهم اتزوج و اعيش الحب ..
بس كالت قبلت بوست ايد امي و كلتلها يله فدوة ..
و اتزوجت ... والله والله والله ...
الي تزوجتها ابد محسستني بيوم بالعيوب الي بيا ... و شالتني من الكاع للسما ... دارتني مثل امي والله ..
بس جهالها شوية جانو يضحكون عليا (بس بالبداية) بعدين بمرور الوكت تعودو عليا و كامو يحبوني .. و هسه منا لهنا ميطلعون اذا ما اروح وياهم ... حتى هدوم ميشترون اذا مو اني وياهم ... وخطية جم مرة تعاركو وي جهال المنطقة من ورايا و مجانو يكولولي حتى لا يجرحون مشاعري ..
صارو قطعة مني واني قطعة منهم ... الله عوضني كل السنين الراحت بزوجة تحبني و اطفال يعشقوني ... انتهت معاناتي اني ..
بس ...
شوكت تنتهي معاناة غيري (الي مثل حالتي) وي المجتمع الي اذاني سنين و سنين ...
(شوكت؟؟؟؟؟؟؟)
