قلت ليهو اها انت عامل كيف؟ قال لي والله الحمدلله بس حصلت لينا حاجه م حلوة قلت ليهو ليه حصل شنو؟؟ قال لي مشينا مع حبوبتي المستشفى لانو وقعت من السرير قلت ليهو لا حولا وهسي هي كويسه؟ قال لي كانت م كويسه بس هسي بقت كويسه قلت ليهو الحمدلله والله ومعليش شديد لاني كنت بلوم فيك وم كنت عارفه الحصل ليك شنو من الأساس قال لي لالا م مشكله قلت ليهو يلا م ازعجك بتكون تعبان نتونس بكره قال لي طيب يلا.
ختيت التلفون ف الشاحن رجعت شلتو تاني فتحت تطبيق القران الفي تلفوني قلت اقرا لي ع الاقل صفحتين وانوم وبقيت ما عارفه اقرا ياتو سورة اتذكرت انو قبل النوم ابوي زمان ورانا بقرو سوره الملك لانو بتنجي الواحد من عذاب القبر فتحت سورة الملك وبقيت بقرا فيها خلصت ورجعت ختيت التلفون في الشاحن ورقدت نمت.
صحيت الصباح مشيت على المطبخ سويت ليهم الشاي وشلتو وديتو ليهم في غرفهم لقيت توسل بتقرا في قرآن قلت ليها صباح الخير قالت لي يا هلا صباح النور قلت ليها بعد تخلصي اشربي الشاي دا طيب؟ قالت لي تسلمي ي حلوة قلت ليها الله يسلمك مشيت ع جهه غرفه قصي قلت ليهو حبيبنا قال لي اهلين قلت ليهو اشرب الشاي دا قال لي من متين بقينا ظريفين كدا قلت ليهو شكلي ح اسحب الشاي واطلع قال لي الزول م يهظر معاك يعني😂 قلت ليهو يلا بالهنا وخليت لأمي وابوي حقهم بجمبه.
بقى م عندي موضوع قررت انزل الواتسب نسبه لاني فضيت ليهو يادوب مشيت لقصي قلت ليهو واتسابك محدث؟ قال لي اي قلت ليهو رسلو لي خلاص قال لي والشاي كان مقدمه ولا شنو قلت ليهو تعبت من تفكيرك دا انا😂 قال لي اسف خلاص فتح لي الشير ورسلو لي قلت ليهو شكراا قال لي عفواً قلت ليهو خلاص اخر شي قال لي الله يفكني منك الليله دي عااد قلت ليهو الخساسه جاريه ف دمك وبعدين انت لاقيني وين حبيبي انا؟ قال لي اها قولي خلاص قلت ليهو عندك شغل الليله أنت قال لي ايوة وماشي اصرف القروش عشان اخت جزء لتوسل قلت ليهو ربنا يسهل ان شاء الله وفضل ليكم كم؟ قال لي حولين 30 مليون كدا أو اكتر شويه قلت ليهو م كتيره بتتسهل قال لي ايوة طبعاً قلت ليهو طيب خلاص يلا ومشيت منو.
رجعت غرفتي فتحت الواتسب ختيت في حالتي باك في ناس ردت لي وفي ناس عملت رايحه😏 أحمد رسل لي نورتي الواتسب قلت ليهو بنورك حبيبي انا قال لي اها حتنزلو السمستر التاني متين؟ قلت ليهو الله اعلم م فضل لينا كتير لكن قال لي ايوا كويس طيب فجاه ونحنا بنتونس انا واحمد جاتني رساله من واحد زميلي مهند قال لي وانا اقول الواتسب الليله نور مالو قلت ليهو هههه بنورك انت قال لي عامله كيف انتي؟ قلت ليهو والله الحمدلله بخير قال لي ان شاء الله دائما كدا قلت ليهو جمعا ، رسالتو دي خلت قلبي يدق وحده وحده سألت نفسي هو فعلا فقدني يعني؟ أو هو لاحظ اني اختفيت فتره من الواتسب يعني ؟
امي جاتني قالت لي السوا الشاي منو؟ قلت ليها انا قالت لي م قصرتي وياريت تتفاعلي كدا دائمآ قلت ليها من الليله ولقدام ح اعمل اي حاجه بتريحكم قالت لي خليك كدا بس قلت ليها حاااضر ابتسمت لي ومشت.
ختيت التلفون جمبي وبقيت بفكر مفروض اساعد اهلي انا ع فكره عشان القروش تتم حقت توسل بقيت بفكر ح القى شغل وين؟ ح اشتغل شنو اصلا والقروش الحاطلع بيها حتكون كم؟ مفروض اشوف منو عشان يساعدني!! اطلع ليهم جزء منها واكون شاركت بحقي وتعبي ورفعت يدي يارب سهل لي الموضوع دا يارب كون معانا يارب سهل لتوسل السفر وياااارب.
وانا بدعي أذان الضهر اذن اتذكرت انو انا اصلا م صليت الصبح مشيت اتوضيت اتذكرت كلام مروة لازم اصلي الصلاه الفاتتني بالأول وبعدين اصلي الصلاه الحاليه صليت الصبح وبعديهو الضهر وانا ساجده دعيت لي كم دعوة وشلت المصحف الكان مركون ف الغرفه بجهه وشبه مترب كان استغفرت الله ونضفتو وفتحت سورة البقره قررت لأول مره اجرب اقرا جزء كامل بعد فتره طويله طويله شديد خلصت من الجزء وختيت المصحف قريب من سريري وحاولت اخد لي نومه صغيرونه كالعاده.
رقدت نمت وصحيت ع صوت توسل جابت لي الغدا لحدي عندي قالت لي امنيه قومي خلينا ناكل ومن قبيل كنت منتظراك انا عشان ناكل سوا قمت غسلت يدي وجيت راجعه ليها وبدينا ناكل.
قلت ليها شكرا يااخ قالت لي قلت اجرب مره اعمل لي حاجه مفيده ليك قلت ليها هههه م قصرتي وبعديها رجعت غرفتها.
اتصلت على مروة قالت لي يا الله انا قلت ليها تعبت منك تعالي لي ف البيت قالت لي بتعرسي لي اخوك قصي قلت ليها انتي تعالي الباقي هين قالت لي سمح جاياك ، انتظرتها لحدي م جات وبقت تتونس معاي قالت لي اها عامله كيف مع الصلاه؟ قلت ليها احسن كتير طبعاً قالت لي صحي نسيت ارسل ليك الكتاب حق فاتتني صلاه قلت ليها رسلي لي هسي م حنك قالت لي طيب وفعلا بعديها رسلتو.
قلت ليها اها استخرتي ف خلودي😉 قالت لي ايوة بس لسه م ردينا ليهم قلت ليها منتظرة شنو قالت لي م منتظره شي بس لسه قلت ليها بتتسهل ي زوله قالت لي فعلا قلت ليها صحي انا م صليت العصر قالت لي م ينفع قومي صلي هسي ونتم ونستنا فعلا مشيت اتوضيت وصليت اول م خلصت قالت لي مفروض تغطي رجولك قلت ليها طيب من الصلاه الجايه ح اعمل كدا وقلت ليها اها الجامعه قربت قالو قالت لي واي م تذكريني قلت ليها طبعا مهند أمس قال لي الواتسب نور🙈 قالت لي الاولاد ديل طلاسين خلاص وبعدين قولي لي انك رديتي ليهو؟ قلت ليها ايوة رديت ليهو طبعا قالت لي تعبت منك ي امنيه انا مش قلت ليك م تردي ليهو زولك دا؟ قلت ليها المره الجايه خلاص م تنقي لي ف راسي دا براي مصدعه قالت لي نشوف وبعديها سكتنا قلت ليها مروة قالت لي اها قلت ليها انا عاوزة اساعد توسل لموضوع السفر حقهم دا وعاوزة اشوف لي شغل الايام الجايه دي عشان اكون على الأقل ساعدتهم قالت لي فكره كويسه منك بس المشكله تشوفي ليك شغل وين قلت ليها م عندي مانع اني اشتغل أو اشتغل اي شغل المهم يكون بتعبي وبحقي وبعدين زاتو اكون ساعدتهم قالت لي والله م عارفه لكن بشوف ليك ابوي قلت ليها لو بقيت ست شاي م عندي مانع قالت لي عاوزة تشتغلي ست شاي انتي؟ قلت ليها لو لقيت لي محل بشتغل والشغل ما عيب ي مروة لو هو بالحلال قالت لي فعلا فعلا بقيتي عاقله فجاه كدا قلت ليها انا اصلا عاقله بس احيانا بكون هبله😂😂 قالت لي كويس انك معترفه دي أهم شي قلت ليها ما علينا يا زوله بكره نلف شارع النيل والحتات ديك كلها م اظن م القى لي حته اشتغل فيها قالت لي طيب قدام قلت ليها بقى ماف موضوع ولا حياه دي ممله؟؟ قالت لي ليه ياخ الحياه حلوة بس نحنا نعيشها صح ونخلي الأحزان حقتنا دي بجمبه براها قلت ليها لكن في حاجات بتخلي الواحد فعلا يكتئب هسي دقيقه لو مات ليك زول عزيز ليك م حاجه حاره؟ أو لو زول قريب ليك خذلك م حاجه حاره؟ الحاجات دي صعب الزول يتجاوزها بالسهوله قالت لي حاره وحاره شديد بس م عندنا حل غير نصبر ونحاول شديد نتجاوز قلت ليها ربنا بسهلا ي زوله قالت لي ايوة وخلي عندك يقين انو الجاي احلى رغم مراره الحياه دي قلت ليها خلينا نرجع لموضوع خالد عرسو لينا سريع بالله على الأقل اشوفك عروسه قالت لي طبعا انا اتخيلت وهناي وبتاع🙈 قلت ليها اسمعيني لو عندو اخو شوفي لي بهنا قالت لي عندك أحمد ومهند وحبيبك القديم داك وصحبك الفي الجامعه عاوزة باخو خالد شنو كمان😂 قلت ليها ديل كلهم م نافعين معاي قالت لي عشان كدا انا زمان قلت ليك انك لسه م حبيتي ولسه م وقعتي ف الحب قلت ليها ف واحد لاقيتو ف الحديقه يوم مرقنا داك نفسي الاقيهو تاني حرفيا اول مره ولد يخطف قلبي بالسرعه دي ومن اول لقاء لينا تصدقي؟ قالت لي انتي المشكله كل م تلاقي واحد بتقولي نفس كلامك دا هههههههههه قلت ليها صحي والله😂😂 لكن دا غير ي مروة انتي م شفتي كان بتكلم معانا كيف؟ م شفتي ملامحو المريحه م شفتي اتعامل معانا كيف يااخي عاااقل من وشو داا نفسي بس الاقيهو تاني قالت لي إن شاء الله تتلاقو ياخي قلت ليها امين يارب قالت لي ارح قدميني بدور امشي بيتنا قلت ليها كلمه بدور دي انا مش قلت ليك م تقوليها لي تاني؟! قالت لي خلاص اسفه ارح قدميني من غير كلمه بدور قلت ليها المشكله انتي تاني قلتيها بس م حنك ارح اوصلك ونحنا ماشين ف الطريق لقينا كلب قلت ليها والله م بمشي بالشارع دا انتي عارفه اني عندي فوبيا من الكلاب قالت لي حياكلك مثلا يعني قلت ليها م قلت بياكلني بس يمكن يسكنا ويمكن يعضي وحده فينا كمان عشان كدا ارح نمشي بالشارع التاني قالت لي لالا ياخ انا بتم باقي طريقي براي وانتي ارجعي بيتكم بعد دا قلت ليها نفسي اكمل معاك بس بخاف وانتي عارفه وانا عارفه قالت لي يلا باي نتلاقى بكره قلت ليها طيب يلا ومنها رجعت بيتنا وهي رجعت بيتهم.
وانا راجعه سامعه الأذان حق المغرب بإذن كسلت اتوضا شلت تلفوني ورقدت فتحت كتاب فاتتني صلاه زي م وصتني عليهو مروة وبديت اقرا فيهو لحدي م وقفت في محل معين ولعنت الشيطان ومشيت اتوضيت وصليت وقعدت انتظر العشاء مره واحده واصليهو لحدي م أذن العشاء وبعديها صليت ورقدت في مصلايتي سامعه أصوات بتتكلم قريب لي طوالي قمت اشوف في شنو والساعه كم بقت حاليا؟ مشيت ع جهه الباب لقيت امي وتوسل واقفين وفي دموع في عيونهم قلت ليهم بسم الله مالكم في شنو؟ بقو بعاينو لي قلت ليهم في شنو وروني؟؟ امي فتحت خشمها وياريت م سمعت الخبر الجا زي الصاقعه قالت لي امنيه للأسف البقاء لله ومروة صحبتك اتوفت💔 قلت ليها امي عليك الله م تهظري معاي هسي كانت معاي هي كيف يعني؟؟ ضمتني عليها قالت لي قبل شويه زاعو الخبر ف الجامع ربنا يرحمها وكلنا حنموت يا بتي قلت ليها امي عليك الله م تكذبي علي قبل شويه كنا بنتونس نحنا دقيقه اقرص نفسي يمكن انا ف عالم الأحلام زي م قعد احلم كل مره توسل اختي قالت لي معليش بس هي ماتت خلاص وقعت ف الارض وبقيت ببكي لا مستحيل يكون حصل نحنا كنا بنتونس قبل شويه.. كيف ومتين حصل كل دا لالا ياخ انتو شكلكم بتطلسو فيني شكلكم عاوزين تشوفوني ح اعمل شنو وبعدين زاتو مروة م ح تمشي وتخليني براي ونحنا اتفقنا نمرق بكره نفتش لينا شغل اتفقنا نعمل حاجات كتيره لالا انا م بصدق زحو مني خلوني براي😭😭😭😭😭😭😭😭😭😭😭😭😭😭😭😭😭😭😭
امي حضنتني عليها وقالت لي ربنا يرحمها ادعي ليها ف الساعات دي وانا ماشه البس توبي نمشي ليهم قومي ارح قلت ليها امي هي م ماتت لكن!! نمشي ليهم ليه انا متأكده هي قاعده وبتحضر ف المسلسل حقتها انا متأكده يا أمي هي م ح تمشي بالسهوله دي قالت لي ربنا يا بتي بقبض اي روح واي زول عندو يوم معين بموت فيهو ربنا يرحمها ويغفر ليها وقومي البسي ارح خلينا نمشي ليهم قلت ليها كيف ح اقدر امشي وريني بياتو حيل وجسم امشي ليها وهي م موجوده في البيت وريني ح الاقيها وين تاني وريني يا أمي ح القى مروة وين تاني ومنو تاني ح يقيف معاي منو تاني ح اكرهو حياتو وامعطو كل دقيقه انا م بقدر امشي معاكم امشو انتو م بقدر يا أمي وامها ح تتعامل معاي كيف وانا صحبتها المقربه وامها حيكون احساسها شنو وبتها مشت خلتها طيب وخالد؟؟؟ وخالد يا أمي البحبها والعاوز يكمل معاها ح يحصل ليهو شنو طيب صحباتنا التانين ي امي ح يحصل ليهم شنو طيب اخوها مازن البحبها وم بقدر يفارقها ديل ح يعيشو كيف طيب وانا؟؟ وانا ي امي يا ريت لو كنت في حلم ياريت لو كان كابوس مزعج ياريت لو رجعت معاها ووصلتها لحد الباب وحضنتها ياريت لو اتونسنا اكتر ياريت يا أمي لو بترجع اخخحخخ يا اميي امشو انتو انا م مستعده امشي بيتهم م مستعده اشوف الناس بتبكي عليها وهي م موجوده م مستعده اشوف الكفن لانو دا اكتر حاجه انا بخاف منها وم مستعده يا أمي أنا خلوني براي أتم بكاي دا براي ااخخخخ ي مروة ياريت لو بترجعي احضنك آخر حضن ونتهابل زي م قعد نعمل كل مره امي وتوسل غلبهم الكلام معاي لانو انا كنت منهاره وكيف م اكون منهاره والرفيقه المقربه لي مشت خلاص.
امي وتوسل حاولو شديد يطبطبو علي وبعديها امي مشت البكا خلتني مع توسل في الغرفه.
بقيت ببكي بس ببكي لانو أغلى زوله في حياتي اتوفت ببكى لانو هي أهم شي ببكي لانو حياتي من غيرها م عندها معنى ببكي لانو تاني م حاشوفا واحكي ليها مشاكلي وتقعد تحلها ببكي لانو داك كان آخر يوم لينا واخر ونسه كانت ببكي لانو هي الوحيده البتقدر تغير حزني لفرح ببكي لانو حياتي مجهجه ومن دونها حتبقى مجهجه زياده ببكي لانو اول زول برجع ليها بعد أقع ف مشكله ببكي لانو خلاص هي ماتت من غير رجوع ببكي لانو م عارفه ح اتصرف كيف تاني!! وهي اصلا ما موجوده ببكي لانو م عارفه ح اكمل باقي حياتي ومروة م موجوده فيها ببكي لانو تاني م ح القى صحبه زيها ببكي لانو هي الرفيقه الأولى والأخيرة والمقربه لقلبي ببكي لانو مروة مشت والسعاده مشت معاها خلاص💔.
من الصعب أن تعيش حياه من غير شخصكَ المفضل من غير اللقاءات ومن غير الضحكات ومن غير كل م يتعلق به من الصعب نسيان شخصٍ يعني لكَ الكثير من الصعب أن تعيش ونصفكَ الآخر لم يعد بعد الآن.
صديقتي أنا اعتذر لكِ نيابه عن الكل نيابه عن الذين جعلوك حزينه اعتذر لكِ إن نسيتك يوماً ما اعتذر لكِ يا رفيقه إن حاولت أن اتناسى واتناسى زكرياتنا الجميله اعتذر لكِ فأنا لا تكتمل حياتي إلا من دونك وتكتمل حياتي بجانبك انتِ فقط
ربنا يرحمك يا مروة نتلاقى في الجنه إن شاء الله😭😭😭😭😭😭😭😭😭😭😭😭😭😭😭
#والجاي_احلى
