حجروها ريدي 💔 ( روايات ليبية )

حلقة 1🔥

رواية 🖤
تحت عنوان:
#حجروها_ريدي💔
بقلم:Hadeel Al

(ايات عمرها 22 سنه عندها اخت وحده وخوين وعرفناهم في المقدمه، ايات تقرا قانون ومتخرجه بس مازالت ماشتغلتش تعرفت على مروه في الاعداديه وقعدت صاحبتها المقربه مواصفات ايات عيونها بنيات مايلات للعسلي وشعرها قهوي داكن لتحت كتوفها وبيضه ونقشها على الاسود بطلتنا بنت عااديه جدا بس شكلها حلوو وجذاب🤤
تعرفت على معتصم في الجامعه وحبوا بعضهم وليهم 7 شهور مع بعض،،،
معتصم عمره 27 ونقشه على القهوي وشعره اشقر🤤
جمال عمره 25 سنه شعره قهوي وعيونه صغاار وطرف❤😂
عمها الكبير منصور مراته صالحه وبناتها جنات وناديه وعياله صلاح وجمال
عمها سالم عنده بنتين و3 ولاد مش مهمين في الروايه وعيلة سالم صايره مشكله بينهم وبين عيلة منصور وحمد وقاطعوا بعضهم
عمها ابراهيم
مراته اسماء عنده ولد اسلام وبنتين رندا و سميحه
اسلام 28 سنه
رندا 21 سنه
سميحه19 سنه
وهذي عيلة ايات❤)
الحلقه الاولى:
ايات:بالرغم من انه اليوم فاتحتها  بس كانت خايفه وتبكي
_بدو الناس يجوا والحوش يزحم وايات في الدار
في المطبخ:
سالمه:كنهم يابتي طولوا
هناء:بلكي الشيخ تأخر
سالمه:مم .. قطع عليها صوت حمد ينادي
سالمه:هيا هي
سالمه جت لحمد:نعم
حمد:اسمعي راه الفاتحه ماصارش منها والبنت حجرها ولد عمها
سالمه:شنوو حي علينا
حمد:هذا اللي صار والفاتحه التغت
سالمه:حي علينا ووه،، وسمعت حاجه طاحت التفتت لقت ايات طايحه قدام الدار:ووووه بنتي وجت تجري
هناء جت:شن في وبحتت  لقت ايات طايحه:ووووه كنها وطبست لأيات:ايات نوضي نوضي
التمن بنات العيله على ايات
ناديه بنت منصور:كنها ياعمتي
ليلى جت جايبه ميه وسكر:هاكي ياماما
سالمه خذاته وشربت ايات:تسمعي فيا ايات ايات
اسماء مرت ابراهيم:ارفعنها حطنها على الصالون
مروه:تعالن نرفعوها
وجن ليلى ومروه وجنات رفعنها وحطنها على الصالون
قعمزت مروه وحطت راس ايات على كرعيها ودارتلها عطر
ايات تفتح في عيونها
سالمه:ينعلي تسمعي فيا
مروه:ايات وتهز فيها
ايات:اممم نسمع،، وتشوف في حد بس مشوش
مروه:اشربي ميه ..وشربتها
ناديه التفتت على الصبايا:جاها خناق العرايس ومعش تاكل عشان هكي داخت تفضلن للصالون والتفتت على سالمه وصبايا عمامها:عدن للصبايا وتوة نشوفوا ايات
مىروه:تعالن ساعدني نخششوها للدار
جنات:هيا وساندنها للدار
ايات:نبي مروه شويه
البنات:تمام وطلعن
مروه:شن في
ايات بدت تحكيلها شن صار
اللي صار(ايات كانت في الدار تبكي وسمعت باتها ينادي على امها طلعت وصبت قدام باب الدار وسمعت كلام بوها ولما سمعت الكلام ماتحملتش وداخت
نردوا للروايه
مروه:حسبي الله ونعم الوكيل ماخطرش عليه ياخذك اللا توا
ايات تبكي:دمرلي حياتي حرام عليه انا بنت عمه😭
عند الصبايا:
سالمه:ياعمتي
فتحيه:نعم
سالمه بصوت واطي :لما كنت في المطبخ كلمني حمد قالي الفاتحه ماصارش منها
فتحيه خبطت على صدرها:هيي كيف صار
سالمه:شكلهم ماتفاهموش وقالي ايات حجرها ولد عمها
فتحيه:ياناري على بنيتي💔
هناء:من من الولاد حجروها؟؟
سالمه:مشعارفه والله
الصبايا:كنك يا سالمه سالمه:قالولي الفاتحه ماصارش منها وايات حجرها ولد عمها
الصبايا:ياناري ربي يعينها
وبدت الاشاعات بين الصبايا
1.البنت شكلها مش مزبوطه عشان هكي سيبها العريس وبيستر عليها ولد عمها
2.العريس ولد مش تمام
وكل واحد يزيد من عنده🤦🏻‍♀
صالحه رن تلفونها صبت
صالحه:كيف صار باه توا نقوللهم ... وجت قعمزت جنب سالمه ووجها متغير
صالحه:سالمه
سالمه: نعم
صالحه:توا رن عليا منصور قالي جمال هو اللي حجر ايات
سالمه:شنو😨
صالحه:هكي قالي والله انا مش راضيه حرام تخرب فرحة ايات بس الله غالب
سالمه تبكي:ياناري على بنتي انا💔💔
هناء:صلي على النبي يا سالمه
سالمه:عليه الصلاة والسلام
فتحيه:لا حول ولا قوة إللا بالله ،، وصبت لدار ايات دقت
مروه:من
فتحيه:انا فتحيه
مروه صبت فتحت الباب:خشي يا عمتي ،،والتفتت على ايات:انا طالعه ..وطلعت
فتحيه قعمزت جنب ايات:كيف حالك توا يابنتي
ايات:كويسه يا امي
فتحيه:ماتزعليش يابنتي كله قسمه ونصيب يمكن جمال خير لكي
ايات انصدمت:جماال😨
فتحيه بإستغراب:اها جمال كنك
ايات تذكرت كيف هو بتاع بنات ومش معقب بنت اللا وكلمها:بس انا مانبيشي يا امي
فتحيه:هذا نصيبك يابنتي
ايات تمت تبكي:لا مش نصيبي نصيبي مع معتصم😭😭
فتحيه حضنتها:خلاص يابنتي قطعتي روحك بالبكاء من الصبح وانتي هكي
في الليل وتحديدا في حوش حمد
سالمه:شن صار في الفاتحه عشان يحجرها جمال؟!
حمد تنهد:اللي صار(الشيخ:نتوكلوا على الله
حمد & محمد:ان شاء الله
جمال:استنوا وبحت في معتصم:اضني ايات بنت عمي
معتصم وعيونه حمر:شن قصدك
جمال:وانا ولد عمها واولى بيها ولا لا ياعمي
حمد:بس ياولدي
جمال:ايات بنت عمي ونبيها وانا اولى بيها من الغريب🤔
حمد:ياولدي لو جيتني قبل مانعطيها لمعتصم راه عطيتها لك بس انا عاطي كلمه للناس خلاص
منصور:تردني ياخوي؟
حمد:لا انت خوي وجمال زي ولدي بس لو جانب قبل مانعطيها لمعتصم راه عطيتها له انا وين نلقا زي ولد خوي.
جمال:والعادات والتقاليد ياعمي؟؟.
محمد:مش لعبه هيا وانت توا خطرلك تخطبها
جمال:انا اللي عندي قلته وصار اللي صار يا وبحت في معتصم:يا عصومي😉
معتصم صبا:والله لما نمرجك طريحه تتذكرها طول عمرك
ميلود مسكه:كنك هبلت
عبد السلام:باتي من جدك بتعطيها ، وبحت في اشرف،:نوض تكلم اختك بتضيع
اشرف:عاداتنا وتقاليدنا يمنعنا نردوا ولد العم لما يطلب بنت عمه
جمال:هذا الكلام الصح
اشرف شافله:وحسابك معايا
جمال:ماشي ياولد العم ولا يا خو المدام
معتصم:تردني يا عمي حمد؟!
حمد:مش بيدي والله
الشيخ:هذي عادات وتقاليد بس الشي هذا ايام جدودنا
منصور:لو بترفض ولدي ياحمد انسا ان عندك خو اسمه منصور
حمد:صلي ع النبي
محمد يبحت وساكت
ميلاد:من الاخير شن بيصير
حمد بحت في معتصم:نصيبك مع غيرها ياوليدي
مؤيد تعصب:شني لعبه هيا كل مره بكلمه
محمد وقف:هيا ياولاد
معتصم مشا لحمد والكلام يتردد في وذنه:منور ياعمي والجرح اللي جرحتهولي عمره مايبرا وربي يهني ايات ربي يهنيها مع غيري ..والتفت بيطلع
عم معتصم عبد الباري:معتصم
معتصم مسح دمعته والتفت:نعم عمي
عبد الباري التفت على الشيخ:عندك فاتحه تقراها اليوم يا شيخ
معتصم: شنو يا عمي
عبد الباري قرب وحط ايده على كتف معتصم:بنتي ليك والفاتحه اليوم والعرس في يومه مش ولد خوي اللي ينرد
محمد فرح بخوه
معتصم برغم حزنه اللا انه ابتسم وباس راس عمه:منور ياعمي
عبد الباري:بوجودك ياغالي)
حمد:خلاص وجمال غالط جا في الفاتحه وحجرها
سالمه تبكي:حسبي الله ونعم الوكيل💔
في حوش معتصم:
معتصم راقد على السرير ودمعته في عينه:اه شن بنقول وخلاص ،، وقعد يذكر كيف تعرف عليها(ايات كانت في الجامعه في القسم بتاعها "" القانون""
ايات:مروه انا طالعه نجيب قهوه من الكافيتيريا ونجي
مروه:مازال خمس دقايق وتبدا المحاضره
ايات:راسي صدااع نمشي نجيبها بسررعه ،، وهي طالعه من الباب خبطت في معتصم بالقوه وطاحت لأنها كانت تمشي بسرعه
معتصم: بسم الله كويسه
ايات ماسكه راسها:اففف كويسه اها
معتصم مد يده بيصبيها
ايات بحتت في يده وصبت بروحها:نقدر نصبي بروحي واسفه انني خشيت فيك ومشت
معتصم: الحق في اللي بيساعد ،،ومشا
وموقف ثاني😂
ايات ماسكه قهوه وتدور في مروه ولما جت بتلتفت كان معتصم هارب من اصحابه خبط فيها وانكبت القهوه عليه
معتصم يباعد في التيشرت:احح كنك ماتشوفيش
ايات:ياحيواان القهوه😨
معتصم: كبيتيها القهوه يا شاطره ومشا
ايات:افف معش عندي فلوس عشان نجيب قهوه😞ومشت لمروه
شويه وجا معتصم ماسك في يده قهوه وجاي لأيات
معتصم:امسكي قهوه وحقك عليا
ايات:وشن دراني انك مش حاط فيها سم؟
معتصم: العافن مايموتش
ايات خذت القهوه وكبتها:اعتبرني شربتها😊
معتصم تعصب:الحق مش عليك الحق عليا اللي جايبلك قهوه لأني كبيتها ومعش عندك فلوس،،وعدا
ايات:يافضيحتي سمعني😱
مروه:عيب عدي اعتذري منه مهما كان جا وتأسفلك
ايات:افف ،وصبت تدور فيه لقاته مصبي مع اصحابه
ايات:شن اسمه هو افف يا اخ معليش
اصحاب معتصم لفولها كلهم ماعرفوش على من تحكي
ايات:انت انت
معتصم بحت فيها ولف وجه
ايات:انت اللي كبيت عليك القهوه
الولاد كلهم بدوا يضحكوا😂😂
معتصم صبا وجاها:كنك
ايات:اسفه كبيت القهوه اللي جبتها ليا
معتصم رفع حاجبه:لا عادي ،، ورد لصحابه
ايات:مغرور ،،ومشت لمروه
وبدا معتصم كل مره يتعمد يحكي معاها لعند قاللها هاكي رقمي نتعرفوا ومن هنا بدت قصتهم)
وفي وسط تفكيره قطع عليه صوت الباب يدق طلع من الدار ومشا فتح لقاها
معتصم:خشي ،،وابتسملها☺
#يتبع
من اللي جايه لمعتصم في الليل؟
وكيف بتكون حياة ايات ومعتصم بعد اللي صار؟
وهل ايات حتحب جمال؟
ومعتصم وبنت عمه حيحبوا بعض ولا لا؟
كله تعرفوه في الحلقات الجايات ، وعطوني رأيكم في الحلقه وتعرفوني ولا لا!
♥
الحلقه الاولى قصير بس الحلقات الاخرات طواال😍