ثاني يوم كملت شغلي وطلعت عالموعد وصلت راس الشارع بنفس الوكت انتضرت شوي وكفت سياره عاليه يمي درت وجهي صاحت صعدي رحومه
- ها ام عيسى منيلج هالسياره طكيتي لا وكاعده ليوره عساس سايقج
- هههه ولج هاي سياره العماره صعدي لتضلين تلغين
- صعدت كعدت ليوره يمها اباوع السايق مناضره ولبسه تكول مال علم دار اسود وباسود كلشي محجه كعدت يمها اشرتلي اش وصلنا للسوك
- تعاي ويايه نتسوك اني المسووله عن المطبخ
- امشي عيني امشي نزلنا شفتها تتسوكً من كلشي 10كيلو انصدمت دتسوين عزيمه
- سكتي لتحجين تسوكت كومه خلو المسواك بالسياره انترست ترس وصعدنا كوه ساكته الفضول كتلتي وصلنا بنايه (لاول مره مراح اذكر مناطق عذروني) عاليه كلش طبينا بفرع شفتها ضليت صافنه وهالفرع نضل نمشي كوومه كلها حدايق داير مداير البنايه ومليانه حرس وجلاب بوليسيه بقيت صافنه فتحونا بوابه جبيره وطبت السياره ومن البوابه للطرمه مال البنايه لييييلمطبخ الجان كلش جبير اخاف حتى انزل بحياتي مشايفه هيج ترف حتى بيوت ماكو غير يمكن بصف البنايه بيت زغير حلو جنه كوخ وهم يمكن ملحق للحراس البنايه اشبه بمدينه كامله الهم كلها خضار وزرع واشجار تحيط بالحدايق مالتها اشجار عاليه تحوط سور الحديقه بقيت اتفرج انتبهت اكو 4بوب للبنايهً كل باب على فرع رفعت راسي عاليه حيل يعني اكو هيج بناء هنا اباوع عالحديقه بيها تقريبا 15فلاح اجه واحد من الحرس جثيث
- يبنيه فوتي لتضلين بالحديقه عدنا ضيوف
- ها اني
- لعد امي طبي وي ام عيسى انتي العامله الجديده مو
- ها
- يبووو من هسه ذابته ثول فوتي ابويه فوتي
- بقيت صافنه علي اكرع وطويل وجثيث ولابس قاط اسود دونً رباط والجلب بصفه منين مادير وجهي كامرات دخت حسيت ايد جرتني انداريت فازه ام عيسى
- تعاي شعدج بره من اول يوم تنطردين
- خاله وين جايبتني ببرج خليفه
- خههههه لا ولج هاي الجنه تعاي تعاي افهمج
- فهميني جرتني للمطبخ بقيت اتلفت شكو جهاز بالتلفزيون شايفته جايبيه هنا شنو السالفه
- باعي رحومه هذا المطبخ هاي هنا المنور
- هذا منور خاله هذا فرع شارع رئيسي
- بعدج ششايفه تعاي
- هذا الطابق كله النا باعي هنا هاي 6غرف وحده بصف الثانيه هاي للعاملات كلمن الها وحده
- طبيت للغرف عبالك مال فندق نضيفه وكل وحده بيها ديلاب ابو بابتين ومرايه وجربايه نفر وحمام صغير وبلازما وتلفون ارضي افتر راسي صدك جذب رجعت باوعتلها اني وين
- سكتي لتحجين باعي هاي المصاعد تصعدج عالشقق فوك ومنا
- باوعت على شي حاكيه بالحايط اشرت عليها
- ومنا تعرفين ياشقه فارغه تصعدين تكربيها وبعدين نخصص ياشقه عليج وياشقه عالبنات خلي ينزلون وتتعرفين عليهم
- اي
- ومن نفس الحاكيه تعرفين شيردون خاف يطلبون شي هاي ساسي الهنديه تصعد الاكل ممنوع احد يصعد وكت جيه الضيوف ومن يدخل ضيف يشتغل ضوه احمر هنا ومن فارغه يشتغل الاخضر مثل اشارات المرور احمر واخضر
- ها اي اغمض عيني وافتحها مداصدك اكو هيج
- زين هسه فهمت
- باعي هاي غرفه الغسالات بيها 5غسالات ضخمه اوتوماتك الهدوم تنشر بالمنور وتنشال ثاني يوم وساسي تكوي
- ماشي بلهت ريك احاول اركز وي كل كلمه --- بعدً
- وهاهي هاي هنا مواد التنضيف والمواسح والفوط
- خوش
- وهنا البرادات مال الاكل انتي مو مسووله عن الاكل هاي شغلتي
- اي زين اني مسووله عن اربع شقق
- اي هسه خلي البنات ينزلن ونتفاهم بالتقسيم
- اوك بقيت افر براسي زين هاي مالمن البنايه
- اهااااا هنا بعد تخاربنا اي سوال ماكو عليح بشغلج وراتبج كل 1بالشهر يوصلج
- شكد
- 4اوراق
- هلوو مو قليله 4شقق
- والله كيفج اكل زين ونوبات حوافز مكان جنه وعطله بالاسبوع لا والله بلاش اذا قبلتي حتى نكوللهم
- خوش هاهي كوليلهم قبلت المكان عجبني بس بقت خوفه والمريت بي كتل شكو خوف عدي كمت مااهتم بس بقه الفضول كاتلني اختاريت غرفه تطل عالحديقه كلش حلوه افتح شباك يصير كدامي ياس والريحه تجنن جريت نفس هي صح خدامه بس يمكن اكدر اصير شي هنا يمكن يصيرلي مجال اقره مااعرف شمكتوب لي صاحت ام عيسى تعاي رحمه اجه سكرتير المحامي
- عكدت حاجبي سكرتير المحامي شعده جيت طلعت من الغرفه اكو صاله جبيره كلش جان كاعد بيها شاب مرتب وبيده جنطه باوعني ببرود ونزل راسه كال
- هاي العقد وبي كل الشروط اذا قبلتي دنبلش وتوقعين
- اي لزمت العقد بيه كومه شروط منها تضحك مثلا بعد الساعه الثامنه ممنوع الخروج الى منتزه البنايه ووالثاني عدم الاسئله او استفسار واستجواب عن البنايه وغيره ترتيب وتنضيف باتقان والا الخصم وكل غلط مخالفه يطير الراتب ربعه بس شي سطرني العقد لازم 3سنين واذا تزوجت او بطلت ادفع 4ملايين دينار عراقي بقيت صافنه كاتبين ليجوه يحقلي عطله بالاسبوع بس تكون عكس عطل بقيه الخدم ومن الشروط ميقل عمر العامله عن 17وميزيد عن ال20 والاستيقاظ من ال5فجرا وعدم السهر لل8تنطفي كل الاضاءه بالبنايه والاجهزه المرئيه يعني التلفزيونات شنو اني بسجن بس عادي تقبلت من لاجاره ترددت بالتوقيع تالي وقعت واني اباوع لام عيسى ونضرات التشجيع بعينها اخذ الشاب الاوراق وسلمني4اوراق راسن باوعلي اي مخالفه تره تنخصم من الراتب الجديدهزيت راسي ماشي --- اي كلمه وي الحراس غرامه --- ماشي --- ساسي بس تطلع تودي الاكل
- ماشي
- واي ضيف يجي ممنوع وحده من العاملات تطلع هاي معروفه خو
- ماشي ماشي
- هاهي ماعدي اي ملاحضات لبسكم يكون تفصال لبس خدم خاص وفقط ام عيسى عالمطبخ والتغذيه
- ام عيسى- هاهي فهمت
- يله اترخص ممحتاجه شي سوال استفسار
- لا استاذ هاي هيه
- ها صدك قبل لا انسىً اي احد من الاهل ميوصل للبنايه ممنوع
- فهمت كلشي
- يله رقمي يم ام عيسى اي شي تحتاجو تخابرون وفقط كرار ينحجي ويا يحتاج اعيد
- لالا فهمنا
- رحمه- طلع السكرتير بقيت صافنه شهالامكانيه الموجوده الراتب الجديدهزيت راسي ماشي
راح وكعدت يم ام عيسى واحد بس يطب ويطلع للبنايه من الحراس وهو كرار نفسه الصاح بيه وكال فوتي جوه ---الحراس كلهم بره عالكامرات وبيهم فوك السطح كم واحد --- ام عيسى يصير واحد يفتر
كعدي ممنوع يمعوده
خوش كعدت نزلت بنيه تطلع بكدي بالعمر باوعتلي وباوعت لام عيسى --- هاي رحمه مو
اي هاي
هلاوً
هله بيج
اني دعاء عامله وياج
هله بيج اني رحمه
حبيبتي من الاخير شقه 13و14و15و20الي
ها ماشي
ام عيسى- خو انتي وين ماكو شقه سكانها نضيفين تكيفين عليها
والله اني اختاريت اول
يله خاله هاهي كيفها باوعت المصعد نزل هاي وحده ثانيه لا والله 2 طبو -- ها جتي العامله هلاو اني سجى واني شمس -- وحده منهم محجت شي مبينه معقده اشرتلي شمس مخبله ابتسمتلي شمس رجعت الابتسامه تحاجينا اتفقت اول 4شقق الي والوراها سجى وراها الخبله رنا وراها دعاء عالضوه الاخضر التفرغ نصعد عرفت انه ساكنين الشقه مريه وحده البنات يشتغلون قبلي بشهور بس الخبله قبلنا بسنه حجايه منا حجايه منا تعرفت عليهم عرفت منهم ساكنين الشقق ذوي النفوذ مو عاديين يعني وميندلون للمطبخ ابد ساسي تصعده الهم واكو مصاعد تطلعهم ليبره غير مصعد الخدم يعني كانما فندق 5نجوم دكت الحاكيه --- ام عيسى ام عيسى صعديلي الغده نفرين
صار ست زهره
باوعت شو نفرين
شششش لتتدخلين شون وي الفضوليه اني
هاها يله سكتت
- - الضوء الاخضر صاحت ام عيسى
- يله رحومه شققج هاي
- اي خاله كمزت متشوقه اريد اشوف الشقق صعدت وي الغراض مال تنضيف كل طابق بيه 3شقق طبيت للشقه تخبل الكاع مرمر ونص الحايط سيراميك البردات حمر واول ماطب بردات خرز الوان حلوه كلش اول ماادخل ممر بي طول وراها هول صغير قنفاته موديلاتها تخبل كولها دزاينات غرفه النوم عبالك مال الافلام تفاجات الحمام بي جاكوزي صغير نضفت واني صافنه بالبيت طلعت وحده من الحمام بالمنشف--- هلاوو
- ههلاو عيني
- انتي العامله الجديده شنو اسمج
- ااني رحمه
- اوك رحمه خلصتي الغرفه تنضيفها حفوت ابدل
- اي اي ست كملت تفضلي
- الله عاشت ايدج
- ابتسمت طلعت عالهول نضفته لكيت هدوم مال رجال لملمت واني دايخه بالسالفه ليش هالاضويه والسريه والتحفظ نضفت المطبخ مبي وصخ بس صينيه الاكل لملمت وكملت باقل الساعه طلعت عالشقه اللخ جانت نفس الفصال كله نفس الشي بس الرقم والباب يختلف كملت للعصر نزلت جوه بمصعد الخدم لكيت ام عيسى مخليه طاوه شكبرها دتسوي عشا وياها ساسي وصمون يكفي عشيره كامت تسوي لفات وتخلي بالصواني بقيت كاعده بعدما بدلت هدومي ويمي من هالصفحه سجى ومن هالصفحه رنا الخبله كمت ساعدت ام عيسى ساسي--- لالا عوف انت اكعد ممنوع تتعاقب--- شبيها هاي
- كعدي يمه كعدي هسه نتعاقب
- كيفكم كعدت نضفت الكاونترات وراهم صاحت كررار
- جيت حجيه
- طب كرار اخذ اللفات عثر بوصله المسح ركضت سجى وياه لملمت اللفات باوعلها هز راسه عوفيها اخذ الصواني وطلع باوعت لسجى ضلت تباوعله وتجر حسره شكلها معجبه بي مرت الايام واحنا بنفس الحاله انضف وانزل مر اسبوع واني لباب المطبخ ممنوعه الطلعه لحد ما فد يوم اختنكت طبيت على سجى لغرفتها وسديت الباب طبعا هالشي ممنوع بس طكت روحي -- ها رحمه شبيج
- باعي اريد احجي اختنكت
- تعاي تعاي كعدي
- خاف يغرمونا
- لالا غلسي كعدي كعدت عالجربايه وكعدت كدامها سولفيلي شنو سالفه البنايه شو البنات الفوك يشكن شك ولل8بعد ممنوع الصعده حتى لو الضوه اخضر الا اذا نادو ساسي والبيبان تتقفل علينا شكو وين طابين معتقل
- ولج مو هاي شروط الشيطان
- الشيطان الشيطان منو بعد
- الشيطان صاحب البنايه
- ها هو اسمه هيج
- اي ههههه هو شيطان حتى الحرس يسمو شيطان
- انتي شايفته
- محد شايفه داد
- زين وينه
- مااعرف يكولون الشيطان بكل مكان يمكن يراقبنا من الكامرات الموجوده بكل مكان
- يايمه زين شنو منو ساكن فوك
- لج بابا عماره مال موزينات خاصه باصحاب النفوذ مو اي احد
- عزززززززه لطمت على وجهي لج منو كلج
- اني ودعاء مره دنفتر قبل ال8سمعت كرار هذا الحليوه الضخم
- اي عرفته
- اي يكول لام عيسى الشيطان راح يجي ضلينا نتصنت كاللها الشيطان ميقبل واي شي توكع براسي
- بقيت فاتحه حلكي يعني هو شنو موجود بنفس البنايه
- لالا مستحيل اني صارلي 7شهور من انضف ابحوش ماالكه احد غير الصاكات بس اليجون طاكين كلش لان من يطلعًون واصعد انضف الشقق تعاي شوفي الهدايه والملابس يجيبوها كلها راقيه ونوبات ذهب اشوف الوصولات عالميز ونوبات لعبان نفس شرب وهالسوالف ونوبات نسمع صياح وحده من البنات يركضون الحرس طبعا احنا وره ال8المصاعد تقفل محد يكدر يصعد فوك من الطابق الخدمي
- اهااا يعني احنا مراقبين
- مااعرف بس هو اكو بره كابينات مراقبه بس بهالطابق لا مااتصور بس ساسي وام عيسى واكو وحده بالمطبخ
- ها
يتبع......
