يومها أصبحت رجلاً يدعى سالم

البارت الثامن

طلال: طيب وكان يستاهل؟؟
سلمــى: أيش؟؟!!
طلال: يعني إنتي عارفه إن الرواسب القبلية موجودة بمجتمعنا وفكرة زواجك بشخص مو قبيلي وانتي من قبيله راح يسبب لك مشاكل وهذي انتي شفتي بنفسك........
سلمــى: أنا ما كنت عارفه إن الأمور راح تاصل لها الدرجة......
طلال: بس مهما كان........هل كان الموضوع يستاهل منك ها التضحيه؟؟؟
سلمــى: عن أي تضحية تتكلم!!!.......التضحية لما أكون أنا مختارة ها الشي.........لكن ماهي أنا اللي طلبت إن حياتي تتدمر بها الشكل.......صحيح كان فيه إعتراض من جماعتي بس أهلي وقفوا معي وهذا كان كفاية بالنسبه لي........وها الرواسب اللي قلت عنها أنا ما تعني لي شي........
طلال: يمكن ما تعني لك بس هذا مجتمعنا ........يعني فيه أشياء يبي لها وقت على بال ما تتغير.......
سلمــى: وأوقف حياتي لين ما تتغير؟؟!!
طلال: أنا فاهم طريقه تفكيرك بس هذا الواقع........إذا تبي تخالف اللي حولك لازم تلقى اللي يتصدى لك.......هذي طبيعة البشر ما يتقبلون التغيير بسهوله.........
سلمــى: طلال إنت قاعد تحسسني إن هذي غلطتي......
طلال: ما أقول غلطة........ لكن أقول قرارك ودفعتي الكثير بأسبابه........
سلمــى: صحيح دفعت الكثير.......بس يا طلال ما تخيلت الأمور تاصل لها الدرجة........
طلال: لو كنتي تدرين إن هذا اللي بيحصل كان تراجعتي عن قرارك؟؟؟
سلمــى: يمكن ما رجعت للبلد........يمكن تزوجت وكملت حياتي هناك........
طلال: وتعيشين بقيه العمر مغتربة؟؟
سلمــى: أكيد......
طلال: من غير حتى ما تترددين!!!!......بالله يستاهل كل هذا؟؟
سلمــى: طلال إنت يمكن ما جربت.......بس بلدك هو وين ما حط قلبك رحاله.......و أنا ما ندمت ولا لحظة على اني قبلت ارتبط بسلطان......ما يهمني لو زعلو جماعتي......يكفيني لو ما يبقى لي أحد بالدنيا إلا هو......
طلال: لها الدرجة؟؟
سلمــى: و أكثر......بس الحين كل شي إنتهى والله يوفقه وين ما راح........
طلال: يعني ما تفكرين ترجعين له بعد ما تطلعين من هنا؟؟
سلمــى: ما أظن.......
طلال: ليش؟
سلمــى: الحين أنا بالنسبة له بعداد الأموات.......أمداه نساني وكمل حياته......
طلال: بكل ها السهوله؟؟
سلمــى: ما أدري ولا أبي أدري....... بس خلاص.......تعقدت الأمور بما فيه الكفايه......ويهمني أشوفه مبسوط ومرتاح بحياته ......ما أبي أطلع فجأة وأبدا من أول وجديد.......صعبه........صدقني مو سهل أبداً إنك تظهر فجأة بحياة إنسان بعد إنقطاع طويل........أمداه تغير وانت نفسك تغيرت.......
طلال: كنت متخيل إذا الواحد حب خلاص........يعني مالك غير ها الشخص ومهما كان ما يتغير الإحساس......
سلمــى: كلام روايات....... بس الواقع غير.......ما فيه شي إسمه حب أبدي إلا ما ندر يعني صعب تلقى عشاق رغم كل الصعوبات يدوم حبهم لآخر العمر عشان كذا قصصهم تخلد........
طلال: يمكن.....

عادت سلمــى متأخراً إلى قسمها فقد أخذتها الأحاديث مع طلال وفي صباح اليوم التالي قدم راشد إلى المزرعة......قابله طلال وأعطاه العود.......
طلال: هذا العود أعطاني إياه سالم يقول إنك نسيته.......
راشد: وينه سالم الحين؟؟
طلال: طالع لسكاكا ما أدري متى يرجع.......
رأى طلال خيبه الأمل والحزن في وجه صديقه...........
جلسوا سوياً وأخذوا يتبادلون أطراف الحديث......لاحظ طلال شرود بال صديقه.......وأحس انه يفكر بسلمــى......
طلال: راشد إنت الحين موظف ومن عيله وما شاء الله عليك مقتدر.........ما انت ناوي تتزوج؟؟؟
راشد: تبي تصير زي أمي........هذا أهلي صجو راسي بالموضوع........تقول أمي أنت بس قلي ايه وانا أروح أخطب لك.........
طلال: وش اللي رادك؟؟؟ قبل كم شهر قلت لي إنك مفكر تتزوج وش اللي غير رايك؟؟؟
راشد: مالي نفس للعرس.......
طلال: فيه أحد ماله نفس؟؟
راشد: ايه أنا......
طلال: ما خبرتك كذا يا راشد.......وش فيك؟؟؟ ....... أنا صديقك...... قل لي على اللي شاغل بالك؟
راشد: أنا أحب وحده......
طلال: والمشكلة؟؟
راشد: المشكلة إن ظروفها ما هي مناسبه.......
طلال: وش فيها ظروفها؟؟
راشد: ما أقدر أقولك.....بس ملخص الحكاية انه صعب اتزوجها........أهلي ما راح يوافقون حتى هي قالت لي مستحيل متزوج.......
طلال: طيب والبنت تحبك؟؟
راشد: ما أدري ما قالت لي أحبك ولا لمحت.......يمكن عشان ظروفها ما تبيني أتمشكل مع أهلي.......
طلال: أو يمكن ما تحبك.......يمكن تحب شخص ثاني........
راشد: وش اللي يخليك تظن ها الشي؟؟
طلال: هو بعد إحتمال......
راشد: هي قالت لي انها كانت مخطوبه لواحد بس........
طلال: هذا هو........يمكن إلا الحين تحبه وماهي مفكرة ترتبط بغيرة.........أنا أقول إنساها وشف نفسك.......
راشد: وشلون بس؟؟
طلال: الوقت راح يغيرك وتتغير مشاعرك ......يوم ما تتزوج راح تنسى.......ما فيه شي اسمه حب أبدي......
راشد: ما أدري........
طلال: إسمع نصحيتي وكلم الوالدة وقلها تدور على عروس........
إبتسم راشد وسأل طلال: وانت متى راح تتزوج؟؟
رأى راشد تعابير وجه طلال تتغير........
طلال: فسخت خطوبتي من زمان.......
راشد: الله يعين.......طيب وش تبي تسوي؟؟ ما راح تخطب........
طلال: ماهو الحين.......عندي أشياء لازم أخلصه أول.......