لماذا انا ؟ ( روايات ليبية )

حلقة 3🔥

#لماذا_اناآ  🔥

#الحلقة3

بقلم dareen

_____________

نا: راقدة ع سرير حاسه روحي مريضه ومتكسره رن فوني برقم ايمن ومسجل روحه اخرة!!! ياااربي شن هالوقاحه رديت
نا: الو نعم شن تبي من قالك تسجل رقمك ومني قالك اصلا بنحكي معاك
ايمن: رفع رجليا ع طاوله ونفخ دخانه ،، هلا هلا بمرتي المستقبلية اللي ح نقصلها لسانها قريب 🤗
نا: ضحكت مرتي!! خيرك انتي طبيعي تحكي من جدك
ايمن: انعم انعم ها تشوفي فيه فاضي نبصر مع خلقتك ع مهم ي فقيريه خليني نذكر ليش كلمتك ليشش امممم ايوة اذكرت اليوم ولك الشرف طبعا ومفروض تسجدي لربك تشكريه حكيت لهلي عليك والأسبوع الجاي ح نخطبك
نا: فتحت عيوني بصدمه نعممممم
ايمن : اووووي وذني طرشتني شني مش مصدقه من الفرحه !! مقدر مقدر 😂
نا: تعرف الساس صبي توا واخبط راسك فيه وأحلم ي مريض ان ننخطب لواحد زيك وجيت بنكسر
ايمن: الله ياربي تعرفي شن قاعد نفكر شن بندير فيك اول يوم ولا طريقه اللي ح نقصلك فيها لسانك ولا طرق التعذيب اللي ح تشوفيها
نا: جن يركبك ماعد يطلع منك واحد تافه حقير مريض ماعش تكلمنييييي فاهم ولا لا
ايمن: ميه ميه عندك فيس ها!!! وخوك الفقري حتي هو عنده!
نا: سكتت وحطيت يدي على قلبي
ايمن: بحتي لساعتك خميس دقايق وحتنزل صورك برقمك بدنيتك كلها بعنوان حوشك هي تشاو
نا: بصوت واطي ل لا
ايمن: ابستم بخبث شنو  اللي لا 😏
نا: لا ما تنزلهن واللهي بابا ينجلط وخوي مش عارفه شن ممكن يدير
ايمن: ماااالا تسكري فمك اللي لك ساعه تلعلعي فيه وتحترمني فاهمه
نا: بلعت ريقي ومسكت دموعي،،، باه
ايمن: هي اندفسي عطيتك وقت اكثر من حجمك وتسكري خاربك حتي نت ممنوع😎
نا: غير قولي ليش بس شن وصلك لهنا ليش ما تقعد زيك زي اي حد طبيعي يحب ويتزوج بطريقه طبيعيه شن اللي خالك توصل للمرحله هذي نشفق عليك بجد
ايمن: فلم من كلامها او ممكن جا ع جرح،،،،صبا وبعياط  اسمعي ي بنت فقرررر واقسم بالله لين ندمك ع ساعه اللي جيتي فيها وراكي تحسبي ان ميت فيك غير قتلك حطيتك ف راسي وحساب الكف بعشرة وتوا هي وجك وسكر ف وجي
نا: عزقت الفون ع سرير وحطيت ايديا ع وجي وانهرت
ماما: جيجي تعالي كول بسم الله عليك كنك وجتني تجري جهينه احكي شن فيه سلم بنيتي شن فيه قولي
نا: خشيت تحت الشرشف مافيه شي تعبانه بس وطلعت نتيجه جزئي وسقطت ف مادة
ماما: الله يهديك ي بنيتي فجعتيني صبي صبي تعالي جهزي معايا العشاء  وشوفي خوك
نا: قعمزت علاء جا
ماما: اها توا غير وصل
نا: صبيت وغسلت وجي وطلعت سلمت عليه
علاء: خيرك ليش باكيه
نا: ها لا ش
ماما: طلعت نتيجه الجزئي وسقطت ف مادة
بابا: معلش ي جيجي تعوضيها
نا: هزيت راسي وبحتت ف علا القيته يبحت فيه ومرفع حاجبه  عديت بسرعه لكوجينه وكل شوي عيوني ع فيس جتني حاله وفوبيا
حطينا العشاء وكلينا وصبيت نغسل المواعين ماما ادير الشاهي
علاء: من برا  جهيينه
نا: طاح مني الصحن ادشدش
ماما: بسم الله شن صايرلك بس اليوم خلاص عدي شوفي خوك توا نلمهن نا
نا: نرعش خايفه يكون نزل صوري هزيت راسي وطلعت لصاله ما القيته طلعت برا القيته مقعمز ف مكان اللي نقعمز فيه مع حمادي ويدخن
نا: نفرك ايديا والخوف باين ع وجي،،،، نعم
علاء: اشرلي براسه قعمزي
نا: جيت وقعمزت جنبه
علاء: كنك!!
نا: شن مافيه شي ليش تسأل!
علاء: ليش باكيه ونتيجه شن اللي تتطلع ف ليل!!!!! كان مشيتها ع امك وباتك ما تمشش عليا اني
نا: زدت رعشت وبلعت ريقي هي طالعه من صبح وصاحبتي توا خبرتني
علاؤ: شقلب عيونه خلاص اسكتي لانك ماتعرفش تكذبي وماتخلينش نفلم عليك
نا: مسكت دموعي وجيت بنصبي مسك يدي
علا: تعرفي ليش ما كنتش بنخشيك لجامعه لان عارفك هبله وماتعرفش تصرفي وكتومه بس اني عندي ثقه فيك واي شي يصير معاك بتقوليه لي صاح!
نا: هزيت راسي
علاء: واني نوعدك اني نكون متفهم ونساعدك،، ام لو سمعت  من برا او خبيتي عليا شي حاجه ساعتها ما تلوميني ع اللي بنديره
نا: كنك علا اني مش دايرة شي ولله
علاء: نفخ دخانه عارف وقاعد انبهه فيكك مافيها شي جوني نحن ناس مالنش غير سمعتنا فاهمه
نا: هزيت راسي فاهمه وماعش تقولي جوني😶 اسمي جهينه او جيجي
علاء: ضحك لي ساعه نحكي ومسكتي بهذي توا
نا: ابتسمت توا قولي ليش ماتسيب شغلك المتعب هذا وتجري وراء تعينك
علاء: قريب ان شاءالله خير نجمع مبلغ كويس
نا: ايوه باش نخطبولك ونفرحو بيك😍
علاء:  ومن اللي بترضا فيا ترا
نا: شهقت وخيرك ماشاءالله لا قوه الا بالله جماال وتشتعل ومعتمد ع نفسك امها دعيتلها اصلا اللي بتاخدها
علا:يضحك ع كلامي هز راسه يمين ويسار، ،،،،، اول شي الجمال مش لراجل ثاني شي اني صح نشتغل بس هذا ما يسدش بنات توا لو ماكان الراجل معبه فلوس مايرضوش فيه
نا: لالا مش نظريه مش كل البنات نفس بعض
علاء: خلاص اسكتي بتفتحيلي محاضره توا،،،،،،،،، اني مانبش نتزوج نجيب فرخه نعاني فيها بسدني غير انتي
نا: باه باه وراسك قولي شن رايك ف حسناء والله تهبل
( حسناء تكون بنت خالتو❤)
علاء: ييياي عليا كم مرة قتلك نشوف فيها نفسك اختي مش اكثر وبعدين البنيه صغيرة عليا
نا: شن صغرها  م 98
علا: بحت فيا ببرود صبي صبي انتلفي مافش فايدة من الكلام معاك
نا: احسن باهي وصبيت ونا متريحه وراي أخ سند يحبني ويخاف عليا خشيت القيت ماما وبابا يشربو شاهي
بابا: شن الاخ واخته يهدرزو مع بعضهم ❤
نا: ضحكت اي يهدد فيه كالعادة 
ماما:  ربي يخليكم يارب
نا: امين،،، بابا حطيتني ف حافله اخرة
بابا: نقلتك اليوم مع معز والله ماني عارف خيرك سكرتي راسك محمود راجل كبير واحسنلك بنعرف السبب بس
ماما: احكي ي بت راه يقعد دايرلك حاجه
نا: لالا بس يجيني متاخر حتي ف مرواحه تفضا جامعه وهو مازال ما جا هي تصبحو ع خير وخشت رقدت