لبارح ماقدرتش نرقد سكات بزاف فالدار😒 تسمع غير سوجي تع كورونا يدور😒 وماما كل ساعة مع قناة النهار تشوف يلا وصل كورونا لعين البيضاء، قلت لازم نسييهم شوي فهذا السوجي😈 عيطت لخلاتي وعماتي قتلهم راكم معروضين غدوا للغداء😌 وراحت عند ماما وبابا ودرت روحي نحكي فتيليفون: واه عمو جيلالي دوك نقولهم قتلهم: عمو قاللكم غدوة راكم معروضين للغداء 🤣 بابا قالي:يااه عمك وجه العدس يعرضنا هاباينة الغداء عدس ومقرون، الصباح رحنا عند عمو وخلينا غير خويا المصفار فالدار على الحداعش خالاتي وعماتي لحقو للدار مالقاو والو ني فطور ني حنا😅 قالهم خويا عمو الجيلالي عرضهم للغداء قاتله خالتي:وانا حنا ثاني عيطتلنا مصيبة نتاع ختك قتلنا راكم معروضين قالها: ياو انتو ثاني مهابيل ديرو عليها كل مرة تحشيهالكم روحو لحقوها راهم عند عمو جيلالي😅 غير طبطبو حليت عليهم تسمع خالتي: هااامصيبة انتي ماتعدليش طبايعك علاه تكذبي علينا قتلهم:جابتكم كرشكم حتى عمو الجيلالي ماقصرش جاب الخير والخمير مساكين امنو ووقت الغداء طابلة من القنت للقنت فول واللبن والخمير 😂 خالاتي قعدوا يشوفو في عماتي ووحدة تغمز لوحدة😉 قتلهم: واش عجبكم الغداء حسبتو المشوي والمحمر تاكلو الرهج😈
