واحد بيقول حد عندى عالفيسبوك حاطط الصوره دي وكاتب انه زعلان جدا من موقف ان صديق عمره راح خطب وجاب شبكة وحدد ميعاد فرحه من غير مايقوله مع انهم دايما مع بعض واخرها قبل خطوبته بليلة واحدة !!
- دكتورة نفسية كانت بتقول لما دورنا علي الأشخاص الرئيسيين اللي ليهم تأثير كبير علي المرضي لقينا ان 80% منهم بيتأثروا جدا بصحابهم ..
- بطل من أبطال تفجير ميناء إيلات صمم انه يسحب جثة صاحبه لمسافة 16 كيلو .. و لما سألوه ليه عملت كدة و اترددت قبل القرار دا ولا لا ..
قالهم انه مترددش لحظة و انه عنده يتعب شوية اهون بكتير ما يشوف جثة صاحبه ف التليفزيون و الاسرائيليين بيفتخروا انهم قتلوه ..
- في مقولة بتقول " صديقك الحقيقي هو الذي يقف أمامك ليحجب عن الناس رؤيتك ضعيف "
- انا كا احمد ف فترة كدة كان عندي مشكلة و اكتئبت وحزن شديد جدا بسبب وفاة ابويا .. صاحبي كان بيجي يشوفني كل يوم و يسمع مني نفس الكلام كل يوم لمدة سنة و نص او اكتر .. و عمره ما قالي انه زهقت منك "
- حد بيحكيلي علي واحدة من صحابه قالي " مع اننا لسة عارفين بعض قريب بس احنا اصحاب .. دي قبل العملية بيوم فضلت معايا لحد اخر وقت و كانت عايزة تخرجني من مود الاكتئاب بأي طريقة "
- بنت كتبت " لما صاحبتي ماتت فضلت اتعالج نفسيا اكتر من سنتين و لما خفيت فهمت ليه بابا كان دايما يقوللي متاخديش الناس علي محمل الأبدية .. علشان كلنا رايحين "
- من كام سنة ف صلاة العيد كان جنبي واحد بيعيط و بيدعي بصوت عالي بيقول " يارب اقسم المرض بيني و بينها يارب " ..
بعد الصلاة قولتلو ربنا يشفيها يارب .. قالي دي ندي صاحبتي ابقي ادعيلها معايا "
- أبو بكر الصديق قال كنا في الهجرة و كنت عطشان اوي و معايا إناء فيه لبن .. أعطيته للرسول صلي الله عليه و سلم ..
فشرب الرسول حتي ارتويت ..
- اعرف ولد حاول ينتحر بسبب زعله علي صاحبه المريض و ساعتها قال " مش قادر اشوفه بيتألم قدامي و اسكت .. مش قادر و عيط " ..
الحقيقة يا جماعة ان كلمة صديق صعب جدا يكون ليها تعريف .. بس انت هتلاقيه شخص بتروحله لما الدنيا تضيق عليك جدا و تبقي عايز تعيط مش تتكلم ..
هتلاقي نفسك بتدعيله ف كل صلاة ..
بتحبه بعيوبه و مشاكله و قابله كدة زي ما هو
عارف بيحب ايه و بيكره ايه و طموحه يوصل لإيه ..
حافظ كلامه و رأيه ف كل حاجة ..
عارف لما تحس انك مطمن انك لو مت او حصلك حاجة هيبقي في حد بيدعيلك و يفتكرك ..
هيفضل يسندك من بعيد و الوقت مش هيخليه ينساك ولا يبطل يدعيلك ..
حد واثق انه بيحبك و بيحترم قراراتك و بيساعدك تكون احسن ..
بيسندك بأفعاله و لو مش قادر يعمل حاجة .. بيسندك بكلامه .. بوجوده معاك ..
بيتمنالك تكون مبسوط و بيعملك حساب ..
انت ف اولوياته مش بيكلمك لما يفضي ..
حد بيقدرك و بيقدر علاقتكوا ببعض .. بيقدر وجودك !❤
أنت تقرأ
رسائل لقلبك ❤️
Adventureهيبقي فكرته مواقف جميله ..حد قالها ...سمعتها ....مقاولات عجبتني.. فيها رسايل جايلك تسعدك وقت زعلك..وقت انشغالك ..وقت همك..
