وي شكون؟ قولتلها نسرين؟ قاتلي وي نتي شكون قوتلها انا اخت واحد يخدم معاك فلاكلينيك جبت رقمك من لاكارت فيزيت (هي طبيبة) قالتي اتفضلي...قوتلها ملاك بنت خالك خويا حب يخطبها و حب ياخذ النيميرو تاع خالك بش يحدو موعد للشوفة حنا نحبو كلشي بالأصول ، قاعدة تضحك قاتلي ملاك بنت خالي و خطيبة خويا و السمانة الجايا رح يعقدو يديرو عرس فاسبانيا و يفوتو فواياج دو نوص تما ... نزل عليا الخبر كالصاعقة و سكت .. الو ألو .. قتلها يا شفتي تسما مكانش مكتوب قاتلي معليش ختي ان شاء الله تلقاو في جيهة وحدوخرى قوتلها آمين و كوبيت... رحت عيطلتلو ديراكت لقيت التيليفون طافي .. وش ندير؟ نعيط لختو و نقولها راني بالحمل من خوك؟ وش رح تديرلي زعما؟ بالاك كون ندير هك عمره ماراح يسامحني بالاك ميحبش خطيبتو بالاك حتموها عليه؟ منعرفش اصلا وين يسكن بالتحديد بش نروح لدارهم 😔 بصح انا كرشي رح تزيد تكبر ... جا نهار الثلاثاء مازال مطفي التيليفون ... أمين راح و مين ديزاكتيفا الفايسبوك و الانستغرام .. صاي عرفت بلي طوا الصفحة تع شيراز ... واش عمبالك يا شيراز الزوالية يا بنت الزواولة ؟ كنتي حاسبة يخلي ملاك المرفهة لاكلاس كيفو علاجالك؟ باباك يخدم فالبلدية قيسو قيس روحو .. ساكنة في حي شعبي... بصح انتي اصلا ماتسوايش درتيها بيديك ماتلعبيهاش ضحية شوفي كيفاش رح تفكيها دوكا
