للكاتبه مريم السعدي...
........
كملت حجي وصارت صنطه بقيت اتصفن كلما تاخذني الصفنه اتذكر الموقف صوت الرصاص واختفائهم الغريب وبغمضه عيني اتذكر نهر الليطاني ولون المي اللي تحول احمر من كثر الجثث اللي انرمت بي وكفه الشاب عالجسر والداعشي بصفه والسلاح موجه براسه باي لحضه يرمي ويشمره بالليطاني مكتف ونوبات يشمره وبعد بيه روح يضل يرفس لحد ميغرك رحمه انتي احسن من هواي ناس اني متاكده الله بقاني لسبب مذكوره بالقران فانتم باعيننا وماخلقنا حتى يعذبنا الله كل صفاته رحمه بعباده واني راح اوجر على كل الم امر بيه ارجع اغمض اتذكر اهلي وطلعتنا والرعب العاش بي ابويه وثامر والخوف الضل بي بالطريق جنت محاسه عليه ومرتاحه بس هو جان شايل الهم وي ثامر معقوله عايشين لا ماريد اضل بامل رجعتهم لا خليني لو ماالامل اموت وبين هذا الموقف وذاك لكيت روحي غافيه برعب كلسا افز من اشوف ضلمه وارجع انام اول ليله جانت صعبه كعدت الصبح شفتها صنطه طلعت على كيفي لكيت عمتي كاعده بالكع تثرم سبيناغ
هلو عمه
- ها يمهً كعدتي صباح الخير
- دتسوين عمه اساعدج
- لا يمه ارتاحي تعاي تريكي وسولفيلي
- اي عمه كعدت كدامها اشرتلي عالجاي والاستكان صبيتلي وكعدت بالكع جودليه فارشه وبصفها الجوله عليها الجاي طلعت خبزه من جدر الخبز ناوشتنياها وجرت من يمها كلاص جبن كريمي مااحبه بس اكلته من لاجاره ضلت تسالني ابوج ششتغل هناك يبيع اعشاب بسوك المسكف
- زين اخوتج
- واحد ثانويه سامر
- والثاني بشركه الببسي بس من علكت بحلب اجه يمنا بعدين طلعنا كلنا
- ميخالف يمه وكلي الله يمه اني محمد ابني مريض بالكله فشل عده ومرته هي التصرف صح هو بيتي بس هي تصرف علينا هي ام البيت وشتكول يتنفذ انتي هالكم يوم شتحجي لاتهتمين طببي منا طلعي منا
- اي عمه نصيت راسي كملت اكل وكمت شلت الغراض اباوع البيت وصخ بمعني الكلمه بحيث جوه الطباخ حيل وصخ ً عبالك لاستيك الدهن الجام وصخ البردات كله وصخ --- عمه منو ينضف
- منو ينضف يمه نوبات اني والجمعه هي فوكاني تعبانه خطيه
- ها الله يساعدها
- هسه انتي هنا ويايه بالبيت حتى متضلين بس تبجين وتفكرين البارحه الليل كله اسمعج تونين
- نصيت راسي عمه مو هينه
- ميخالف يمه هذا امر الله واحنا بهالدنيا مخيرين ومسيرين وانتي ايدج بالبيت حتى متفك حلكها وتحجي والله دنيا جانت تخاف من محمد خوفه الحيه من تسكط ليهسه ماضلتله كلمه الله يرفع ناس ويهبط ناس كلها بيد ربج كومي يمه كومي اني رايحه بيت ام اركان جيرانننا اشوف شسوت عالنفط استلمو لا
- ليش ينطوكم نفط
- اي عالبطايق هالفتافيت من هالكومه خيرات يتصدقون بيها عالشعب
- الله يهديهم
- ايييي عفيه يمه عفيه احسن دعوه يله في امان الله ساعه ساعتين وجايه هاي الغده علىً نار هاديه شوفي انتي شتكدرين تسوين شغل مالح عليج اني
- اي عمه طلعت عمتي واني منين مادير وجهي زباله ودبك بلشت بالمطبخ الكاونترات جلفتهن وحجي ماما براسي الشغل ميتعب التفكير يتعب المفاكره تتعب الشغل راحه ورياضه للبدن اجلف واتذكر من جانت تحجيلي القصص والامثال جانت امي مدرسه بالفعل اباوع روحي كملت الكاونتر بسهوله والوكت مشه بسع تنهدت ربي عينني على قضاءك باوعت لبردات الهول مسينه شلعتهن وخليتها بالغساله وفريتها اندار الكه الحمام وصخ كلش رشيت شعدي منضف وكعدت اجلف طلعت قهري بالشغل منين مادير وجهي انضف ماالكه روحي الا وصلت لباب البيت والبيت غده مرايه من اباوع على تنضيفي كلبي يبرد طبيت بدلت من هدومً عمتي دشداشه تخرب ضحك عليه علكت البردات طبت عمتي ضلت فاتحه حلكها وتتبسم باوعتلي انتي جيتينا رحمه وهاي سهى هسه تكيف بيج كعدت كدامي هسه يله انتبهت عليها التجاعيد ماليه وجهها والسمنه اخذت من عمرها العافيه بالكوه تمشي وتنهد فتت اتمدد من تمددت حسيت بالتعب غفيت راسن وهالمره براحه كعدت على صوت سهى تحاجي عمتي
- عمه شبسع خلص المسواك ذاك اليومً تسوكت
- يمه ولد يرحون ويجون عالثلاجه
- لا بت اخوج بس تاكل
- يمه توها يومين يمنه
- عمه شوفيلج جاره اني مااكدر اصرف عالبيت كله تزوجيها هاي اني مالي دخل
- مو دتساعدني بالبيت شوفي البيت شون صار يلمع على ايدها
- عمه ماعدي شسوي راتبي ميكفي
- هسه هي نفر راح تفرق هي شماكله خطيه
- ياعيني مااعرف والله شوفيلج جاره
- رحمه- بقيت ابجي واسمع وين اروح نخيت الله ورسوله تذكرت السيده زينب شويه من صبرج سيدتي مااتحمل ذله مر الاسبوع من تجي سهى افوت للغرفه محمد بس متمدد فوكً وينام خطيه وولد سهى بالمدارس دوامهم بس ضهري نادرا ماشوفهم ومن تجي بس تحجي عمتي تعبت خلص اسبوع ثاني عمتي كالتلي يمه لازم تشتغلين
- ششتغل عمه كلشي مااعرف اسوي
- اي شي مربيه خدامه
- صفنت خدامه!والله وكت بت علي خدامه كلتها بداخلي دمعه عيني نصيت راسي
- يمه لو بيدي اخليج حتى بلمدرسه ترجعين بس مااكدر هاي موتتني البارحه مانمت من وجع كلبي لان مجابت الادويه تكولي خلصت فلوسي فاتحتلي ميتم
- اي عمه اشتغل ميخالف ولا يهمج
- هسه اروح لامً اركان اشوف بلكن احد محتاج شي
- خوش عمه
- طلعت عمتي وره ساعه جتي جنت توني مكمله شغل وكاعده كالت كومي لبسي يمه
وين
لكينالج-
- بيت وتدارين رجال جبير بالعمر
- صدك عمه زين خاف مااعرف ويموت
لا يمه عدهم خدامه ثانيه تعلمج دمشي يمه
- لبست نفس هدومي الجيت بيها من سوريا وطلعت وياها رحنا لبيت ام اركان ضلت تباوعلي المره تبشبشت وي عمتي وطلعنا وكفنا تكسي كالت ام اركان لحي القضاه وصعدنا اباوع عالبيوت بيهن حلوه وبيهن خرابه والشوارع هم بيها حلوه وبيها كاضيه دخان هنا واصل للسما هاي شكو صاحت ام اركان ابو التكسي رد ببرود انفجار والله صارت عاديه السالفه شكلها واني الليل كله انوح الله يساعد كل طفل يتيتم وكفنا يم شارع كالتله ام اركان اوكف يمه هنا اندارت على عمتي ام محمد شايله فلوس لو احاسب
ها اي اي شايله
طلعت عمتي فلوس ونطتها للسايق وباوعتلي خجلت هي كوه مدبرتها نزلنا تمشينا الفرع يخبل وصلنا لبيت جبير بس مبين عليه جديد بس ايدهم مو بيه دكت الباب ام اركان فتحت وحده سمينه وجثيثه لابسه صدريه مال مواعين --- ها امً اركان هله هله بيجً تفضلو
