ချစ်သူ့ နတ်ဘုရား〖 Completed 〗

9.6

<Unicode>

"မင်း ငါ့ရဲ့ ယီ အင်ပါယာထဲမှာ နေနိုင်တယ် ဒါပေမဲ့ ငါ စောင့်ကြည့်တာကိုတော့ လက်ခံပေးရမယ်"

ဆော့လို့ဝသွားပြီဖြစ်သော စစ်နတ်ဘုရားက ဤသို့ မိန့်ကာ ပြန်ထွက်သွားတော့သည်။

ရှန့်ခယ် စိတ်အတွင်းမှ 'အောင်ပြီကွ' အော်လိုက်သည့်အလျောက် မျက်နှာဖုံးတွင်လည် ပျော်ရွှင်မှုများ ပေါ်ပေါက်လာတော့သည်။ ╰(*＾▽＾*)╯

ဘယ်အချိန်ကတည်းက ဘေးသို့ ရောက်နေမှန်မသိသော နေးလ်က မေးသည်။ "စောင့်ကြည့်ခံရတာတောင် ပျော်နိုင်သေးတယ်ပေါ့"

ရှန့်ခယ်က တစ်ချက် စွေကြည့်သည် (﹁"﹁): မင်း မသိပါဘူးကွာ စစ်နတ်ဘုရားအပြင် အခြား နတ်ဘုရားတွေနဲ့ပါ နှစ်ရာနဲ့ချီ တိုက်ခိုက်နေခဲ့တဲ့ မကောင်းမှုနတ်ဘုရားက မြင်မြင်ချင်း အသတ်မခံရရုံမကဘူး အစကပြန်စဖို့ အခွင့်အရေးလည်း ပေးခံရသေးတယ် ဒါနဲ့တင် ရှားရှားပါးပါး ကျေနပ်စရာလေး ဖြစ်နေပြီ

လာခြင်းကောင်းနေသဖြင့် ရှန့်ခယ်တစ်ယောက် သူ့မျက်နှာဖုံးသွင်ပြင်တွေ ပုံမှန်ထက် တွန့်ကွေးနေသည်ကို အာရုံမထားမိတော့။ ကြောင်ကြည့်နေသော အချစ်နတ်ဘုရားကို လက်ပြနှုတ်ဆက်ကာ အတွေးများ တိမ်ပေါ်ခုန်တက်လျက် အခန်းဆီ ပြန်လာခဲ့တော့သည်။

သုံးရက်ကြာသော် မင်းသား၏ ကြင်ယာဖက်ရွေးချယ်ပွဲ စတင်တော့သည်။ ရှုမျိုးစုလည်း သေသေချာချာ ပြင်ဆင်ခြယ်သကာ တီမာအား အခမ်းအနားဆီ ပို့ဆောင်ပေးကြသည်။ ရှန့်ခယ်က ဝိဉာည်အသွင်ပြောင်းကာ သူမနောက် လိုက်ဝင်လာခဲ့သည်။

တီမာ့အတွက် လမ်းဖောက်ပေးရန် မူလ မကောင်းမှုနတ်ဘုရားသည် အခြားယှဥ်ပြိုင်သူမိန်းမပျိုများကို ကျိန်စာတိုက်ကာ အပြင်းအထန် နာမကျန်းဖြစ်၊ ဒဏ်ရာရစေခဲ့သည်။ ထို့ကြောင့် ယှဥ်ပြိုင်ခွင့် မရခဲ့ကြပေ။ သို့သော် ကျိန်စာက ဖြည်မရတာတော့ မဟုတ်ပေ။ အခြား စွမ်းအားကြီးသော နတ်ဘုရားများကို ကိုးကွယ်ကြသော မိန်းမပျိုများသည် ကျိန်စာဖြည်နိုင်စွမ်းရှိလေသည်။ ဥပမာ စစ်နတ်ဘုရား တန်းတူ အားကြီးသော အလင်းနတ်ဘုရား၊ ကျန်းမာရေးကို အုပ်စိုးသော ကုသမှု နတ်ဘုရား၊ ရှင်သန်သော သတ္တဝါအလုံးစုံကို အစိုးရသော လောကသဘာဝနတ်ဘုရားတို့အပြင် အမှောင်ကို ကြီးစိုးသော သေခြင်းနတ်ဘုရား စသော နတ်ဘုရားတို့တွင် ထိုအစွမ်းရှိသည်။ သို့သော် သေခြင်းနတ်ဘုရား၏ ကိုးကွယ်သူများသည် အလင်းရှိရာနယ်မြေသို့ ခြေမလှမ်းကြပေ။