رسائل لقلبك ⁦❤️⁩

الله⁦♥️⁩

(وَنَحْنُ أَقْرَبُ إِلَيْهِ مِنْ حَبْلِ الْوَرِيدِ )🌸❤️☘️

واحدة كانت بتقول:
كل مرة كنت باجي عند قول الله تعالى :

" بِيَدِكَ الْخَيْرُ إِنَّكَ عَلَى كُلِّ شَيء قَدِيرٌ "

كنت بقولها " بِيَدِه الْخَيْرُ إِنَّه عَلَى كُلِّ شَيء قَدِيرٌ "

كنت حفظاها من سنين كده وعمري ما جه في بالي يوم إنها غلط ، لحد ما في يوم كان عندي تسميع سورة آل عمران  والشيخ قالي سمعي من أول قول الله تعالى : " قُلِ ٱللَّهُمَّ مَٰلِكَ ٱلْمُلْكِ "

بدأت أسمع طبيعي وجيت عند قول الله تعالى : بِيَدِكَ الْخَيْرُ

قولتها زي ما أنا متعوده أقولها " بِيَدِه الْخَيْرُ "

الشيخ صححها ليا ورجعت بدأت الآية من الأول ، وقولتها بردو " بِيَدِه الْخَيْرُ "
رجع صححها ليا ورجعت قولتها غلط

ابتسم وقتها وقالي هفهمك حاجة بسيطة

أنا دلوقت لما أجي أكلم حد قريب مني بقوله مثلًا " ( انت تقدر على كذا ) ولا بقوله ( هو يقدر على كذا ) ؟

لما اجي أقدم في وظيفة وأنا معايا واسطة هكون مطمن اني هتقبل أكيد ولا هكون خايف زي واحد مش معاه اي واسطة ؟

لما باجي أقول قول الله تعالى : قُلِ اللَّهُمَّ مَالِكَ الْمُلْكِ تُؤْتِي الْمُلْكَ مَن تَشَاءُ وَتَنزِعُ الْمُلْكَ مِمَّن تَشَاءُ وَتُعِزُّ مَن تَشَاءُ وَتُذِلُّ مَن تَشَاءُ ۖ بِيَدِكَ الْخَيْرُ ۖ إِنَّكَ عَلَىٰ كُلِّ شَيْءٍ قَدِيرٌ  "

اول ما قولت " اللهم " وقتها أنا بدأت أكلم الأقرب ليا من روحي ، وأكتر حد حاسس بيا وعارف أنا نفسي في ايه ، بكلم اللي " إِذَا أَرَادَ شَيْئًا أَنْ يَقُولَ لَهُ كُنْ .... فيَكُونُ "

بكلم اللي بيدّه كل شيء
بكلم اللي مش محتاج مني تكلُف في الدُعاء وكل اللي مطلوب مني رفعه يدّ وصدق طلب بس ..
بكلم اللي قال " ونحن أقرب إليك من حبل الوريد "
بكلم إللي أرحم بيا من أُمي
بنادي على اللي نداه يوسف فنجاه  ، واللي ذكره إبراهيم فرعاه ، واللي كان ثالثًا لأبا بكر ومحمدًا في الغار
بكلم اللي ذكر اسمه نوح وقال " أَنِّي مَغْلُوبٌ "  في نفس اللحظة انتَصِرْ
بكلم اللي قال " لا تَخَافِي وَلا تَحْزَنِي " لأم موسى وفعلا نجى ابنها
بكلم اللي قال لمريم " أَلَّا تَحْزَنِي "  وطفلها بقى نبي

بكلم اللي دعاه زكريا وكان نفسه في ولد وفي نفس اللحظة اتقال ليه " أَنَّ اللَّهَ يُبَشِّرُكَ بِيَحْيَىٰ "

حد قريب مني اوووي فـ يبقى بِيَدِكَ الخير يارب ولا بِيَدِه الخير ؟؟
أنا لما باجي اقرأ الآية دي بكون مش عارف أيهم أكثر راحة وأمل وطمأنينة قوله " إِنَّكَ عَلَى كُلِّ شَيء قَدِيرٌ "

ولا الأمان إتجمع كله في إن كل حاجة في يدّ الله

" بِيَدِكَ الْخَيْرُ "💙💙💙💙💙

فلما اجي أدعي لازم أكون عارف وعندي يقين تام إن أنا بكلم حد قريب مني أوي 💙