💕 زواج 💕 بعد☜حب💍معوق 😜2

حلقة25💒🍥

قعدو هكاك شحااال
جازت ساعة و ريان كي الميت مابوجاش مامبا
ياسمين وحها صفر و ولات تفيبري حطت صباعها تحت نيفو و تنهدت
ياسمين:اااااه حمدألله عطاني خلعة
و باستو من جبهتو و بعدت عليه بشووية باش ماينوضش و راحت عند خوها
زدمت عليه لقاتو يضحك و تقوى حممممرة
ياسمين و هي تغلق فعينيها كيشغول راهي تكونصونطري مع وجها
ياسمين:على حساب الشوفة كوبيتلكم الر مانسيك تاعكم
محمد:وي لوكان غير درتي شوية روطار
تقوى و هي تهدر بزرب:ههه لالااا حيتي فوقتك اصلا هو كان يقلقل فيا خوك و تعرفيه اييه تفكرت هادوك لمزعوقات راهم شورو لداركم مع جداتك و عيشة تان راحت و ريان كان يقلب عليك مانعرف وين راح
ياسمين:ايه لقاني و دوك راه راقد
تقوى:ااه؟!!😲😲😲😲😲
ياسمين:وشبيك
تقوى و دموع في عينها:رياان ككان راقد راكي سووور ماراهش يتمسخر
ياسمين و هي تطلع فحاجبها تاع وشبيها هادي:وي راني سوور راه راقد عندو وحد ساعتين ولا كتر يبان عيان خليه يريح
و هنا دخلت تغريد و شافت فتقوى
تغريد:وشبيك تقوى
تقوى و هي تبكي:راه راااقد والله
تغريد:شكون و اومبعد كي يرقد ياك نورمال كامل نرقدو
تقوى:ريااان راهو رااقد ريااان
تغريد و هي مخلوعة:كييفاش راقد هادي رامي تتمسخري بيا حسابتلك بهلولة و راح نامنكم
ياسمين:وشبييكم خلوه يرقد علاه نخلعتو هكا و نتي علاش راكي تبكي
تغريد صوطات ديركت عنقتها:ياسمين ريان رقد ريااان راه رااقد
و بداو لخواتات يبكو و محمد و شكيب و ياسمين مخلوعين
شكيب:علاش راكم تبكو واش فيها مي يرقد ماشي حرام عاادي
تغريد و هي تمسح فعينيها:ههههه دموع لفرحة هادو
شكيب:وعلاش تفرحي
تغريد و هي تشوف فيه و حاكمة ياسمين من يدها:ريان خويا عندو كتر من 29 شنك عينو ماغمضهاش يضال نايض و كيما درنالو مارقدش و الطبيب لي نروحو عندو يقولنا عندو ازمة صراتلو و مخو ترجمها على شكل ارق مزمن (بوون جماعة لميدسين راني جبتلكم مرض جديد صفقولي بلعقل راكم كل مرة تتعرفو على موهبة من مواهب دماغي الاحمق)
ياسمين بقا مخها يدور غير فكلمة ازمة
زعما واحد كيما ريان واش راح ياثر فيه
محمد:تسما من واش فهمت هو رقد كي كان مع ياسمين
تقوى شهقت و دارت يدها في فمها و مام جاست دارتو تغريد و قالو فوقت واحد:يحبها
محمد و شكيب:طاح على راصو.
و بداو كامل يضحكو.و كتر ضحكهم بعد ما شافافوها ولات حمرة و هربت لبرا
كانت تتنفس و تمروح على وجها:اااااع يعني لازم يحشمومي هكا اووووف كامل بسباب لجايح تاع ريان اممم بصح قالت تغريد ازمة واش راح تكون اااه(شهقت)ايمااااا ....
و راحت تجري لبيت لي كان فيها ريان
زدمت كي الارهاب و هو مسكين ناض مخلوع كلي حكو باباه يدراڨي فلبنات
راخت ليه و حكماتو من وذنو
ريان:اااح ياااسمييين شا كي ديري خامبوك هبلتي عليا ولا كيفاه
ياسمين:نسقسيك و جاوبني الصراااحة تكذب والله نخليك بلا وذنين تولي كيما زازا تاع مراد علمدار فمسلسل واد الذئاب
ريان حكملها يدها و نحاهالها و جبدها حطها فوق حجرو و شاف فعينيها
ريان:واش راكي حابة تعرفي
ياسمين وللات كي المدروڨية غاصت فعينيه بصح فلحظة تفكرت علاش جات لعندو
ناضت و شافت فيه بوجه سيريو
ياسمين مع روحها :واااو ماكانش علابالي بلي عندي وجه كيما هادا اووو شكشييي
ياسمين:اححم شحال عندك مارقدتش
ريان:بزااااف ملي كنت صغير
ياسمين راحت ليه و خبطاتو لراصو
ريان:اوووف واشبييك
ياسمين:قتلك ماتكذبش و نتا غير بديتها بديتها خرطي
ريان:اااع ياسمين والله لا راه ضارني راصي قوليلي شا خصك بركاكي من الزعاقة تاعك
ياسمين و هي تخبط اللرض برجلها:كيفاه تقولي ملي كنت صغير و نتا هاداوين نضت راه وجهك منفخ
ريان:ههه بركاي ملكذب
ياسمين و هي تعيط:اوووف راني سيريوووووو
ريان و ضحكتو تقوى:بعدااا نتي سيريوو صدقتك ههه
ياسمين قربت ليه و حكمتلو وجهو بين يديها و ركزت مع عينيه :رياان والله والله غير كنت راقد عندك زوج سوايع والله ياك كنا كيفكيف و كي نضت لقيتك راقد
ريان شرع عينيه و ناض مخلوع
ريان و هو حاط يديه على راصو يمسح على شعرو
ريان:شوفي ياسمين عمري والله ماني نتمسخر صح صح رقدت؟؟
ياسمين تبسمتلو تبسيمة دافية و دارتلو براصها تاع اييه
وهنا بدا يصوطي و يعيط :كنت راااقد انا رقدت ااااارققدت
و رفدها و قعد يدور بيها و هي تضحك
عنقها شحاال و دفن راصو فرقبتها
هي كانت معنقاتوحتى حست بتشماخ فرقبتها
بعدت عليه لقاتو يبكي
ياسميم و دموع في عينيها:علااش تبكي نتا بيبي ماتبكيش ياك هاداوين كنت فرحان و تضحك و دوك اسكت ي‘سينون نبدا نبكي و تعرفني والله الصبيطار يولي كيما لبلاصة لي ضربتها تسونامي
مسحتلو دموعو و تبسمتلو
ريان بصوت فيه بحة تاع بكا و حزن:نحبك و نحبك و نبقا نحبك
ياسمين: هه انا تان
ريان:علاش غير نتي لي قدرتي ترقديني ااه واش درتيلي
ياسمين رفدت يديها للسما :والله مادخلني خاطيني
ريان ضحك و قرصها من خدها
ياسمين:ريان راك حاب تحكيلي
شاف فيها و ضحكتو تخبات و سكتو ضربة وحدة و كل واحد يشوف فبلاصة
حتى حكمها من يدها و جبدها
ياسمين حست يدها راح تتكسر بصح هو ماكانش مزير عليها تيما ماحكاتش صبرت و راحت تتكركر موراه
ركبو فالطوموبيل و قلعو
زادو شويك حبسو قدام لبحر و هبطو
كان سكات هاداك مازالو بيناتهم
كل واحد فيهم يشوف فلبحر ختى نطق هو
ريان:ماشي غير نتي لي فقدتي عباد عزاز عليك كل واحد فهاد دنيا خسر بنادم يحبو ،كاين لي داتو لموت و كاين لي داتو الدنيا ،كنت صغير و تغريد كانت غيرما زادت ،كنت راقد قدامها حتى سمعت صوت عياط طليت ملباب لقيت بابا حاط راصو بين يديه و يهدر غير فكلمة وحدة "علاش"
خ حت مشومبرا و مشيت بلعقل لقيتها واقفة مع وحد الراجل و يشوفو فبابا و يضحكو
حتى شفت بابا ناض و بدا يعيط "خراتم عليكم هادوك ماشي ولادك؟ماغاضوكش؟ ماشي نتي لي ولدتيهم قوولي ، وانا وانا لي حبيتك و خرجتك ملي كنتي فيه و عيشتك فحياة الف وحدة تتمناها تضربيني فضهري و معامن مع لي درتو خويا
و نتا هانت عليك لعشرة لي بيناتنا تخسر عشرة 30 سنة علاجال مرة ماعندكش شهر ملي عرفتها
ووهنا طاحت دمع من عين ريان بصح كمل يحكي بصوت تاع بكا و مهبط راصو باش مايشوفوش دموعو
ريان:خلات ولادها و راجل جبل مايهزوش و راحت تبعت واحد رخيص ههه بصح شوفي دنيا هههه خلاصت عليها خدامة عند رجليه ههههه و ندامك تتكل فيها
سكت ماحبش يكمل بسباب شهقاتو لي خنقوه و ماحبش يخرجهم.
راحت ليه عنقاتو و خبطتلو ظهرو بيدها تواسي فيه
ياسمين:ريان ابكي و شهق و عيط و كسر بصح ماتخبيش فقلبك شوف احكي كلش هاد لمرة و خرح لي عندك سنين و نتا مخبيه على خطرة كمل احكي و فرح على روحك راك غابن حياتك بسباب خاجة نتا مادخلكش فيها
ريان:بعد ماراحت و خلاتنا بابا ماقدرش مرض و بعد شهرين مات و بقينا انا و ختي وحدنا نطايشو فدار جدي و كامل كارهينا و يقولنا بلي حنا سباب موت وليدهم ،تغريد كانت صغيرة ماتشفاش بصح انا ماقدرتش ننسا ،قعدت معاهم عام كاامل و انا عايش معيشة الذل حتى وحد نهار جات وحد لعحوزة و معاها مرة و دار قلبوها و موراها بيومين ولاو و داوني انا و ختي ،كانت جداتي و خالتي داونا لعندهم بعد ماسمعو واش رانا عايشين
هي حداتي سمحت فبنتها و تبرات منها بعدما عرفت واش دارت  و كبرتنا انا و تغريد و تقوى كيفكيف موس واحد يذبحنا
اااه كبرنا و عشنا ووبعد خمسطاش سنة ملي مات بابا كنا انا و خواتاتي قاعدين عند لباب تاع الدار نشفا هاداك النهار كنت حبت لباك تاعي و كنت فرحاان و دنيا ماشي سايعتني شفنا مرا جات لعندناو حكمتلي وجهي و بدات تضحك "نتوما راكم فرحانين  و انا بسبتكم راني عايشة الهانة كاامل بسبابكم نتوما و باباكم انا تماك و‘دم نشف فيا ماعرفتش واش ندير
فلول كي شفتها قدامي فرحتوحسابتلي جاية تبوركلي و تطلب سماح بصح كي ضربت تغريد وليت نغلي و نعيط كنت كبرت و نعرف ماقدرتش نضربها ولا ختى نسبها درت حاجة وحدة عيطت بكامل واش عندي و قتلها ربي يهديك
و حكمت خواتاتي و دخلتهم للدار و غلقت لباب فوجها و بعدها رحلنا و جينا لهنا  و جداتي مازالها لدوك تعاني عندها زوج بنات و حدة دفنتها الموتو لوخرا دفنتها الدنيا، و انا من هاداك نهار ماذقت نوم حرمتي من حنان الوالدين و خسرت عليا ابسط حاجة يديروها الناس الرقاد داتو من عيني
نتهد تنهيدة من عمقو و شاف فيها لقاها دموع و خناين
عنقها و بداو يبكو لزوج
ياسمين:سامحني
ريان:علاواش
ياسمين:علا واش راح نقول دوك
و ديمارات
ياسمين:وحدك رخيصة ¥$×** كلبة ~€¥£& بنتβπ€...% نعل¢€¤π©™ و يحرق$@*$
و بقات ساعك و هي تسب و تكفر بكل لغات حطتهملو مستفين
ياسمين:اوووووف دوك ريحت
ريان شتف فيها و طلع حواجبو تاع واش هدرتي دوك:منين تعرفي هاد لكلام نتي
ياسمين:انها تجارب الحياة يا عزيزي
ريان:لسانك هادا نقطعووو لوكان نلقاك تعاودي هاد لكلام فهمتي
ياسمين رجعت للور:راك زعفان كي سبيت ولا كي سبيت يماك
ريان:زعفت كي وسختي لسانك بسباب وحدة ماتستاهلش الرحمة بهد الموت
ياسمين:ايه عندك لحق وحدة *$... ماكملتش هدرتها
كي شافتو داير يديه فجنابو
و لات بلعتها و ضحكت ببرااائة كلي (جزائري كي يحكموه في باراج 😅)
ياسمين:اححم قولي دوك ريحت
ريان قرب ليها و عنقها:ريحت بصح مازالني مشوكي من زوج حوايج
ياسمين:واشهوما
ريان:علاش رقدت معاك و وعلاش فرغتلك قلبي
ياسمين ضحكت و شافت:توو سامبلومو باسكو تحبني
ريان و هو يقرص فخدودها :ااام تعلمتي تهدري و وليتي فااهمة ااه
ياسمين:هههههههه و تعنقشت فيه و دورت رحليها على وصطو
ياسمين:حتى انا مازالني مشوكية من حاجة
ريان:شتاهي
ياسمين:كيفاش قدرت ماترقدش فايتة عشرين سنة
انا كي مانرقدش نهار و نولي نشبه شفيف تاع سبونجبوب
ريان ضحك و باسها من خدها:دوك خلاص راكي عديتيني نولو نرقدو صبح و عشية
ياسمين:هه امشي نولو.
مشا بيها و حطها فالطوموبيل
ياسمين:نولي للصبيطار
ريان:تروخي للداار
ياسمين:مااه للصبيطار أولاً مانخليش خويا و ثانياً دارنا فيها كائنات غير مرغوب فيها تسما تروح للصبيطار و رجلك فوق راصك
ريان:بلا يماها غير للدار و خوك راه مع تقوى ماتخافيش و تسكتي
ياسمين شنفت فيه كيما لبيبي و هو ضحك و ديماراو ديريكسيو الدار
هبطت و مازالها مشنفة
دخلت للدار لقات دنيا مقلبة
قابلتها عيشة رابطة راصها بحبات باطاطا ملوزين داخل فولارا
عيشة:ياااسمييييين
و راحت ليها عنقتها و بدات تبكي كيما لممثلات تاع لهنودا كي يغتاصبولهم بناتهم
ياسمين:اااه ربي اعطيني الصبر بلا عبر
و تظهر سووبر باية من حيث لاندري
باية:لعبر لي يعبرك نشالله نتي و مك
ياسمين و هي تهدر مع عيشة:عشعش راني طالعة نرقد غدوا نولي للخدمة راني بطيييت
عيشة:روحي بنتي و ايدا نضتي و ما صبتينيش قلبي عليا وصط ليساك بوبال تعود تذبحني و تطعني و ترميني فصليييح
باية:سكريه و روحي تكملي خدمتك
ياسمين حات راخ تنوضها معاها كي هدرت مع يماها هكاك بصح عيشة قرصتها ولات سكتت و طلعت لبيتها تغلي
هي فتحتها و تضربها بعيط لدرجة تغريد من دارها سمعتها
ياسمين:واشنووو هادااااا
مايسة:وشبيك تضبحي على راصك
منال:خليها تاكل راصها
ياسمين:شكون قاللكم ادناو لحوايجي دايرتلكم خزانة بوبليك هنايا ايا نحو قشي و عفطو من شومبرتي اياا نتي و نتي و نتي براااااا
وفاء:وشبيييك طفلتي(زعما خت راجلها) ريلااكس
ياسمين:طفلة لي تتلبزلك في كرشك نشالله اخرجوووووووو
و بدات تحما دعوة و ياسمين تغلي كي لكوكوطة مافاقتش بروحها حتى حست بحاجة دارت طررق و ضبحت ضربة وحدة
ياسمين:ااااااااعع
بصح ماهداتش كانت حاكمة مايسة من شعرها و تعض فوفاء و واقفة فوق كرش منال
و حاسة يدها راح راحت فيها
مابعدتش حتى جبدها شكيب
باية:واش هادا غولة تضربيهم هكاك ماتحشميش تدير للضياف هكاك ماتربيتيش
ياسمين:لي يغلط يخلص و نتوما ضياف ماشي مرحب بيهم هنا راكم فوق لقلب و لي رباني ربيتيه تسما شوفي روحكك ايدا عرفتي تربي و لا نن
عيشة:يااسمين
و شافت فيها بنظرة تاع اسكتي
ياسمين:راني رايحة
عيشة:وين
ياسمين:خارجة
و طلعت لبست سورفات و شافت فلفعات هادوك تاع استناو شا راه جايكم و خرجت تجري دايرة كاصك كي عادتها
حتى اووووب
هنا نحبس هيهيهي
تهدر وحدة تقولي زيدي ناكلها راهم صباعتيا فشلو و انا نكتب قريب نلحق 2000 كلمة
ههه بصح ماشي خصارة فيكم
اييه اعطوني رايكم فلي عاشو ريان
و خمو فواش راح تدير ياسمين راكم عاشرتوها و عرفتوها بلي مش ساهلة
نشالله يكون عحبكم و صحا صيامكم
‘اتنياوش بلا مانوصي فوط و كومنتاااات بلييز
نحبكم