#رفقا_بالقوارير 😢
#الحلقة_الأولي 1
#مروة_محمد ✒
😍😘 #منقول
أولا : أكيد بتسالوا شن السبب اللي خلاني نختار هالعنوان تحديدا #رفقا_بالقوارير 💔 ح نقول الإسم اخترتاش عبث لا أنا قاصدة الإسم لأن مجتمعنا مجتمع ظالم للمراءة ومش عطيها حقها ديمة هي غلط ديمة فيها العيب وحتي لو كانت ضحية مش ح يرحمها حد وعندنا أمثلة حية نشوفوا فيها في حياتنا يوميا اللي تتطلق من زوجها تبدأ عليها علامة استفهام كبيرة؟ وتقعد تعاني وتسمع وسخ وذنها
اللي تجيب بنات يسموها أم البنات ويقولوا لالا هذه تجيب إلا في البنات وكأنها هي اللي تخلق فيهم
واللي تتأخر في الزواج يحرجوها بكلامهم اندادك بصغارهم وإنتي كنتي تتشرطي وهاك قعدتي وووووووو
لهذا قررت نكتب واقع أليم تعيشه مجموعة من النساء ونتمني أن وضعهم يتحسن يعيشوا حياة سعيدة
ونبدو علي بركة الله روايتنا
#عند_المتزوجة
أميرة ( بطلة قصتنا وهي اللي تجسد دور المتزوجة ) زوجها محمد ساكن في دار مع العائلة وعنده 2 صغار ولد وبنت ملاك ومالك وطبعا معاهم أمه #زينب وبوه #إبراهيم وخوته شباب زوز مجدي ومعتصم وخواته منال و مني البنات متزوجات طبعا
زينب: يا أميرة يا أميرة
أميرة: نعم يا عمتي
زينب: شني طرشتي ساعة نضبح عليك😡
أميرة: كنت نغير لي مالك في حوايجه😢
زينب: ساعة تغيريله 😡 ولا بلعاني ما تبيش تجي
اميرة: لا لا والله نغيرله
محمد : تعرفي يا كلبة لما أمي تناديك تجيها تجري وقرب منها شدلها ايديها بالقوية
زينب: تبي رباية هالفانص
أميرة: حرام عليك شن درت 😢
محمد: صكري فمك وبوسي رأس أمي وتاسفي منها 😠
زينب: عن بوها من قربه ناتنة ما نبي منها بوس
محمد: زودي بوسيها😠 ويفنص في أميرة😡
أميرة: قربت من عزوزتها ودموعها علي خدها زي المطر باستها
زينب: ترا اركبي فوق الحيط اغسلي البسطات وإنتي نازلة سيقي الدروج والجنان وبعدها خشي ديري العشاء
أميرة: حاضر
محمد: اقلبي وجهك هي
مشت أميرة تغسل في البسطات ومحمد قعد يهدرز مع أمه
زينب: شن هالحصلة ياوليدي عليك بخت وخلاص
محمد: يا أمي مصلحتي فيها توا
زينب: كيف
محمد: صاحبتها فتحت معمل حار وحلو بتمشي تخدم معاها وبتطلعلي سيارة من المصرف
زينب: بتخدم😱 والحوش من بيه ياوليدي
محمد: ما تخافيش نسقت معاها تمشي الصبح تعطي حصصها وتروح تنكت الحوش واتطيب الغذي وتغسل الماعين وبعدين تمشي للمعمل ولما تروح تغسل الدبش وتطيب العشاء
زينب: قوللها اتطيب الشاهي والقهوة وتحطهم في الترامس وتدير حاجة حلوة لخوتك
محمد: حاضر ياامي
زينب : ما تعودهاش ع الدلع والدلال تاخدلك عليه
محمد: باهي حاضر
(طبعا يسحابوا أميرة مكينة أو بالأحرى يعاملوا فيها علي أنها مكينة 24 ساعة تتحرك ممنوع تحكي وممنوع تشكي ممنوع تتعب وممنوع تقول لا ...........أميرة ساكتة وصابرة مش لاشي ألا لأن بوها مريض وأمها عزوز كبيرة وخوتها متزوجين ومش لاهيين بيها ........)
