#هيرو 5
رواد يدور في غرفه أيوب في العياده :انت لازم تموت لان باي لحظه ممكن تستعيد ذاكرتك ونمشي فيها.
ويدي يقرب من أيوب وهو راقد كيف بياخد المخده من تحت راسه بيخنقه بيها...... انفتح الضو وخشت الدكتورة مريم....
الدكتورة مريم :رواد انت شن جابك هنا؟ وشن أدير؟ وليش ايدك ع مخده أيوب؟؟؟
رواد :اه لالا شي غير جيت بنطمن عليه قلت ما معاه حد وحسيت المخده مش مساوية كنت نساوي فيها.
الدكتورة مريم :اها تمام لالا لكن المخده مساوية لازم هكي تكون.
أيوب فاق ع صوت النقاش متع رواد والدكتورة..
رواد :هي السلام عليكم مروح انا مادام انتي قاعده يا دكتورة هكي اطمني.
وطلع من الغرفه متغايض:تي هاذي شن جاب امها توه.
أيوب :دكتورة خير شن في؟؟؟
الدكتورة مريم :اتصل بيا عبد الرؤوف ووصاني ندير بالي عليك وانا بالصدفه جاياتك شفت رواد خش لك خفت وجيت نجري الواضح كان ناوي يخنقك بالمخده بس ما تخافش انا كملت شغل وجاية بنقعد معاك.
روحوا الشباب كل حد لحوشه وكيف خش عبد الرؤوف للحوش لقي بوه مقعمز يراجي فيه....
عبد الرؤوف :السلام عليكم ان شاء الله خير شن مسهرك يا بوي.
خيري :وينه الخير من يوم ما جبت خليقه زيك يا فرخ الحرام ها وين كنت دايخ للساعه ثلاته اكيد مع السافلين اصحابك زيك زيهم صايع دايح تاخدوا في الدوخه و تناشبوا في بنات الناس ومش مخلين شر مش مدايرينه حتى خدمتك معاش مشيت وواخد مبلغ وقدره قالي صاحب المحل شن درت بامه ها اكيد خديت بيه العفن ليك و للبغوله يلي معاك شوف خوتك رشيد اكبر تاجر عمله في البلاد و ايمن بادي يبني في حوشه امتى بتعقل انت ها تي شن درت تحت ربي باش أعطاني خامر زيك.
عبد الرؤوف حسها غصه في قلبه و شد دموعه :يا بوي أيوب دار حادث كان في المستشفى و عبد الله أعطاك عمره لقوه مقتول ملوح قدام الطبي .
خيري :الله لا ترحمه فروخ حرام ولقتوا بعضكم اكيد مداير مصيبه والا غالط مع بنت ناس تي كلهم عافينين تلقطوا الخامر وخوه.
فوزية(ام عبدو) :صلي ع النبي يا فوزي الولد كان في المستشفى كلمتني ام مريم شافاته غادي جابوا صاحبهم.
خيري :فوزية ضمي فمك ما تتدخليش اصلا هاذي تربيتك فيه الوحيد في خوته عافن و ضايع.
عبد الرؤوف خش لداره و حارقه قلبه و يفكر لا لقاها من عيلته ولا من حبيبته ولا من صاحبه ما عنده غير أيوب و قصي واحمد وقعد يبكي لين رقد...
ثاني يوم الصبح خطموا احمد و قصي و عبد الرؤوف ع أيوب في العياده ولقوا حاله احسن كتبوله خروج و اعطوه أدوية و مشوا مع بعضهم جنازه عبد الله كانوا كلهم يبكوا مقهورين ع موته صاحبهم وقروا شوي قرآن ع القبر و قعمزوا جنبه....
بدر :انا متأكد انه موته عبد الله بالقصد في حد متعمد قتله هو.
احمد :كيف شن قصدك؟؟
بدر :اولا سيارته قاعده في الطريق وفيها فلوسه وتلفونه، يعني لو حد كانت نيته الخنبه رآه ما لقيناش السيارة والبضاعة قاعده.
عبد الرؤوف :كلامك مزبوط.
قصي :بأه من ممكن يكون ورى موته رآه عبد الله كان أكثر واحد مسالم فينا وما عنداش أعداء.
عبد الرؤوف في خاطره بفكر :زعما موتت عبد الله ليها علاقه لنورة ورواد.
أيوب :عبدو وين سرحت؟؟
عبد الرؤوف :زعما ليه علاقه بالموضوع هذاكا.
قصي و بدر واحمد شرحوا لبعض وقالوا :اي موضوع؟؟
أيوب قعد يحكي لهم في القصه من البدايه وكلهم مصدومين.
رواد يتصل لنورة يلقى فيها مشغول :الزب هالقحبه منو تكلم ليها ساعه.
نورة ع التلفون مع شخص مجهول......
المجهول :نفذت العملية دون ما تخلي اي أثر بس حصلت ضربه بالبوخوصه في بطني لكن فداك.
نورة :سلامتك يارب منور هلبا وموعدنا الخميس.
المجهول :تم انا نراجي فيك و مستاحشك هلبا، وشوفيلنا مكان كويس المره هاذي معاش خاطري نقتل حد زي ما قتلت عبد الله معقوله بالعقل انتي رافعتيني لاستراحه أصحاب الهيرو (طبعا عبد الرؤوف كان عاطيها نسخه من المفتاح لو خطرها تتلاقى معاه يتلاقوا غادي مره مره).
نورة :تمام تعالى في الحوش احسن شي.
وسكرت الخط اتصل رواد ع طول.....
رواد :الو ما تقوليليش مع منو ليك ساعه.
نورة اه لالا بيبي هاذي بنت خالتي مريضه وتعبانه كنت نسأل عليها.
رواد في خاطره تي باه باه تو تشوفي شن يصير فيك عليا انا ما تحسابينيش غافل زي عبدو ومش عارف خمرك :تمام يا روحي عادي ان شاء الله حالها احسن.
نورة :ايه الحمد لله احسن استاحشتك دودي رآه.
رواد :حتى انا هلبا امتى نتلاقوا رآه بنموت عليك.
نورة :السبت الجاي يا عمري.
رواد :هلبا للسبت الزح خليها الخميس.
نورة بارتباك:لالا الخميس عندي عرس وبنمشي المزين مش فاضية.
رواد :تمام السبت نتلاقوا ومحضرلك مفاجأه هي توه نستاذنك بنرقد غدوه قراية وارقدي حتى انتي.
نورة :ايه اهو بنرقد كيف خشيت لفراشي.
عبد الرؤوف كيف خاطم من جنب حوش نورة شافها واقفه في الروشن تتكلم بالتلفون :اااه يا حقيرة عندك تلفون وتكذبي عليا بس حسابك عندي.
ثاني يوم في الثانوية جت نورة لعبد الرؤوف وكالعاده حضناته عبد الرؤوف باعد من عليها....
نوره حست بخوف وشي غريب :خيرك في شي حبيبي؟؟
عبد الرؤوف :لالا غير متضايق من موته عبد الله بس
نورة ووجهها ولى اسود :ايه اااه.
عبد الرؤوف :خيرك تغير لونك شن في اسوديتي.
نورة :لالا شي غير كان غالي عليا المرحوم لان زي خوي.
عبد الرؤوف في خاطره تي باه باه حسابك بروحه انتي :الله يرحمه.
وخشوا حصصهم...
في الساحه واقف رواد هو و جماعته يضحكوا وعبد الرؤوف واقف ع نورة يبيش يوضح لها انه كاشفها.... رواد بصوت عالي : شن يا هيرو أعطينا من العسل ههههههه.
عبد الرؤوف كان مغلول من رواد وشده أعطاه طريحه لين طيحله زوز سنون وخلى خشمه دم.... رواد ناض ينفض في حوايجه وجوا قصي واحمد لعبد الرؤوف يجروا :خير شن في شن صار؟؟
عبد الرؤوف :معاش قدرت نتحكم في روحي غشيت غلي فيه يتمهتك الحقير وقاعد يا ما جايه.
سكتوا الشباب و مشوا لحوش أيوب بتطمنوا عليه وحكوله يلي صار.....
أيوب :يا حمار مش قلت لك ما اديرش اي تصرف غبي ليش هكي.
عبد الرؤوف :معاش قدرت نشد روحي مدايريني مضحكه الزح.
اأيوب :هو يستاهل بس مازال الحساب عنده ما صفاش انا اكتشفت انه عنده موعد مع نورة السبت قالي عليه واحد مخليه يراقب في رواد ورح نديروا عليهم طبه نعيبوه وخود من نورة حقك و الخناق يلي رافعهولها الحقيره و نطلعوا.
جي اتصال من ساجد لعبد الرؤوف......
عبد الرؤوف :ها ساجد شن الأمور؟؟؟
ساجد :اسمع رآه.............
شن ممكن يكون صار؟؟ وشن بيصير في موت عبد الله؟؟؟ وايوب و عبد الرؤوف هل رح يخليهم رواد في حالهم والا بيخلص عليهم؟؟ وشن بيصير في نورة بعد لعبها بالشباب؟؟؟؟
انتظروني في الحلقه الجايه و بيق لوف المتفاعلين اما يلي يقروا ما يتفاعلوش شايفتكم وجايكم الحظر وح تفوتكم هالرواية وغيرها من الروايات 💓💓💓😌😘
#المتيمه
