اليوم داك كان اسؤا يوم في حياتي اليوم داك بقيت قاعده وببكي بس بقيت قاعده وبتذكر كل ذكرى لي معاها بقيت قاعده وم عارفه مفروض اعمل شنو اليوم داك بكل تفاصيلو كان اسؤا يوم لي اسؤا ليله قضيتها بقيت بتذكر انو هي دائما بتنصحني وهي كانت النصف التاني حقي كانت الحاجه الوحيده الطلعت منها من الدنيا دي مروة كانت حكايه بالنسبه لي مروة كانت مصدر الأمان مروة كانت حياه كامله مروة ومروة ومروة م قادره اصدق ي صحبتي انك مشيتي بالجد م قادره اصدق والله يا مروة احساس انك اقرب زوله لي احساس انك أهم زول عندي احساس اني بحبك يااخي ربنا يرحمك ويغفر ليك وزي م نصحتيني ح اعمل بكل القلتو ليك صدقيني ي مروة ح اصلي زي م قلتي لي ح اقرا قرآن وح اتصدق عشانك وم تختي ف بالك إني انساك في زول بنسى الرفيقه حقتو؟؟ قررت لي قرار يا مروة بأني ح اتحجب قادره تصدقي؟ كان من زمان نفسك تشوفيني محجبه كان نفسك تشوفوني زوله كويسه انا ح اعمل كل البقدر عليهو عشان ابقى نسخه منك ااخخخ الحياه ح تكون من دونك كيف؟؟ طيب والجامعه والجامعه يا مروة يا ريت لو سقتيني معاك وارتاح مع انو م عندي استعداد الاقي ربنا كدا بس عاوزة اجيك والله😭 حاجه كعبه شديد يا مروة انو الواحد يفقد حياتو ما عارفه ح اتم باقي ايامي دي كيف من دونك م عارفه يااخي ممكن ترجعي؟ استغفر الله يارب وعاوزة اقول ليك بانو انا م ح أقصر معاك والله زي م كنتي مقصره معاي ف الدنيا القاسيه دي اخخ يا مروة ربنا يتولاك برحمتو بحبك شديد والله.
م عارفه اليوم داك نمت كيف لحدي م لقيت امي بتصحي فيني قالت لي ارح نمشي بيت البكا قلت ليها يا أمي أنا عاوزة امشي بس م عاوزة امشي بخاف يا أمي قالت لي الكلام دا عيب منك قومي البسي خلينا نمشي قمت غسلت وشي وكملت باقي حاجاتي وجيت طالعه قلت ليها انا خائفه يا أمي وم اتوقعت يحصل معاي كدا ف يوم قالت لي كلنا م قاعدين ي امنيه ادعي ليها مروة صحبتك دي دائما بس قلت ليها كويس.
مروة اتخيلي لاقيت الكلب ف الطريق م خفت منو زي م قعد اخاف زي كل مره ، بقدر م أنا خائفه من بيتكم خائفه وم قادره امشي زياده مروة يااخي انا م قادره اصدق لحدي هسي ياريت لو بترجعي ياريت لو الروح حقتي المشت لربنا بدلك إنتي.
وصلنا البيت حقكم بقيت م قادره اخش واخش كيف وانتي مافي؟؟ حاجه حاره شديد ، امي مسكتني من يدي وحاولت تجرني قلت ليها امي انا راجعه البيت م بقدر اخش البيت دا تاني قالت لي ما ينفع ارح خشي باحترام وبطلي الحركات دي قلت ليها يا أمي لكن انا م قادره قالت لي لا بتقدري مسكتني بالقوة ودخلتني قعدت ف أقرب كرسي لي وبقيت ببكي عليك عاوزاكي تجي ونتونس زي م قعد نعمل كل مره ونقعد نتصور وانتي تقولي لي امسكي التلفون انتي وانا بقول ليك لا امسكي انتي وفالنهايه تقنعيني زي م قعد تعملي كل مره وامسكو واصور ، مروة انتي م فاهمه انا قلبي مقطع قدر شنو !! م ح تتخيلي انا متمنيه حاليا تجي بس عاوزاك تجي ، تتذكري زمان كنت بقول ليك م بحب كلمه بدور البتقوليها لي دي حاليا م فارقه معاي لو بتقوليها لي أو لا المهم هسي فارقه معاي انتي وبس ، جات مرة كدا م بعرفا دي منو قالت لي انتي صحبتا امنيه صح م قدرت اتكلم واتكلم كيف زاتو امي ردت ليها قالت ليها ايوة دي امنيه المرة ي مروة جات حضنتني حضن طويل وبقت تبكي فيني مسافه انتي م فارقه معاي انا بس فارقه مع كل الناس البتحبك.
نحنا مش كان اتفقنا نمرق ف اليوم دا ونفتش لينا شغل مش قلتي لي ح أمشي معاك طيب ليه كذبتي علي؟؟ مش كان مفروض نمشي سوا ونرجع سواا استغفر الله انا متأكده دا حلم وكابوس مزعج.
وانا ببكي جاني اخوك مازن قال لي يحليلها مشت خلتك وخلتني انا كمان م عرفت اقول ليهو شنو غير حضنتو علي وبقينا نبكي انا وهو يمكن اكتر اتنين ح تفرقي معانا بعتذر ليك على أي شي.
امي جات قومتني وودتني لامك عشان اعزيها م كان عندي استعداد والله م كان نفسي يحصل كل دا اتمنيت شديد انو يكون حلم وخلاص مشيت ع جهه امك قالت لي يحليلها مروة ح نشوفها وين تاني ح نلاقيها وين تاني بقيت ببكي مع كل كلمه هي قالتها قلت ليها ربنا يصبرنا م عارفه قدرت اطلع الكلمتين ديل كيف وم عارفه انا ليه م مشيت معاك؟؟ مش كل مشوار بنمشي سوا طيب الاتغير شنو هسي ااخخخ استغفر الله ربنا يرحمك ويغفر ليك.
قعدنا شويه كان نفسي امشي غرفتك يمكن تكوني مدسيه جوة يمكن تكوني عاوزة تشوفي منو الحيبكي عليك ومنو الحيعمل رايح منك كنت عاوزة امشي بس م قدرت لانو انتي خلاص بالجد مشيتي.
رجعت بيتنا رجعت لسريري بكيت عليك وبقيت بكورك بصوت عالي وكيف م اكورك ي صحبتي بقولو مفروض الواحد م يكورك لانو الميت بتعذب تلقائياً بس انا م كنت قادره لازم اطلع كل الدموع الفيني واقعد اكورك ع فراقك ، انا اشتقت ليك من هسي باقي الايام ح تكون كيف ياربي؟؟؟
الضهر اذن اتذكرت كلامك لي اتذكرت انك بتقولي لي اهتمي بصلاتك اتذكرت تفاصيل كتيره لينا لعنت الشيطان وقمت غسلت وشي واتوضيت مفروض اصلي العشاء والصبح والضهر اكتفيت بانو صليت الضهر بس ، لعنت الشيطان للمره التانيه واتذكرت كلامك لي بانو الصلاه الفاتتني بالأول وبعدين اصلي الصلاه الحاليه بديت العشاء وبعديهو الصبح والضهر سجدت سجده طويله وكانت مليانه باسمك انتي بس😭😭
شلت المصحف قريت سوره البقره كلها وكلها صدقه جاريه ليك انتي كل وصيه حقتك انتي ، انا ح اعمل بكل كلمه طلعت منك وحأمشي بيها صدقيني يا مروة ح أتجاوز انك مشيتي بس انتي لسه قاعده ف قلبي وم تفتكري ف يوم اني أنساك لانو م بقدر زاتو اعفي لي طيب؟ بحبك يااخي وربنا يرحمك.
م عارفه اليوم خلص كيف؟؟ وم عارفه الحصل فيهو شنو غير اني بصلي وبرجع انوم بصلي وبرجع انوم واسمك دائما موجود ف سجودي م كنت قادره اعمل حاجه غير ديل م كنت قادره اطلع الشارع م كان عندي نفس اتكلم مع زول غيرك انتي وانتي م موجوده💔.
عدا اسبوعين من غيرك اسبوعين من غير ضحكتك اسبوعين من غير ونستك اسبوعين من غير حوامتنا اسبوعين من غير م امشي بيتكم ومن غير م تجيني ف بيتنا اسبوعين كاملين يا مروة وانا م شفتك فيهم م سمعت صوتك م حكيت ليك الحاصل لي شنو م سمعت نصائحك الكتيره لي اسبوعين كاملين م طلعت الشارع م كان عندي نفس امرق من غرفتي زاتو ، اخخخخ الحياه من غيرك م ليها طعم ياااخي.
بعد اسبوعين قررت امشي افتش لي شغل كنت مجبورة امشي وف نفس الوقت م عندي مزاج امرق من البيت ، طلعت عشان اطلع لتوسل قروش عشان تسافر ، تعالي اوريك اليوم الأول حصل شنو؟ قدر م فتشت م لقيت لي شغل يا مروة مشيت اليوم التاني لقيت لي شغل في مطعم م كان عندي حل غير اشتغل جرسونَ ، عارفه؟ كان نفسي تجي وتمشي معاي ونحوم زي م قعد نعمل كل مره ، كان نفسي والله اشتغلت واتعرفت ع ناس م حاولت اتعمق معاهم لاني خائفه يوم يجي وافقد واحده فيهم زي م فقدتك انتي.
صاحبت لي وحده اسمها نور حكت لي وقالت لي انا شغاله مجبوره عشان اشتغل اتخيلي مالا؟ امها وابوها اتوفو ف حادث وبقت المسؤليه عليها هي بس عشان هي الكبيره عندها اختين واخو واحد فكانت الكبيره هي والمسؤلية عليها عشان كدا اشتغلت لانو م عندها حل غير كدا ، حنيت عليها وكان نفسي اساعدها واخفف عليها بس انا كنت برضو محتاجه للأسف.
روتيني بقى بتكرر كل يوم وكل يوم بمشي المطعم وبرجع حتى امي سألتني قلت ليها قعده اشتغل عشان اطلع مصروف لنفسي حاولت اكذب لانو م اظن تسمح لي اشتغل عشان توسل هم م عاوزننا نتعب ، الاهل عاوزين لينا الراحه ليس إلا ، هم عاوزين يطلعو القروش بتعبهم هم م بتعبنا نحنا !! عشان كدا كان لازم اكذب عليها ربنا يعفي لي ، أمي طبعا ابدا م اعترضت بالعكس خلتني امرق مع انو كنت متوقعه عكس كدا.
امي خلتني اشتغل ومنها عشان اقضي باقي ايامي وعشان اغير مزاجي للأحسن عشان كنت متوحده وانا قاعده ف البيت.
اشتغلت 3 أسابيع متواصله بطلع الصباح برجع المغرب لحدي م في يوم لقيت الولد اللقيتو ف الحدائق داك متذكره؟؟ كان حكيت ليك عنو قدمت ليهو الاكل وطوالي رجعت.
اليوم البعديهو قررت اتحجب ي مروة واخيرا شديد بقيت زوله كويسه ، اول مره البس ف حياتي طرحه وانا مارقه اول مرة يا مروة !! اي عارفه من زمان كان نفسك تشوفيني محجبه من زمان كان نفسك ، تعالي قولي لي مبروك ع الاقل وربنا يثبتك عليهو.
توسل قالت لي الحجاب حلو فيني وامي فرحت مني شديد عشان اتحجبت كنت عاوزة اعرف ح تقولي لي شنو انتي؟؟ بس معليش الدنيا دائما بتشيل الناس الحلوة الفي حياتنا للأسف.
جا آخر يوم لي ف المطعم اتخيلي جا تااني؟؟ لاقيتو للمره التانيه عاينت ليهو من غير م احس ابتسم لي م عارفه هو اتذكرني ولا لا ولا ابتسم لي ساي؟ م عارفه يا مروة م اهتميت بموضوعو شديد زي م كنت متمنيه ومتحمسه زمان اني الاقيهو تاني اليوم داك كان آخر يوم لي ف الشغل صرفت المرتب حقي ورجعت البيت وانا مبسوطه من نفسي.
مشيت طوالي ع غرفه قصي اديتو المرتب الصرفتو كلو قال لي ديل شنو؟؟ قلت ليهو قروش زي م شايف قال لي لشنو يعني م فهمت قلت ليهو اعتبرا مساعده مني ليكم قال لي لالا اصرفيها لنفسك انا بجازفها وبعدين ي امنيه فضل عشره مليون بس م اكتر اتجازفت لينا ف الأخير قلت ليهو خت عليها التلاته مليون حقتي دي وحيكون فضل ليكم سبعه مليون قال لي ربنا يفتحها عليك ي اختي قلت ليهو امين جمعا كدا.
اول مره احس بإنجاز عظيم حاسه حياتي اتصلحت بفضلك انتي ي مروة شكرا ليك شديد.
طبعا قطعت علاقتي مع احمد وبلكتو وبلكت مهند وبلكت اي ولد بقيت م بحب زول بقيت براي للأسف ، الزول الوحيد الكنت محتاجاهو انتي مافي زول غيرك تصدقي؟
علاقتي مع ربنا اتصلحت قدرت انتظم ف الصلاه رجعت امنيه الزمان وبقيت نسخه منك يا مروة ، بقيت بقرا قرآن كل يوم بقيت بتصدق ليك صدقه جاريه عشانك انتي وبس والحجاب اهم شي كان بالنسبه لي ودا كلو كنت عاوزاهو يحصل وانتي قعده جمبي بس معليش💔
اليوم البعديهو جا عمي اعتذر لينا ع فتره الغياب الحصلت نسبه لانو شويه كان مشغول ودفع لينا 20 مليون لتوسل قادره تصدقي انو الموضوع اخيرا اتسهل واتجازف فالنهايه.
علاقتي مع توسل ماشه زي الفل بقينا اخوات بالجد رجعنا زي م كنا زمان ، اعتذرت ليها على كل كلمه جارحه قلتها ليها ، اتغيرت تغير توتلي وبقيت نسخه منك بالضبط بقيت زوله كويسه وكلو بفضلك طبعاً.
انا بعد دا مستعده اقابل ربنا حاسه نفسي نضيفه من جوة حاسه اني م امنيه السخيفه البتتعامل مع ربنا وبتتعامل مع الناس بقساوة ، مبسوطه من نفسي ومن إنجازاتي العملتها وف نفس الوقت حزينه لانو انتي بقيتي م موجوه بعد تعبك معاي عشان ابقى زوله كويسه ودي تقريبا اكتر حاجه واجعه قلبي م مشكله ح اتحسن اكتر عشان الاقيك ف الجنه هناك ي مروة ي صحبتي💛
#والجاي_احلى
