سر هوسي (كرونيك مقتبسة) 💖

30

"راين" كان فيدو شكارة نتاع التراب.. حتى صادف الممرضة فجأة وعيطتلو شحال من خطرا وهو ماداهاش فيها .. حتان لحقاتو للطوموبيل وطبطبت على الكارو وهو هبطو باه يسمعها

*الممرضة : الرقم لي مديتهولنا مايخدمش ؟

*راين : ههه انا و "جينيفر" كنا نهدرو هاذ الصباح وقلنا بلي ماتاصلتوش بينا

*الممرضة (كي شغل ما أمناتوش) : كيفاش راهي

*راين : أي مليحة

*الممرضة : المحقق راو يحوس عليها

*راين : المحقق ؟

*الممرضة : ايه . وانا صراحة تقلقت  .. خاطراكش رقم مايمشي من لي مديتهولي

*راين : ايه .. بالاك تخلطو عليا نوامر (وشعل الطوموبيل)

*الممرضة : وش رايك كون تقولي وينها "جينيفر"

* راين : علابالي بلي راكي تخدمي في خدمتك و حابا تعاونيها .. بصح مارسي اي لاباس بيها

كان حايغلق الطاقا وكي سمع بلي قاتلو ضرك نعيط للمحقق ..

*راين : بعدي على الطوموبيل تاعي

*الممرضة : كيفاه وشنو ؟

وقلع طيارة وبقات الممرضة مشوكية في بلاصتها ومافهمت والو

وهو يصوق كانت لابوليس وراه هو هنا وجد روحو وجبد الموس و غارا الطوموبيل بصح لابوليس فاتاتو برد ...عرف بلي ماكانتش تبع فيه

فاقت "جينيفر" و شافت بلي رجلها مربوطة بالسرير فحاولت تفكها وكانت تعيط باعلى صوتها "جيمس" "جيمس" بصح واحد ما ريبوندا عليها وملقات حتى حل غير تسحب رجلها للور ... وتالمو فورصات على روحا قريب قطعت رجلها ... وكانت تعيط قلبها خرج...بصح ماستسلمتش وهكاك قدرت تفك رجلها وجبدت لمشبك نتاع الشعر باه تحل الباب كيما الخطرة لي فاتت ..

خرجت وبسيف لاكانت تمشي ... كانت تتوجع في كل خطوة تخطيها .. راحت للكوزينة باه تحوس على حاجة تضغط على رجلها باه ماتوجعهاش وما لقات غير سكوتش .. لوات بيها رجلها وكي كملت راحت للغاراج لقات طوموبيل .. زربت ركبتها ..وكانت تحوس على المفتاح باه تنوض الطوموبيل ...بصح لقات تيليفون نتاعها غير حلاتو لقات لافوطو نتاعها هي وراجلها

توتاكو تحل الغاراج .. وهنا "جينيفر" رجعت للور وتخبات باه مايشوفهاش "راين" وكي حل لامال تاع الطوموبيل لي كانت فيها جينيفر ..كانت جثة راجلها الحقيقي ومزية مافاقلهاش ..خرج وقفل الغاراج .. خرجت من الطوموبيل ومن الغاراج وكي شافاتو حايدخل مالقات حتى حل غير انها ترجع للبيت . وغطات رجلها بالغطا باه مايفيقش بلي حلتها ودارت روحها راقدة.. 

*جينيفر : آآ جيت

*راين : ايه .. وتلاقيت الممرضة

*جينيفر : صح ؟

*راين : ايه . سقساتني عليك ..... كيفا ش راكي ضرك ؟

وكي جا ينحي الغطا هي حكمتها الخلعة وفي زهرها صونا الباب

*جينيفر : وشي هذا ؟

*راين : ششش ... ضرك نرجع

راح "راين" للتيليفون تاع الباب وقال : رانا مشغولين ارجع بعدا

كارل : "جيمس" انا المحقق كارل..تقدر تفتحلي الباب ؟ لازم نهدرو......"جيمس" ؟

*راين : (خمم وبقا يشوف فالطاقا ومن بعد قال) : اكيد .. تقدر تفوت

فتحلوالباب .. من بعد دخل المحقق "كارل"وعيط "لراين" : "جيمس"... "جيمس" ولفتت انتباهواللوحة اللي مكتوب عليها "آل ويليامز" ..لقى بلي كارت مقشر وكأنو هذيكمجرد لصقة .. جبد الموس وكي نحا هاذ اللاصقة لقا بلي العنوان الاصلي هو "آلغاريتي"