ချစ်သူ့ နတ်ဘုရား〖 Completed 〗

9.8

<Unicode>

ကန်းစ်မြို့တော်သည် ယီအင်ပါယာ၏ မြို့တော်အနေနှင့်ရော ကျွန်းစုအတွင်း အကြွယ်ဝဆုံး မြို့တစ်မြို့အနေနှင့်ပါ နတ်ဘုရားအများစုနှင့် ၎င်းတို့အား ကိုးကွယ်သူများအတွက် အိမ်လိုပင် ဖြစ်သည်။ မြို့ထဲ မြို့တွင်း ဝင်လိုလျှင် စစ်နတ်ဘုရားနှင့် ယီ ဘုရင်၏ ခွင့်ပြုမိန့်ရမှ ဝင်ခွင့်ရှိသည်။ ဝင်ခွင့်မရသော နတ်ဘုရားများမှာ ပုန်းလျှိုးကွယ်လျှိုးနှင့် အချိန်အတော်ကြာ နေရသည်။ နတ်ဘုရား ကောင်းချီးရရှိထားသူ ဖြစ်သည် ဖြစ်စေ၊ မဖြစ်သည် ဖြစ်စေ စစ်နတ်ဘုရား ပိုင်နက်အတွင်း ဝင်လာမိသူတိုင်းကို စစ်နတ်ဘုရားက သတိပြုမိပြီး ဖြစ်သည်။

စစ်နတ်ဘုရားသည် သူ၏ ကလေးများ၏ လုံခြုံရေးကို ခြိမ်းခြောက်လာသော နတ်ဘုရားများမှအပ နှင်ထုတ်လေ့မရှိပေ။ စစ်နတ်ဘုရား စောင့်ကြည့်မှုအောက်တွင် နတ်ဘုရားများကလည်း မိုက်ကန်းကန်း ဆက်တိုးဝင်လေ့မရှိ။

ကန်းစ်မြို့တော်တွင် နတ်ဘုရားပေါင်းစုံ နေထိုင်ကြသော်ငြား လူ့မြင်ကွင်းပေါ်လာတတ်သော နတ်ဘုရားများမှာ ရှားပါးသည်။ ရှန့်ခယ်ကဲ့သို့ သူ၏ ကိုးကွယ်သူများကို ဖေးမစောင့်ရှောက်ပေးသော နတ်ဘုရားမှာ ပို၍ပင် ရှားပါးသေးသည်။ နတ်ဘုရားများသည် ပူဇော်ပသမှု ကောင်းမွန်မှုနှင့် စိတ်နှင့်ရင်းကာ ရိုသေကြသူများ ရှိမှသာ ကောင်းချီးပေးတတ်ကြတာဖြစ်သည်။ ၎င်းတို့ ကိုးကွယ်သူများကို တွယ်တာမှုများ မရှိတတ်ကြပေ။ ပြောရလျှင် စီးပွားရေး အရောင်းအဝယ်ကဲ့သို့ ဆက်ဆံရေးမျိုးသာ ထားတတ်ကြသည်။ အထူးသဖြင့် နတ်စွမ်းအင်မဖြုန်းပစ်ချင်ကြသော အဆင့်နိမ့်နတ်ဘုရားများအနေနှင့် ၎င်းတို့ ကိုးကွယ်သူများ၏ ဆုတောင်းမှုများကို ဆယ်ပုံတပုံ တုံ့ပြန်ပေးတာတောင် ကောင်းလွန်းနေပြီဟု ဆိုရချေမည်။

ထို့ကြောင့်လည်း စစ်နတ်ဘုရားသည် ရှုမျိုးစုအတွက် ရှန့်ခယ် ဟိုပြေးဒီပြေးလုပ်နေသည်ကို မြင်သောအခါ စိတ်တွင်း သံသယပွားလာရသည်။ သူတွေးထားသည်က မကောင်းမှုနတ်ဘုရားသည် အခြားသူများအတွက် ကိုယ်ကျိုးမငဲ့ပဲ ကူညီမည့် အစားမျိုးမဟုတ်ပေ။ နတ်ဘုရားများ၏ ကျေးဇူးနာမတော်သည် ၎င်းတို့ ဖြစ်တည်လာကတည်းက ကြိုတင်ဆုံးဖြတ်ပြီးသား ဖြစ်ကာ နှစ်ဘယ်လိုကြာကြာ ပြောင်းလဲမရနိုင်ပေ။