سحر كادي ( روايات ليبية )

حلقة 1🔥

#سحر_كادي❤ حلقة 1 ❤

الكاتبة " هبوش "

مريم : كااااااادي

اني سيبت السلة من يدي وطلعتلها : نعم

مريم : خشي قرضي السلاطة

اني : شوية بس خلي ننشر

مريم تعلي ف صوتها : سرعي روحك قداش بنقعد نعلم فيك

اني هزيتلها براسي وبعدين طلعت ننشر فالحوايج ف البلكونة متع داري لأنها الوحيدة فاضية
وأني ننشر تلمحت سيارة كحلة مسلفرة درست ف الحوش إلي لاصقة فينا وهو كان عبارة عن حوش ع 3 ادوار وديما يأجرو فيه عمرنا ماشفنا أصحابه الأصليين
المهم نزل منها شاب لابس جاكة جلد ونظارات وشكله غريب بكل نزل نظارته وقام راسه بالصدفة جت عيني ف عينه 😶

وخرت لين عترت ف السلة 😂 ودخلتها وخشيت

مها : ماتسمعيش في امي تنادي ياحيوااااانة 😡 تمنزلي

اني مارديتش عليها ونزلت طول ومتعودة ع الهزايب اصلا

لحظة نعرفك بنفسي ! اني قصتي قصة يابنات
اسمي كادي كلكم حاتستغربو ف الاسم صح لأن اسم أجنبي وامي هيا إلي سمتني 💔 الله يرحمها

أمي ايطاليا وبوي ليبي توفو بحادث وكنت معاهم بس ربي كتبلي عمر وقتها كان عمري 5 سنين من يومها خداني عمي بس بالغصب اي والله لا هو راضي ولا مرته بس ماعنديش إلا العم هذا وخوالي أجانب مانعرفهمش بكل ولا عندي عليهم أي معلومة لا حد الآن

عمري 22 سنة مواصفاتي أجنبية طويلة وبيضاء وعيوني زرق

عايشة عيشة الذل ف حوش عمي تقول مربيين حيوان معاهم حشاكم
عمي ماعنداش كلمة مع مرته إلي تقوله هو الماشي
عمي هذا مرته اسمها مريم وعنده 3 بنات مها ، رويدا ، رنا
وولد صغير اسمه يوسف

مريم ( مرت عمي ) : كااااااادي يعطيك وادي ره خيرلك معاش تتمرخي

اني : هاني جاية هي

نزلت نجررري وخديت منها السلاطة وقعدت نقرض فيها لين خشت رنا كانت ف المعهد

رنا : وين امي 😒

اني : بالك فوق

رنا : شن طيبتي

اني : رز ☺

رنا : ديما رز كسكسي رز كسكسي الزفت مللتونا

اني : به شن تبي انتي وكان لحقت تو نديرلك

رنا : ما نبي شيء انطمري .... وطلعت من الكوجينة

مريم خشت بعدها : خيرك شن قلتيلها ؟

اني : هيا إلي تنفخ مش عاجبها شيء

مريم : سكري فمك بلا قلة أدب

اني سكتت ومن داخل قريب نتفجر
ماسد يتيمة ما سد ناخد المعاملة كل هالسنين

ماعنديش حد نشكيله ولا صاحبات ولا قرايا ولا شيء مخدتي هيا الوحيدة إلي عندها اسراري💔 ره البنت من غير حوش ومن غير ولدين مستحيل تعيش بكرامتها طول عمرها تقعد مدلولة😢
حسبي الله ونعم الوكيل وخلاص

وقمت راسي فوق ومسحت دمعتي إلي نزلت ع خدي

روح عمي وحطيتلهم يتغذو واني ديما متعودة نتغذى بروحي بس المرة هادي ماكانش عندي نية
ركبت لداري وكنت نرقد بروحي ف دار نهاية الممر وجنبها حمام
خشيتلها وسكرت الباب وقعدت مقعمزة وسرحانة لين حسيت بالدار ظلمت والجو سحببب
طلعت للبلكوني بندخل لحوايج قبل ماتصب لمطر وأني ندخل فيهم نسمع ف واحد يقول بس بس

قدمت شوية وقعدت ندور ف الصوت

الشاب : شوفي فوق

اني قمت راسي وجسمي رعش مش عارفة علاش

الشاب أبتسم : خيرك ترعشي

اني ساكتة ومادرتش اي ردة فعل ممكن لأن أول مرة حد يكون قريب مني هكي ويكلمني تعرفو مرات من حوش عمي مانطلعش بالسنة إلا إذا كان مرضت ولا صارتلي حاجة قوية

الشاب : اني أسمي مهند
وانتي شن اسمک ؟

اني : اه ؟ اسمي كادي

مهند قام حاجبه وبكل حنية : كادي ؟ مش ليبية صح

اني ابتسمت : لا ليبية ما غير أمي ايطاليا

مهند عيونه لمعو : وهيا إلي سماتك ايوه فهمت

اني هزيت براسي

مهند : كادي معليشي خليك اهني شوية وراجعلك

ومشي طول .. مافاتوش تانيتين إلا ونسمع ف مرت عمي تنادي أكيد ع خاطر الماعين
دخلت لحوايج بسرعة وخشيت وتفكيري كله ف مهند شن يبي مني او شن بيعطيني
ونغسل ف الماعين ونفكر لين جرحت يدي بالموس

رويدا خشت لقت الحوض عليه دم : تي هذا شننني حولي غادي امشي اغسلي يدگ

اني مصدومة ف يدي واصلا قعدة سخونة مافيش اي ألم

رويدا : اغسليها وكملي اماعينك مش تبدي تتسبلي 😑

وهيا طلعت واني لفيت عليها شاش وقعدت نغسل بيد وحدة وبعدها ركبت لداري وهما كلهم رقدو تريحت من دوشتهم

قعدت نفكر ونفكر بعدها طلعت راسي من الروشن مالقيتاش رجعت لمكاني
وفات اليوم زي اي يوم عشته معاهم
وجي اليوم التاني ف الليل مع ساعه 9 هكي

درت روحي نسيق ف البلكونة واني بيني وبينكم خاطري نشوفه ماعرفتش هل لأني تريحتله ولا مجرد فضول

مهند بصوت واطي : كادي

اني تلفتله : اهلين 😊

مهند : شن جوك❤

اني : كويسة

مهند : خيرك كنتي تبكي ؟

اني سكتت وبعدها : اسفة أمس خشيت لأن ينادو عليا ومافهمتش شن تبي مني

مهند : اسمعي ........يتبع>

الكاتبة « هبوش »