Patuloy na Nasasaktan

MARTIR

Oo, ako ang nauna 

Unang lumapit 

Unang nagpakilala 

Unang nagbahagi 

Hindi mo pinansin

Ngunit matiyaga akong nanuyo

Ganoon daw kasi kapag gusto mo 

Na magbubunga rin kapag minahal na

At ganoon ka kaespesyal sa akin

Ako ang lalapit

Ako ang susuyo

Para makilala mo ako

Para maramdaman mo ako

Lahat ibinigay ko

Lahat katotohanan ang galing sa akin

Walang itinago

Walang ipinagdamot

Walang iba

Walang. Iba 

Ikaw lang

Ikaw

Hanggang sa sinuklian mo rin 

Matagal kong hiniling

Matagal kong ninais

Kinilala't minahal

Sa wakas nasuklian na

Ngunit lahat ay panandalian lamang

Sa ating dalawa mas nangibabaw ang siya

Sa pagmamahalan natin nagkaroon ng siya

Siya ang pinili at ako'y kinalimutan

Subalit ayos lang

Oo, ayos lang

Nandito pa rin ako

Tatanaw kahit sa malayo

Maghihintay kahit walang kasiguraduhan

Dahil may baka sakali

Baka sakaling maalala mo 'yong atin

Maalala mo ako

Maalala mo ang pagmamahal ko

Kung paano kita minahal

Minamahal

At patuloy na mamahalin

Oo, pinagpalit mo ako

Ngunit heto't ipaglalaban ko ang atin

Dahil alam ko, paasahin ka lang niya

Sasaktan, 

Hindi tulad ng kaya kong ibigay

Isang tawag ang nahintay ko mula sa'yo

Iyak lamang ang namutawi sa'yo

Yakap at pagtanggap ang siyang pambungad ko

Halika, dito ka muli sa piling ko

At habang ika'y inaalo

Bumalik siya, 

Hindi pa nakakahingi ng tawad mula sa nagawa sa'yo

Ngunit nasa piling ka na niya agad

Ang bilis mong bumitaw sa hawak ko

Hindi pa natutuyo ang luha mo sa damit ko,

Pero masaya na kayong magkasama muli

Hayaan mo't nandito lang ako

Oo, maghihintay ako muli sa tawag mo

Maraming nagsasabi na huwag na akong maghintay

Palayain ka na't sa iba na masaya

Pero paano, paano kung alam kong mas sasaya ka sa akin

Na ako ang takbuhan mo tuwing malungkot ka

Ayokong isang araw na tatawag ka't wala ng sasagot

Ayoko

Ayokong isipin mong mag-isa ka

Na walang tatanggap sa'yo

Dahil habang nandito ako,

Hindi ka mag-iisa

Oo, masakit

Tinatawagan mo lang ako kapag may problema ka...kayo

Pero hindi ko rin nais iparamdam sa'yo 

Kung anong ipinadadama mo sa akin

Sapat nang mahal kita

Kahit hindi mo ako mahal

Sapat nang masaya ka

Kahit pa sa piling niya

Sapat nang pinili kita

Kahit siya ang pinili mo

Dahil sapat ka

Sapat ka sa akin

Oo, nandito pa rin ako

Naghihintay sa tawag mo

Mahal, isang tawag mo lang,

Ako ang lalapit sa'yo

Ako ang papawi sa sakit na nadarama mo

Dahil mahal, Isang tawag mo lang sa pangalan ko,

Panginoon, ako ang tatakbo palapit sa'yo.

--------------------------------

His love is greater than any other love