نجمة والخلخال

part30

نجمة والخلخال
ج 30 الاخير

لو.....

كلمه تحمل معاني كبيرة هي من حرفين فقط
لكن نسمعها  بعد كل كارثه..
مرات تكون بصيغه عطف ومرات ندم ومرات عتاب
لو...
ينعاد بيه الزمن ما اكون نفس نجمة الي جانت حمالة
تتعلك عليها كل الأخطاء
منو اني
اني نتيجة اخطاء متراكمة من الاهل
ونتيجة اخطاء من المجتمع والاعراف
ولو
يعود الزمان كان احتضنت امي اكثر
كان غيرتها.. كان
وسرعت الزمن وياها واكولها فلوسج دمرتنا يمه
اكولها اتقربي من والدي حبي حسسي بوجودة
مو بوجود فلوسج
لمينة يامه زرعي بروحنا الخوة
بعدج اطشرنا

جان نمت بحضنها اكثر ابوسها المسها
اني اليوم ما تذكر ملامحها زين
ذاكرتي تخوني.. واعصر دماغي في سبيل
اذكرها ماكدر
ارجع عاجزة من رحله الذكريات

ولو يعود الزمن
احجي ويا ابويه.. واكوله امي تحبك.. لو ما تحبك متموت متسجل كل الاملاك باسمك..
واحنا اهم من الدنيا كلها يابه
لا تضيعنا..
ابويه بحث عن حب.. بحث عن شي ناقصة حتى لو كان هذا الحب فاجر
وصيعنا كلنا وياة

رضوة وهدية..
الاثنين اختارو الهروب
رضوة هربت من وضعنا وتركت كل شي وراها
واستقرت وازوجت.. وعاشت حياتها

وبعد مرور هاي السنين. وسقط النظام.
اجاني اتصال منها..
جنت بالروضه مشغوله
الو.. مرحبا
نجمه /اهلا وسهلا

المتصل / انتي نجمة

نجمة / اي نعم تفضلي..
المتصل / اني رضوة

مرات يتوقف عدنا الزمان..
ويبقى صدى  اللحظات..
بالمرة الاولى جنت مستعجله اريد اعرف هاي اختي
لو ام احد الطلاب

بصوت يرجف كلت تفضلي..
رضوة /نجمة اني اختج نسيتيني..

نجمة/اي نعم تفضلي..

رضوة /نجمه اني رضوة جعفر تذكريني..
اختج من ام واب..

سكتت ماعرف شنو اجاوبها ولا احجي.
سديت  التليفون..
ماريد أواجه صعب اواجه وارجع اعيد نفس الكلام صعب توصل احساس الم للي ماعاشه مهما يكون ألمك قوي غيرك يشوفه لا شيئ
انك اخ الاكبر
هنا مجرد ما نولدت الاول راح توكع عليك
مسؤوليات كبيرة
لازم تتحمل الكل
ولازم اجاري الكل
ولازم تكون مع الكل..

لكن لو تصفن ثانيه اكو احد وياك؟
لو كلها تريد بس منك
ومن بعد الطوفان.
مرات احمد ربي ع التجارب الي مريت بيها
خلتني اكون اقوى

ومرات لا العن يوم الي اجيت بي
بسبب الي عشته
محصل حاصل..

محد خسر مثلي..

من بعد هاي مكالمتي مع رضوة
تكررت بعد مدة
رضوة /نجمة اسمعيني لا سدين الخط
اني اضطريت اطلع لان ردت اكون نفسي واعيش وكلنا نعرف ماكو مستقبل بالعراق سافرت وحاليا عندي ولد واحد  سميته جعفر
واتخرجت وصرت دكتورة