ချစ်သူ့ နတ်ဘုရား〖 Completed 〗

9.11

< Unicode >

ရှန့်ခယ်၏ မျက်နှာဖုံးကား မျက်နှာထက်တွင် သူ့နေရာနှင့်သူ အံဝင်ခွင်ကျရှိနေ၏။ သို့သော် သူ့မျက်နှာနှင့် ပေါင်းစပ်သွားတာမျိုးလည်းမဟုတ်ပြန်ရာ ချွတ်မည်ဆိုက ချွတ်လို့ရနိုင်လောက်သည်။ ခက်သည်က သူကိုယ်တိုင်လည်း မျက်နှာဖုံးချွတ်နည်းကို မသိ။ သူ၏ နတ်ဘုရားအဆင့်နိမ့်နေသေးသဖြင့် ချွတ်မရတာပဲလားတော့ မပြောတတ်ပေ။

ရှန့်ခယ်သည် ကိုယ်လုံးတီးဖြစ်နေသော ခန္ဓာကိုယ်ကိုကြည့်ကာ သူ့အတွက်သူ အဝတ်အစားများ ဖန်တီးဖို့ လုပ်သည်။ ထို့နောက် ကြယ်စင်ပေါင်းမြောက်များစွာ ပေါ်ထွက်လာလေသည်။ ၎င်းတို့သည် ရှန့်ခယ်၏ ခန္ဓာကိုယ်ကို ဝန်းရံလိုက်ကြကာ ခါးနားတွင် ခဏတာ လှည့်လည်နေကြပြီးနောက် ပုံစံပြောင်းလဲသွားသည့် ဝတ်ရုံသည်ကား အလွန့်အလွန်ကို တောက်ပ၍ လှရက်နိုင်လွန်းသော....

တိရိစ္ဆာန် သားရေပတ်တစ်ခု ဖြစ်လေသည်.....

ရုပ်ထု၏ ပုံသဏ္ဍာန်သည် နတ်ဘုရား၏ မူရင်းသဏ္ဍာန်ဖြစ်သည်။ ထို့ကြောင့် ရှန့်ခယ်မှ အသွေးအသားရှိသော ခန္ဓာတစ်ခုအဖြစ် ပြောင်းလဲသွားတောင် သူ၏ မျက်နှာဖုံး၊ တူနှင့် သားရေပတ်တို့ကတော့ မည်မျှ စွမ်းအင်သုံးသုံး အမြဲကပ်ကျန်နေဦးမှာ ဖြစ်သည်။ မကောင်းမှုနတ်ဘုရား ဝတ်ဆင်ထားသော သားရေပတ်သည် ရှေးခေတ်သားရဲတစ်ကောင်၏ အရေခွံမှ ထုတ်ယူထားခြင်းဖြစ်ကာ အနက်ခံအရောင်ပေါ်တွင် ရွှေရောင်နှင့် အနားစွန်းများကို ကွပ်ထားပြီး မီးနှင့်ရေကို ခုခံကာကွယ်နိုင်စွမ်းရှိသည်။ ထိုသားရေပတ်သည် အင်အားကြီးမှုနှင့် အမိန့်အာဏာရှိမှုတို့၏ ပြယုဂ်ဟုပင် ဆိုနိုင်သည်။

သို့သော်ငြား မည်မျှပင် ဤသို့ အမွှမ်းတင်စေကာမူ တိရိစ္ဆာန်သားရေပတ်ဟူသည့် အမှန်တရားကိုတော့ ပြောင်းလဲမရနိုင်ပါပေ။

ရှန့်ခယ်ခါးမှ သားရေပတ်သည် သူ့ပိုင်ရှင်၏ မကျေနပ်မှုနှင့် စိတ်တိုင်းမကျမှုများကို ခံစားမိသည်ထင့်။ အနည်းငယ် ဝေ့ဝဲနေပြီးနောက် ပျောက်ကွယ်သွားကာ ရှန့်ခယ်အား ငှက်ကုလားအုပ်တစ်ကောင်အလား တကိုယ်လုံး ပြောင်တီး၍ ကျန်နေအောင် ထားရစ်ခဲ့တော့သည်။