اول يوم ف السمستر التاني واول يوم لي ف الجامعه من غير مروة ، جامعه من غير مروة جامعه م عندها طعم جامعه من غير حوامتنا من غير أي شي ، مروة تعالي اوريك بقيت بلف براي ف الكليه م حاولت اتكلم مع الناس بسلم عليهم وبمشي طوالي بحضر المحاضرات وبرجع البيت ، روتين ممل لمن ماف طريقه حياه قاسيه وبتشيل الناس الحلوة دائما ، كل ركن ف الجامعه وكل موقف حصل بينا حيفضل قاعد ف دماغي كدا للأبد م اظن اقدر انسى حوار دار بينا م اظن اقدر انسى ونحنا بتشاكل ف الدوريتوس وشوكلاته ماربيلا م اظن اقدر انسى اي حاجه متعلقه بيك وح أفضل اتذكر الذكريات دائما.
عارفه حصل شنو؟ دخلت الكفتريا عمو سألني قال لي صحبتك البتكون معاك الليله وين؟؟ انسحبت طوالي م رديت ليهو وم قدرت اصلا ، مشيت قعدت ف محلنا المفضل الفي الكليه قعدت هناك وبقيت ببكي عليك ببكي لاني عاوزاك ترجعي لي ببكي لانو م قادره اتحمل اكتر ياريت لو ناسنا الحلوين يفضلو معانا للأبد.
بقيت كل يوم بمشي الجامعه وبرجع من غير أي حماس من غير أي لهفه ، لاقيت أحمد ومهند م حاولت اتخافف زي م كنت بعمل بالعكس م اشتغلت بيهم زي م كنت بعمل زمان ، انا اتغيرت شديد ع فكره !
قصي جا قعد معانا قعده عائليه طويله كان بورينا انو السفر بعد بكره وانو بعد دا خلاص الموضوع اتسهل حقيقه كلنا فرحنا بالخبر دا وكان خبر حلو بعد فتره طويله والفتره الكانت مليانه حزن.
بقيت م بقعد ف غرفتي زي م كنت بقعد ، بقينا انا وتوسل ف نفس الغرفه حكت لي قصص ليها كتيره وبديت احكي ليها تجاربي الفاشله ف الحب حكيت ليها عنك وانك زوله كويسه شديد حكيت ليها عن علاقتي مع احمد الفاشله حكيت ليها كل شي كان موجود جوة قلبي عارفه؟ وانا بتكلم معاها حاسه انو انتي قعده جمبنا وبتسمعي ف كلامنا بكل حب.
كانت احلى يومين لي مع توسل حتى كنا بنساهر سوا عشان نحكي لبعض الحاجات الماحكيناها زمان ونحنا متخاصمين.
شعور حلو يا مروة لمن تكون م عندك علاقه مع اختك وفجأه تبقى علاقتكم احلى شديد ودا طبعا كلو بفضلك انتي وبنصائحك البتديني ليها فأنا بشكرك من جوة قلبي وحب ليك بقدر السما وربنا يرحمك يارب.
الجامعه كل مره بمشي وبرجع طوالي بقت لي مسيخه شديد م ليها طعم اصلاا.
جا يوم سفر ناس قصي وتوسل بقدر م نحنا فرحانين انو ح تتعالج خلاص بقدر م نحنا زعلانين لانو ح يمشو فتره وبعدين يرجعو كان فرح ملخبط بحزن ، مسكتها علي شديد وحضنتها قلت ليها اعفي لي ي توسل وربنا يشفيك وتبقى كويسه وتجينا بتمشي برجولك قالت لي امين ي امنيه ي اختي اديتها حضن تاني وبعديها ودعت قصي قلت ليهم البيت ح يبقى مسيخ بس م مشكله كلها شهر وترجعو قال لي فتره وبتعدي هسي ، مشينا المطار معاهم وبكينا عليهم وودعناهم وجينا راجعين البيت.
قلت ليها يا أمي الشهر دا متين ينتهي عشان يرجعو لينا امي قالت لي قولي بسم الله كدي هم مصر لسه م وصلوها😂 قلت ليها الله يعديها بس.
تمت 3 ساعات لحدي م اتصلت على قصي قال لي وصلنا قبل شويه قلت ليهو حمدلله ع السلامه وابقى عليها عشره نحنا منتظرنكم بفارغ الصبر ، امي سلمت عليهم وابوي سلم عليهم قلت ليهو اديني توسل اسلم عليها قالت لي ايوة ي امنيه قلت ليها اشتقت ليك تعالي راجعه خلاص قالت لي انا كمان اشتقت ليكم كلكم قلت ليها ربنا يشفيك لينا يارب قالت لي امين قلت ليها يلا م اكتر الكلام بتكونو تعبانين حاليا.
مشيت رقدت نمت صحيت ع مكالمه من نور قلت ليها نور قالت لي امنيه كيفك؟ قلت ليها ماشي الحال انتي كيف قالت لي بخير قلت ليها احكي قالت لي اتصلت ليك عشان اوريك انو ف واحد بجي بتغدا كل مره ف المطعم حقنا فقام سألني منك انتي قلت ليها بسم الله دا منو كمان قالت لي حلاتو كدا قال لي مواصفات وشك كلها قلت ليها اجيي؟؟ دا منو كمان قالت لي قال لي اسمي أيمن وكان لاقيتها ف الحدائق قلت ليها لا حولااا بالله اسمو أيمن اسم السرور يمهه 🙈قالت لي قال عاوز يتواصل معاك قلت ليها أدي رقمي م حنك قالت لي طيب قلت ليها اها انتو كيف واخواتك كيف؟ قالت لي ماشي الحال الحمدلله قلت ليها بجيكم ف البيت الايام الجايه دي قالت لي تنورينا قلت ليها طيب يلا قالت لي طيب.
فرحت شديد بانو هو الحاول يصل لي فرحت لانو هو م نسى شكلي وحفظ ملامح وشي زي م حفظت ملامح وشو ف دقائق بسيطه ، شلت تلفوني من غير م احس اتصلت ع مروة عشان اوريها جاني مغلق ختيت يدي ف راسي وبكيت عليها شديد اكتشفت اني لسه م قادره اصدق الحاجه دي حتى وهي اتوفت انا بحس بيها معاي وعندي استعداد احكي ليها اي شي وحتى وهي مافي.
استغفرت ربنا شديد ودعيت ليها بالرحمه والمغفره ، كان نفسي احكي لزول بفرحي الجا فجاه كان نفسي احكي لزول انو أيمن حفظ وشي في دقائق معدوده كان نفسي احكي لزول بالجوة قلبي بس للأسف م لقيت لي زول احكي ليهو مروة اتوفت وتوسل سافرت احكي لمنو؟؟ م عندي زول غيرهم احكي ليهو الحمدلله يارب ع كل شي.
احيانا بكون نفسنا نحكي لزول بالحاجه المفرحانا بس م لاقين الزول المناسب م لاقين نحكي لزول وهو يكون متفاعل ومتحمس معانا م لاقين الزول الصح البنحكي ليهو فدي حاجه محزنه شديد انو م تلقى زول تفضفض ليهو وقت حزنك أو فرحك أو ع الاقل تطلع الجواك ف حين م لقيت زول عارف تمشي لمنو؟ تمشي لربنا طوالي من غير تفكير زاتو لانو ربنا هو الوحيد المستعد يسمع كلامك وهو الوحيد البسهل المواضيع هو الوحيد مافي زول غيرو💛
بمشي الجامعه وبرجع زي كل مره ، ومنها لميت لي قروش اديها لنور صحبتي هديه عسى تفيدها في شي ومنها تكون صدقه لمروة.
جا يوم السبت الكان اجازة وصفت لي نور بيتهم ومشيت ليها سلمت عليها وعلى أخواتها واخوها كانو حاجه كده حلوة شديد رغم الظروف يلي هم فيها حكو لي حاجات كتيره وخلوني اضحك من قلبي ، الضحك الضحكتو اليوم داك كنت بضحكو وانا جمب مروة بس لانو هي الوحيده البتعرف تخليني اضحك وبتعرف تنزع الحزن حقي ف ثواني معدوده ، مروة عندها القدره الهائله ف انو تخلي الواحد مبسوط فأنا اشتقت ليها شديد😭.
سألتها من أيمن قلت ليها هو عرف كيف نحنا صحبات؟ قالت لي بكون شافنا سوا م دام هو كل مره بجي المطعم قلت ليها ايواا وجا قال ليك شنو بالضبط يعني؟ قال لي البت الكان معاك مشت وين لي كم يوم م شفتها وقال لي ممكن توصليني ليها؟؟ قلت ليهو م عارفه بتصل ليها بعدين وبوريك قال لي تمام بكره بجي تاني وبشوف قالت شنو؟ فعلا ي امنيه اليوم التاني جا واديتو رقمك قلت ليها ايواا طيب كويس.
وبعديها مشينا البقاله الجمب بيتهم قلت ليهم عاوزين شنو أو نفسكم ف شنو نور قالت لي لالا م تعذبي نفسك قلت ليها عادي اخوانك ياهم اخواني اي واحد فيهم شال العاوزو ، شفت كميه الفرح الفي عيونهم وهم شايلين حاجاتهم النفسهم فيها حاسبت بتاع البقاله وطلعنا منو قالت لي م كان تعذبي نفسك قلت ليها اخوانك ياهم اخواني قالت لي م قصرتي قلت ليها ولو يااخي وصحي امسكي ديل معاك يمكن تستفيدي منهم ف شي واعفي لي لانو هي م كتيره شديد قالت لي لا م حاقبلها منك قلت ليها نور بطلي انتي اختي امسكيها الله يرضى عليك قالت لي ربنا يضاعف ليك أجرك قلت ليها امين ويلا مع السلامه قالت لي ربنا يحميك ودعتهم ومشيت منهم.
وانا راجعه اتصل علي رقم غريب قلت ليهو وعليك السلام قال لي امنيه صح؟ قلت ليهو ايوة انت منو؟ قال لي معاك أيمن قلت ليها ايوا عرفتك كيفك؟ قال لي الحمدلله كويس انتي كيفك قلت ليهو ماشي الحال قال لي بعتذر منك شلت رقمك والكلام دا قلت ليهو لا م حنك عادي قال لي نتواصل واتسب قلت ليهو جداا قال لي طيب يلا قلت ليهو يلا.
قربت انطط ف الشارع من الفرح😂 معقوله الحاجه الكان نفسي الاقيها مره تانيه حتى ولو بالصدفه جات لحدي عندي وهي المصره اكتر! حاجه غريبه شديد دي!
وانا راجعه جيت ماره ببيت ناس مروة قررت امشي وف نفس الوقت لا م قدرت اتوكلت ودقيت الباب جا فتح لي اخوها مازن قلت ليهو امك قاعده قال لي اتفضلي موجوده دخلت عليها وسلمت عليها قلت ليها كيفك ي خالتو مناهل؟ قالت لي كويسه الحمدلله انتي كيف قلت ليها ياهو اشتقت لمروة بس والله قالت لي كلنا اشتقنا ليها خلت لينا البيت من غير نكهه ومسييييخ من دونها قلت ليها ربنا يرحمها قالت لي امين قلت ليها معليش م جيتك طول الفتره الفاتت لانو كنت م قادره وف نفس الوقت خائفه قالت لي متفهمه كلامك كويس قلت ليها وانا بخاف شديد ع فكره قالت لي ادعي ليها معاك كتير قلت ليها يب يب لازم يا خالتو قالت لي الجامعه ماشه معاك كيف قلت ليها ياها الحمدلله بس قالت لي زورينا كتير سمح ي بتي ؟ قلت ليها حاضر ي خالتو مناهل سلمت عليها وودعتها ورجعت البيت.
اخدت لي نومه صغيرونه واتصلت على قصي وتوسل قلت ليهو اها ماشين كيف؟ قال لي بكره اول مقابله لينا دعواتك تتسهل قلت ليهو بتتسهل إن شاء الله سلمت على توسل واتكلمو مع امي وابوي.
قلت ليهم ارح نمرق الليله امي قالت لي نمشي وين؟ قلت ليها اي مكان م عندي مانع قالت لي ارح نمشي المطعم الفي الظلط دا قلت ليها بحساب منو😂؟ قالت لي انا طبعا قلت ليها ماشه البس قالت لي سمح مشيت لبست وجيت لقيت امي وابوي لبسو اتمشينا برجولنا وبعديها وصلنا قلت ليهم اطلبو العاوزنو وانا اي شي باكلو م عندي مانع طلبو لحدي م يصل الاكل قلت ليهم ارح نتصور لينا كم صوره ارسلها لناس قصي وتوسل بعدين وبعديها اخدنا كم صوره ، فكانت الصور مليانه حب💛
قعدنا أكلنا ورجعنا البيت شلت تلفوني عشان ارسل لناس قصي الصور ومنها رسلتها ليهو جاتني رساله من رقم أيمن قال لي كيفك قلت ليهو الحمدلله قال لي اختك كيف؟ قلت ليهو سافرت مصر عشان تتعالج قال لي كويس شديد ربنا يشفيها قلت ليهو آمين وبعديها سكتنا وسجلت رقمو عندي.
رسل لي قصي قال لي عملتو حركات من ورانا لكن قلت ليهو عشان كدا تعالو راجعين عشان كلنا نعمل حركات قال لي هههه قلت ليهو وريها لتوسل الصور قال لي تمام.
مرت الساعات لحدي م جات الساعه عشره بليل وبعديها ختيت التلفون ونمت.
صحيت الصباح مشيت الجامعه وجيت راجعه رسلت لقصي رساله ف الواتسب قال لي حاليا نحنا مع الدكتور قلت ليهو طيب.
#نتلاقى_في_الجزء_الاخير
#والجاي_احلى
