...// Aaj ki raat jaldi beet jaaye bas yehi chal raha tha dimaag mein. Mujhe toh theek se yaad bhi nahi ki itna excited aur itna khush mein pehle kab Hua tha...Shayad kabhie nahi...Par ab ek ladki ke sath park mein ghumne jaane wala tha yeh cheez na toh mujhe chain se jaagne de rahi thi aur na hi chain se sone de rahi thi. Mein humesha se ladkiyon ke maamle le complicated raha hu. Kabhie life me koi ladki friend bhi nahi thi. Toh iss maamle mein mera experience bilkul ZERO tha. Kisi ladki ka aapko itna pasand aa jaana ki na neend aapki ho aur na chain. Shayad isiko aaj ke time CRUSH kehte hain...Haan ! Mujhe Anshika pe bahut bada wala CRUSH tha Aisa mujhe mehsoos hone laga tha.
Saari raat mein ussi ki yaadon mein khoya raha. Uski woh jheel si neeli aankhein, uski woh teekhi naak aur uske gulaabi honth mujhe sone nahi de rahe the. Sone ki koshish mein, mein 12-1 baje ke kareeb so gaya aur subha 9 baje uth kar taiyaar hone laga. Ab ladki ke sath ghumne jaana tha toh apni Pankaj Udaas jaisi shakal ko khushnuma banaana tha. Meine ek badiya si red colour ki T-Shirt pehni aur Blue Denim aur AXE Signature chidakne ke baad mein university ki taraf nikal pada. 9:50 pe mein university ke entrance ke theek saamne tha. 15 minute wait karne ke baad 10:05 pe woh aayi. Meri aankhein toh maano thamm si gayi thi.
Usne blue colour ki Shirt aur Trouser pehna Hua tha. Meine pehli baar usko shirt mein dekha. Uske khule baal aur uski aankhon ka kaajal mujhe ghayal kar chuka tha.
Woh aayi aur usne mujse kaha " hey ! tum pohunch bhi gaye...kab se aa gaye the tum?"
Meine jawab diya "Ho gaye kuch 5-10 minute"
Toh usne kaha "Chalein phir bunk maarne"
Toh Maine kaha "han kyun nahi..."
Aur phir hum auto lene ke liye road ki taraf jaane lage. Ab mein itna bada GADHA tha ki ek itni khoobsurat ladki mere saamne thi aur meine uski taarif mein ek shabd nahi kaha. Yehi hoti hai boys school me padne ki pehli disadvantage.
Hume phir auto mil gaya aur humne Auto wale se kaha ki chalo bhaiya BAGH-E-BAHU le chalo.
Auto mein humare bich utni baat nahi hui. Par mein nazar chura ke usko dekhta woh apne baal sanwar rahi thi. Uff uski yeh adaayein...Kya lag rahi thi mein bayan nahi kar skta. Uss waqt aisa lag raha tha ki bas iska sath mil jaye toh puri zindagi khushi khushi beet jaaye.
Kuch 15 minute baad hum Baagh-E-Bahu pohunch Gaye... Humne park entry se tickets li aur Andar ki aur chal pade.
Andar jaate hi usne mujhse khaa ki uski fountains ke sath photo lu mein. Toh Maine uski pictures li.
Ab woh mere sath selfie lene lagi. Sach kahu toh aaj tak Maine yeh imagine hi nahi kiya tha ki koi ladki mere sath legi -- SELFIE.
Ab mereko aade-tede muh banaane aate nahi the toh wahi apna famous champu smile de diya Maine. Phir hum aage gaye aur ek bench pe baith gaye.
Aur usne mujhse kaha "Yaar mein humesha se sochti thi ki jab college pohunch jaungi toh khoob ghumungi-firungi aur life enjoy karungi...Aaj mein wahi kar rahi hu"
Muje samaj nahi aaya ki mein kya kahu toh meine keh diya "han mera bhi kuch aisa hi tha"
Toh usne kaha "Tum toh ladke ho...Tum toh jaha chaho wala ghum skte ho. Sacrifices toh hum ladkiyon ko karne padte hain"
Toh Maine jayada feminism pe behas na karte hue kaha "Hmmm"
Tabhie meri nazar gayi waha bench pe baithe couple par...Woh log passionately ek dusre ko kiss kar rahe the. Ab aap imagine Kariye ek itni khoobsurat ladki ke sath mein baitha hu aur saamne kass ke chumma-chaati chal rahi hai...Kaisa manzar hoga woh mere liye. Mein agar akela bhi hon toh ek baar ko Sharma jaau lekin yaha toh ladki sath me thi.
Tabhie uski nazar bhi uss couple pe padi. Aur woh ignore karte hue mujhe dekhne lagi ...
Kuch der baad woh smile karne lagi aur kehne lagi "Yaar yeh log kaise khule-aam yeh sab kar lete hain"
Meri samaj mein nahi aa raha tha ki iss pe usko kya jawab du...Kabhie kisi ladki ke sath kissing pe discussion karna padega socha nahi tha.
Toh Maine kaha "Han ab honi ko kon taal sakta hai"
Toh usne kaha "Haha! what honi and all...Yaar seriously kaise kar lete hain yeh log"
Ab mein kaise batau ki kaise kar lete hain meine Emraan Hashmi School of Kissing se Ph.D toh ki nahi thi...
Isiliye meine usse kaha "Pata nahi kaise kar lete hain"
Toh usne kaha "Tumne kabhie apni girlfriend ke sath aisa nahi kiya na...sorry I'm getting personal "
Meri phat ke haath mein aa gayi...
Meine kaha "Girlfriend! Na ...Meri koi girlfriend nahi hai" meine sharmate hue kaha
Usne kaha "Are you serious! tumhari gf nahi hai...Yakeen karna mushkil hai"
Ab isme yakeen karna mushkil kaise ho gaya..Mein Tom Cruise jaisa toh hu nahi ki ladkiyan mere piche baage
Toh Maine kaha "No ! I'm serious...meri wakaiye koi gf nahi hai"
Toh usne kaha "Oh! mujhe laga ki tumhari gf toh zaroor hogi....Interesting character ho tum"
Meine kaha "Thanks! Tumhara hai"
Usne pucha "kya??"
Maine kaha "boyfriend?"
Ussne hanste hue kaha "Nahi yar! 4-5 ne propose toh kiya tha but baat ni bani...koi pasand hi nahi aaya"
Yeh sunke behad khushi hui mujhe ki uska koi bf nahi hai aur dukh bhi kyunki usko bahuton ne approach bhi kiya tha. Mujhe iss baat ki insecurity thi ki kahi kisi ne isse propose kiya aur isse ladka pasand aa gaya toh !
Tabhie usne kaha "Pata nahi aisi kon hoga jo pasand aayega. Aur kya pata kabhie koi pasand aaye hi na."
Phir hum ghumne lage aur fish aquarium chale gaye. Uske baad humne gol-gappe khaaye tab tak time 2 baje ke kareeb ho gaya tha.
Toh usne kaha ki ab ghar chalte hain aur "Acha suno mujhe meri pics send kar dena"
Meine kaha "Send!! kaha"
Usne kaha "oh my bad. mera number note karo phir WhatsApp kar dena"
Meri khushi ka thikaana nahi raha...Ekdum se current si daud gayi body mein
Maine uska number note kiya aur woh apne ghar chali gayi.
Ab bhai yaha pehle ladki ka number milta hai aur baad mein baat aage badhe toh ghumne jaate hai ...mere case mein bilkul hi ulta tha pehle ghumne gaye aur baad mein number mila...Par jo bhi ho raha tha jaisa bhi ho raha tha mein khush tha ....Mein bahut khush tha...Ek alag si hi feeling thi...Pehli baar mein zindagi mein itna khush tha aur uss khushi ki wajah thi Anshika • ...//
To Be Continued.
WRITTEN BY
ABHISHEK SINGH RAJPUT
