القصة مؤثرة فعلًا.....اعرف انك مهما عملت من ذنوب ومعاصي لما تتوب لربنا هاينصرك ويوفقك....أهم حاجة تكون صادق في توبتك وتكون عازم إنك ماترجعش للذنب ده تاني....القصة كالتالي :
واحد صاحبي بحكيلي
بيقولي بنت بتقوله " أنا حياتى كانت عبارة عن جحيم ’ كنت إنسانة وحشة جدًا وكنت أستاهل كل اللى يجرالى أنا أكتر واحدة عصيت ربنا ’ شربت سجاير ومخدرات وزنيت وعملت بلاوى ملهاش حل ولما فوقت وقولت أتوب ربنا أكرمنى بشاب رائع أى بنت تتمناه لكن الصراع اللى جوايا فى إن الشاب ده واخد عنى صورة لحياتى الجديدة وميعرفش عنى صورتى القديمة خلانى اموت وقررت إن لازم أصارحه بكل قصصى القديمة واللى عملته لكن تراجعت ومقدرتش ’ فضلنا مخطوبين فترة ومفيش فايدة اللى جوايا مش بينتهى والألم والضغط النفسى بيزيد عليا كل يوم وزاد إن حاجات من الماضى بقت تلاحقنى وابتدى يظهر ناس فى حياتى تهددنى إنهم هيفضحونى ’ وإنهم معاهم صور ليا ولو مستجبتش لإلحاهم فى طلباتهم هيعروا صورتى قدام " خطيبى " ساعتها حسيت بوجع وخوف رهيب ’ جريت بعدها على الصلاة وفضلت اعيط وأقول لربنا يارب قوينى واحفظنى منهم اتوسل إليك استر عرضى وابعدهم عنى .. بتقولى عمرى ما بكيت كده ولا حسيت بالحال ده فى قلبى كنت ببكى دعاء المضطر بجد أنا مليش غيرك يا رب ومحدش غيرك يقدر يغير الوضع والله انا واثقة فيك انت وبس ..ياارب أنا تبت إليك يارب ’ يارب متردنيش من على بابك ’ يارب متكشفش الصورة الحلوة اللى لسه باقية فى ملامحى ومخليانى أعيش ’ أنا رجعتلك يارب وفضلت حوالى 3 أيام حالى على كده وبس دعاء وعياط وسجود طويل وإستغفار ووالله كأن ربنا بيقولى " اللى يقرب لازم نجبر بخاطره " اليوم الرابع عرفت إن الشخص ده عمل حادثة دخل فى غيبوبة حمدت ربنا جدًا وفضلت اشكره ’ لكن لسه جوايا الصراع فى خطيبى اللى شايفنى ملاك وفى لحظة قولت يارب أنت عارف إنى تبت وأنت عارف اللى فى قلبى ’ يارب قوينى على إنى أقوله الحقيقة ’ قررت أقوله لكن برضو مقدرتش ’ قولت هكتبها فى ورقة وهو يقرأها كتبتلوا كل حاجة وبعتها ليه ’ فضل يومين ميكلمنيش كنت بنهار حرفيًا فى اليومين دول وقلبى نبضه هيقف ’ لحد ما لقيت رسالة منه على موبايلى بيقولى " عارفة مفيش حد فينا أبيض ’ كلنا العفرة طالتنا والذنوب غرقتنا ’ وأنا فى يوم من الأيام كنت أسوأ منك وعملت فوق اللى عملتيه ’ ويمكن نصيبنا نكون لبعض عشان ربنا يدينا رسالة يقولنا فيها " محدش أحسن من حد , أنا بقبل اللى بيذنب اوعوا انتم تردوه ’ اوعوا تضيقوا الرحمة ومساحة الإنسانية اللى جواكم ’ كلكلم أصحاب ذنوب وأنا اللى ساتركم ’ مش عاوزك تخافى وخلينا نبدأ حياة جديدة على مساحة بيضا سوا يكون فيها الصراع أن إحنا نثبت لربنا بجد قد ايه احنا بنحبه وٌد ايه إن احنا كنا ضايعين من غيره تعالى ناخد بايد بعض للجنة "
بتقولى مبقتش مصدقة اللى بتقراه ومعملتش حاجة غير إنى صرخت يااارب إنت كريم اوى يارب كريم اوى يارب :)
أنا عايشة دلوقتى ومعايا أحمد 4 سنين وحفظته جزء تبارك وعم وعايشين مبسوطين جدًا والحمد لله
وأنا بقرأ الرسالة دى افتكرت كلمة بن القيم فى كتابه لما قال " فإذا أراد الله بعبده خيراً فتح له باباً من أبواب التوبة والندم والانكسار والذل والافتقار والاستغاثة به وصدق اللجأ إليه ودوام التضرع والدعاء والتقرب إليه بما أمكن من الحسنات ما تكون تلك السيئة به سبب رحمته حتى يقول عدو الله: يا ليتني تركتته ولم أوقعه " :) أوعى تيأس وابشر
#باب_التوبه_مبيتقفلش
#غفور_رحيم_بيكم ❤👌
أنت تقرأ
أحلام يقظة
Diversos✨💖 هي فقط أوهام أتخيلها قد تتصل بالواقع وقد تكون محض تخيلات لذا ادخل وشاهد ولا تربط ماتقرأ بي فليس كل مابداخلها عني 🖐🏻
