A CIDADE BRANCA
Agora si que che dou permiso, agora podes mirar atrás, agora podes chorar, agora podes fracasar.
Estás na porta, quédache tan só un paso para entrar na cidade.
As murallas son brancas e resplandecentes, e os habitantes míranche dende o outro lado da porta, estrañados. O sol brilla no alto.
Escoitas a tranquilidade do aire e o silencio da cidade. Os teus ollos gardan con receo os segredos da túa viaxe e a túa mirada reflicte os soños de todos aqueles que a miran. Es sabia e forte.
Miras cara atrás, e lembras o teu glaciar, os mares que percorriches, a area que pisaches e as árbores que viches. Mereceu a pena?
As murallas son brancas, e limpas, non levas coroa, porque non a necesitas para sentarte no trono da verdade. As nubes límpanse no alto.
Respiras a pulcritude da sociedade e os sentimentos das persoas. A túa soidade está triste, e non quere que a deixes soa, consigo mesma.
Rompes a chorar, e lembras o frío, os raios, a sede, o teu príncipe. Todo iso foi demasiado para ti.
As murallas son brancas, e puras.
Son brancas e resistentes.
Son brancas e lisas.
Son brancas e perfectas.
Pero quedas na porta pensando, "Será este o meu destino?"
Dime, Dama dos continuos viaxes, é este o teu destino?
