سر هوسي (كرونيك مقتبسة) 💖

29

أسمحولي لي زامي  راح نكمللكم الكرونيك كيما هك ضروف خلاتني مانكملش نكتبهم في الصور 

المحقق "كارل" توجه للشركة لي كانت "جينيفر" و "جيمس" يخدمو فيها وكان يسقسي فواحد من الموضفين اذا يعرفهم

*كارل : تعرف "جينيفر"و "جيمس"

*الموضف : خلاو الشركة قبل العرس ديراكت وكان هذا قبل شهرين

* كارل : تسما تعرف "جيمس"

*الموضف : تتمسخر ؟..كانو اشهر كوبل فالبيرو .. وكانو كيوت بزاف مع بعضاهم

وبين ماكان المحقق يهدر معاه "جينيفر" هبطت للبيرو نتاع "جيمس" وفتحت الميكرو نتاعو وكي كتبت "جينيفر آلن" تفتح الميكرو .. وبدات تحوس فاليفوطو نتاعو كشما تلقى .. وهنا تشوكات .. لقات بلي لافوطو لي شافتها هاذاك النهار فالالبوم وحيرتها انعكاس "جيمس" فالمرايا ... وعرفت بلي لافوطو مركبة

اما "كارل" كي نعتلو الموضف الصور نتاعهم كي كانو فالشركة لقا بلي "جينيفر" مع راجل و "جيمس" يشوف فيهم من بعيد .. "كارل" ضحك وسقسا الموضف

*كارل: اذا كان هذا لي قدام "جينيفر" هو "جيمس" مالا لي قدامهم شكون

*الموضف : "راين غاريتي" .. علاه كشما بيهم..

*كارل : مازال يخدم هنا ؟

*الموضف : عندو شهرين ماجاش ..علاه ؟ كشما صرا ؟

*كارل : راح نحتاج كلشي تقدر تمدهولي من معلومات

*الموضف : اوكي .. بصح اذا حبيت.. بعد ما خلاو الخدمة .. لقيت برييا صغيرة كان "جيمس" كتبها ل "جينيفر" وهي نساتها فالبيرو ..راح نعطيهالك اذا كانت تفيدك.

*كارل : ايه .. مارسي

"جينيفر" حكمتها الصدمة لانو الصور لي كانو في الالبوم كامل كانو ترافيك .. وعرفت بلي لي راهي عايشة معاه مش راجلها الحقيقي

وهنا جاتها صورة في راسها .. ليلة عرسها جا "راين" وقتل راجلها "جيمس" .. حاولت تحوس في غوغل كشما تلقى لقات بلي الانترنت ماكانش هي حارت بزاف وكي راحت تشوف المودام لقات بلي الخيط مقطع ... وهنا فهمت بلي دارلها هاك باه ماتتواصل مع حتا واحد... وبين ما "راين" كان يصوق عرف بلي البوشات نتاعو ماكانش .. مالا رجع ماشاريال باه يرجع للدار وهي كانت تمشي بزربة وهي تعرج وباين على وجهها الالم .. هزت بورطابلها وهزت لافاست نتاعها .. وراحت تحوس على ريزو .. وكي حلاتو لقاتو بلي فازد من داخل وهي تزرب هكاك طاحت وتشوكات كي شافت يد نتاع عبد مدفونة فالجنان .. مافهمتش كيفاه حتان جاها "راين" من اللور .. ضربها بحجرة صرعها

بعد زمان كانت "جينيفر" مازالت دايخة وتسمع غير في "راين" يقولها

*راين : "جينيفر" فيقي .. آكي مليحة ... طحتي طيحة قاوية والجرح اللي في راسك كبير

*جينيفر : وش صرا ؟

* راين : وش كان حايصرا في رايك .. كيفاه تحوسي فجنان ونتي آكي عارفة بلي ماكيش قادرة تمشي

*جينيفر : وش راهو صاري ؟ حقا وش درت بتيليفوني ؟ و...وش صرا بالانترنت .. و.... (قاطعها)

*راين : اششش .. ماتقلقيش... اسمعيني ..

*جينيفر (وهي خلعانة مايفاهمة والو) : لالا..لالا

*راين : ادي دواوات نتاعك و ريحي ..(قاطعاتو)

*جينيفر(فقدت اعصابها وبدات تعيط ) .. مابغيتش ندي الدوا .. ماحبيتش نريح

وهنا شربها الدوا غصبا عنها و بدا يعقملها الجرح نتاعها

*جينيفر : شكون نتا

* راين : وش قصدك

*جينيفر : وش درت براجلي ؟

شاف فيها وحد الشوفة ومن بعد قدملها رجلها للطرف نتاع السرير وربطهوملها

*جينيفر : وش راك دير ؟

*راين : وبعد كلشي درتهولك .. هكا ترديلي لبليزير لي درتو فيك ضركا لازم ترديلي شويا من خيري

*جينيفر (وهي خلعانة) : لالا .. لالا

*راين: اششش . ابقاي هنا .. انا نكمل شوي خدمة ونجي..راح يكون كلشي مليح

*جينيفر : (وهي تحاول تفك رجلها) اسنا ..اسنا