عشق مابعد الطلاق

البارت الاول

#ساره# فاضل

''''''عشق مابعد الطلاق

نتعرف على ابطال القصه

أسمي ناي عمري 17 أني ازغر وحده بخواني بزر الكعده مثل مايكولون
ماكملت دراستي اول متوسط خلصته وتوفت امي وطاح البيت كله براسي عاد بطلت وكعدت لان المسؤليه جبيره مومال دراسه
الله كريم يمكن ارجع للمدرسه بس بعد بيد الله ماندري بالدنيه شضامتلنه ولو اني اموت ع المدرسه وضاله اكمل بنفسي بس شسوي هاي حكمة الله اللهم لاأعتراض
اعرفكم ع عائلتي
اخوي سجاد عمره 35متزوج وطالع خارج العراق من زمان عنده 2بنوتات يشبهني هههه عايش ومستقر مودائمآ يسأل علينه بحجه الشغل وماعنده وقت يالله الله يوفقه شنريد منه

واخوي الثاني أسمه والي وعمره 29ومامتزوج
والي فطير ومن اهل الله لازم البستان الوالدي رغم هوه فقير بس سباعي ومسوي البستان يخبل سوده عليه تعبان يطلع من الفجر للعصر ماياذي احد ياكل لكمته وينام بس اني مداريته مخليته بعيوني اخوي هاذ يستاهل ماي عيني لأن بس هوه الي والوالدي

والدي رجال جبير كلش تعبان متعبته الدنيه يوم يطلع للشغل ويه والي وعشره بالفراش اني اخاف علي واتمنه مايطلع لان تعبان ومريض وهوه مابقه غيره النه الله يحفضه النه خيمه وين نروح من بعده

امي قبل سنتين توفت بالسرطان واحنه حالتنه تعبانه ماكدرنه نسويلهه شيء راحت الرحمة الله وخلتني أبحدي لاأم لاأخت والله تمنيت عندي اخت تساعدني ع دنياي لأن الدنيه بدون ام ولأخت ماتنطاق ماعندي صدر حنين الأنتجي علي وكت التعب والهموم رغم اني زغيره بس احس نفسي حزينه

ابوي
رجال تعبان عاش طول عمره ع الزرع
يزرع يعيش ميزرع ميعيش هوه وحيد امه وابو ماله احد بس اخته من ابو
عمتي ام قيصر
عمتي مديرة مدرسه انسانه مثقفه وواعيه تحبنه تموت علينه دائمآ تجينه بس هلفتره ماكو ماأجت وهيه الساعدت اخوي سجاد يطلع خارج العراق ويكون نفسه شكد حاولت تساعدنه بس والدي عزيز نفس ومايقبل يمد ايده الاحد حته لو جانت اخته َ جان رافض المساعده بس هيه خطيه متقصر ماتنسانه دائمآ ماتجينه اديهه فارغه شنحتاج متقصر

اليوم كاعده متأخره الساعه سبعه راحة عليه نومه
كعدت من الصبح ادردم ويه روحي

هسه هاذه المسكين والي شلون طلع للشغل وماكعدني اسويله لكمه ياكلهه هسه اكيد ميت من الجوع خلي الحكه بالريوك احسن لأن ادري بي يشتغل ومايحسب للتعب
9
حضرت الريوك بيضات سلك وخبزات خليتهن بعلاكتي ورحت ورا والي للبستان ردت افوتله من ورا بيتنه لكيت والي ناسي الماطور مال الري مشتغل والطين للركب خفت اطيح واطين وهيه عايزه هههه

صحت علي
والييي والييي والييييي

جنه مايسمعني خل اروح من بستان جوارينه افترله ولو جيرانه بستانهم ع الشارع بس يلا ميخالف خطيه والي يفوت علي ريوكه
هستوني عبرت الشارع واجت سياره طايره الا شوي جان دعمتني يمه دخيلك ربي جان موتني الخبل